觸讋說趙太后

趙太后新用事，秦急攻之。
tio7-thai3-hio7 sin1-iong7-sir7, tsin5 kip4-kong1 tsi9.

西元前265年，趙國惠文王過身，in1 囝孝成王繼位；因為猶細漢，著由趙太后掌政。無外久，秦國派兵強侵趙國連拔三城。

趙氏求救於齊。
tio7-si3 kiu5-kiu3-ir1-tse5.

趙國向齊國討救兵。

齊曰：「必以長安君為質，兵乃出。」
tse5 uat9:“pit4-i2-tiong5-an1-kun1 ui5-tsit4, ping1 naiN2-tshut4.”

齊國表示，講一定愛用趙太后的細囝長安君抵押做人質，來保證趙國會照締盟的約束，才欲出兵。
(案，「人質、質押」的「質」本來讀 tsi3，tsit4 是俗讀。)

太后不肯，大臣強諫。
thai3-hio7 put4-khing2, tai7-sin5 kiong5-kan3.

趙太后毋肯，眾大臣極力進言。

太后明謂左右：「有復言令長安君為質者，老婦必唾其面。」
thai3-hio7 bing5-ui7-tsoo2-iu7:“iu2-hok8-gien5 ling7-tiong5-an1-kun1 ui5-tsit4 tsia9, nooN2-hu7 pit4-thoo3-ki5-bien7.”

趙太后著對彼寡左右仔拆白講：「若有人佫再提講欲叫長安君去做人質 -的，老身兮絕對會揢瀾呸 (啡) 咧伊的面兮。」

左師觸讋 (龍言) 願見太后，太后盛氣而揖 (胥) 之。
(案，《史記‧趙世家》做「觸讋」，「讋」讀 tsiap4。1973長沙馬王堆出土帛書《戰國策》做「觸龍」。「揖」，《史記》、帛書做「胥」，王念孫謂「揖」是「胥」的訛字。)
tsoo2-sir1 tshiok4-liong5 gien5 guan7-kien3-thai3-hio7, thai3-hio7 sing7-khi3 li5-sir1-tsi9.

當眾人束手無策的時，左師觸龍求見太后；太后早著知影觸龍的來意，當然嘛未爽，著氣怫怫 (khi3 phut4 phut4) 箸咧張等 (tng1 tan2) -伊，按算欲與觸龍一頓仔粗飽 -咧。

入而徐趨，至而自謝曰：
lip8-li5-sir5-tshu1, tsi3-li5-tsir7-sia7 uat9:

上殿的時，觸龍著激一個未輸真趕緊彼囉形兮，但又佫寬寬仔行 kau3 太后的面頭前謝罪講 (kong5)：

「老臣病足，曾不能疾走，不得見久矣，竊自恕，而恐太后玉體之有所郄也，故願望見太后。」
“nooN2-sin5 ping7-tsiok4, tsing5-put4-ling5 kip4-tso2, put4-tik4-kien3 kiu2-i9, tshiap4 tsir3-sir2, li5-khiong2-thai3-hio7 giok8-the2 tsi1-ui2-soo2-khik4-ia9. koo3 guan7-bong7-kien3-thai3-hio7.”

「老臣骹毋好，阿人著無爽箸咧，行，都行未緊。誠久 (tsiaN5 ku2) 無來拜見太后汝 -啊，我是揣有理由通原諒家己 -啦。嘛過 (mah4 koh8) 掛意太后的玉體有康健 -無，所以希望來揢太后探安一下 koh8。」

太后曰：「老婦恃輦而行。」
thai3-hio7 uat4:“nooN2-hu4 si7-lien2 li5-hing5.”

太后講：「老身兮靠車咧代步行徙。」

曰：「日食飲得無衰乎？」
uat4: “lit8 sit8-im2 tik4-bu5-sue1 hoo9?”

觸龍講：「阿日常的胃口應該未徦外 bai2 hooN7？」

曰：「恃粥耳。」
uat4: “si7-tsiok4 niN2.”

太后：「嘛是加減仔飵一屑仔糜若爾 (naN7 niaN7)。」

曰：「老臣今者殊不欲食，乃自強步，日三四里，少益耆食，和 (知) 於身。」
(案，帛書做「智於身」，「智」通「知」。《方言》：「知，愈也，南楚病愈者謂之知。」「知於身」是講對身體有幫助。台語講與先生看了有較好，抑是藥仔飵了有效，嘛講「知 (tsai1)」；敢是同一個詞源，我未曉。)
uat4: “nooN2-sin5 kim1-tsia9 su5-put4-iok8-sit8, naiN2 tsir7-kiong5-poo7, lit8 sam1-sir3-li2, siau3-ik4-ki5-sit8, ti1-ir1-sin1.”

觸龍：「近來老臣的食慾誠 bai2，但亦免強家己，一工愛行三四里遠的路，安呢著小可仔會較愛飵物件，身體加真好。」

太后曰：「老婦不能。」太后之色少解。
thai3-hio7 uat4: “nooN2-hu7 put4-ling5.” tai3-hio7 tsi1-sik4 siau2-kai2.

太后講：「這喔，老身無才調。」阿面腔 (tshiuN1) 著較回啊 (khah4 he5 a7)，無像拄頭仔 hah4 歹看。

左師公曰：「老臣賤息舒祺，最少，不肖；而臣衰，竊愛憐之，願令得補黑衣之數，以衛王宮。沒死以聞。」
tsoo2-sir1-kong1 uat4: “nooN2-sin5 tsien3-sik4 soo1-ki5. tsue3-siau3. put4-siau3; li5-sin5-sue1, tshiap4 ai3-lien5 tsi9, guan7-ling7-tik4-poo2-hik4-i1 tsi1-soo3, i2-ue7-ong5-kiong1. but8-sir2-i2-bun5. ”

觸龍講：「太后，小犬舒祺，是不成器的煞尾仔囝；taN1 我都已經老啊，但總亦一直咧痛惜伊。因此冒著死罪，稟告太后汝，想講箸黑衣侍衛內面，伊若有一個缺，嘛會當 (tang3) 為保衛王宮出寡力。」

太后曰：「敬諾！年幾何矣？」
thai3-hio7 uat4: “king3-lok8. lien ki2-hoo5 i9. ”

太后答應伊講：「hoo9，好！阿外大漢啊？」

對曰：「十五歲矣。雖少，願及未填溝壑而託之。」
tui3-uat4: ”sip8-ngooN2-sue3 i7. sue1-siau3, guan7-kip4-bi7-thiam5-gio1-hok4 li5-thok4 tsi9. ”

