伶俐

●「伶俐」這個語詞是徦宋朝才有兮，應該是明代了後才開始大量使用兮，像講《水滸傳》、《西遊記》、「三言兩拍」等，內底著有未少用例，台語「伶俐 (ling2 li7)」減采是口語化的書面語。有一個真趣味的現象，照《康熙字典》講 -兮：「俐，《字彙》力至切，音利。今方言謂黠慧曰伶俐。○ 按，「俐」字諸書不載。」(北一，1974：32。案，其實箸《字彙》進前的《龍龕手鏡》北京中華，2006：36，人部去聲著有「俐，音利」。阿漢語的「伶俐」，嘛毋 kan1 naN7 孤會使做「黠慧」講若爾：比如，蘇東坡《稍遍 (春詞)》：「撥胡琴語，輕攏慢捻總伶俐」的「伶俐」是「輕巧、輕盈」的意思；湯顯祖《紫釵記》：「要你兩頭迴避，不如死一頭伶俐」，做這「あっさり」的用法自古著未少。另外，嘛會使做「清氣相」解說，參閱下文《拍案驚奇》的例句) 字典無講這是佗位的方言，m7 koh4 《水滸傳》等這寡書的作者計是吳語區的人士**，講「伶俐」應該是吳語，嘛算合理的推測，準若有人摕來做閩語源於吳語的佐證，毋知會通 -未？

箸台語「伶俐」這個語詞，會使做幾 naN7 款解說：

1. 清氣相 (siuN3)，著是愛清氣、整齊，事項 khioh4 徦真四是 (sir3 si7)。例：

冰箱便若有人開過，著驚人手無清氣，緊用巾仔拭拭 -咧，佫用酒精消毒。傷過「伶俐」，嘛會與人講是「tsi1 li5」。
(「老台語重注--- 支釐」)

媽媽拭桌我拭椅，
媽媽煮飯我洗米，
媽媽洗碗我洗箸，
也閣沃花顧小弟，
媽媽真歡喜，
講我真伶俐。
(「真伶俐」)

2. 骹手帇疌 (liap8 tsiap8)、做代誌扭搦 (liu2 liah8)，偏漳腔有講做「骹手猛 (me2)」。例：

中風了，嘴歪一爿，腳手袂伶俐，穡頭做袂來 ……
(王昭華「花埕照日‧青草膏的滋味」)

即號空課，對漁工來講，硬硬是食技術的，骹手著伶俐（léng-lī），愛著猛掠（mé-lia̍h）佫熟手，chiah 賺食伊會倒。
(林建輝「外洋漁工的故事 (1～10)」)

3. 一般是阿老 (o1 lo2) 囡仔、查某人聰慧靈敏、目頭巧，以早是毋是照《台日大辭典》寫 -兮，講做「ling2 lai7」，我毋知 (案，甘為霖《廈門音新字典》臺灣教會公報社，2006：435，做「ling2 li7」)。例：

阮上台語課 真輕鬆 真趣味
臆謎猜 學諺語 體會祖先的智慧
看圖講故事 唱歌閣演戲
盤喙錦 答喙鼓 阮攏真佮意
阿爸阿母真支持
定定呵咾阮 乖巧閣伶俐
阮是快樂的囡仔庀
全家歡喜講台語啊講台語
(黃阿惠「歡喜講台語」)

因為塔卡莉毋nā伶俐 (léng-lī)，儂佫生做緣投，自來着真得大副疼。
(林建輝「外洋漁工的故事 (1～10)」)

4. 穑頭做 -起來輕可、容易，例：

看伊擔二百斤尚更伶俐。(khuaN3 i1 taN1 nng7 pah4 kun1 ia2 koh4 ling2 li7)
(小川尚義《臺日大辭典‧下》武陵，1993：993)

一個人辨 (辦) 得伶俐伶俐。(tsit8 e5 lang5 pan3 tit4 ling2 li7 ling2 li7)
(同上)

5. 比較特殊 (su5) 兮 ──「無伶俐」著是 lam2 nuaN7，佮「伶俐」共款，計用箸人身的行為模式。不而過，古册嘛有揢「伶俐」當做事物的性態形容詞，「無伶俐」變做講「無正當、未見眾的代誌」，今仔台語若 (naN2) 像無這款用法，例：

小娥既是男扮了，申蘭如何肯留他一個寡漢伴著妻子在家，豈不疑他生出不伶俐事來？
(凌濛初《拍案驚奇‧卷十九》，桂冠，1984：277)

那尼姑也是個花嘴騙舌之人，平素只貪些風月，庵裏收拾下兩個後生徒弟，多是通同與他做些不伶俐勾當的。
(同上‧卷三十四：514)

**
施耐庵，祖籍是泰州海陵縣或蘇州吳縣閶門 (今江蘇蘇州)，一說錢塘 (今浙江杭州)人。
吳承恩，淮安山陽縣 (今江蘇省淮安市楚州區) 人。
凌濛初，浙江烏程 (今吳興區織里鎮晟舍) 人。
馮夢龍，南直隸蘇州府長洲縣 (今江蘇省蘇州市) 人。

