周長楫教授語錄簡評019---肉脯

■ 差不多半年前，我箸 周長楫教授語錄簡評002---有興趣的來蒦覓咧 內面提起著箸咱 tsia5，有彼囉十外歲仔著學台語，講十外年阿，徦 taN1「肉酥」、「肉脯」猶未曉分的語文學者 ……。

拄好這幾工仔王順隆先生的 blog 亦咧討論這項代誌：

【肉酥】bah4 soo1
【魚酥】hi5 soo1
台灣人的傳統菜餚裡絕對少不了這兩樣加工食品 …… 台日大辭典未收錄這兩個詞彙，只蒐錄了類似的食品 －－【肉脯】bah4 hu2、【魚脯】hi5 hu2。
在今日的台灣，由於口感風味不同，【肉酥】、【魚酥】的能見度絕對超過【肉脯】、【魚脯】，但是在早期卻正好相反。或許前者是較晚近才開發出來的加工法，但【肉酥】和【肉脯】兩者的加工過程有何差異，我不知道。如果有讀者了解詳情，還請賜教。

福建的朋友，你們也有【肉酥】、【肉脯】嗎？
(2009,07,14台湾語の広辞苑-肉酥／魚酥)

我所了解的，福建有「肉酥、肉脯」這兩項加工食品，只是閩南地區「肉酥」的講法參咱無同而已。

因為王先生發文著有一禮拜啊，猶無看兮福建的朋友來指教，我著小家婆一下，去伊的 blog 做回應。

●「脯」台語亦會使讀做「poo2」，「poo2」著是「乾 (kuaN1)」的意思，「魚脯」嘛會使讀做「魚 poo2」。有人驚「魚 poo2、魚 hu2」用共一字會亂去，所以「魚 hu2」著改用做「魚拊」，「魚脯」著是「魚乾 (kuaN1)」專用，讀做「魚 poo2」；當然，「肉 hu2」嘛寫作「肉拊」。

針對讀做「poo2」的用法，我先簡單記幾字仔：

「魚乾」台語講做「魚脯 (下骹計讀 poo2)」，魚脯亦有幾仔款，像：but8 仔脯 (白白，足細尾的，一疕疕仔)、liau5 仔脯 (較大尾)。

「菜脯」是專指菜頭去曝的乾，毋是「菜乾」的括稱；菜頭礤簽才落去曝乾的，號做「菜脯米」。
曝乾的高麗菜、匏仔、筍仔著講「高麗菜乾、匏仔乾、筍乾」，毋是講「高麗菜脯、匏仔脯、筍脯」。

「肉脯」較少人咧講啊，像古早若箸日頭骹曝傷久，有人會問：「是咧曝肉脯啊？」過去亦有人講：「是咧煏羓 (piak4 pa1) 喔？」今仔計攏講「是咧曝肉乾是毋 (連音，讀 sim32)？」較濟。

「羓」亦是「肉乾」，這字可能是徦唐、宋才有的語詞。台語嘛有衍伸做「ta1」的意思，「煏羓、烘羓、鳥仔羓、san2 pi1 羓、牛屎羓」，kau3 taN1 猶算日常用語。

「羓、脯」嘛會使摕來用做罵人的話，像講「臭頭羓」、「死囡仔羓」、「死囡仔脯」；但毋別 (m7 pat4) 聽人咧罵「臭頭乾」、「死囡仔乾」。

另外，「脯脯」亦是「攝攝 (liap4)、naiNh4 naiNh4、ta1 疕疕、皺皺 (liau5 liau5)、乾乾 (kuaN1 kuaN1)」的意思。例：
橐 (lak4) 袋仔脯脯、蔫 (lien1) 脯脯、老奶脯 ……。

● 部份的閩南話詞參台語的話詞，有的看起來欲 kang5 欲 kang5，其實是有差別的。譬喻講「寒著 (kuaN5 tio3)」的台語參閩南語，全會使講「感冒」。但對某一種人、事、物無爽，台語嘛可以講「對 …… 感冒」；這句若換做閩南話，意思是咧講「對 …… 有認同」，相差十萬八千里。不過，將來有可能整合做 kang5 一種意思，我講的是辭典的注釋。

