「戊、茂」同音無重［貝廉］

mysky - 2011,10,27,19:25 留言：

"重［貝廉］(ting5 taN5)"，一般攏寫作"重耽"，版主用"貝廉"不用"耽"，請問是何道理?又根據"異體字字典"，"貝廉"為"賺"的異體字，怎毋乾脆就寫作"賺"?
另 外，您文中講著"「戊、茂」同音"，我拄好猶有探討過，請多多指教!http://tw.myblog.yahoo.com/myway-letusgo /article?mid=295&prev=296&next=294&l=f&fid=15

mysky：

按「戊、茂」同音先講，汝彼篇大作我進前著讀 *過啊，誠拄好，箸2007年我整理筆記的時，嘛有記錄一篇。我的較簡單，因為我主要的是欲記王力先生講了無妥當的所在，我量約仔抄 *一下。這是幾那年前的代誌，我亦毋pat4佫摕起來餾抑是補正，總是，罔心適著好：

“戊”字最為特殊，它本來屬侯韻去聲，和“茂”字同音，現在不但北方話，連各地方言也都如其所讀的“務”字。(王力《漢語史稿》)

1. 台語戊、茂都唸同音 [bɔ7]。

2. 台語 [bio/ bɔ/mɔ]、[bɔ]。

3. 除了閩南。(案，以上三點是我箸《漢語史稿》書頂寫的注)

附記：

1. 這角的「台語」是講台灣一般的讀法，有寡所在，像台南市「戊」講boo，「茂」讀moo；不過這是聲母讀法無同，參王力teh4說明的重點(韻)無關，“務”台語攏讀 [-u]。

2.「貿」台語有三種讀法攏著，講boo的大概偏廈、漳音的人，講moo的大概是偏漳州音的人，講bio的是偏泉州音的人；有一個藝人(宏都拉斯)講bio，與伊的前輩笑kah4欲死，其實顛倒是這個逐項著攏欲假博的小丑仔藝人(華語講搞笑藝人)毋別字。

3. 根據《彙集雅俗通十五音》沽下去聲怙字韻，「戊、募、幕、慕、貿、茂」聲母攏計屬「門」，這些字在各地的說法都與當地所讀的“務”字不同：

廈門音「戊、募、幕、慕、貿、茂」讀boo，「戊、貿」又讀moo，「務」讀bu。(《閩南方言大詞典》)

漳州音「戊、募、幕、慕、貿、茂」讀boo，「貿」又音moo，「務」讀bu。(《閩南方言大詞典》)

泉州音「戊、募、幕、慕、茂」讀boo，「貿」讀bio，「戊」又音moo，「茂」亦讀bio，「務」讀bu。(《閩南方言大詞典》)

泉州音「戊、募、幕、慕」讀boo，「貿、茂」讀bio，「戊」又音moo，「幕」亦讀bok，「務」讀bu。(《當代泉州音字彙》)

林金鈔「戊、募、慕、貿、茂」讀boo，「務」讀bu。(《閩南語研究》)

宜蘭「戊、募、幕、慕、貿、茂」讀boo，「務」讀bu。(我聽 *過的台語)

北市「戊、募、幕、慕、貿、茂」讀boo，「貿」亦讀bio，「務」讀bu。(我聽 *過的台語)

大溪「戊、募、幕、慕、貿、茂」讀boo，「務」讀bu。(我聽 *過的台語)

新竹「戊、募、幕、慕、茂」讀boo，「貿」讀bio，「務」讀bu。(我聽 *過的台語)

鹿港「戊、募、幕、慕、茂」讀boo，「貿」讀bio，「務」讀bu。(我聽 *過的台語)

台南「戊、募、幕、慕、貿、茂」讀boo，「貿、茂」又讀moo，「務」讀bu。(我聽 *過的台語)

4. 另外根據書面資料參家己了解的，其他所在的講法：

日語漢字譯音，吳音，戊 [mɔ] /[mu]、茂 [mɔ]、務 [mu]。

日語漢字譯音，漢音，戊 [bɔ:]、茂 [bɔ:]、務 [ bu]。

上海話，戊 [vu]、茂 [mɤ]、務 [vu]。

粵語，戊 [mou]、茂 [mɐu]、務 [mou]。(關子尹)

粵語，戊mou、茂mao、務mou。(饒秉才)

