貼消膏

■  想 *徦hia9，寫 *徦hia9

   最近看苦苓怹定定箸鄭弘儀佮于美人的節目做台語的「說文解字」，講咧吐連涎是有較無禮貌(「吐連涎」唸做「thoo3 lien5 sien5」，是多義詞，無的確是歹話；阮一個長輩不時嘛咧數念，講以早若招金龍仔 ── 著是信介先，去酒家啉酒攏免開チップ代，彼寡查某嬰仔乾若聽伊咧吐連涎著夠氣啊，連ながし嘛歡喜gah8，有當時仔嘛會做サービス *兮；「夠氣」唸「kau3 khui3」，心滿意足。  阿tsia5的「吐連涎」加「est」，著無較hiah4雅，號做「騙囡仔kan3尻穿」)，因為怹是娛樂觀眾，無可厚非。  一時手giauN1，加減寫一滴仔罔止癢(tsiu7) *咧。

■ 風火頭，風火、癀火

台語「風火頭」教育部網路辭典的釋義是：

氣頭上。例：伊當佇風火頭，你千萬毋通去惹伊。I tng tī hong-hué-thâu, lí tshian-bān m̄-thang khì jiá--i. (他正在氣頭上，你千萬不要去招惹他)。

「頭」的時間點箸「風火」，照辭典的講法「風火」是「火氣、怒氣。例：伊風火夯起來矣，你愛較細膩咧。I hong-hué giâ--khí-lâi--ah, lí ài khah sè-jī--leh. (他的火氣上升了，你要小心一點。)」，看khiai9有通，其實這個解說有討論的空間。

一、「風火頭」無的確愛解說做「當咧受氣、發怒的時」，譬喻講汝麻雀拍徦當熱，連莊八佫起手等(tan2)，連放尿都未顧 *兮啊，hiong5 hiong5有人行倚去招保險，穩當與汝「碰丁(借字，唸「phong3 ting1」，歹聲嗽、大聲罵)。  這並毋是講汝箸咧受氣的時，人去賣保險；因為汝這是手氣當順、緊張刺激、愛全神貫注，伊拄箸汝「風火頭」的時陣去五四三，當然嘛會與汝嚷。

佫舉一個例：阮隔壁一個少年兮tshim2學會曉跳舞，怹老母講學生仔愛有學生仔的款；欲跳舞，等出社會機會ia2真濟。  當然嘛講未聽，都開始咧痟(siau2)若爾。  老母走去投怹諸姑(ta1 ke1)，老歲仔講，過 *一久仔才處理，今仔(tsim1 maN2)當咧風火頭，急亦無效。

這寡「風火頭」是指對某一項事、物拄發生興趣的時，彼種熱沸沸(liet8 phut4 phut4，狂熱)、沉迷或者急切、注神的心緒，無定著是「拄咧受氣」的時。

小川尚義《台日大辭典》「風火頭」的語例：「伊在荒賭，此候當在風火頭，共伊講都無彩工( i1 teh4 hong1 kiau2，tsit4 tsun7 tng1 teh4 hong1 he2 thau5，ka7 i1 kong2 to7 bo5 tshai2 kang1)」，著是這個意思。

二、《台日大辭典》「風火」日語的解說是「心熱、逆上」，日語「心熱(シンネツ)」有「体内の熱、情熱のこと」兩款解說；小川氏的例句「風火發」解說做「逆上せる」，「逆上(ノボセ)」應該是咧講「狂熱、沉溺」。  林俊育先生「《台日大辭典台語譯本》查詢」翻做「心火熱」著無伊「風火頭」這條翻兮hiah4嫷氣。  因為tsia5「体内の熱」是「腹內發燒」，阿「情熱のこと」是指「激情、狂熱」；台語用「心火熱」表達了較未hah4明確。  當然，嘛毋是指「發怒、受氣」。

三、以上的用法，無分地域、腔口。  另外，台語箸偏廈、漳腔的所在，有其他類似的語詞，「hong³³火著(toh8)、hong³³火發」，一般寫做「風火著、風火發」，比喻教育部的網路辭典。  這個「hong³³火」單指「受氣、發怒」，參《台日大辭典》「風火頭」做「心熱、逆上」的「風火」音sang5、詞義有爭差。