這篇主要是欲講，咱咧佮人講代誌的時，咧用非母語的語詞，若有較生疏、罕咧用的，上好先了解、探聽一下，千萬毋通 (thang1) 望文生義、家己想家己著 (tioh8)，這會與人捎無，有時仔佫會去與人搦包。

● 我箸 周長楫教授語錄簡評018---洋蔥 提起某君未使憑周先生一句話，著引述講周先生比對董忠司先生的辭典，講有 90% 左右的語詞參閩南方言是相同的。箸舉三個「未確定」的例況了後，我佫講有足濟無 saN1 sang5 的「狀況」。

周教授揢台語的「洋蔥、蔥頭」搦準是參 in1 共款講「北蔥」，是「狀況」之一；伊對「肉脯 (以下攏改讀做 hu2)」的解說，又佫是另外一種「狀況」。

照這囉範勢看起來，我箸 周長楫教授語錄簡評006---古意 推測講：

「我相信 …… 若欲用『辭典』來比對，佫三、五年仔周先生若有新編、改版的辭典、或者新的論述，無的確『他們跟我們的詞彙』會變做『99％以上是一樣的。』」

無定著會與 (hoo7) 我蒦 (ioh4) 徦準準準。

■ 周長楫講：

脯 hu2 肉乾：鹿 ~│兔 ~。按，閩南對肉乾一般叫 [乾] 或 [巴]。[脯] hu2 指某些特製的絨狀的肉、魚類食品：肉脯 bah4 hu2│魚脯 hi5 hu2。

【魚松 (案，「鬆」的簡體字，下同)】hi5 sang1 用魚類的肉加工製成絨狀或碎末狀的食品，也叫魚肉松。
(周長楫等《普通話閩南方言詞典》福建人民，1982：223、954)

【肉脯】〈廈漳〉bah4 hu2〈泉〉mah4 hu2，hiak4 hu2 一種食品。參看 648 頁【肉松】。

【肉松】〈廈漳〉bah4 sang1 一種乾而鬆散的瘦肉加工食品。特製成絲狀的叫 "肉脯"。
(周長楫《閩南方言大詞典》福建人民，2006：648)

【魚脯】〈廈漳〉hi5 hu2〈泉〉hir5 hu2 魚松，用魚肉加工製成的絨絲狀食品。
(周，2006：22)

■ 事實上：

● 台語的「肉脯」參「肉酥」是兩種無共款的食品。雖然計攏是用豬的腈肉 (tsiaN1 bah4，著是赤肉、sian2 肉) 去做的。但若用外觀比較起來，隨時著分 (pun1) 會出來。

茸茸一絲一絲的台語是「肉脯」，台灣國語本來是無適當的對應語詞，不過，有人去揢「正名」，號做「肉絨」。

粉粉碎碎、幼幼一粒一粒的是「肉酥」，國語叫做「肉鬆」。但是揢「肉脯」正名做「肉絨」的先覺，煞講「肉酥」才是「正名」，「肉鬆」是俗名。

in1 講「肉絨、肉酥」是「現今中國國家標準之正名」，列位中國的朋友啊，安呢寫逐個敢攏看有？

● 用豬的赤肉去加工的食品，參「肉脯」略仔欲 sang5 的，猶有「肉絲、肉條」，氣味、口感佮外形共「肉脯」攏無有爭差。

周教授 in1 所講的「絲狀的肉脯」，咱 tsia5 佫有分做幾仔囉款，當然，每一款有每一款的的叫法，食品的名稱計無同，這句語詞的用法，咱參閩南話無一致。

■ 我的看法：

● 閩南地區確實有「肉脯」參「肉酥」。一兩年前，一個晉江的朋友參我開講的時，伊有講過，從 in1 做囡仔著有「肉酥」、「肉脯」這兩種食品；伊今年三十偒 (thong2)，因為伊對母語相當注心咧研究，佫加上伊的長輩計七十外啊，日常攏用晉江話咧交談，所以母語有比同沿的加真深入。