客語，戊vu、茂meu、務vu。(徐兆泉等)

潮汕語，戊bou、茂mou、務bu。(蔡俊明)

潮汕語，戊bou、茂mou、務bu。(林倫倫)

5. 頂頭青色的字表示敿王力先生講的無同。

6. 戊，《集韻》莫候切，參「茂」同音，是原始的讀音(無論《王一》、《王二》、《唐韻》、《廣韻》「茂、戊」的音攏是切「莫候」)，另外佫有一個莫後切，這是後起音。日譯吳音「戊」諸橋轍次做モ[mɔ]、ム[mu]，長澤規矩也做ム[mu]，若是做ム[mu]的，是用《集韻》莫後切去推(thui1) *出來的。(以上六點是我筆記的概要)

正經「戊、茂」讀同音兮、會使「證古」的，大概著是閩南語系佮日語漢音。不而過論真來講，boo、moo並無共音，因為較按怎諍，「味(bi)」毋是「麵(mi)」，「碼(ba)」毋是「罵(ma)」、「模(boo)」毋是「毛(moo)」、阿「麥(beh)」亦毋是「脈(meh)」。

今仔換來講［貝廉］，參我頂頭的眉批共款，差不多是共彼個時陣，我嘛有記錄這個筆記，只不過我略仔有做補正，簡單回覆 *一下。

台語taN5 是「毋著」的意思，比論講：聽taN5是「聽毋著」，算taN5是「算毋著」，講taN5是「講毋著」；重taN5本來是講「買毋著」，後來變做若是欲表示「錯誤」攏會使用的，親像：寫重taN5是「寫錯」，拍算有重taN5是「可能有錯」或是「計畫錯誤」。台灣俗語講「生理人taN5買，無taN5賣」，是講生理人可能會買了較貴、買了毋著貨，但是未貴貨俗賣。

我頭一擺知影［貝廉］ *字，是箸林金鈔先生的《閩南語探源》*看著的。林先講：「廣韵『［貝廉］，重賣。佇陷切』；咸開二去陷澄 (談*)……集韵『［貝廉］，一曰市物失實』。說文新附『［貝廉］，重買也；錯也』。廈門話sng3 taN7 siau3『算［貝廉］數』是『算錯帳』；sng3 taN7 lit8『算［貝廉］日』是『算錯日子』，thiaN1 taN7『聽［貝廉］』是『聽錯』……。」(案，原文用IPA標音)

［貝廉］、賺是同字異體，《龍龕手鏡》、《集韻》安呢寫，但是《說文》徐鉉的新附、《廣韻》計用［貝廉］ *字，參「賺」不混。照王念孫的講法，［貝廉］ *字箸三國時代佮南北朝的《玉篇》著有咧用a7(《廣雅疏證》：廣文，民60：80)。

這字台語有taN5、taN7兩音，前者是誤讀、或者另有來歷，我無把握。

我的想法是照中古漢語的音切，［貝廉］會使讀做陽平聲亦會使讀去聲，這無爭議啦。除了《廣韻》佇陷切以外，《王一、五代刊本切韻》都在「鹽」韻，《王二》力兼反，《集韻、類篇》離鹽切，《四聲篇海》力沾切。「鹽」韻是平聲咸攝，「鹽、兼、沾」上古漢語是「談」部，台語會使唸-aN，像：藍、藍、斬、監、掩、敢。「力、離」上古漢語為「來」母，與「端」母旁紐，台語會使唸 t-。何況台語的讀音自本著有一寡特例，比如「組織」的「組」讀陰平、「紀念」的「紀」讀陰去、「高尚」的「尚」讀上聲……。看khiai9有較免強，毋koh8比其他的用字，都攏較合理。

台語古全濁讀「送氣」佮「無送氣」的來源

■ 搦大師來挵壁

philip yen - 2011,10,26,12:29 留言：

關於台/閩南語並非光"古全濁聲母不分平仄、同一音韻地位的字分別讀送氣和不送氣",甚至是同一字,聲母不分清濁平仄,都同樣有送氣跟不送氣.我們是相信沒錯,因為你舉的例子是事實,一般人也都懂.

可是有了事例也不代表就有事理,是不是我們也能說:

聲母不分清濁平仄,只要是送氣,那就是洛陽音的傳承,相反的,不送氣就是山東音.

