源於日語漢語詞彙的台語略說

日本話外來語有真濟來源，其中按漢語接收 -來的語詞，因為無換做仮名，比較容易受漢字系統的語族誤解。比如，有泉州的學者，認為日語的「急須 (キュス)、尺八 (シャクハチ)」是來自泉州話的「急燒、尺八」。關於前者，個人的看法，日語是綴吳語講 -兮；若是後者，會使參考上海藝術研究所陳正生先生的「尺八研究」，基本上，陳氏的考據佫引證攏真詳細，日本傳入「尺八」的年代，可能連甘棠港都猶未發跡，欲佗生泉州港？

.

最近藏經閣外的掃葉人講台語「(俳優) 這個詞，可以遠溯到秦始皇，西漢、東漢，絕對不是台語從日語借來的詞。」我認為這句話有討論的空間，論真講 -起來，箸秦始皇進前《荀子》、《韓非子》頂頭著有出現過「俳優」這句話；但是日語傳入的年代，上早未超過南北朝，這句語詞箸南北朝猶算常用語；我個人認為是唐朝的時陣，可能性較大，因為日語「俳優 (ハイイウ)」這兩字計是讀漢音。

.

我講台語的「俳優」絕對是台語按日語借 -來的語詞，理由是：

.

1. 古早台灣的口語並無這句「俳優」，《台日大辭典》無這個詞條；kan1 naN7 箸「下九流」詞條用日語做解釋：「娼妓 (シャウギ，趁飵 tsa1 boo2)、俳優 (ハイイウ，搬戲 -兮)、巫女 (ウコ，媽姨)、按摩 (アンマ，搦龍兮)、笛喇叭吹 (フエラッパフキ，歕鼓吹兮)、理髮人 (リハツニン，剃頭 e5)、奴隸 (ドレイ，用錢買的奴才)、下婢 (カヒ，tsa1 boo2 kan2)、妾 (せふ，細姬) の九種の下等なもの」，出現過一擺，這是日語。

.

《廈門音新字典》「俳」有講「poaⁿ hì」，「優」無相關的解說，無「俳優、pâi - iu」。

.

2. 今仔閩南語無人講「俳優」，林寶卿的《普通話閩南方言常用詞典》連「俳」-字嘛無收。

.

3. 南北朝至徦隋唐的用語箸現代日語猶有誠濟用詞，但是台語部分有借入，算外來語；有的語詞共款，意思、用法無 kang5，這無算是外來語；有的嘛無揢借用。這攏真簡單著會當 (tang3) 區別 -出來，無啥大學問。摕寡記載六朝隋唐歷史的書，內底較有相關、咱較熟 -兮做例：

.

3-1.《顏氏家訓‧雜藝第十九》：

武烈太子偏能寫真，坐上賓客，隨宜點染，即成數人，以問童孺，皆知姓名矣。

.

《南史》亦有 sang5 款記載。

.

蕭梁簡文帝《咏美人看畫詩》：

可憐俱是畫，誰能辨寫真。

.

日語改寫做「写真 (シャシン)」，台語揢摕來用，用漢字「寫真」。這毋是咱的先民按六朝的時傳 -落來兮，證據參「俳優」共款，台語古早的詞書無，閩南人亦無這囉講法；另外，咱「寫真」的口語講做「sia2 sin1 (寫新)」，這是受日語讀法的影響，並毋是照字讀「sia2 tsin1」。

.

3-2.《顏氏家訓‧雜藝第十九》：

卜筮者，聖人之業也；但近世無複佳師，多不能中。古者，卜以決疑，今人生疑於捕；何者？守道信謀，欲行一事，卜得惡卦，反令恜恜，此之謂乎！且十中六七，以為上手，粗知大意，又不委曲。

.

《隋書‧卷四十八》：

上賜王公以下射，素箭為第一上手，以外國所獻金精盤，價直巨萬，以賜之。

.

唐，段安節《樂府雜錄‧琴》：

大和中有賀若夷尤能 …… 後有甘黨，亦為上手。

.

同上《箜篌》：

太和中，有季齊皋者，亦為上手，曾為某門中樂史；後有女，亦善此伎。

.

tsia5 的「上手」是指對某一項代誌抑是技藝的高手、一頂一的手藝。參日語「上手 (ジョウズ)」意思相 kang5，日語是訓讀。

.

台語講「tsiuN7 tshiu2」，有三款解說，一種是講代誌做了真順手，一種是講功夫學了有起；另外，物件抑代誌得 kau3 手嘛會使講做「上手」，例，「月給摕上手著開了了 (liau2)、這個詐騙集團拐上手著緊散股」。這句語詞參日語的「上手 (ジョウズ)」無關係，這款現象真清楚，未濫毋著 -去。

.

3-3.《顏氏家訓‧文章第九》：

邢子才、魏收俱有重名，時俗準的，以為師匠。

.

《魏書‧卷一百一十四》：

後有沙門常山衛道安性聰敏，日誦經萬餘言，研求幽旨。慨無師匠，獨坐靜室十二年，覃思構精，神悟妙賾，以前所出經，多有舛駁，乃正其乖謬。

.

《舊唐書‧卷一百八十九上》：

若不經其兄弟指授，則謂之「不經師匠，無足采也」。

.

真明顯 -兮，日語「師匠 (シショウ)」是來自漢語的外來語，台灣話口語講「師父 / 傅 (sai1 hu7)」，無揢這句日語的語詞 khioh4 來用。

.

日語漢語的語彙保留未少的古漢語，這當今一寡漢語系的語族，顛倒無咧使用，上大的原因是「書面語」無口語化。台語嘛有這個情形，若毋是與日本管五十年，「俳優」這句話嘛未變做活的語言。

.

我的意思毋是講咱台語所有參日語相同的漢語詞彙，都 (to1) 計是來自日語，像「新婦、達摩、外家、清白、公爵 ……」，這攏是台語的固有詞。但嘛毋通明明著是學日本人講的語詞，便若發見漢語古籍有記載 -兮，著緊講這是「台語」。摕一寡無根據的講法咧「美化」台語，家己膨仔龜咧挱油 (phong3 a2 ku1 leh8 so1 iu5)，這嘛無必要。因為，這真容易區別，我著講 -過啊，這毋是啥大學問啦！