「肉脯」in1 講 mah4 hu2 ( in1 泉州 b- 真濟計講做 m-，廈門著講 bah4 hu2)，有的講 hiak8 hu2。
「肉酥」in1 講 mah4 sang1、bah4 sang1，應該是照 in1 的普通話「肉松 (鬆)」直接讀土音的。我咧蒦，這表示「肉酥」毋是閩南的傳統食品；若無，in1 這個食品的名稱，應該參台語 saN1 sang5 會講「肉脯」，毋是講「肉鬆 (sang1)」。

昨 hng1 我用電話問過將近五十個人，包括食品行，講「肉 sang1」無徦一個別 (pat4)。

● 咱台灣參「肉脯」類似的產品，種類較濟，名稱亦無 kang5。

1990年代初，一位長輩去南京，有 kuaN7 咱 tsia5 的食品禮盒做伴手，in1 朋友講箸南京無咧區別「肉脯、肉條、肉酥 ……」，一律號做「肉鬆」。當時的南京只有一間箸新西街口的四星級飯店，彼個時陣講號做「涉外單位」，kan1 naN1會使用外匯參外匯券，無收人民幣。

tsim1 ma2 佮過去無 sang5，各種條件佮過去亦有改變，而且各地的飲食文化應該亦無的確計攏共款；閩南除了有「肉脯、肉酥」以外，拍算亦有別項的肉類製品。不過，若照周教授的詞典，in1 這寡食品的名稱應該亦是濫濫鬥陣，因為伊揢絨狀 (周，1982)、絲狀 (周，1982) 的攏是叫做「肉脯」。

周長楫教授的認知是：絲狀的叫「肉脯」(周，2006)，參台灣的講法無同。
箸台灣，傳統的「肉脯」有較死鹹，「肉絲、肉條」較有甘味。「肉脯」是幼絲兮，較柔軟；「肉絲、肉條」較硬身 (ting7 sin1)。「肉條」上粗、上耐哺，有的喙齒 bai2 兮著飵無啥法的。

論真講起來，「肉脯」是「絨絲狀的」，「肉絲、肉條」是「絲條狀的」，周教授 in1 hia5 無分 (pun1) 徦 hiah4 清。

● 台灣的字書，對「肉脯」解說了較正確的是教育部《臺灣閩南語常用詞辭典》：

詞目：肉拊
音讀：bah-hú
釋義：[名] 肉鬆。用肉類加工製成的絨狀的食品，乾而鬆散。

解說了有問題的是：

(1) 陳修《台灣話大詞典》講：「【肉脯】乾肉。乾肉之幼如綿者。」

有毋著，前者應該是「肉乾」，若無愛讀做「肉 poo2」才著，有一款較薄的肉乾，有人號做「肉紙」。總講一句，「乾肉」未使講做「肉脯」。

(2) 董忠司《臺灣閩南語辭典》：「脯 hu2，一、置魚肉於熱鍋中加力研揉，所製成的絲狀或細條狀之物。例：魚脯、肉脯。…… 」。

有毋著，(a) 敢有人看過「絲狀或細條狀」的魚脯？(b)「絨絲狀」的號做肉脯，「絲狀、細條狀」較幼的是「肉絲」、較粗的是「肉條」。「肉絲」若毋是「絲狀」，哪會號做「肉絲」。

有人會想講台灣的董教授參閩南的周教授，毋是計攏講共款的，「肉脯」是「絲狀」應該無錯啊？阿這嘛免相諍 (sio1 tsiN3)，汝去有咧賣肉脯、肉絲、肉條的食品行，凊彩摘 (tiah4) 一項仔，看 in1 會摕毋著與 (hoo7) lin7 未。

台灣的中華穀類食品工業技術研究所，傳統訓練特別班系列的課程，著有結合市面實作應用技巧，提供不同的專業加工方法 ……，包括：臘肉、板鴨、肉酥、肉絨、豬肉乾(肉脯)、牛肉乾、肉條、肉角、肉絲、中式香腸、臘腸 …… 等。
(網址是：www.cgprdi.org.tw/training/traditional_info_special7-12.htm)

現仔時閩南的「魚脯」是以前的「絨狀或碎末狀」(周，1982)，抑是有一種「絨絲狀」的嘛號做魚脯的新產品 (周，2006)、或者是林寶卿先生講的「線狀」(《普通話閩南方言常用詞典》福建人民，2007：158)。我毋知，亦無必要傷去了解，橫直我知影1982年以前，台語參閩南語的「魚脯」是共款的，上慢箸2006年著變做無 kang5。