請問,這樣的說法你認為合理否?

如果合理,那張光宇的說法也就成立了.

如果不合理,那,理由呢?

philip yen：

請注意看我的內文：

閩南先民來自幾個所在，欲講偌濟，我攏無意見，因為我毋知。

台 / 閩南語都毋是kan1 naN7「古全濁聲母不分平仄、同一音韻地位的字分別讀送氣和不送氣」若爾 (naN7 niaN7)；甚至是同一字、聲母無分清濁、平仄計未要緊，共款嘛計有送氣參無送氣兩種讀法……阿若是「古非全濁」的聲母、同聲同韻的字、無分平仄，但分別讀送氣敿不送氣的，箸台 / 閩南語嘛毋是咧外罕見、無講算是特例啦。

我只是咧闡述「古全濁聲母不分平仄、同一音韻地位的字分別讀送氣和不送氣」對台語來講，並毋是啥重要的特色；連「古非全濁」的聲母、同聲同韻的字、無分平仄，甚至同一字，計嘛有分別讀送氣敿不送氣的。

我並無講送氣的是按佗位來、無送氣的是按佗位來。恁欲怎講是恁的自由，準若真正欲「請問」我，安呢換我問汝 *一下，根據 *咧？

未使講要求無下結論的人(我)講事理，阿著已經有結論的恁，tsong2 mooNh9免講一個仔「根據」*咧？揢恁的「根據」講 *出來，人毋才知有「合理」*無。

阿我亦無必要假仙，事實上我著是認為張光宇先生講了有重［貝廉］(ting5 taN5)，伊講：

閩南話古全濁聲母不分平仄都有送氣與不送氣的現象……例如侯韻「頭」唸thau而「投」唸tau……由於看不出分化條件，漢語音韻界對此束手無策，提不出合理解釋。聯繫華北地理演變類型，乍見曙光……文獻上可考的古全濁送氣見於唐代李肇《唐國史補》……(傷濟，拍字誠費氣，我用scan與汝看)

這囉講法根本著未通，阮自本著有一篇專文，提出阮的質疑佮看法。我簡單記 *兩條仔：

1.《切韻》成書約在隋開皇年間(581-600)，《切韻序》寫箸仁壽元年，著是西元601年；《唐摭言‧卷一》：「元和中，中書舍人李肇撰《國史補》。」《唐國史補》是完成於西元806-820年之間。中間上無差兩百年，有啥根據講兩百年前的語音攏未變？箸學術上，臆測著是臆測，無彼囉過度抑適度之分。臆測著是合理的解釋？阿毋欲叫彼寡束手無策漢語音韻界的人逐個隨個仔(sui11 e33 a44)去挵(long3)壁。

2. 王力先生講朱熹《詩集傳》、《楚辭集注》頂頭的反切，毋是依照《切韻》，是宋代的讀音。阮毋知朱熹的音切會使代表啥年代、啥地域的讀音，阮乾若瞭解一項事實，著是朱熹的音切，古全濁的聲母計讀全清(一般歸無送氣)敿次清(一般歸送氣)，比如：動(定母)，叶德(端母，t-)總反；蛇(定母，這字讀「駝」)，叶土(透母，th-)何反。王氏講：「並母平聲併入了幫滂兩母，奉母併入了非敷兩母，從母併入了精清兩母……」。憑安呢著講宋代的讀音是閩南話，抑是講台/閩南語古全濁讀「送氣」佮「無送氣」的來源著是直接承續自宋朝，準阮若安呢臆測，人一定搦阮去挵壁，哈！有一位大師講台語古全濁讀「送氣」是來自客話，阮咧想，若講按日本抑美國嘛較差不多，因為in1講台語根本著無咧管清濁、平仄、送氣或無送氣。當然阮這是罔咧講笑 *兮啦，毋是欲搦大師來挵壁。

阮認為張教授箸這部分講了無妥當的所在，都(to1)毋是安呢若爾，不過針對阮頂面講的，汝若欲指正，我參汝討論。若其他兮，等另閒。

■ 會使證古的台語

2011,10,26,12:41 的留言：

看來這篇是在反諷"愛穿鑿抓瞎",而我們則對於你心目中認為可以"證古"的台語是什麼,比較有興趣.