觸龍應太后：「十五啊。雖然猶少歲，我希望趁箸 ia2 未死進前，揢託付與汝。」

太后曰：「丈夫亦愛憐其少子乎？」
thai3-hio7 uat9: ”tiong7-hu1 ik4-ai3-ki5-siau3-tsir2 hoo9? ”

太后講：「阿丈夫人 (ta1 poo1 lang5) 亦痛細囝 -乎 (oo9)？」

對曰：「甚於婦人。」
tui3-uat8: ”sin7-ir1-hu7-lin5. ”

觸龍講：「比 tsa1 boo2 人痛去佫較功夫。」

太后笑曰：「婦人異甚！」
thai3-hio7 tshiau3-uat8: ”hu7-lin5 i7-sin7. ”

太后煞愛笑，講：「哈，做老母 -兮，對細囝攏計嘛痛命命，惜去特別厲害。」

對曰：「老臣竊以為媼之愛燕后，賢於長安君。」
tui3-uat8: ”nooN2-sin5 tshiap4-i2-ui5-o2-tsi1-ai3-ien3-hio7, hien5-ir1-tiong5-an1-kun1. ”

觸龍講：「我個人認為太后對待恁 tsa1 boo2 囝燕后，較痛惜過長安君。」

曰：「君過矣！不若長安君之甚。」
uat9: ”kun1 koo3-i9. put4-liok8-tiong5-an1-kun1 tsi1-sin7.”

太后講：「汝毋著 -啊 -啦！我對燕后的痛惜，遠不如像對長安君安呢。」

左師公曰：「父母之愛子，則為之計深遠。媼之送燕后也，持其踵為之泣，念悲其遠也，亦哀之矣。已行，非弗思也，祭祀必祝之，祝曰：『必勿使反！』豈非計久長，有子孫相繼為王也哉？」
tsoo2-sir1-kong1 uat9: ”hu7-bio2 tsi1-ai3-tsir2, tsik4 ui7-tsi9 ke3-tshim1-uan2. o2-tsi1-song3-ien3-hio7-ia9, tshi5-ki5-tsiong2 ui7-tsi1-khip4, liam7-pi1-ki5-uan2-ia9, ik4-ai1-tsi9 i7. i2-hing5, hui1-hut4-sir1-ia9, tse3-sir7 pit4-tsiok4-tsi9, tsiok4 uat9: ‘pit4-but8-sir2-huan2.’ khi2-hui1 ke3-kiu2-tiong5, u2-tsir2-sun1 siong1-ke3 ui5-ong5-ia9 tsai9?”

觸龍講：「咱做爸母 -兮痛囝，著是欲為 in1 的將來設想、關心 in1 的前途。當初燕后出嫁，咧送行的時，汝徛箸車邊仔，隈 (ui3) 伊的骹後 tiN1 捏 (niNh8) -咧，目屎 naN2 流，毋甘伊嫁去 hiah4 遠的所在，真正傷心兮。燕后嫁出門了後，汝嘛佫一直咧數念伊，便若有祭典，汝著為伊祈禱：『千萬著毋通與轉 (tng5) -來 (案，古早諸侯的 tsa1 boo2 囝嫁去別國，kan1 naN7 與人廢后、抑是亡國，才會佫轉來後頭處)。』這敢毋是希望燕后的囝孫仔世世代代會當 (tang3) 相繼為王？咧為伊的將來設想？」

太后曰：「然。」
tai3-hio7 uat9:”len5.”

太后講：「正是。」

左師公曰：「今三世以前，至於趙之為趙，趙主之子孫侯者，其繼有在者乎？」
tsoo2-sir1-kong1 uat9: ”kim1 sam1-se3 i2-tsien5, tsi3-ir1-tio7 tsi1-ui5-tio7, tio7-tsu2 tsi1-tsir2-sun1 hio5-tsia9, ki1-ke3 iu2-tsai7-tsia9 hoo9? ”

觸龍講：「按今仔進前的三代開始算，一直徦趙氏開國的時；所有的趙王 in1 封侯的囝孫，這寡封侯的囝孫，in1 的繼承人，敢有徦 taN1 ia2 保有爵位兮？」

曰：「無有。」
uat9: ”bu5-iu2.”

太后講：「無。」

曰：「微獨趙，諸侯有在者乎？」
uat9: ”bi5-tok8-tio7, tsu1 (tsir1) -hio5 iu2-tsai7-tsia9 hoo9?”

觸龍講：「嘛毋 kan1 naN7 是趙國；其他彼寡諸侯國王所有封侯的囝孫，in1 的繼承者，徦 taN1 敢猶有人揢爵位保著 (tiau5) 的？」

曰：「老婦不聞也。」
uat9: ”nooN2-hu7 put4-bun5 ia9,”

太后講：「毋 pat4 聽 -過 koh8。」

「此其近者禍及身，遠者及其子孫。豈人主之子孫則必不善哉？位尊而無功，奉厚而無勞，而挾重器多也。今媼尊長安君之位，而封之以膏腴之地，多予之重器，而不及今令有功於國。一旦山陵崩，長安君何以自託於趙？老臣以媼為長安君計短也；故以為其愛不若燕后。」
”tshir2 ki5-kun7-tsia9 hoo7 kip4-sin1, uan2-tsia9 kip4-ki5-tsir2-sun1. khi2-lin5-tsu2 tsi1-tsir2-sun1 tsik4-pit4-put4-sien7 tsai9? ui7 tsun1 li5-bu5-kong1, hong7 hio7 li5-bu5-loo5, li5-hiap8-ki5 tiong7-khi3 too1-ia9. kim1 o2 tsun1-tiong5-an1-kun1 tsi1-ui7, li5-hong1-tsi1-i2-ko1-lu5-tsi1-te7, too1-ir3-tsi1-tiong7-khi3, li5-put4-kip4-kim1 ling7-iu2-kong-i1-kok4. it4-tan7-san1-ling5-ping1, tiong5-an1-kun1 hoo5-i2 tsir7-thok4 ir1-tio7? nooN2-sin5 i2-o2 ui7-tiong5-an1-kun1 ke3 tuan1-ia9; koo3 i2-ui5-ki5-ai3 put4-liok4-ien3-hio7.”