偏泉的所在嘛有相sang5的語詞，怹講「hong¹¹火著(toh8)、hong¹¹火發」；顯然這個「hong¹¹」的漢字毋是陰平的「風」，應該是陽平的「癀」。  理由之一是無論佗位的腔口，「發癀」攏有「發炎、腫脹」、「受氣、發怒」兩種用法。  理由之二是泉州話「風火頭、發癀、癀火」的用法佮台語是一致 *兮，但是「風火頭」講「huang1 her2 thau5」，「發癀、癀火」講「huat4 hang5、hong5 her2」。

所以教育部這個「受氣的hong³³火」著愛寫做「癀火」。 《台日大辭典》「癀發」這條嘛講會使做「受氣(腹が立つ)、「盛怒、暴怒(逆上する)」解說；tsia5的「逆上する」讀做音讀「ぎゃくじょう」，佮「風火」彼條的「逆上、逆上せる」用訓讀唸做「のぼせ、のぼせる」無sang5，意思嘛無共款。

四、患部發癀，會腫hang3、一模(boo5)紅紅，有兮會癢(tsiuN7)、會痛、會燒ho7燒ho7；但是無漉膿甚至嘛毋看兮一點白白若(laN2)欲puh4膿的款，猶未徦患動的程度。  發癀箸在早，上簡單兮的處理方式的是怙冷的鹽水洗洗 *咧，後 *來嘛有用ホウサン(著是「硼酸」)透水消毒。  準若無效，著去青草仔店、拳頭館抑漢藥店買消膏來貼。

消膏是膏藥的一種，膏藥有人講藥膏，藥膏無的確是膏藥。

■ 膏藥，藥膏

膏藥是膏藥褙箸布、油紙抑蠟紙的頂頭，摕來貼咧患部兮，欲用的時一般愛先烘與軟，這毋是內服的藥品。  藥膏有外用亦有內服，外用兮除了做膏藥，嘛有直接抹tiam3患部，像今仔的メンソレータム(華名「面速力達母、曼秀雷敦」)、フルコート(華名「膚潤康」)相sang5。  內服的藥膏毋是藥水，藥水無煅麥芽、糖、蜜……，像「枇杷露、濟眾水」，若有用蜜等煅 *過兮，比論「枇杷膏」，著算內服的藥膏。  藥水嘛有外用兮，比如「紅藥水、目藥水」。

膏藥嘛真濟款，欲去傷解鬱、活血行氣，治生頭發尾、燒傷凍瘡、筋骨痠痛、撓(lau2) *著𢶀(tshuai7) *著……計有無同的膏藥，若「消膏」是專門咧消腫退癀兮。  台語有一句五仁話「貼消膏 ── 無癀」，「癀、妨」咱攏唸「hong5」，「無癀」著諧音變「無妨」，唸「bo5 hong5、bu5 hong5」計會通。

■ 貼消膏 ── 無妨啦

咧簡覆網友dongxie箸2012年七月初三留言的時，感覺伊尾仔：

一、「岑」台語讀「琴」或「吟」。

二、古文獻上有「帇疌」一詞否？

三、「ki3念」是「記念」。

這三個問題有一個共通點，計是咱字、音有爭議、疑問的字詞。  想欲了解與清楚，是好代，毋佫若用另外一個角度來想：

本字的稽考若毋是有特殊的目的，個人認為無必要傷鼓吹，考求本字毋是揢(ka7)母語訂一個規範，一般人看看咧著好囉。

我主張語、文是約定俗成的，欲怎寫，在人的；只要會使清楚的表達家己想欲講的，別人看有也接受安呢就可以。(「人比儂氣死人」)

總講一句，這三個問題對咱普通人，並毋是介重要。  咱的母語，有人欲講、欲聽、欲寫、欲看、欲做節目，著阿彌陀佛啊；人按怎講、按怎讀、按怎寫都攏可以、都攏無妨，計較hah4濟是自揣麻煩徒增困擾，對母語的推廣顛倒是一種阻礙。  上無，箸現仔時這個階段是事實，嘛是現實，個人的想法啦。