philip：

比論講東漢‧劉熙《釋名》：

《釋天》：「戊，茂也，物皆茂盛也。」汝敢知現仔時的漢語方言有幾個所在像台語共款「戊、茂」共音？

《釋水》：「江，公也，小水流入其中，公共也。」「江、公」咱同讀kang1。

《釋州國》：「邦，封也，封有功於是也……鄉，向也，眾所向也。」「邦」咱讀pang1，如劉邦；「封」嘛會使讀pang1，如「一封家書」。台語「鄉」讀hiong1/hiang1、hiuN1如「鄉里」，「向」讀hiong3/hiang3，嘛會使講hiuN3，如「坐南向北」，我箸「宜蘭腔的 -uiN」有講 *過。

《釋樂器》：「人聲曰歌，歌，柯也，所歌之言是其質也。以聲吟詠有上下，如草木之有柯葉也。故兖冀言歌聲如柯也。竹曰吹，吹，推也，以氣推發其聲也。」

台語話音「歌、柯」攏講kua1，請注意，這毋是劉熙的母語青徐話oo5。「吹」讀音tshui1，「推」讀thui1、the1/ther1/tue1，嘛會使讀tshui1，如「推算(tshui1 sng3)、推排(tshui1 pai5)」。

《釋疾病》：「眸子明而不正曰通視，言通達目匡一方也。又謂之麗視，麗，離也。言一目視天，一目視地，目明分離，所視不同也。」「斜眼」台語講thuah4 thang1，「thang1」著是「通」*字，我箸「留言回覆 Sept.2010」嘛寫 *過啊。

以上我是根據「四部叢刊初編經部，上海商務印書館縮印江南圖書館藏明嘉靖翻宋刻本」，餘不詳。

台語「戊、茂」、「江、公」共音、「封」讀pang1、「向」講hiuN3、「歌、柯」攏講kua1、「推」讀tshui1、「斜眼」台語講thuah4 通，這寡計會使印證古冊所記載的物件，會使與人知影劉熙咧講啥。當然，《釋名》內底猶有別項的資料，甚至其他的古文獻，嘛有會使用台語去做解說、或者做旁證，有興趣汝上網去揣應該嘛有。

台語證古---徛孔明車

定義一：「台語證古」是欲用當代的台語去對照以早人寫的資料，準若講會當對同，嘛算講加一款印證；當然，我的看法、或者講我的見解是未當成立的，安呢著當做無聊咧盤喙花吐練涎。

定義二：若欲按古早人的記載，去揣看台語有外古雅，我想應該號做「證古台語」。先舉一個「證古台語」的例：

頂無幾年，日本アニメ映画名探偵コナン的「銀翼の奇術師」當偁(tshing3)，徦taN1網路猶有te3看。日語的「奇術(キジュツ)」著是「魔術(マジュツ)」的意思，古早台語參日與共款，「奇術(ki5 sut8)、魔術」濫咧用，「奇術」較濟人講，今仔一半擺仔猶pat4聽 *著，mah4 koh8差不多欲變死語啊。

北魏‧楊衒之《洛陽伽藍記‧卷一》有這(tsit4)一段：

(景樂寺)後汝南王悅復脩之，召諸音樂，逞伎寺內。奇禽怪獸，舞抃殿庭。飛空幻惑，世所未覩。異端奇術，總萃其中。剝驢投井，植棗種瓜，須臾之間皆得食。(徐高阮《重刊洛陽伽藍記》中研院史語所，民81：8)

台語「奇術」應該是照日本話的漢字直翻兮，日本一寡漢語語詞有保留中古漢語的用詞，嘛定定有南北朝的用語，像「写真(シャシン)、上手(ジョウズ)、師匠(シショウ)」(案，參閱「源於日語漢語詞彙的台語略說」)，減采「奇術」亦是隈(ui3)tsia5去 *兮嘛無的確。

總講一句毋管怎樣，台語「奇術」這個語詞，上無會使源溯徦南北朝。一千五百年，嘛會使算古董啊，這著是「台語古證」。這款以古證今的khang1 khe3早著有人做，考求本字嘛是以古證今的一種，有的做了誠好，比如進前的林金鈔、黃典誠諸先生，現仔時的楊秀芳、王華南、周長楫、佮李如龍……，當然猶有真濟。阿今仔日我換一個小可仔無sang5的做法、用以今鑑古的方式來試bai7 *咧，罔心適 *一下。