觸龍講：「這是因為有爵位的人，近禍危及自身，隱患遠禍著殃及囝孫。哪是國君的囝孫著一定無好？是因為 in1 位高但是無功績，有好的俸祿 mah4 koh4 無貢獻。今仔太后與長安君伊 (i7) 這呢仔尊貴的地位，佫分封伊 hah4 呢好的土地，與伊 tsiah4 濟的金銀財寶，卻無愛趁今仔這個機會，與伊為國建立功勞。一旦太后百年以後，長安君家己將憑啥箸趙國安身立足、保持伊的地位 -咧？老臣以為太后汝並無替伊拍算、考慮伊的將來；所以我毋才講汝較痛燕后。」

太后曰：「諾。恣君之所使也。」
thai3-hio7 uat4: ”lok8, tsir3-kun1 tsi1-soo2-sir2 ia3.”

太后說︰「好啦，無，照汝的意思去排比著會使 -哩。」

於是為長安君約車百乘，質於齊，齊兵乃出。
ir1-si7 ui7-tiong5-an1-kun1 iok4-kir1-pik4-sing7, tsit4-ir1-tse5, tse5 ping1 naiN2-tsut4.

就安呢替長安君準備一百台車馬，送伊去齊國做人質，齊國著出兵助趙。

子義聞之，曰：「人主之子也，骨肉之親也，猶不能恃無功之尊，無勞之奉，而守金玉之重也，而況人臣乎？」
tsir2-gi7 bun5-tsi9, uat9: ”lin5-tsu2 tsi1-tsir2 ia9, kut4-liok8 tsi1-tshin1 ia9, iu5-put4-ling5 si7-bu5-kong1 tsi1-tsun1, bu5-loo5-tsi1-hong7, li5-siu2-kim1-giok8 tsi1-tiong7 ia9, li5-hong2 lin5-sin5 hoo9? ”

趙國的賢士子義聽著這層 (tsan5) 代誌，講︰「國君的後生，是國君的親生骨肉，都猶未使靠勢無功勛的尊位、無貢獻的俸祿，來保有金玉寶器，何況是做朝臣的人 -咧？」

後記：

台語俗諺講「公嬤 (maN2) 痛大孫，爸母痛細囝。」

這篇故事出於《戰國策‧趙策》，有收入《古文觀止》，是我舊年開始綴江 -先 -生學漢文的教材。江 -先 -生三峽人，頂月日過往，謹以此文紀念。

附記：

● 王先謙《荀子集解‧議兵篇》云：
盧文弨曰：《史記‧趙世家》「左師觸龍，言願見太后」，「言」字當屬下讀。《趙策》誤作「觸讋」，當以此注為正。

王念孫《讀書雜志‧戰國策雜志》「觸龍」條：
此《策》及《趙世家》皆作「左師觸龍言願見太后」，今本「龍、言」二字誤合為「讋」耳。太后聞觸龍願見之言，故盛氣以待之。若無「言」字，則文義不明。據姚 (宏) 云一本無「言」字，則姚本有「言」字明矣。……《漢書‧古今人表》正作「左師觸龍」。又，《荀子‧議兵篇》(楊倞) 注曰「《戰國策》趙有左師觸龍」，《太平御覽‧人事部》引此《策》曰「左師觸龍言願見」，皆其明證矣。

左師觸龍有兮做「左師觸讋」，是因為「龍」-字參下骹的「言」-字誤黏鬥陣，毋是這位觸 -先 -生號做「厚話」。

● 多謝藏經閣外的掃葉人提供的資料。

欲轉 PO 我發表的文章，無問題啦。阿若認為內容有毋著的所在，抑是感覺怪怪 -兮，歡迎亦期待汝 hia5 的網友會當 (tang3) 摕無 sang5 款的看法。
(2010,06,02)

回覆「烏貓」等

■ 藏經閣外的掃葉人：

1. 以前我嘛箸新竹讀冊，了後，過一半 -年 -仔著會佫走去趖趖-咧，新竹我嘛介熟，呵呵。

2. 2009二月初二，我著有根據一位老先兮的轉述，寫一篇有關「烏貓包」的文章。伊是按我講的彼間老人茶桌仔 hia5 聽 -來 -的。講了真精采，mah4 koh8 有的代誌交代了無啥清楚。

我會問 H，是因為伊新竹在地人，佫蹛箸西大路，城隍廟口古早是伊的「管區」兮。

引起我的興趣-的，著是「yahoo 知識+《新竹黑貓包》」頂頭講-的：
當時，新竹城隍廟有三位「黑貓姑娘」，一位是賣大麵羹、一位家裡賣棺材，另一位就是賣包子，於是有人將她做的點心稱為「黑貓包」。

其中彼位咧「賣大麵羹」的「黑貓姑娘」，著是箸茶桌仔咧講「烏貓包」彼個人的長輩。

但是網路寫 -的，參 in1 講的有爭差，所以我這篇本來號做「周長楫教授語錄簡評004---烏狗烏貓」(案，這篇後來換做周長楫教授語錄簡評004---檨仔 ) 的文章，著候囥下 (he7) -咧。另外一個原因是林建輝 pat4 講過「烏貓烏狗」這句是廈門話 (大意)，不過這個問題後來我有請教 -伊，嘛已經了解，算講解決 -啊。不過，我是想講等其他的代誌，了解較清楚-咧，才欲收咧 blog 內面。

我所知-的，「烏貓包」的頭家娘號做「烏貓葉 (hioh8) -仔」，今仔應該有90歲左右，參汝講-的拍算無 kang7 人的款。

3. 感謝汝-啦，若有機會才來 tsat / k4 tso7 汝 (li7)。

4. 關於「台灣拳」，我所知-的：
(0) 毋出 (m7 tshut4)
(1) 同，單 tshau1
(2) 同，嘛有講「對 so5」
(3) 同，嘛有講「sam44 sam24」
(4) 同
(5) 新竹有，講「五魁」讀做「u42 khue44」，台北無，頭仔我叫是咧講國語的「烏龜」-咧，哈
(6) 同，講「lak44 lien24 / 42」，嘛有講「lak44 koh44 lien24 / 42」
(7) 台北講「tshai24 tshai24」、「tshai24 七」、「tshau42 tau24」；若像無人講「七 tshiau24」的款，頭一擺聽著的時，我搦準是咧講歹話「拭 X」-咧
(8) 同
(9) 同
(10)同，嘛講「tsuan44 來」、「tsuan44 tsuan44」、「總開」