■ 附記

     誠久以前，長輩有兩囷(khun5)カセット，是李鴻禧教授箸謝長廷服務處(若像是台北東區服務處的款，服務處的主任是前總統府代理秘書長卓榮泰)的講演帶。  我會記得李教授有提起「台語的嫷」，著是用「開、開開、開開開」佮「去hiang1港買phang1香(「新聞挖挖哇」來賓的牌仔「phang1香」寫「香香」)」做例。  講演結束有留與佮聽眾對話的時間，來賓當中有洪惟仁先生，洪 *先有發言，講來成立一個推廣台語的團體(單位？組織？)，請李教授tshua7頭抑擔任榮譽(名譽？)發起人。  李教授並無接受，乾若(laNh8)有講理由的款。  因為テプ無錄完(聽講古早這款錄音帶凊采創創 *咧，摕去競選演講場兮，著賣徦siah4 siah4叫，品質有影足古 *兮。 tsia5的「足古」是「足au3古」的意思)，年代亦久啊，佫是細漢綴大人聽兮，細節記了未hiah4褿(tsau5)。

講「𡳞」

     咱tsia5以早有一句講「lan7」的俗語號做「生 *字無偒頭」，所以箸我刻板的印象，台語「lan7」是「安呢寫 *兮」(這頁的頭一字)；當然，我知影這是土字，因為字書頂頭揣無。  尾手箸林金鈔先生的《閩南語探源》看 *著，才了解原來「生 *字無偒頭」會使寫做「𡳞」；查《彙集雅俗通十五音》、《廈門音新字典》的結果，嘛用這字。  不而過，因為我電腦拍未 *出來，進前我計用標音兮或者用「卵」；徦有一工箸潘科元台語文理想國看 *著這字，才拜託ROROサン怹替我鬥用，一寡以前無才調拍的字，著盡量揣來與我。

     無佫用「卵」並毋是認定「𡳞」著是本字，是因為「卵」*字咱自本著有「luan2(卵生、卵翼)，lng7(雞卵、煎卵)」兩讀，若佫再加一音，感覺上有較茹。

「𡳞」*字是隈(ui3)明朝萬曆年間，宣城人梅膺祚所編撰的《字彙》開始有兮。  《康熙字典》：「𡳞，《字彙》良慎切，音吝。閩人謂隂也。《正字通》按方俗語有音無字，隂不必別名𡳞」，這句話個人有一屑仔感想：

第一，「慎」是去聲字，但是「lan7」箸老偏泉腔老派(鹿港、台西)佮泉州音是陽上調，實際調值敿偏同廈漳真相sang5，唸「lan²²抑lan³³」；準若是去聲，怹著變讀「落難」的「難」，佮咱tsia5的「懶、咱」同音，是高降調「lan⁴²」；「懶、咱」怹是讀高平調「lan⁴⁴抑lan⁵⁵」，差不多是偏漳、廈這兩字的變調：這字佮台西、鹿港聲調未合，欲講是本字有較困難。

第二，真明顯「𡳞」*字是「因聲創字」，但梅膺祚的收字包含未少當時的通俗字，這寡通俗字未必是梅氏家己發明兮；通俗的用字並無一致，阿《字彙》編撰是欲「庶備同文之一助焉(《字彙‧序》)」；《字彙‧凡例》嘛講：「上古有音無字，上古以字通音，輓近又沿字而又失其音，蓋以韻學未講，而仍訛襲舛，莫知適從也」，無分通語抑方音。  張自烈講：「方俗語有音無字、不必別名」根本著無尊重、或者講未了解作者寫書的宗旨。  當然，通俗字是「用字」，毋是本字，佮寫「生 *字無偒頭」無啥爭差。

     梅膺祚所指的「閩人」毋知是講佗位的福建人，照講應該是當時的省城福州會較大面；今仔福州話「男陰」號做［lɸy1 iu2］，「𡳞脬」號做［liŋ7 pha1］，［ɸy］是陰聲韻，敢會是陰陽對轉，我未曉；不過，若是［iŋ］著有合。

