「不諳音聲」佮「囿於方音」

● 這篇嘛算是料理人 - 2011,01,21,16:26、dongxie - 2011,01,28,15:55、02,10,14:36兩位留言內底，有關「時勢音」佮「動機」這兩個問題回應的補充。

● 談論台文漢字的寫法，個人主觀的看法：

pat4 一屑屑仔漢語聲韻學常識，可能對字音的讀法較有根據，咧檢驗字、音對應的時陣，會有一寡助益。

略仔知影咱 tsia5 各地方音的特色，本字是所有台語的次方言計會合用兮，無可能台北的 kuiN1 mng5 (關門) 參宜蘭的 kuaiN1 muiN5 寫無共款。若欲借字，嘛是揣攏有對同的字，較未有爭議。

考求本字一定愛有「證書」，有「書證」通補充會佫較好。(「塍、田」)

萬不一若無這寡條件 -咧？抑是有所欠缺，嘛未要緊。咱會使摕別人各種無仝 (kang5) 的看法來參照比較、做判斷、提問題，照常會當參加討論。但是，互相尊重，一定愛遵守。

用字會使從眾，m7 koh8 毋通排斥其他的寫法。若有具體的理由，欲講人用了無適當，這無妨；講了人欲接受抑無愛 (讀連音 buai3)，咱無權利亦無必要去干涉；準人若甘願做孤鳥 (koo1 tsiau2)，著隨在人去發揮，這是人的自由。無合用的寫法，徦尾 -仔自然會消失，免煩惱 hah4 濟。

● 事實上，我發見著算具備這寡條件的人，有當陣仔嘛會恍惚、隨宜從事、阿抑是因為其他的因素，講了無正確。摕網路頂 -仔的一份說帖做例，說帖無注出處 **，照內容讀 khiai9，寫作者聲韻學的素養絕對 m7 naN7 一屑屑仔。這篇說帖拄有提起「本字」佮「用字」的相關問題，嘛拄好「講了無正確」，阿我拄好摕來做例，sin7 sua3 來探討「講了無正確」的原因：

【陷眠】hām-bîn

對應華語：夢囈

用例：伊咧陷眠

民眾建議：啽眠、含眠

用字解析：
臺灣閩南語「夢囈」說 hām-bîn，傳統習用字作「陷眠」。沒有其他寫法。「眠」睡眠之意，用字沒有問題，「陷」字音契合，但意義比較難以理解，「陷入睡眠」不一定是「夢囈」，所以保守的說，用「陷」字只是借音字。

有民眾建議寫成「啽眠」。《集韻》：「啽，寐聲。五含切（gâm）。」意義上有點關係，但也不甚契合。音韻上比較迂遠，不一定是本字，字也很僻，不適用。

至於「含眠」的「含」音 hâm，聲調不合，意義也不如「陷」契合，同時也很少人使用，因此不太適用。
(「306pdf - 【陷眠】hām-bîn 【成】tsiânn」)

● 先來講這份說帖毋著的所在：

1. 臺灣閩南語「夢囈」說 hām-bîn，傳統習用字作「陷眠」。沒有其他寫法。

這毋著！
m7 naN7 講「hām-bîn」嘛有人講「ham5 bin5」，阿「傳統」絕對有「其他寫法」。

1-1.
有高人講：
白話文「說夢話」，台人曰「酣眠」，淺人白丁誤為「陷眠」，音近混淆之。

這是 in1 陰、陽平變調計共變中平調的關係，論真講 khiai3，用「酣眠」參用「陷眠」，相拍未過田岸，第一名講第二名，攏先覺啦。

1-2.
Gē 讛 khùn ê sî chhut-siaⁿ , khùn teh kóng-uē , hâm-bîn . (睏的時出聲，睏 teh4 講話，ham5 眠)
Gē 囈 kap tíng-bīn jī sio-siāng . (佮頂面字相 kang5)
(甘為霖《廈門音新字典》台灣教會公報社，2006：137)

這是第五聲陽平調，毋是第七聲陽去調。《甘典》冊名雖然是「廈門音」，實際上是台灣偏廈的口音。

1-3.
ham5 bin5 含眠。①寐惚ける。ー ー 含觸 ＝ 同上。②寐言。你在 ー ー ＝ 何を寐言をいうか。
ham5 bin5 ue7 含眠話。寐言。
(小川尚義《臺日大辭典‧下》武陵，1993：536)

1-4.
台文/華文線頂辭典 亦做「含眠」，讀做 ham33 bin24，會使注意聽伊發音。

1-5.
所以「ham」無一定是發第七聲變低平調。有真濟主張本字愛寫「酣眠」的人士，這嘛表示咱 tsia5 猶有人講「ham33 眠」，寫「陷眠」咸 in1 的腔口著無對同 (「教育部作夢寫做陷眠(應為酣眠或鼾眠)」) 。毋是咧討論用字兮的文章，嘛有寫做「酣眠」兮，關鍵字用「台語酣眠」，網路揣 -一下著有。阿「傳統習用字作『陷眠』、沒有其他寫法」，佫較是無稽之談。