無佫去問人過，以後若有發見毋著，有機會我才補正。

■ 新鮮料理人：

啊知，我咧寫的時嘛感覺簡單簡單，今仔佫揢餾 bai7-咧，有影若 (naN2) 茹ka3 ka3 的款，組織性誠魯。講較好聽-咧，是「跳躍式的思維」，問題實在是出箸我「想 kau3 hia9 寫 kau3 hia9」。汝著將就一下，kun1 luh8 若捎無兮，我著盡量揢汝解說與清楚，

a. 汝揢這寡顯示未出來的字 copy 踮 (tiam3) word，字體用「新細明體」試看-咧。

b. 有理，若用未出-來-的，我改做別項。

tɕ，ㄐ
y，ㄩ
tɕy，ㄐㄩ
*ɨ，有的用 ii
高後平唇元音ɯ，ir
ku qia，ㄎㄨ ㄑㄧㄚ
ku cha，ㄎㄨ ㄔㄚ
qiu，ㄑㄧㄡ
gu，ㄍㄨ

c. 有注出處-的，是根據 N君的原文，我照 khoo1 (copy)。

無注出處 -的，是我以前 pat4 看過、有印象 -的。正經若欲寫較詳細 -咧，著佫想較斟酌一下，才有法度去 hiau1 資料。我是想講應該無需要 hah4 費氣，會省 -兮著省，安呢較輕可。

哈哈，冊讀少嘛有一步取，攏較會記-得。
所以我建議汝，銀行簿仔用一本、信用卡用一張著好，足好記 -兮，攏未亂 -去。

網友 R君提供，另有此說：
1.「對 so5」是「毋出」，嘛講「攏無」。
2. 單 tshau1 亦講「單一支 (tan tsit5 ki)」。
3. 台北佫新竹同款，亦有出五支。
4.「tshai24 tshai24」也講「tshai24 佫 tshai24」。

新竹的「進士第」別無分號。
我的了解，無人講「進士宅」，「第、宅」音近，但這可能是用字有 taN5，毋是走音。

請代替我向恁大舅 a7 說謝， 等我會學曉轉貼視頻檔的時，我會揢彼條歌詞 PO 出 -來。
(2010,05,29 補充)

台語「龜」哪會讀 ku1

[未刊稿]

有學者安呢講：
「龜」閩南音 ku，也屬特殊之例。如從吳語「支微入魚」的現象去看，並不難理解。所謂的「支微入魚」是說止攝合口三等唸同魚韻，也就是康熙《嘉定縣志》「歸、龜呼為居，晷、鬼呼為舉」的語音現象。閩南音「龜」為 ku 可能來自吳語今音 tɕy 的前身 ky。閩南音沒有撮口呼，把撮口呼轉讀為合口呼。
(張光宇《臺灣閩南語辭典‧序》，民90，五南：4)

個人有無共款的看法，閩南音 (案，所謂「閩南音」涵蓋的範圍傷闊，我毋別，限於能力，以下我改用較會曉的台灣話，簡稱「台語」)「龜」讀 ku1 參吳語「支微入魚」並無關係，嘛毋是來自吳語今音 tɕy 的前身 ky，理由是：

A. 所謂的「支微入魚」著是中古漢語「止」攝的合三字，漢語方言揢國語的 uei (ㄨㄟ) 韻派入 y (ㄩ)；這箸漢語方言內底，並毋是 kan1 naN7 吳語才有的現象。

蘇州 (吳語)「止合三」讀 y 的字，像「支」韻的「嘴、吹、虧、跪、喂」，「脂」韻的「穗、槌、錘、墜、水、龜、櫃」，「微」韻的「歸、鬼、貴、緯、圍」，除了「龜」-字以外，台語毋管文白，無徦一字讀 u。包括參「龜」的聲紐共屬「見」系的「虧 (溪)、跪 (群)、櫃 (群)、歸 (見)、鬼 (見)、貴 (見)」。

台語有影無撮口呼，但是有撮口呼的福州、莆田、永安「龜」講 kui1，毋是講 ky1。
(中嶋幹起《福建漢語方言基礎語彙集》東京外国語大学，1979：22)

B. 台語「龜」讀 ku1 毋是特例，亦無啥麼通 (thang1) 歹理解。

「龜」漢語上古音是「之」部，同韻的「牛、丘、邱、有、久、婦、負、富、舊、龜、侮、拇」等；這寡字台語徦 taN1 猶攏讀 u，參吳語無啥治代 -啦。

台語敿「龜」同韻讀 u 的字，古早的吳語可能嘛讀 u，這按日譯吳音著看會出 -來，「丘、久」ク，「有」ウ，「牛、舊」グ，「婦」ブ，「富」フ …… 攏是讀 u。但是「龜」-字是キ，讀 i 的音，孤 ta1 箸「龜茲」的時，著翻做ク讀 u。

我抄一段周振鶴先生寫 -兮：

歷史上最早給龜茲注音的是應劭，他在《漢書‧地理志》龜茲縣下注：龜茲音丘慈。應劭是東漢人。五百年後，中唐的李賢注《後漢書‧西域傳》云：龜茲讀曰丘慈。

龜茲此名只是當地發音的記錄。

漢代龜茲國在今新疆庫車縣一帶，國都延城即今庫車縣治。唐代龜茲鎮、龜茲都督府和安西都護府也在今庫車縣。因此庫車的讀音應與龜茲相關聯。庫車的當地讀音是 ku qia，如果再往前回溯，該地在元代叫做苦叉，其今音 ku cha 與庫車極相似。因而我們可以推想：龜茲，就是丘慈的讀音應與庫車相去不遠。至少龜和丘的讀法應做 ku，而不是 qiu。這個推想還可以從方言得到證明。在閩南方言中，丘正讀做 ku，而龜讀做 gu，與庫車的庫同音或相近 ……
(周振鶴《隨無涯之旅》北京三聯，2003：293-295)

1. 所以咱嘛會使推測，準「日譯吳音」是六朝的中古吳音，安呢當時的吳語「龜」是讀 ki 抑 khi，但共「見」紐的「久」是讀 ku 抑 khu，無同。

這說明兩項代誌，準若毋是班固、應劭的語音系統參吳語無 sang5，著是六朝的吳語已經將上古漢語的「之」部分化做讀 i 的韻部。毋管佗一個原因，台語「龜」參漢代的讀法共款或者相近，上少是計讀 u，這參吳語有啥關係？因為人自本著是讀 u，阿無是讀啥？證據 -咧？

2. 當然，嘛會使證明毋是張光宇先生所講的「支微入魚」，因為時間點未合 (hah)。

阿嘛有其他的學者主張蘇州 (吳語) 這種「止」攝合三的白讀 uei → ui → y 音變的時間，絕對比「支脂微」的合流佫較晏。
(案，「支脂微」有人講可能箸中唐的時，有的所在著已經合流，雖然禮部取士毋 pat4 揢「微」韻併入「脂」韻。
抑是講「支脂之」同用，「微」獨用。這是符合隋唐韻部的實際情況。
或者講隋 ── 唐的「脂微」兩部，到晚唐合併為一部。)

