留言回覆Sept. 2012

■ 第五則

他K 箸 2012年9月29日下午7:11留言：

請問:除閩語系 還有哪些方言用娣或姒

他K：

我毋知。

準一定欲了解，建議汝：

1. 查《現代漢語方言大詞典》，中央圖書館有，捷運永安站落車，行幾分鐘仔著kau3啊。

2. 上「北大中文論壇‧漢語語言學‧漢語方言」的網站去問。(2012年9月30日上午8:06)

■ 第四則

Haiker箸2012年9月16日上午9:30留言：

日語的吳音確實即為六朝吳語的譯音嗎？如果是，怎知這時的吳音不受中原衣冠的影響，而已不是原本的吳語？

Haiker兄：

1. 日語吳音即為六朝吳語，確實無確實，我有影毋知；我記了上清楚的是王力《漢語史稿》講 *兮，日語吳音是中國南部的讀音，「吳」大概是指三國時代的吳。  不過，2001年有學人用「佳、皆」兩韻比較吳音、現代吳語、六朝詩歌的韻骹，箸日本發論文，結尾有講：「日本呉音は古代呉方言のかような音韻実態が伝承され、定着したにちがいない。」

2. 準彼時的吳語有受中原僑仔的影響，台語的「𣟵」是中原僑仔的語詞，這敿吳語無關。

準彼時的吳語並無受中原僑仔的影響，台語咸吳語的「𣟵」讀無同音，安呢敿吳語嘛無關。(2012年9月16日下午7:48)

■ 第三則

Haiker箸2012年9月13日下午9:05留言：

你覺得西晉時吳語「支三」不念「ia」？

Haiker兄：

西晉時的吳語中古漢語「支三」讀啥，我毋知。  日語吳音「騎、寄、蟻」等讀「gi、ki、gi」，參今仔的上海、蘇州、無錫共款唸「-i」的韻，一般來講日語吳音是六朝劉宋時的譯音。(2012年9月14日上午7:35)

■ 第二則

philip箸2012年9月11日下午12:36留言：

「倚」讀為uá，無ia韻。請教，hôo，字典作撈，應為借用字，有本字嗎？又， “「支(紙寘)」台語唸「ia」的韻，有人講是上古音，有人講是兩漢音，攏未要緊，橫直是比讀「i」兮較早”，先兮這段是欲表達啥貨？看無。又，這篇應該就有三千多字，為何說“無才調寫上一萬字”，難道兩本冊的資料，干焦則有法度寫兩三篇？按爾毋是怪怪？又，將來猶會PO第二篇、第三篇…..嗎？個人真期待。

philip；

1. 我「徛」拂按「倚」*去，多謝。

2. 個人認為是「瓠」，瓠著是瓢，瓢嘛是蠡。  台語名詞、動詞有真濟互用的例，比如「摕兩te3盤仔盤與冷」、「用車車衫 / 嫁妝」、「怙篩仔篩沙」、「用拭仔拭與伊清氣」等，最後一例「拭」是用動詞做名詞，其他兮「盤、車、篩」是用名詞做動詞。 「瓠」亦是名詞做動詞，因為咱一般攏計講「𣟵(hia1)、杓(siah8)」，「瓢(phio5)」較早猶有人講，尾身著參「瓠」共款，無人咧用，著未去想著詞性變化這個可能。

3. 這應該攏看有敢毋是？  中古漢語「支三」讀「ia」的語系無濟，阿照書面資料吳語是唸「i」，tsong2 mooNh9「𣟵」著會曉唸「hia1」，哪會是綴唸「hi1」兮？

4. 是，這篇有三千外字，m7 koh8，八成以上的內容是咧網路吐練涎，無合適印箸刊物的頂頭；正經剩(sin7，讀偏漳音)無兩割堪用。 對所謂的「古籍」，我並無興趣或者有通去鑽研基本素養，只有我主觀上、ia2是直覺認為參母語可能有關係兮，才會想欲進一步去了解(想是有咧想，但是大部分攏無實際的行動；真正有去深入 *兮，一般計嘛無采工，結局亦是未了解；別人的一小步是我的一大步，哈)，定位非常明確；其他兮，看有兮看過著煞，看無兮跳過，跳過 *兮比看別 *兮加幾那倍。  意思著是講(「講」唸變調)，毋管古冊的內容外有啥meNh8奧義、有外精博，我一滴仔嘛未曉、一滴仔嘛無趣味；都maiN3講一萬字，三千字嘛誠艱苦tiN3。

5. 這類兮我ia2有咧寫，心適興，我著會揢(ka7)改做網路開講的形式發文，這我講 *過。  不而過，免傷期待，計若毋是拾人牙慧，著是粗淺無成熟的土想。(2012年9月12日上午6:49)

■ 第一則

dongxie箸2012年9月9日上午2:53留言：

或謂「龜毛」源於佛經，涵義則應該是受日本漢文《三教指歸》的影響而產生的。在雅虎知識+(http://tw.knowledge.yahoo.com/question/index?qid=1305082621385)，閣下以為然否？

dongxie；

其實不然，意思差傷遠。  準若有人講「驚某大丈夫」的是「驚某著無問題；驚某著安全、著OK啊」，台語這個「大丈夫」源於日語的「大丈夫(ダイジョウブ)」，汝敢欲信？  我講一個較未hiah4離譜 *兮，共款是較早阮先兮教 *我兮，汝罔參考：