● 有一個現象真心適，著是周教授上早講：

「閩南 …… [脯] hu2 指某些特製的絨狀的肉、魚類食品：肉脯│魚脯。(周，1982)」，敿台語「肉脯 (hu2)」的講法是 kang5 意思的。

但是經過十幾年後，煞變做絲狀的 (周，2006)。

這參董忠司《臺灣閩南語辭典》(董，2001) 講肉脯、魚脯是「絲狀或細條狀」同款。

這是啥麼情形啊？欲佫來蒦一下無 (bo3)，好耍 (sng2) 好耍：

(1) 董教授講了參事實有出入 (「事實」著是箸台灣「肉脯、肉絲」有分)，周教授敢會是綴 (te3) 董先生才毋著的？

講周教授是「綴」的，一方面是董先生的辭典早伊的辭典五年，阿周先生較早的辭典佫毋是安呢講的；一方面是箸2007年林寶卿先生講：「【肉松】ròusōng〖肉鬆〗bbāhsāng (碎末狀的)。〖肉脯〗bbāhhù (絨狀的)。(林，2007：466)」平平是「閩南方言」的辭典，解說哪會無 kang5。我想，林教授是無愛「綴」，毋是「綴」無著陣。

後班 (pang1) 我才來記一篇咱台灣的辭典綴閩南辭典，佫綴了毋著的實例。

阿汝綴我、我綴汝，徦尾仔使驚毋 (sai2 kiaN1 m7) 兩朋的辭典若雙生仔咧，啊使佫比對。

(2) 無相綴 (bo5 sio1 te3)，董教授講了參事實有出入，周教授拄好亦毋著 (準閩南的「肉脯、肉絲」有分的時)。

阿毋著的對毋著的，這敢有科學？

(3) 無相綴，董教授、林教授講了參事實有出入，周教授是著的 (準閩南的「肉脯、肉絲」無分)。

阿董先生「毋著的」去對周教授的「著的」，準若共款，董教授的「毋著的」敢會變「著的」(台灣的「肉脯、肉絲」變無分)？

● 我講過，台語參今仔的閩南語攏是按古早的閩南語演變來的，是共一個祖語，這未毋著啦。(過熨斗)

我咧反對網友V君主張「閩南話是爸，台語是囝」的時，嘛講過：

「共祖先湠落來的敢干但『爸仔囝』？攏無其他的關係？少缺 (tsio2 khieh4) 人 in1 叔伯兄的孫比伊較濟歲 …… 單單用直向的歷時差異無法度釐清橫向的共時差異語音變化的現象 …… 我有咧變，汝嘛有咧變，徦路尾有時仔嘛會成做兩種的語言；今仔的閩南人參同款語系的潮汕、蒼南對話就有困難，若莆田、海康、海口(海南島)著閤較免講囉 ……。」
(案，這篇無收錄箸這個 blog，不過有的網友有看著，C、R、S君亦有提出問題)