C. 著 mai3 講徦漢代去，《廣韻》「龜」有居求 (尤) 、居追 (脂)、居危 (支) 三個音切。

居追 (脂)、居危 (支) 台語計讀 kui1，這個讀音用了較少，啥「蟬腹龜腸、龜年鶴壽、援鱉失龜」都攏毋 pat4 聽著-啊；今仔大概 tshun1 一個歹聽話「烏龜 (oo1 kui1)」。

居求切，見尤平開三，「見」紐台語讀 k-，比如「高、見、規、矩、隔、間」；中古漢語「尤有宥」韻開三字唸 -u，箸台語算是常例，像「丘、舊、有、牛、久」，這寡字參「龜」共款，箸上古漢語計是同韻，屬「之」部；「見」清母，「求」平聲，台語讀陰平。「龜」讀 ku1，聲、韻、調計合對應。 阿吳語 -咧，除去「龜」讀 y (日譯吳音 i) ，其他兮嘛攏毋是讀 u (日譯吳音 u)。真清楚嘛，in1 參台語的讀法根本著風馬牛。

台語「龜」讀 u，上自上古韻部，經過漢、唐，一直 kau3 徦《廣韻》，攏會當 (tang3) 看著事例，何必著去揢硬 kang7 櫼 (tsiN1) 一個「可能」的「特殊之例」？

D. 啥人知影吳語「支微入魚」的時，「魚」的音值是啥？

照王力先生的講法，「模魚虞」分做 u、y 的音變上晏是箸16世紀，大概是明朝中葉。王氏認為元代「魚模」毋是讀 y，原因是 y 無可能咸 u 押韻；伊講，無，看現代曲藝的十三轍，y 歸衣期，不歸姑蘇，著知。

準若王、張兩位先生講 -兮攏有正確：

1. 台語「龜」讀 u，毋著是明朝中葉以後的代誌囉？這著有毋著 -啊。

因為張氏講這是「永嘉之亂、兩京傾覆」閩南先民南下「『路過』江東太湖流域」的時，「碩果僅存的幾件樣品」之一。

2.「魚」韻目前台語有「i (偏漳)、u (偏廈)、ir (偏泉)」3款讀法，是按怎吳語讀 y 的「龜」未變做 i 抑 ir。阿敢會是廈門人先學吳語，漳、泉人才綴廈門人講「ku」？這敢講會通 (thong1)？

3. 有學者認為「龜」的共同閩南語古音是 *ɨ，這類字的韻讀，漳州都讀做 u；泉州的同安方言則運作 *ɨ → u 的規律，變做 u，咸漳音一致 。

亦嘛有學者主張講漢語上古「之」部讀做高後平唇元音 ɯ，進前一步著是 i，喙小圓 (uan5) 一下著是 u，「i ─ ɯ ─ u」共是高元音，互相之間容易轉化。

這兩種說法，毋管著 -無，上少 in1 有揢 in1 的理由寫 -出來，個人認為安呢會較有說服力。

E. 古冊的聲訓，台語「龜」參「舊、久」音近，「舊、久」台語話音「ku7、ku2」，「龜」話音講「ku1」：

1.《說文》：「龜，舊也」，段注：「此以㬪 (案，疊) 韵爲訓。門聞，戶護之例。」(段玉裁《說文解字注》上海古籍，2006：678)

2.《白虎通‧卷三》，「蓍龜」條：「龜之為言久也」。(《諸子薈要》廣文，1981：103)

照《簡明吳方言詞典》，「龜」讀「kue (文)、tɕy (白)」，「舊」讀「dʑiɤ」，「久」讀「tɕiɤ」 (閔家驥等，上海辭書，1991：404、409) 。台語、日譯吳音計攏讀 -u，我嘛會使講，這幾字的讀音，「可能」古早台語佮古早吳語是共一個源頭 e5；參國語的「衣、醫、包、胞、幫、邦 ……」相 sang5，講 siang5「來自」siang5 的前身，敢未傷免強？

附記：

這篇文章本來是我的學弟 N君箸幾仔年前用華語寫-兮，題名號做「從幾個『可能』和『似乎』談到『應無疑義』」，是針對張光宇先生箸《臺灣閩南語辭典》所寫的序文，內底部分的內容，提出無共款的看法。

我 pat4 參照伊草稿的資料，箸福建的網路語文論談發帖佮做回應。彼個中間熟似未少網友，包括後-來我紹介與 N的 J君。當時 J有建議 N緊揢這篇文章定稿，不過因為 N都合上未拄好，in1 著叫我揢改做台文、做寡修改，若會使收囥咧我的 blog，敿其他的網友共同探討，安呢佫較好。

我有答應 -in1，所以箸 2007 的時，有準備欲寫一寡補充，亦將「前言」下箸我舊的 blog 頂頭，按算欲做分七擺改寫。

不而過我這囉一晃 (huaN2) 過三冬，佫晃一世人，大水流破布的個性，一個 khua3 著三、四年。另外猶有一篇亦是 N寫的「簡評《唐朝的官話研究(1)》」，共款的情形，誠害。

頂禮拜五暗，N箸僑居地拍電話與我，講伊真「不滿」。無法度的度，我只好「急就章」，先揢安搭 (an1 tah4) 一下，這篇箸伊原文的小標題號做「第一個『可能』」。

有影無彼囉鼎毋通允人煠彼囉牛卵 (lan7)，古早人講了真著；允 -人較慘欠 -人，實在是咧加揭枷 (ke1 giah8 ke5) –兮。

這個テーマ到底會佫寫外濟、寫外久，我今仔攏無按算，亦無把握；因為 N伊原稿提出的問題，有的我嘛著愛佫問伊才會曉-得。

總是，上起碼我會佫揢伊的「第二個『可能』」 ──「油炸粿」的資料重 khing5 -一擺。

這款應卯的 khang1 khe3 我真 tsiap8，hi1 hi1 戽戽 -咧著準過，是「破爛骨」唯一的好處。雖然寫了無理想，減采引用資料記了嘛無外完整，甚至有失覺察，這我攏會當 (tang3)「自恕」。因為咧趕嘛，阿我這是筆記，抑毋是考券，構はない -啦。