     台語「lan7」的本字，個人較贊同陳冠學、周長楫、林寶卿等諸位先生用的「卵」*字；卵，《廣韻》盧管切，來緩上合一，中古漢語「來」紐台語發l-，「桓(緩換)」合一字的「搬(pan1)、潘(phan1)、半(pan3)」等，有讀-an的韻；共款是「來」母的「兩」*字，台語文讀「liong2 / liang2」，話音是「lng6 (偏泉腔老派)、lng7」，「卵」台語唸「lng6、lng7」符合佮中古漢語的對應。  「卵」*字箸《黃帝內經》著有準「𡳞核」的意思咧用，其他做「𡳞」使用的古冊嘛誠濟，比論《醒世姻緣傳》有「卵脬」、《金瓶梅》有「卵鳥嘴」。

     台語參「𡳞」相關的語詞誠濟，揀幾個仔今仔較少用兮，罔心適。

     鍾年晃先生箸「新聞挖挖哇」講一位有錢人(我記憶中應該是張榮發先生的款)講馬政府是「𡳞muaN7政府」；在座包括來賓鄭佩芬小姐，攏箸hia5會(he7)「𡳞muaN7」是啥意思，印象中無人蒦了正確。

照《台日大辭典》講是「陽物の毛」，教育部網路辭典寫做「𡳞蔓」佫加一條釋義：「皮。形容厚顏無恥、流氓樣、不要臉的樣子。例：彼个人有夠𡳞蔓的。Hit ê lâng ū-kàu lān-muā--ê. (那個人有夠不要臉的。)」，比《台日大辭典》有小可仔較倚意，但是ia2無夠傳神。  「𡳞蔓」毋是大面神、未見笑，嘛毋是鱸鰻胚、鱸鰻鱸tshuaN7的人，「𡳞muaN7政府」毋是「未見笑政府」、「流氓政府」的意思。  台語的「𡳞蔓」是多義詞，古早我毋知，我問會著的範圍，無人當做「陽物の毛」。

「𡳞蔓」這個語詞較上捷(tsiap8)咧使用兮是形容「驕傲、愛癀，但是無本事」，例：「he1鄰長是無人欲做才通輪徦伊，無叫伊「鄰長伯仔」煞會共(kang7)罵，毋知咧蔓啥siau5。」  阿嘛毋是講有本事的人著未𡳞蔓，這參「屎桶、屎撥(puah4)」略仔欲kang5，例：「趁過面著毋佮咱tsui1換帖 *兮相交插，誠𡳞蔓。」

台語的「𡳞蔓」咸閩南話的「𡳞蔓」無共意思，雖然怹嘛毋是當做「陽物の毛」。  照周長楫《閩南方言大詞典》，怹的「𡳞蔓」是指無本事：「罵人話。說人軟弱無能；沒本事；孱頭：連囝仔也拍輸伊連小孩也打不贏，真𡳞蔓│𡳞蔓腳數無能之輩。」  台語的「無能」有未少用語通形容，比論「無效、無路用、下痟」，「拍輸lang3 kang5著未赴 *嘍，佫箸hia5𡳞蔓，拄與人摏 *死」。  阿「𡳞蔓政府」是有本事的「𡳞蔓政府」，或者是無能的「𡳞蔓政府」*咧？  這著愛參考講的人，伊頂下句是啥，抑是講話的口氣、場合，才會當分辨。  譬喻：「kan⁴²！𡳞蔓。」咱乾若知影是咧罵人(人，隨前變調，讀lang7)，無法度理解按怎才𡳞蔓。