插兩個仔題外話，有網友寫講 in1 kang5 字勻的「儂都卜做安公咯，我猶未結婚 …」。 (夏日里的春夢-施府喜事臨門)
現實的情況是論輩無論歲啦。

莆田的「魚脯」怎講，我未曉的。但是根據書面資料，in1「鹹鴨蛋」講「tou42 loe21」、「木耳」講「pak5 mi31」……。

學術界已經將「莆 (田) 仙 (遊) 話」獨立做另外一種方言，雖然「莆仙話」嘛是按古早的閩南話演變出來的。

無 kang5 著是 無 kang5，會變著是會變，這著是事實。

是按怎偏偏著有人無欲 (抑是講毋敢) 面對事實咧？

想無！

■ 附記：

● 這篇亦是咧補充與 (hoo7) 王順隆先生回覆的急就章，寫了若有落鉤、失覺察的所在，歡迎諸位先進指教補正，亦請包涵。

王先生有回覆：

我也曾想過【魚酥】是不是就是【魚脯】，因為我從來不曾見過【魚脯】。
但是我不曾見過，並不足以證明【魚脯】不存在，有更多的可能只是因為我孤陋寡聞而已。目前我還是寧願保留【魚脯】、【魚酥】和【肉脯】、【肉鬆】一樣，是兩種不同的產品。也許某個世代的人，某個地區的人就是真有吃過【魚脯】、【魚酥】這兩種食品。唯有這兩種食品都吃過的人能證明兩者相同的時候，才能說【魚脯】就是【魚酥】。
您詳細解析各本辭典的解釋，試圖論證hu2和soo1的區別。基本上我覺得這個方法有缺陷。
編過辭典的人就知道，基於辭典的性質和篇幅所限，對譯和解釋不可能100％詳實。一本辭典少則上萬，多則數十萬個詞目，不可能針對每一個詞條長篇大論，一定會經過編者的簡約和整理，這其中就產生了遣詞用句的問題（別說還有遺漏掉的）。拿一個詞條的對譯去質疑作者，實在太苛責了。如果是一篇論文，就必須承擔所有的指摘和評論。

我以前在學日語的時候，拿著辭典的解釋去質問日本人老師，就被他打槍過。他說：「如果辭典寫的內容就足夠的話，根本不需要老師了。」
多年後我才體會出這句話的意義何在。

1. 個人認為自底台語的「魚脯」有包括「魚酥」，差別是炒焙的程度，「魚脯」炒焙的程度無「魚酥」hiah4 懸而已。

王先生認為：

「我也曾想過【魚酥】是不是就是【魚脯】，因為我從來不曾見過【魚脯】。但是我不曾見過，並不足以證明【魚脯】不存在 …… 也許某個世代的人，某個地區的人就是真有吃過【魚脯】、【魚酥】這兩種食品。」

這種假設毋是無可能，準若古早著有分「魚脯」、「魚酥」，安呢我本來寫的有關「魚脯」的內容，著未當 (tang3) 成立。因此，這部分我先刣掉，等徦揣有新的事證佮事例了後，再佫補充。

2. 伊講我「試圖論證 hu2 和 soo1 的區別。基本上我覺得這個方法有缺陷」。

無咧，我上要緊的論點是台語的「肉脯、肉絲、肉條」有區別，參閩南話有爭差。

3.伊講：

「基於辭典的性質和篇幅所限，對譯和解釋不可能100％詳實 …… 拿一個詞條的對譯去質疑作者，實在太苛責了。」

這我著有無同的看法：

3.1 個人認為辭典毋免「詳」，但是愛「實」。 毋 naN7 是辭典，所有的論述計嘛是愛「實」。「無實」亦毋是講攏挑意故的，有時仔是個人主觀的看法，著是安呢，毋才有所謂的「討論」。

3.2 我並毋是 kan1 naN1 摕一個詞條若爾，以後的 maiN2 講，進前的加加咧，嘛有十外個。

3.3 這哪是苛責，阿無敢愛 tiN1 毋知？

4. 王先生講：

「在學日語的時候，拿著辭典的解釋去質問日本人老師，就被他打槍過。他說：『如果辭典寫的內容就足夠的話，根本不需要老師了。』」

這我想無，「拿著辭典的解釋去質問」的對象，應該是辭典的作者毋才著。辭典敢毋是計嘛有印講類似「不吝賜教」的語詞，無敢咧寫心酸兮、寫看 hong2 的？

汝去質問老師，這共老師啥 ti7 tai7？毋 hoo7 拍銃才怪。

5.多謝王先生的回覆，亦期待所有的朋友鬥指教。
(2009,07,26補)