準若有才調攏寫完，我會詳細佫巡過，將引用的材料，參原文斟酌對校，並注明出處。當然，平常時仔若有拄陣，我嘛會 naN2 改 naN2 補正。阿若有人有趣味，欲插一-骹，是好是 bai2 我計歡迎。對我寫的內容，準若無了解、有疑問，欲辯難、thut4 thau3，都計OK。

N原稿的「前言」參「結語」是：

前言
張光宇在《臺灣閩南語辭典》的序文裏，舉了一些閩南語的特色，和比較罕見於其他方言的樣品作例子，形容“閩南話是一座漢語史博物館。”張氏的詮釋有不少獨特之處，讓我感到興趣的是他的論述中，用了「可能」、「似乎」等不確定的爬疏、考釋作為印證的部分。或許張氏這篇文章只為某些特定的讀者而寫的，有的地方過於疏略語焉不詳。本文討論的重點是張氏「不確定」而且跟我的看法有不一致的地方，我們期盼諸方家先進的指正。

結語
個人不反對任何論述裏頭使用類似「可能」、「也許」等沒有確定的字眼，也不懷疑閩南話摻有其他語言的成分。只是我們沒有能力了解張先生對於上面各項說法的理 / 立論基礎，而以一般的看法與經驗提出個人意見。

我們可以感受到張先生是博聞多學所知繁富的，但在這篇序文裏，給我們的印象是被某種思維定式 (mind-set) 框住了。這個框框是不是“閩南話是一座漢語史博物館”我們不清楚。

張先生對於許多引證的甄別、取捨，用例考釋的敘述，多扼要到讓人不知所云。除了前述，其他如：山東牟平方言「痣」既然唸 ki，為什麼要寫做 ci；為何閩南話山咸兩攝三四等的鼻化元音是連繫吳閩方言關係的一環，其他有鼻化元音非山咸兩攝三四等字、以及其他有鼻化元音方言的關係又怎麼「連繫」；「石」唸 siah〜sia 有什麼證據來自河南，這就是「益石合流」嗎？

為了把閩南方言形塑成“漢語史博物館”，給人有一種撿到籃子就是菜的感覺，撿不起來的就是“「母土」的方言丕變 …… 孤臣孽子到了新地又南染吳越”；這樣的繫聯方式，反而讓閩南方言像是「沒有主題的漢語史博物館」，或者說是一座「大雜院」來得更恰當。

張先生的倡言，肯定是有令人深思的讜論，可是沒講清楚說明白，總難免叫人認為「比較」多成了「比附」，只有臆測無法證實，這麼一來不就太可惜了嗎？

2007將「前言」PO 箸舊 blog 的時，有寫一寡注腳，其中有一條講：
所謂「某些特定的讀者」，我的看法包括：(1) 水準有夠看別 -兮，(2) 看無跳過去 -兮，(3) 看法一致 -兮。(4) 路線同樣正確 -兮 …… 等等。

塗骹咧處尾頂

透早著落去新竹，照 H君報-兮，去西市仔邊阿，揣一間老人茶桌仔，探聽一位號做「沙武囉」的阿伯-仔，目的是欲去請教伊「烏貓包」的故事。無疑悟聽 hia5 附近的人講茶桌仔收 khiai2 誠久-仔，拍算毋五、六年攏有 a7。

H去國規十冬，啊毋 pat4 轉來台灣，行方不明，這兩工仔才鼓電話與我，煞害我白走一 tsua3，佫開幾仔百買等路。自安 neN4 我著去 in1 tau1 拜訪 in1 老爸。H pat4 揢我講過，in1 老爸會曉 puat8 紙牌仔「天九 (thien1 kiu2)」，我想講，無，來加減仔問 bai7 -咧嘛好，橫直伴手著便便-咧。

著先走去城隍廟口-兮 piah4 點，徦 in1 tau1 都過晝-啊。おじさん拄佮人咧拍麻雀當無閒，無法度，參伊小挨拶坐一-下，過差不多成 (tsiaN5) 點鐘我著告辭。

四個麻雀骹我揢看看咧毋欲300歲-啊，攏真厚話，毋 koh8 對答真心適，有的我毋 pat4 聽過：

「骰仔」講「骰九」，聽 khiai9 未輸用國語咧講「禱告」-咧。

骰仔叫著九點，人若講「九頭」，有人著應講「狗頭煠無熟」，抑是「狗頭滴著麻油滓 (tai2)」。

叫著七點講「七穿 (tsuan1)」，有人會接「對面 kuan1 (關？官？)」

叫著五、十講「五出、十出」。

叫著八講「八尾」，有的講「八尾一斤重」。

有人 kau3，錢揢人加算，若 hong7 講「贏掛唬 (hoo2)」，阿伊著應人「輸掛偷摕」。

有的莊官 khioh4 子仔 (li2 a2) 較慢，未堪兮等的著激骨喝講「塗骹 (「頭骹」的諧音)！塗骹-咧？」，莊官著應：「我敢咧處尾頂 (tsuh3 be2 ting2) -咧」。

趣味趣味，罔記。

老台語重注 --- 分張

■ 詞條：

分張

pun1 tiuN1 分張。子供など物を惜しまず人に分與へる氣前 [囡仔等慷慨有量甘揢物件分與人 (lang7) ]。有分張=氣前が好い [有度量]。無分張=氣前が惡い [khiap4 屎、無量]。
(小川尚義《臺日大辭典‧下》武陵，1993：749)

■ 重注：

漢語的「分張」會使做幾囉款解說，其中有一個是「物件分 (pun1)-人」的意思；在我所知，這句話詞，自南北朝開始著已經有咧用啊。

岱初作遺命，分張家財，封置箱中，家業張減，隨復改易，如此十數年。
(《南齊書‧列傳第十三》北京中華，2003：581)
(《南史‧列傳第二十一》北京中華，2003：808)

唐，白居易：
故情分匝向交親，新茗分張及病身。
(《白居易集‧謝李六郎寄新蜀茶詩》北京中華，1991：346)

身飲數杯妻一盏，餘酌分張及兒女。
(同上，《和元微之詩二十三首‧和〈自勸〉二首之二》頁486)

另外像元微之《告贈皇考皇妣文》：
先夫人備極勞苦，躬親養育。截長補敗，以禦寒凍，質價市米，以給餔旦。依倚舅族，分張外姻，奉祀免喪，禮無遺者。
(羅竹風《漢語大詞典‧第二卷》台灣東華，1997：583)