「龜朘(ku1 sui1)」著是龜的頭lun1 leh9 lun1 leh9，伸亦毋是，勼亦毋是；台語「朘、蓑」共音，棕蓑毛狀，毛狀、鬚鬚的物件嘛會使講蓑蓑(sui1 sui1)，所以「龜朘」著變「龜毛」。咱口語中有這款例oo5，比如「姑不而將，敢姑不三將 *咧」、「兩千？我咧卵仁啦。」

不過，阮先兮家己講伊是怙蒦 *兮，無證據啦；我參伊tiN3五仁，叫伊綴人流行，tua3 li7(著是「賴」的意思)與「耆老傳說」去坐數(tse7 siau3)，哈哈。(2012年9月9日上午7:22)

未要緊

話頭：Haiker講楊允言先生的大作《台語羅馬拼音符號ê競爭》是「粉學術滴(很學術的)」(2012年8月20日下午1:57)，這我無意見，不知為不知。不而過伊兩字「學術」，與我想起較早有一篇文，今仔著揢捎出來罔餾。

    小川尚義氏箸《台日大辭典》的講法，「姑不而將」是「姑且不得已而將就」的省略，有道理。準若有人認為佫省略變講做「姑不將」，這著無的確；個人感覺有可能「姑不而將」是「姑不將」所衍伸後起詞。

「姑不將」小川氏廈門音伊標「koo1 put4 tsiong1」，漳州音是「koo1 put1 tsiang1」。毋naN7其他的辭書嘛安呢寫，比論周長楫《閩南方言大辭典》_[注]。我嘛pat4親耳亦聽 *過，偏漳腔的親朋講做「koo1 put4 tsiang1」，包括有徛箸枋橋後埔，埔墘、雷公爺廟透徦中和的芎蕉腳(king1 tsio1 kha1)、水尾仔……一帶；桃園、大溪、羅東、壯圍、花蓮、嘉義、台南……的在地人。

   「姑不而將」箸咱tsia5我聽 *著兮，偏漳腔較有歲頭的人嘛是講「koo1 put4 ji5 tsiang1」，一部分是講做「koo1 put4 li5 tsiang1」。毋管in1「而」*字怎講，「將」計攏講「tsiang1」。另外一個較特殊的現象，一般in1攏用「姑不將(tsiang1)」，一半擺仔講「姑不而將」的時，「而」的變調有人參偏廈腔共款唸中平調，有人參偏泉腔共款唸低平調。台灣教育部《台灣閩南語常用詞辭典》的標音是「koo-put-jî-tsiong/koo-put-lî-tsiong」，音頻唸「koo³³ put⁴⁰ ji¹¹ tsiong⁴⁴」，陽平連讀變低平調，阿同音的「兒」連讀是變中平調，譬喻「貓兒竹(bâ-jî-tik)」音頻唸「ba³³ ji³³ tik³²」。我是知影台語的變調有影是較複雜，m7 huk8，複雜徦這款程度，我真正無去想 *著。未要緊，聽有著好。

箸釋義的部分，《台日大辭典》隈(ui3)「已むを得ず、余儀ない……」一直徦「據所(拠所)なく、是非なく」攏是咧講「無法度、不得不、無其他的路、未當閃避拄著啊」的意思。小可仔愛講 *一下的是「已むを得ず」的「已む」讀做「ヤム」，嘛會使寫做「止む」；「已むを得ず」著是「止むを得ず」，是「不得不安呢」的意思。參「アカシアの雨が止む時」 (我足愛這位阿サン的歌，佫記兩個無共款版本的網頁：http://video.search.yahoo.co.jp/search?p=%E8%A5%BF%E7%94%B0%E4%BD%90%E7%9F%A5%E5%AD%90&tid=60c1dfffc4a54829bbc46e8f0f89397f&ei=UTF-8&rkf=2、http://www.youtube.com/watch?v=2xSACm3Ey-c&feature=related)的「止む」是「停止、結束」的意思，完全無同。

「姑不而將」真濟種寫法，有人寫做「姑不二將」，毋知有啥麼故典 *無？我是咧蒦講毋知會是因為有人講「姑不二三將」，才認為應該寫做「姑不二將」，事實上嘛有人講「姑不三將」。準若是這個原因，我認為無妥當，因為咱台語有一寡五仁話，是用諧音引申 *出來兮，比論：「尾牙？馬牙咧馬喙齒」、「共款？共館咧無共師父(sai1 hu7)」、「(拍麻雀)自摸(tsu7 bong1)？tshu7 風箸孔明車店」(案，一般認為液體噴 *出來才號做「tshu7」，其實氣體噴 *出來嘛會使用「tshu7」)、「細膩？細字孔子媽(maN2)教 *兮」、「講？管(kong2)一支長長」……「姑不而將？我敢(kaN2)姑不三將 *咧」。不過嘛未要緊，看有著好。