     台語有一句「𡳞tshuaN1」，tshuaN1，教育部網路辭典綴林俊育先生寫做「扦」、《廈門音新字典》用「閂」、《台日大辭典》用「𣟴」；前兩字中古漢語「先、刪」兩韻台語無讀「uaN」的字例，「扦」是「𢳍」，「𢳍」的本字是「𢸯」，「扦、𢳍、𢸯」計是宋朝以後的新字，無適合用古音通轉；「𣟴」的似還切「邪」紐「仙」韻，台語會使讀「tshuaN1」，不過「𣟴」是「關門機也」，字義無合，恐驚兮攏是借字。  周長楫寫做［上竹下殘］，千安切，竹籤也，周氏講：「今泛指竹、木的針狀小刺_兒」，音有合、字義亦倚，爭差無講毋是屬「竹、木」類的「掌甲(tsng2 / tsing2 kah4)tshuaN1」敢會使用這字。  陳冠學有兩種講法，箸《南楚之外》：「凡草木刺人，北燕、朝鮮之間謂之茦，或謂之壯。自關而東

或謂之劌。按，『茦』即臺語ts’a̍k‧『壯』即臺語ts’oaⁿ。『劌』即臺語koeh。」  另外箸《一本最古老的字典之印證與糾正》伊講：「『莊』，可能是芒刺，臺語叫ts’oaⁿ。」  拍算是講「去與tshuaN1 tshuaN1 *著」，漢字可能是寫做「去與莊壯 *著」的款。  過去有一位教我漢文的先兮，伊講「tshuaN1」的本字是「㦰」，子廉切，刺也，銳意也；我認為中古漢語「鹽」韻台語嘛無唸「uaN」的字例，雖然字義較kang5。  毋管按怎，我認為目前寫做「扦」上理想，筆畫少、電腦拍會 *出來、國語咸「千」同音佫好記，取一步方便。

「𡳞扦」是講人細粒籽、無夠分量、與人看無夠重的人，是貶義詞；嘛會使講做「屁that4、屁that4仔」，參今仔咧講的「sut8仔」意思差不多。  以前講「sut8」是「拐、騙、siaN5」的意思，例：「這隻老豬哥一寡錢與貓仔sut8了了」；「囡仔哭未扂，阿毋先揢sut8 *一下」；「講徦會飛天會鑽地，than2毋通去與sut8 *去，股票未上兩萬點啦」。  「sut8」寫做「訹」，這字按先秦徦漢代的古冊都有用例。  「訹仔」是著是正經頭路毋做，以「拐、騙、siaN5」為業，想欲推軟仔的無路用人；是毋是後 *來有衍伸義，變佮「𡳞扦」欲同意思，我毋知。

     這段是阮以早的漢文先生講 *兮，我認為有道理，sua3手寫參 *落去：

「𡳞sui1」一般搦準是部位的頭部，毋是，「𡳞sui1」嘛是指全部；「包sui1」著是「包莖」，「莖」是「陰莖」，毋是陰莖的頭部。  共款的概念，「茶䀇sui1」毋是「茶䀇喙」；「茶䀇喙」摃破，是喙口的部位受損，「茶䀇sui1」摃破，可能是規支sui1受損。  茶䀇出sui1未順，大部分是sui1出問題，咸喙的關係較少(所以茶䀇、tiong1仔罐攏會做「蜂siu7」，防止茶心that4咧sui1兮)。 

哪會講做「茶䀇sui1」*咧？佮茶䀇耳共款，以形號名。  「sui1」寫做「脧」，一般照《說文》解說，講「朘」是「紅嬰仔的𡳞」，根據是《道德經》：「含德之厚，比於赤子。毒蟲不螫，猛獸不據，攫鳥不搏。骨弱筋柔而握固。未知牝牡之合而朘作，精之至也。終日號而不嗄，和之至也。」  因為有「赤子」著認為「脧」是「紅嬰仔的𡳞」，阿「號」*咧？箸tsia5會使解說做「嬰仔咧哭」，但並毋是講大人咧哭著毋是「號」；所以「朘」箸tsia5是「嬰仔的𡳞」，但未必講大人的𡳞著未使用「朘」。  咱當做這角的「朘」是「嬰仔的𡳞」好啦，但是詞義會變，比論「腳」按「脛」變「足」；今仔「𡳞鳥、𡳞面」客話是講「朘仔(苗栗、屏東內埔音，tsoi1 e2)、朘面(苗栗、屏東內埔音，tsoi1 mien3)」，這是現實的例。