「分張」是物件分-人。
「有分張」是物件有欲分-人，慷慨、有度量。
「無分張」是物件無愛分-人，khiap4 屎、けち。

「分張」亦引申做物件甘 (願意、欲、會出-兮) 分-人，有量；嘛有可能是「有分張」省。

箸「講 ka1 lo2 (4)」我有記講：「主人的大漢兮有『pun1 tiuN1 (分張)』，才會一直招小弟」。
其實，「分張」無一定是咧講囡仔慷慨，形容大人有度量嘛會使用「分張」。

小川尚義講「子供など物を ……」表示：
1.「分張」這句語詞並無一定是用箸囡仔，這著。
2.「物 (もの)」會使當做「物品、着物 (きもの，穿著的物件、服飾)、食物、物事 (ものごと，代誌)」等，表示咧「分」兮無限定是啥麼物件，這亦著。

若講「分張」這句話今仔罕咧聽-著，拍算有影，除了字辭典，箸網路頂仔的文章並無啥人咧用。

個人的看法，陳瓊華 (毋知是先生抑小姐，敬稱省) 對台語的「分張」解說了上合實際、第一正確：

「分張」有分享、分配、分贈、施與等涵意。雖然現在很少聽到這一句話，但在老一輩人的口中長說：「要分張才有福。」也就是「得在於施」的意思，也有「好東西要與好朋友分享」，的含意。

猶記得童年時期，奶奶常常會教導我們這些孩子們：「做人一定要『分張』才會福氣滿滿喔！尤其是瓊華要分張才會『招小弟』ㄋㄟ。」我有三個弟弟，看來是有「分張」吧！
( 陳瓊華《口中有德〜大家來「撿寶」》 )

另外嘛是按網路看-著-兮，潘艷姿亦有誠好的語例：

分張是一種美徳，也是快樂的延伸！咱的話講『有分張』道是「會曉分享」。

咱有時會聽著人講：原住民較有分張。其實平地人有分張的嘛界濟 ……
( 潘艷姿《分張》 )

我較 tsiap8 用的辭典：

1. 教育部《台灣閩南語常用詞辭典》「分張」的詞目釋義：
通常指小孩子慷慨大方願意將食物分給他人。

意思有倚，不過 kan1 naN7 講「通常」的用法；阿事實上嘛無限定講是「食物」分人飵，おもちゃ (玩具；ang1 仔 mngh8、a toy) 肯咸人公家 sng2，嘛號做「分張」。in1 這個解說，無啥齊全。

2.《台灣閩南語辭典》：
【分張】pun1 tioN1，指 (小孩子) 慷慨、大方，願意把自己有的東西分給別人的氣量。例：有分張个人較會招小弟。U7 pun1 tioN1 e5 lang5 khah4 e7 cio1 sio2 ti7. (樂意把自己有的東西分給別人的人比較容易招來弟弟，意思是母親比較可能生弟弟。臺灣人有此一說)。
(董忠司，五南，2001：1060)

《台灣話大詞典》：
【分張 pun1-tiuN1】小孩慷慨分食予他人。阮即個真 ~ ~ goan2-chit4-e5 chin1 ~~ → 我們這個 (孩子) 很慷慨。安爾道無 ~ ~ 呢 an1-ne1 (ni1) to7 bo5 ~ ~ neh4 → 如此就不算慷慨了。
(陳修，遠流，1991：1410)

董教授寫「指 (小孩子)」，「小孩子」這三字是加 (ke1) 寫-的；陳修講「小孩、分食」這爭差了著有較濟。

3.《廈門音新字典》有「ū-pun-tiuⁿ」，無解說。
(甘為霖，台灣教會公報社，2006：564)

《國台雙語辭典》無收。
(楊青矗，敦理，1992)

4. 閩南話今仔應該猶人咧用。
(周長楫《閩南方言大詞典》福建人民，2006：360)
(林寶卿《普通話閩南方言常用詞典》廈門大學，2007：149)

「niau2 鼠」怎寫較好

● 2008,11.03箸「鹭水芗南」有人留言：

借問一下，
niau-chhi（老鼠）的niau（上聲）是啥？
鳥（白話用文言音）？爪（泉州音？http://taigi.fhl.net/dict/gm.php?fn=B/B0542.png）？
多謝。

林先的答覆是：

莫（boo̍h）客氣。(案，boo̍h，著是 booh8)

動物“鳥”，普通話niau，閩南語唸做“chiáu”（白話字）。“鳥”字：「【唐韻】都了切，【集韻】【韻會】丁了切，𠀤音蔦。」(案，這段話準若是引用《康熙字典》的，「𠀤音蔦」應為「丛音蔦」。下文有一個「 側絞切」，同) 照按呢，該當讀做“tiau”（普通話），音同“屌”。中國民間攏有將公的動物（包括儂）的生殖器官叫做“屌”，看勢，屌＝鳥。閩南語共號做 “lān(卵)-chiáu”，意義相共款。

“鳥”字，另外有讀音：「【法華經偈頌】聖主天中王，迦陵頻伽聲。【註】迦陵頻伽，妙音鳥也。鳥未出聲時，卽發音微妙，一切天人聲皆不及，惟佛音類之，故以取况。又【正韻】尼了切，音裊。義同。 (案，【正韻】是明朝的《洪武正韻》)」照按呢來講，即陣普通話共“鳥”讀做“niau”著是根據即个音切，閩南語讀冊音共“鳥”讀做 “niáu”也著會當解說囉。

“鼠”佮“鳥”是兩種動物。是按怎“鼠”，閩南話又佫叫做“niáu-chhí (chhú)”，到底即字“niáu”是啥物？是“鳥”抑是“爪”咧？這hoān-sè著斟酌稽考古文古韻，才有結果。
“爪”，是像形文字，表示動物的kha-jiáu（腳爪），漳音jiáu；泉音正音liáu，不而過即陣攏讀做niáu較儕。普通話“抓、撓”的動作，閩南語漳腔jiàu，泉音對應是liàu（毋佫，咱所聽著的，實際是讀做niàu較儕），這本字，我認為寫做“爪”、“抓”攏會通。當然，若比照即 mái普通話來講，“抓”會較好理解。毋佫，一定是先有“爪”，後才有“抓”。