2.「陷」字音契合，但意義比較難以理解，「陷入睡眠」不一定是「夢囈」，所以保守的說，用「陷」字只是借音字。

嘛毋著！！
這個「借音字」未當 (tang3) 適用箸所有的腔口。

「陷」是第七陽去聲，連讀變低平調，講「酣眠」的人真明確的變調了後是講中平調，欲對應這兩種腔口的音調，kan1 naN7 第五聲陽平調才有合。若欲借字，應該是「含、咸、函、銜 ……」才合理。

3. 民眾建議寫成「啽眠」。《集韻》：「啽，寐聲。五含切（gâm）。」意義上有點關係，但也不甚契合。音韻上比較迂遠，不一定是本字，字也很僻，不適用。

佫毋著！！！
「啽」字義毋是「有點關係」若爾，是完全「契合」。音韻嘛一致，一定是本字。適用。

3-1.
啽，《集韻》頂頭有兩種寫法，嘛會使寫做 [「寐」-字的「未」改「含」] (請閱：「含眠、陷眠」)，《集韻》的注解「寐聲」，有影會使做幾囉款解說，m7 kuh8，《廣韻‧下平二十二覃》講：「寐中言語」著有夠清楚嘍。意義完全對同 (tang5)，毋是「有點關係」若爾 (naN7 niaN7)；事實上，古早古早著有用例，《列子‧卷第三周穆王篇》：「眠中啽囈呻呼，徹旦息焉」；元代朱名世有一卷《啽囈集》。

3-2.
五含切，疑覃平開一咸，中古漢語「疑」紐台語話音會使讀 h-，比如「魚、蟻、岸、額」，「覃」韻的「庵、貪、堪、南」台語讀 -am，「疑」是濁母，「覃」是平聲，台語拄讀做 ham5。

3-3.
「啽」-字「很僻，不適用」？講 heh8 in1 ma2 khit4 e9 (「無影無跡、有空無榫、無意義」的意思)，實在有影，人未堪兮氣。

台灣教育部《臺灣閩南語常用詞辭典》 頂頭的：

[亻因] (in1)、 [上「相」下「同」] (siang5)、[扌冒] (mooNh4)、僫 (oh4)、蕨 (kheh4)、曷 (ah8)、[氵常] (siuN5)、婸 (giang1)、鈃 (giang1)、擉 (tiak8)、[甚冘] (sim3) ……

佗 (to2) 一字毋是「很僻」，kan2 著亦「適用」？嘛用阿足爽 -兮；「啽」敢會比這寡字佫較「僻」？

4. 至於「含眠」的「含」音 hâm，聲調不合，意義也不如「陷」契合，同時也很少人使用，因此不太適用。

猶原毋著！！！！
「含眠」的「含」音 hâm，聲調比「陷」較合；使用的人比「陷眠」較濟；準若是借音，用「含」比「陷」佫較適合。

4-1.
「含」第五聲陽平，講「ham11 眠」的所在有合，比如「含笑 (花)、咸豐、同治」講「ham11 tshiau11、ham11 hong44、tong11 ti33；講「ham33 tshiau11、ham33 hong44、tong33 ti33」的地區，in1 講「ham33 眠」，嘛是有對同。

準頂頭講 -兮，讀 khiai9 傷茹，用「留言回覆‧■ 關於調號的標法等」的「頇顢」做例，我小繵一個仔音值咧，唸 khiai9 著較清楚：

華語詞目 差勁
鹿港偏泉腔 頇顢　hâm-bǎn (講 ham11 慢)
三峽偏泉腔 頇顢　hâm-bān (講 ham11 慢)
台北偏泉腔 頇顢　hâm-bān (講 ham11 慢)
宜蘭偏漳腔 頇顢　hâm-bān (講 ham33 慢)
台南偏漳腔 頇顢　hâm-bān (講 ham33 慢)
高雄通行腔 頇顢　hâm-bān (講 ham33 慢)

準若無受其他腔口的影響，講「ham33 眠」的所在，一定講「ham33 慢」無例外。

注，灣教育部《台灣閩南語常用詞辭典》的「台北偏泉腔」是孤指新北市蘆洲的偏同安腔，個人認為是新派的口音，毋是老輩的腔口。若是台北的偏泉腔，佫有另外一款讀法：
台北市偏泉、同腔 講 ham11 慢
台北市偏廈門腔 講做 ham33 慢

4-2.
台語的「ham5 眠」是指「夢囈」，「陷入睡眠」著毋是「夢囈」。若照王華南先生講 -兮，欲「橫柴 giah8 入灶」，嘛會使解說做「包含睡眠」，因為「含眠話」包括毋是咧睏，精神的時烏白講的話。烏白講有人著會笑講是咧「講睏話」抑「咧 ham5 眠」，烏白講的人並無咧睏。阿嘛有人講用「含眠」才著，因為「含糊、含混」嘛是用「含」。(「教育部公佈台語300字建議修正」)