「朘」《廣韻》是「臧回切」，精灰平合一，台語會使唸「tsui1」，中古漢語「精」紐台語無發「s-」的字例。  朘，《說文》：「从肉夋聲」，《說文》頂頭有「夋聲」兮，通共二十字，照《廣韻》的音切揢分做四組：

A組「焌、皴、䞭、餕」四字

B組「俊、悛、浚、捘、脧、逡、畯、竣、㕙」九字

C組「晙、駿」兩字

D組「梭、狻、酸、陖、鵔」五字

A、B兩組音切的頂字包含中古漢語「精、清」等台語無發「s-」字例的聲紐，攏總十三字，佔65%。  C組「晙」有「子峻、私閏」兩個攏訓「早也」的音切，後者「心」紐，台語會使發「s-」，駿 *字「子峻」切，台語未使發「s-」，但又音「峻(須閏切)」，嘛是「心」紐，台語發「s-」；D組五字，攏是「心」紐，台語計發「s-」；加起來七字，佔35%。  這是《廣韻》的音切。

但準若佫揣《玉篇》、《集韻》，B組九字攏有發「s-」的另讀；換一句話講，《說文》內面「夋聲」的二十字，有十六字台語會使發「s-」佔80%，比例算真懸。  何況台語「超越《切韻》系統」，「夋聲」的字咱讀「s-」講「異」讀著咧酷行阿，絕對毋是訛讀。

「朘」另有「縮」義，台語「龜朘(ku1 sui1)」(嘛會使講「ku1 mooN1」，一般寫做「龜毛」)，著是鄙相人做代誌伸 *咧勼 *咧、未アッサリ。

先生的道理，伊講：「朘」做「𡳞、縮」是文同義異；發「ts-、s-」是音轉失讀(「精、清、從、心」鄰紐對轉)；讀「sui1、tsoi1、syn1(香港粵語)、［tʃɸy1］(廣州話)、ㄐㄩㄢ」是八方音殊；解說做「𡳞、赤子陰」攏無問題，這是庶物易名。   著是有這寡現象毋才這呢複雜，所以研究漢語音韻、字書、訓詁等等的專文敿專冊，才會hah4濟。

     sua3 *落來欲寫的是參「𡳞」無直接關係的字，台語「sui1」嘛是「啉酒」的意思，例：「拄有菜配，欲來sui1 *一下無？」、「時機䆀䆀 *仔，haiN3頭仔罔sui1」，這個「sui1」毋是「朘」，愛寫做「嗺」。  嗺，《集韻》蘇回切，促飲也，或从妥，寫做「哸」亦可以。  形容物件鬚鬚(tshiu1)會垂(se5 / ser8 / sue5)，台語講「sui1」，寫做「蓑」；例：「布邊愛縫(pang5)，無，會蓑(今仔用手縫兮較少 *嘍，計怙機器，縫布邊的機器一般攏講「掃布邊兮」，專業用詞是「オーバー」，車布邊著講「掃オーバー」；「オーバー」的全名號做「オーバーロックミシン」，台灣國語講「拷克、拷克車」)」、「穿(tshing7)褲激拖塗，*兩工仔褲骹著蓑 *去」。  鬚鬚兮若是直豎狀，講做「tshang3」，「tshang3毛(管)(驚惶、抑寒的時陣，動物的生理反應；禽鳥張羽)、tshang3鬚」的「tshang3」；鬚鬚兮若是四界烏白tshang3的輻射狀號做「giang3」，「giang3牙、草giang3」的「giang3」。

     上尾溜來講一個「藝術話」，「𡳞(鳥)面」是罵人「椎(thui5)椎、未曉好䆀、毋別芳臭」；若嫌歹聽，會使換一個較未hiah4粗喙的代用詞──「褲thiN3 / theN3」(這字箸教育部的網路辭典拍「thinn3」揣無，愛拍「thenn3」才有一個替代字「牚」。這寡先兮敢是講有參考《廈門音新字典》、《臺日大辭典》？毋知是無聽 *過未曉，抑是恍惚失覺察)，意思完全相kang5，「thiN3」著是因為「朘作」，揵(king7，拄tiau5 *咧)咧褲 *兮的意思。