“爪”字，古冊記載講「〔古文〕㕚【唐韻】【集韻】𠀤側絞切，音抓。【說文】覆手曰爪」，照即个來擬閩南音，通讀做“chiáu”。

毋管是鼠，抑是鳥，in攏有kha-jiáu（腳爪）。所致，有儂講，閩南語所講的“chiáu”（動物），本字是“爪”。也著是講，閩南語的chiáu=鳥＝爪。

總是，按照咱頂頭所講的，“爪”字作名詞的時陣，有即幾種讀音（閩南語）：chiáu,jiáu,niáu。

因為“鼠”（動物）本然嘛有kha-jiáu（腳爪），所致，若講閩南話的niáu-chhí本字是“爪鼠”，看勢嘛是有可能。不而過，若是“正字法”，我無贊成寫做“爪鼠”，我認為猶是寫做“鳥鼠”較bē迷亂。

《诗经•斯干》有寫講「風雨攸除，鳥鼠攸去，君子攸芋……」毋知，當中的「鳥鼠」是啥物意思，隨儂會當去稽考看māi咧。

原來的網址是http://hokkienese.com/?page_id=417，今仔我揣無。

● 隔轉工中晝我有去做一個回應，網址是http://hokkienese.com/?p=412，今仔嘛揣無。

寫「蘇東坡是鳥 (tsiau2)」的時，有去想著這層 (tsan5) 代誌，舊資料揢反 (ping2) 出來，趁閒罔改罔改。

● 一點仔個人的看法，毋知著(tioh8)抑毋著，無掛保證。

1.「爪」有人讀 jiau2，有人讀 giau2，寫做「爪鼠」，人無定著計會讀 niau2-tshi2 / tshu2 / tshir2，感覺上用「鳥鼠」較未看taN7。

2. 無證據講「鳥」字，未用 eh8 講做 tsiau2，都了、丁了切箸中古漢語屬於端母，不過，有人講「丁」箸《經典釋文》內底，亦可能是知母，伊講「伐木丁丁」的丁是讀 tsng1，不管如何，中古漢語的端、知二紐，箸上古漢語攏計歸端母。

上古端母，台灣參閩南讀 ts- 的，頂頭講「鳥、丁」無算，其他的字例猶有未少，比論講：轉 tsuan2 / tsun7 / tsuan7、站 tsam7、貞 / 偵 / 楨 tsing1、徵 tsing1/ tsi2、黹 tsi2、駐 / 註 tsu3。

有一個較特殊的現象，著是日語漢字譯音，毋管是吳音抑是漢音，「鳥」計讀做チョウ，子音 (聲母) 亦是 ts-。阿「丁」的吳音嘛讀チョウ (ts-)，傳入年代較晏的漢音讀 t-。

欲探求、稽考本字，有時仔換一個角度咧，mai7 的確著死釘 tua3《切韻》系統的字書，個人的主張啦。

3. 關於《詩經•斯干》寫的「鳥鼠」，陳榮嵐先是講大部分的注本，計解說做「鳥」參「鼠」，伊認為「鳥鼠」著是「niau2 鼠」，因為古漢語並毋是全無雙音節的詞；另外，伊講「鳥鼠」的成詞比「老鼠」早，箸杜甫的「山空鳥鼠秋」猶有「鳥鼠」這二字。

「鳥鼠」是「鳥、鼠」，古冊內面，毋 kan1 naN7 是箸《詩經》才 (tsiah4) 安呢注的；像講《史記‧夏本紀》，毋管《索隱、正義、集解》或者是郭璞注《山海經》，攏解說做「鳥」佮「鼠」，是兩項物件。

若欲知影《詩經》這句話的意涵，我想，用規句來解讀會較好。

這首詩的全文是：
約之閣閣，椓之橐橐，風雨攸除，鳥鼠攸去，君子攸芋。
意思是，ka7 (處的，tshu3 e9) 枋堵一沿一沿縛乎好勢，用塗填填 (thun7) 乎 tsat8，安呢著毋驚「風雨、鳥鼠」會入來，君子亦因為安呢，所以就會當 (tang3) 安居。

這角的「風雨」若當作「風」參「雨」，「鳥鼠」著是「鳥仔」敿「niau2 鼠」。不而過，《詩經》內底，雙音節詞有夠濟，像：

《召南‧草蟲》，「喓喓草蟲」的「草蟲」是指「草蜢」彼款的蟲，毋是「草」參「蟲」兩款物件。

《甘棠》「家室」是「家後、牽手兮」的意思，毋是「家」佮「室」。

《邶‧北風》「北風其涼，雨雪其雱」，「北風」是雙音節詞，毋是「北」佮「風」；「雨雪」準若是「雨」參「雪」，這表示頂下句，無的確愛有對同 (對文)；準若愛對同，「風雪」就是雙音節詞。這參頂頭「喓喓草蟲」下句的「趯趯阜螽」的情形共款。

所以，我想《斯干》的「鳥鼠」，無證據講著是「鳥、鼠」兩項，niau2 tshir2 / tshu2 / tshi2 寫做「鳥鼠」，會通 (thong1) 啦。

4. 準若安呢，「niau2 鼠」這句話音毋著是等徦有「尼了切」的時代才有兮？

4-1. 是。

「風雨」，今仔咱「風 u2 / hoo7」；「滿意」「buan2 / buaN2 意」；「偉大」，「偉 tai7 / tua7」計有人講，無人知影以後會變按怎。
「合同 (合 tong5)」、毋知今仔猶有人講「合 tang5」，阿「方面 (方 bin7)」講「方 bien7」無 (bo9)？ (我是咧講「台語」oo5)

語音會變。

4-2. 無的確。

古無輕唇、舌上，照二歸精、娘日歸泥、喻三歸匣、四聲一貫、形聲相表裏 ……，毋管這寡講法有理抑無，有一項會使確定的是猶有真濟咱毋知的代誌。

準若毋是錢大昕的發現，無定著咱今仔「方」讀 png1、「芳」讀 phang1、「竹」讀 tik4、「丑」讀 thiu2，煞會誤會按「走音」去。

啥人敢保證佫幾年仔，「gia5 / giah8 狂」未與「搦狂」取代 -去，「削骨肉 (sioh4 kut4 bah4)」著計讀 siah4 kut4 bah4，甚至攏改講做「喙 phe2 肉」。

換句話講，準「鳥」箸明朝進前的某一個時、空，著有人讀「niau2」，只是猶無人去發見著。(案，tsia5 是指《洪武正韻》，根據曹德和的考釋，「鳥」按「都了切」改讀「尼了切」可能始於宋代)

佗一個才著，或者猶有其他的可能，我有影未曉兮。

我的看法，免想 hah4 濟啦。不管如何，箸目前「niau2 鼠」寫做「鳥鼠」，比「老鼠、爪鼠」攏較合適。

● 有閒兮才鬥想看 bai7 咧，心適心適。嘛毋免講愛內行，有興趣著OK啦。