「陷眠」敿「含眠」共款，平平是借音字，意義著在人解說 -兮，啥咧有「契合」抑無？何況「借音字」抑毋是「借義字」，音，準上要緊，參字義無啥關聯啦。

4-3-1.
少人用著「不太適用」，安呢哪著創啥「建議用字」，佫去揣一寡新的用字。逐個繼續用「我甲你、卡好呷、水噹噹、會凍去、乎我愛 ……」，毋是加真省事？

4-3-2.
啥人做過統計，講用「含眠」兮比用「陷眠」兮較少，數據箸佗？

tsia5 有一份現成的資料，無講真精確，上無，會使搦一個仔大概，逐個罔參考。總是，這毋是我空喙哺舌家己編 -出來兮。

Google 搜尋：
含眠 約有 3,850,000 項結果
陷眠 約有 1,100,000 項結果

蕃薯藤搜尋：
約有159000項符合含眠的查詢結果
約有 85100項符合陷眠的查詢結果

yahoo搜尋 (台灣網頁優先)：
含眠 搜尋結果約9,190個，
陷眠 搜尋結果約1,530個，
(案，以上計是今仔日的資料)

喙佮目諍？

● 例文的作者 pat4 聲韻學，知影「陷」毋是本字，嘛真用心做解說；這毋是一時的失察覺，嘛毋是凊采寫寫咧、有交代著準煞的應酬文。無，敢是作者無了解台灣各地方音的特色，毋知影有的所在講「ham33 眠」所致？準若是這個原因，安呢逐個著會使較放心，這是小失誤，人若摕證據講台灣猶有的地區講「ham33 眠」，伊著會考慮抑是提新的論述，慢慢仔研究，總會有結局；當然，世間事無絕對 -兮，往往 (ing2) 嘛有彼囉無疑悟的時陣。

所謂的無疑悟，著是準若欲強詞奪眾理，講用「ham33 眠」是「因為台語口耳相傳，有很多發音都唸錯了而不自知」，安呢著無伊法啊。不而過講「ham33 眠」的人嘛未因為安呢，著改講「陷眠」；阿講「ham11眠」的人，嘛未改講「酣眠」。這是典型的「不諳音聲」，「不諳音聲」真容易與人 (hoo7 lang5) 看破骹手，所以我講是小失誤，會使放心兮。

我較關心兮是明明知影咱 tsia5 各種次方音的用法，但是去致著「囿 (讀做「又、右」) 於方音」的症頭，煞亂主拂。

毋是講未使用方音，用方音顛倒佫較好，佫較會當保存各種無同的語料參話音通做比較。我咧講的「囿於方音」，是指「我講的才著，別人講的攏無標準」；另外，所有的「考求」攏按家己主觀的需要去鬥資料，安呢就難免參事實有爭差。甚至做假、講白賊，家己猶無致覺，亦嘛有人是挑意故 -兮。

欲避免「囿於方音」的第一要件，著是我上頭仔講的：「知影咱 tsia5 各地方音的特色，本字是所有台語的次方言計會合用兮」。換一句話講，本字一定著符合台灣所有口音的對應。我簡單舉一個例：

用手「tshih8」物件，阮嘛講「lih8」。[扌列]，《玉篇》呂結切，捺也。音、義攏有合。但是士林彼箍圍仔的在地人，參宜蘭、下港的人共款，講做「jih8」。[扌列] 中古漢語是「來」紐，若摕未出來「來」紐的字，in7 有讀「j-」的實證，硬諍講 [扌列] 著是「lih8、jih8」的本字，阿毋著欲叫人綴阮講「lih8」？這著是「囿於方音」。

sin7 sua7 響應一個仔Haiker兄箸2011,02,10,16:29對「動機」的看法，我同意伊講 -兮。「囿於方音」一定有理由，理由 m7 naN7 孤一款，無 te3 蒦 (ioh4)。理由著是動機，別人的動機是啥，我正經毋知，有人主張講知嘛未使講。講人的是非著是是非人？這愛看汝揢「是非」按怎樣定義，「是非」嘛是「『著』佮『毋著』」的意思，人若犯錯，逐個攏做「好人」，安呢著天下太平？「動機」嘛是共款，警察抑檢察官咧記者會或者箸法院陳述被告的犯罪動機，警察敿檢察官敢攏「壞人」？我欲講的是分析代誌，(1.) 未使用二分法、未使以偏概全，一個帶 (tai3) 屎，哪有通人 (thong1 lang5) 綴咧落衰 (loh8 sue1) 的道理？(2.) 佫較未使人講綴人講，放屎分汝捧 (phong2)。

準若我有這囉破病路，「動機」拍算是對「母語」的「使命感」蓋過「責任感」，欲揢「時勢音」總貿 (bau7) 的關係。當然，我無咧啽眠，這是比喻；我自本的一箍散散無啥遠志，m7 koh8，嘛無近視，好咧加再！

**
多謝philip - 2011,02,15,13:01 的拍報，說帖的出處是台灣教育部《臺灣閩南語常用詞辭典》的編輯小組。
(2011,02,16 補)