    語、文會使約定俗成，著是講欲怎講、欲怎寫，只要大多數的人欲接受，安呢著形成共識；因為專業的人畢竟是少數中的少數，一般大眾好講、好寫、好記、好學、利便上重要，免hah4學術，未要緊啦。

欲形成共識毋免去規範、設標準，因為規範愛靠權威，箸咱tsia5權威嘛會使講是「威權」，箸這囉講自由的天年，無啥人會去sin3 tau2啦；阿「標準」的標準箸佗？所以講，「從眾」才是上策。

咱嘛會使擔心準若有毋著，但是因為多數人毋是計pat4，安呢敢未習非成是，徦尾仔毋著規組(tsoo1)害了了？未啦，真正學者專家雖然無講介濟，但嘛毋是攏無徦半個，in1會當提出in1認為正確的講法。只要有道理，人聽了會入耳(lip8 niN2)，自然著會「眾從」。

    阿萬不一專家的主張若與人聽了未入耳 *兮咧？這有兩種情形，攏未要緊：

1. 準若是著 *兮，「曲高和寡」真正常，免凊心，未要緊。因為這款成就未庮(au3)未臭，早慢會與人肯定。比論「喙phue2」以前我毋別，計攏用標音兮，看王華南先生的視頻，才知影愛寫做「䩉」。我相信將來這字一定會加真普遍；外久我毋知，但這是王 *先考求 *出來的事實，一定未改變，除非有人提出先發見的證據。

2. 準講是毋著 *兮，根本著免去煩惱，這款用字擋無久，所以嘛未要緊。毋信我報恁看，著用「姑不而將」做例，看《補破網》的歌詞逐個按怎寫。「姑不二終、姑不二章、孤不而衷、孤不二衷、孤不而終、姑不利將、姑不利終……」攏有人用。阿咱今仔會使去上網，揣用漢文寫台語的作品抑blog，這寡「異用字」必定是愈來愈少，欲講是教育部網路辭典的功勞，我嘛同意。(這篇誠早以前著寫啊，這段本底是：2. 準講是毋著 *兮，根本著免去煩惱，這款用字擋無久，所以嘛未要緊。毋信我報恁看，GTV(八大電視)第一台「我的音樂我的歌」江蕙「戀之曼珠沙華.」唱徦「癡戀來所致」的時，字幕拍「癡戀來所治」，看是看有啦，著算有人未曉，綴in1安呢寫，這款用字敢會成熟(sing5 siok8)？因為引例今仔箸YouTube已經揣無，我揢改 *過)

    設使有無sang5的專家有兩種以上無sang5的看法，嘛攏有人欲接受，這欲按怎？共款未要緊。這是人的自由，只要in1認為別人看有、聽有，做in1講、做in1用。毋是有一句「理未易察，愈辯愈明」？因為咱認為有爭議，無代表的確著有影有爭議，咱毋是專家。交與時間佮「市場」去決定著好，比如，王華南先生講：

44. 應為「姑不終」【kɔ-put-chiɔŋ ,ㄍɔ– ㄅㄨㄊ ㄐㄧɔㄥ】而非「姑不將」

「姑不終」、「姑不而終」是「姑且、不得已」之意，「已」和「終」皆有「結束、停止」之意，「將」是「將要、將如何」之意和原意不合。 ( 「台語漢字正解十」)

我認為有爭議，箸音的部分，頭拄仔講 *過，偏漳音的人是講「姑不tsiang1」。「終」是中古漢語東韻、上古音冬部，偏漳音東韻、冬部若(naN2)無讀iang的字例。

箸義的部分：

1. 王 *先揢「將」解說做「將要、將如何」，異於小川氏的「將就」。

2. 不得已的「已」毋是訓「結束、停止」，這tah4的「已」參「不有博奕者乎？為之，猶賢乎已。」、「敦序九族，眾明高翼，近可遠在已。」的「已」共款是「如此」的意思。「不得已」是「無可奈何不得不如此」，毋是「不得不結束、不得不停止」。

「不得不揣頭路、不得不趕暝工」是開始欲揣頭路、趕暝工，毋是結束抑停止揣頭路或者趕暝工。當然若欲解說做「結束抑停止以前無咧揣頭路、趕暝工」，我嘛尊重。這是我個人的意見，認為用「終」有爭議。不過，頭拄著有講 *過，我佫強調 *一擺，咱認為有爭議，無代表的確著有影有爭議，咱毋是專家。所以當做我烏白講，亂主tsuaN3嘛未要緊。

[注]

【姑不(二)將】〈廈〉kɔ^1-6 put^7-8 li^6-5 tsiɔng¹〈泉〉kɔ¹ put^7-8 li^5-4 tsiɔng¹〈漳〉kɔ^1-6 put^7-9 li^6-5 tsiang¹(周長楫《閩南方言大詞典》福建人民，2006：107)

「姑不將」漳州音講「koo1 put4 tsiang1」，「將」唸「tsiang1」，參咱台語偏漳腔共款。