咱坐船講著講「坐船」，但坐孔明車(著是「骹踏車、自轉車、鐵馬」)，並無講「坐車」， 普通講做「徛車、徛鐵馬、騎鐵馬」。「騎鐵馬」減采是按台灣國語學 *來的，國語有「騎車」的用詞，《廈門音新字典》、《台日大辭典》攏卻無這個詞條，《閩南方言大詞典》、《普通話閩南方言常用詞典》嘛無收；是毋是攏未要緊，這是題外話，因為參我欲論證的無關。

《呂氏春秋‧貴因》：「如秦者立而至，有車也。適越者坐而至，有舟也」。高誘注講：「立猶行也。車行陸而至。」畢沅講：「古者車皆立乘，故云『立』。與下『坐』字對文。《注》非也。」吳檢齋講：「畢說是也。《御覽》七百六十八引《慎子》曰：『行海者坐而至越，有舟也。行陸者立而至秦，有車也。』與此文正同。」(許維遹撰、梁運華整理《呂氏春秋集釋》北京中華，2010：387)

咱講的「坐船、徛車」，嘛會使做畢、吳兩氏的解說做旁證。

附帶講 *一下，「徛」咱一般講khia7(khia33)，鹿港、泉州音的調值參咱差不多(案，泉音照丁邦新《台灣語言源流》的調值，台灣學生，民68：37-38)，這是in1的陽上調，泉州有的所在亦講kha6，但無講做去聲的khia31、kha31。徛，《廣韻》：「渠綺切，立也」，中古漢語群紐紙韻，上聲、濁母，鹿港、泉音讀陽上，阿咱普遍計變陽去，這字有合。若是「企」*字，中古漢語溪紐是清母，著無這囉條件。我箸「不諳音聲」佮「囿於方音」講咱欲談論台文漢字的寫法，略仔知影咱tsia5各地方音的特色，本字是所有台語的次方言計會合用兮，無可能台北的kuiN1 mng5(關門) 參宜蘭的kuaiN1 muiN5寫無共款。若欲借字，嘛是揣攏有對同的字，較未有爭議。猶咧用「企」的人，是毋是有啥佫較具體的證據來支持in1的主張，我毋知。是講這囉現現現的物件，若欲怙投票的方式來做取捨，敢講會過、敢有通？

補記；「徛車」未當成立，因為台語是講「騎車」，毋是講「徛車」。

講 ka1 lo2 (10)

昨方(tsang5，十月初九，禮拜)咸清華先電話講規點鐘，先兮講伊無贊成與無適用的用字「自然淘汰」。

伊認為照今仔的範勢看khiai9，有能力分辨有適用 *無的人，是「寡」毋是「眾」；阿有能力的人嘛無定著願意去認真思考別款的意見，因為in1顧宣揚家己論說著無足無閒阿，欲佗生彼囉美國時間來想參in1無sang5的講法？徦路尾變「從寡」不「從眾」亦無一定，叫我免傷期待啦。當然，我無伊hah4悲觀。

拍算有啉 *淡薄的款，伊愈講愈激動，佫舉幾仔個台語常用詞做例。其中一個例是國語「癩蝦蟆」，台語「螿蠩」、「蟑蠩」、「蟑蜍」、「螿蜍」……計有人寫，專家嘛未去探討佗一字較合用。話，伊安呢講，我無認同。所以這篇毋是交代參清華先討論的結果、佮咸伊開講的細節；我想講記一寡參「癩蝦蟆」這個語詞，箸咱台語用字相關的代誌。

「癩蝦蟆」書面語是「蟾蜍」，進前略仔有口語化，現仔時無啥人咧講 *啊。這個語詞小川尚義《台日大辭典》安呢寫：

1. 螿蠩，讀做tsiuN1 tsu5、tsiuN1 tsi5、tsiuN1 tsir5、tsong1 tsu5。

2. 蟾蜍，siam5 su5

先講讀音，小川氏的「tsong1 tsu5」毋知根據啥，可能在早有人安呢講，阿減采是in1用音切家己推 *出來兮，嘛無的確。伊揢頂字「螿」標做陰平聲，敿咱教育部《台灣閩南語常用詞辭典》寫的讀音共款：