● 在我的了解，相關的辭書：

1.《臺日大辭典》解說了上精確：「ling2 li7 伶俐。① (女又は子供など) 小ざっぱりとして締のある。きちんとして綺麗好な。─ ─ 的查某 ＝ 同上の女。② 易しい。容易な。看伊擔二百斤尚更 ─ ─ ＝ 彼は二百斤の重荷を擔いで平氣な樣だ。一個人辨得 ─ ─ ─ ─ ＝ 一人で容易にやってのける。」
(小川尚義，武陵，1993：993)

tsia5 的「こざっぱり」是講清氣整齊彼囉感覺，「その子はいつもこざっぱりした服装をしていた」意思是「彼個嬰阿看 -起來定定嘛 tsing7 徦真清氣相。」

「(女又は子供など) 小ざっぱりとして締のある」一般是講查某人抑囡仔等清氣相，「きちんとして綺麗好な」普通是咧講愛清氣、整齊。《台語辭典(台日大辭典台語譯本)查詢》揢這兩句話翻譯做「(女人或 gín-á 等) 細粒子 koh 結實」，林俊育先生的根據是啥，我未曉；不而過，台語的「伶俐」並無解說做查某人抑囡仔細粒子佫結實。

2. 台灣教育部線頂辭典《台灣閩南語常用詞辭典》對「伶俐」的解釋是 (1.) 輕便。(2.) 指人聰明靈巧。(3.) 動作靈巧。

後兩義無問題，但解說做「輕便」著有討論的空間；辭典的語例：「伊衫仔褲穿甲清氣閣伶俐」，台灣國語應該翻做「他服裝穿得乾淨又整齊」比「他服裝穿得乾淨又輕便」，較合實際。

3.《國台雙語辭典》講「伶俐」是「聰慧的；活潑聰明靈巧，做事乾淨俐落」，這是照國語詞彙「伶俐」的解說，咸台語若 (naN2) 有差一氣 (khui3) -仔。
(楊青矗，敦理，1992：40)

4.《台灣閩南語辭典》：箸「伶」字目講：「(通常形容女孩子) 聰明、靈敏。例：伶俐。」傷過簡省，其實這個語詞台南的用法，參其他的所在並無啥差。
(董忠司，五南，2001：847)

5.《台灣話大詞典》的解說嘛有欠點，編者講「伶，伶俐也，言行輕快整潔、賢慧等稱頌女人之詞。」事實上「輕快整潔」嘛會使用箸別位，丈夫人做代誌緊、捷 (tsiap8)、快，共款會使講骹手伶俐，無限定是咧「稱頌女人」。
(陳修，遠流，1991：1093)

● 我 pat4 請教過閩南地區的網友，講台語「伶俐」除了講骹手敏捷、目頭巧、衫褲清氣整齊以外，佫有「清氣相 (siuN3)」的意思，例「這個姑娘仔真伶俐，處內摒掃徦一塵不染。」閩南地區敢有這款講法？in1 的回覆計是肯定 -兮，比如：

léng-lī 有。
意思嘛共款，閩南民間真常用著。
(林建輝，2010年11月3日上午11:53，Email)

「伶俐」，甲同安無差 kah 半項。
(kua，2010年12月15 日 at 18:09:29)

當然，猶有其他網友的賜教，講法計共款，阿 in1 彼朋出的辭典嘛有收錄這個詞條：

1.《閩南方言大詞典》紹介了不只仔褿全 (tsau5 tsng5)：

【伶俐】〈廈漳〉liŋ3 li6〈泉〉liŋ3 li5 ① 聰明；靈活：即个囝仔真 ～。② 敏捷利索；乾淨整齊：做代志真 ～。│穿插樸實 ～ (穿戴樸素整齊)。
(周長楫，福建人民，2006：433。案，標音換做TLPA廈漳音是 ling2 li7、泉州音是 ling2 li3；「俐」黃晉波《當代泉州音字彙.》讀陽去調，《彙音妙悟》碁母柳音陰去有收「利」無「俐」-字，「俐」是來母，讀陽聲調是常例，當然，嘛有例外；不過，我聽過的鹿港佮泉州音，「伶俐查某」naN2 全講做「伶 li11 查某」，毋 pat4 聽過人講「伶 li55 查某；有機會才佫斟酌看 bai7 -咧)

2.《普通話閩南方言常用詞典》無講著「清氣」：

【伶俐】lǐnglî 敏捷；整齊。
(林寶卿，廈門大學，2007：327。案，標音換做TLPA是 ling2 li7)

日語嘛有「伶俐 (れいり，亦有寫做「怜悧」)，意思是「巧 (khiau2)」，但是台語的「伶俐」毋是源於日語的外來詞，這參「俳優」這句外來詞拄倒反 (ping2)。(參閱「源於日語漢語詞彙的台語略說」)