鹿港偏泉腔 螿蜍　tsiunn-tsîr

三峽偏泉腔 螿蜍　tsiunn-tsîr, 蟾蜍　siâm-sîr

臺北偏泉腔 螿蜍　tsiunn-tsû

宜蘭偏漳腔 螿蜍　tsiunn-tsî

臺南混合腔 螿蜍　tsionn-tsû

高雄混合腔 螿蜍　tsiunn-tsî

金門偏泉腔 螿蜍　tsiunn-tsîr

馬公偏泉腔 螿蜍　tsiunn-tsû

新竹偏泉腔 螿蜍　tsiunn-tsîr; tsiunn-tsî

臺中偏漳腔 螿蜍　tsiunn-tsî

這著有問題嘍！在阮所知，tsia5上少有兩個所在的講法咸事實有出入，台北市內偏泉腔是講tsiuN5 tsu5，新竹市內偏泉腔是講tsiuN5 tsi5(清華先世居大浪pong7，箸新竹讀四年冊；我箸hia5讀冊的時間，比伊佫較久的久)；我講的是在地人、無透濫的在地口音。

因為計想講頭字是陰平，所以用「螿」、用「蟑」，「螿、蟑」絕大部分地區的人一般嘛話音會使講tsiuN1，台南腔佫拄會使讀做tsiooN1，所以著認為字音有對同。毋koh8，敿頭字「tsiuN」連讀變低平調的所在著未合嘍。這句語詞頭一字的用字，應該是讀陽平的字才合理。

台南參今仔的漳州略仔共款，普通計講tsiooN33 tsu24/tsi24，音是攏著啦；但因為漳、廈音連讀了後，前字分未出是陰平抑陽平，致使一寡陽平的字煞誤解做陰平的字。比如：ang5架桌寫做尫架桌、ham5眠寫做酣眠、ien5 tau5寫嫣頭，阿uan5 kong1門有人pat4揢我諍講愛寫做彎拱門，逐個計嘛有一說。

tsiuN5/tsiooN5 tsi5嘛相sang5，其實，上少箸兩百外年前，漳州猶是講tsiooN5 tsi5。

《彙集雅俗通十五音)，伊姜母曾字頭上平聲有收「螿」讀tsiang1，但這是指「小蟬」，毋是「螿蜍」。「螿蜍」箸十五音寫做「螿蝫/蠩」，分別收箸薑母曾字頭下平聲，居母曾字頭下平聲，讀做tsiooN5 tsi5，是其證。

根據古早的韻書，「螿」是陰平調，台語會使讀tsiuN1、tsiooN1，蟬嘛算蟲類，不而過毋是蟾蜍，音調、字義計攏無合。基本上準若揣無本字，用字應該嘛是摕陽平調的字，可能會較好，上無「本調」未去與流失 *去──雖然我認為講「tsiuN1蜍、tsiuN5蜍」計攏著，阿毋koh8辭典的名既然掛一個「台語」抑「台灣」，各地嘛攏小照顧 *一下較好(這點教育部《台灣閩南語常用詞辭典》有咧做，雖然猶有進步的空間，但是絕對值得肯定)，個人土想兮啦。像吳守禮先生講「蟾蜍」，台灣俗稱tsiuN1 tsi5/tsiooN1 tsu5，俗用字「蟑蠩」。(《國台對照活用辭典》遠流，民89：1844)，這未免太主觀、毫無根據，我安呢講未傷過分；清華先講這是自以為是、混淆視聽、貽誤讀者。唉！

阮理解的範圍，台語發tsiuN5/tsiooN5的字誠少，而且亦無合適：

黃謙《彙音妙悟》箱母爭音陽平無收字。

謝秀嵐《彙集雅俗通十五音》乾若(kan1 naN7)一字「螿」*字。

甘為霖《廈門音新字典》收一字「裳」，衫褲的意思。

小川尚義《台日大辭典》敿《廈門音新字典》共款，收一字「裳」。

林金鈔《閩南語研究‧字彙》無收這音。

台灣教育部《台灣閩南語常用詞辭典》無收這音。

黃晉波《當代泉州音字彙》敿《廈門音新字典》共款，收一字「裳」。

楊青矗《國台語雙語辭典》敿《廈門音新字典》共款，收一字「裳」。

董忠司《台灣閩南語辭典》敿《廈門音新字典》共款，收一字「裳」。

陳修《台灣話大詞典》無這音。

周長楫《閩南方言大詞典》我揣無這音。

林寶卿《普通話閩南方言常用詞典》參《廈門音新字典》共款，收一字「裳」。

上頭仔清華先認為用「螿」有影足免強，毋kuh8嘛是姑不將，無法度的度啦；不而過伊尾仔，同意我的看法，用「蟾」*字可能會較理想。

「蟾」《廣韻》有職廉、視占兩個音切，中古漢語分屬章、禪兩紐、計是鹽韻平聲開三字。職廉切讀同韻字有「詹、瞻」等，讀做tsiam1，漢藥材有一味「蟾酥」，一般講tsiam1 soo1；有部分藥材界的老先兮嘛讀siam5酥，阿蟾蜍嘛讀做siam5 su5/sir5。蟾讀做siam5參禪鈕的視占切有合對應規律。中古漢語禪紐台語除了會當發s-(像，禪宗的禪、日常的常)，嘛會使發ts-(像，上京的上、石頭的石)，禪是濁母、占是平聲 ，所以若欲讀tsiuN5，聲、調攏OK。爭差兮是韻的部分，中古漢語的鹽韻，咱若(naN2)無講-iuN/-iooN的字例。

我有兩個想法：

箸《呂氏春秋‧知度》有講趙襄子與任登做中牟令，任登揢趙襄子講：「中牟有士曰膽、胥己，請見之。」畢沅講：「《韓非》作『中章、胥己』，是二人。」王念孫講：「『膽』疑『瞻』誤。瞻、章聲近而通，上又脫『中』字耳。《大雅‧桑柔篇》『民之所瞻』與相、臧、腸、狂為韻，是瞻可讀為章也。」(引自：許維遹撰、梁運華整理《呂氏春秋集釋》北京中華，2010：457-458)我欲講的是「章」台語講tsiuN1、tsiooN1，「瞻」是章紐，照王念孫的見解，咱嘛會使讀做tsiuN1、tsiooN1。箸《廣韻》瞻、蟾計是「下平二十四鹽」的同韻字，章紐、禪紐咱攏有發讀ts-，禪是濁母，若安呢蟾 *字台語發tsiuN5、tsiooN5嘛未講傷離譜啦hooNh9？此其一。

毋是今仔的台語，古漢語「蟾蜍」的寫法共款亦是真濟種，阿用「蟾諸」兮算嘛真普遍。我引用蔣天樞《釋〈邶風〉「日居月諸」》寫的：

月諸者，意謂月中有蟾諸。《爾雅‧釋魚》「鼁��，蟾諸。」郭注「似蝦蟆，居陸地。」

《月令疏》引李巡：「蟾諸，蝦䗫也。」

《說文》：「䗇鼀，詹諸以脰鳴者。从虫匊聲。」

《爾雅》《釋文》：「蠩，音諸。本作諸。」

《爾雅》作蟾蠩，作蟾諸，蟾與蠩後起字也。後世通作蟾蜍，其實一也。

《禮記內則》有桃諸梅諸，鄭注：「乾桃乾梅皆曰諸。」《釋名‧釋飲食》：「諸，儲也。藏以為儲，待給冬月用也。」是諸有儲之讀音，詹諸之諸亦當讀如儲，與蜍同也。

(《中國古典文學叢考》復旦大學，1985：3)

「諸」咱今仔計讀陰平調，但是參陽平調的「儲」古通，減采古早有影聲調不分陰陽嘛無的確；若安呢，管伊是職廉切抑視占切，「蟾」欲讀陰平抑陽平，敢是嘛無問題？此其二。

頂頭這兩點的假設，我家己嘛無介堅持，咸「自信」無治代；這是咧開講拄撞 *著，順手罔想罔寫的。有無sang5的意見欲補正，我歡迎；欲［扌禿］臭嘛免細膩，不過上好是小繵(tan7)一下仔理由 *咧。

後記：

寫好過轉工，緊mail與一寡閩南講泉腔的網友，問in1這個語詞是怎講的。徦taN1乾若會使確定同安城關、惠安講tsiuN1 sir5，其他兮猶攏猶無接著回批。我想講先發文，buai24佫等啊，準有新事例，若必要，我會補充。