● 王先生：

多謝汝的回覆。
汝的意見我有囥箸我的 blog，亦有寫一寡看法，簡單踮 tsia5 回應一下，省 hoo7 汝佫走去看。

(1)「也許某個世代的人，某個地區的人就是真有吃過【魚脯】、【魚酥】這兩種食品。」這個假設毋是不可能，我毋 pat4 同時飵過【魚脯】、【魚酥】。所以這部分我先刣掉，等有新的事證佮事例，我才來補入去。
(2) 我上要緊的論點是台語的「肉脯、肉絲、肉條」有區別，參閩南話有爭差。並毋是像「汝講的試圖論證hu2和soo1的區別」。
(3) 汝這句「基於辭典的性質和篇幅所限，對譯和解釋不可能100％詳實 …… 拿一個詞條的對譯去質疑作者，實在太苛責了。」我不敢從，亦不敢不議。第一、我認為辭典無「詳」未啥要緊，但是未使無「實」。第二、我並毋是 kan1 naN1 摕一個詞條若爾，這抑 (案，應為「亦」) 毋是最後一篇。第三、這哪是苛責，阿無敢愛 tiN1 毋知？
(4) 汝講「拿著辭典的解釋去質問日本人老師，就被他打槍過。他說：『如果辭典寫的內容就足夠的話，根本不需要老師了。』」這我想無，「拿著辭典的解釋去質問」的對象，應該是辭典的作者毋才著。辭典敢毋是計嘛有印講類似「不吝賜教」的語詞，無敢咧寫辛酸兮？去質問老師，這共老師啥 ti7 tai7？免講嘛去 hong5 拍銃。
(5) 若有問題，勞煩汝繼續賜教，箸這個 blog 討論著好，我會補記蹛我的 blog。
loo2 lat8
hiku 於 2009-07-26 07:42:23 留言

板主 (王順隆先生，下同) 回覆：

通常獨力編寫的辭典，代表的是一家之言，也就是反映編者的認知。我所認知的「實」，和辭典編者所認知的「實」，如果有所不同，那就有以下幾種可能：
1. 我對，編者錯。
2. 編者對，我錯。
3. 兩者皆錯。
4. 兩者皆對。
一般人通常最容易迷失的是只想到第1個選項，也認定是唯一的選項。
依標準程序，這個各有25％可能性的選擇題的正確答案，必須經由嚴整的論證，再公開接受各方評論，最後依多數人的意見才能做出決定。這就是我說不必太苛責辭典的原因，因為編辭典的人不可能每一個詞條都以這樣的標準去做，除非這是一個國家級的計畫。

我常常在想，每一個詞條背後，應該至少都要有一篇好論文做支撐，這樣才能編出較完善的辭典。台語界還沒有累積出足夠的學術論文，所以目前每一本台語辭典都還不盡完善。之前，您寫的【氣口】那篇文，個人覺得可以視為樣板之一。
另，我是拿著日語辭典去質疑老師的說明，因為當時我認為一本辭典的地位高於一個日語老師。結果老師告訴我辭典只能是辭典，不足以奉為聖經。當時我體會不出他的言外之意，後來才知道原來是我很不懂事。

我的看法：

1. 毋管啥人認知的「實」，只要參編辭典的人無 kang5，若欲摕出來討論敢著是「苛責」？

2. 古今中外少缺一寡大部頭的字書，毋是「國家級的計畫」，摕日本來做例，岩波書店的「広辞苑」、三省堂的「大辞林」、小学館的「国語大辞典」、大修館諸橋轍次的「大漢和辞典」、「広漢和辞典」等等。阿若咱 tsia5，台灣商務的「辭源」、台灣中華書局的「辭海」……。

3. 周教授的《閩南方言大詞典》是 in1 「"十一‧五"國家重點圖書出版規劃項目」，毋知這是王先生咧講的「國家級的計畫」抑毋是？

4.「國家級的計畫」敢著未毋著？根據資料：

王引之等有一本《字典考證》，其中考證出《康熙字典》有兩千五百外條的錯誤。

日本人渡部溫的《康熙字典考異正誤》，查出錯誤達11,700幾條。

1988 年北京中華書局出一本王力的《康熙字典音讀訂誤》，這本書我無讀過，聽講王氏搦出來的錯誤有上 (tsiuN7) 萬條。

●「魚脯」佮「魚酥」無仝喔！阮阿母上gâu脯魚脯，我足愛食~

阮阿母脯魚脯的方法：

1. tshng-á魚(鮪魚)抹豆油、米酒先豉--一睏矣，才共炊予熟，撥做一細塊、一細塊。

2.大鼎熱，hē一sut仔油，khiàn蒜頭(蒜頭先用菜刀拍拍兮)，蒜頭出味，tshng-á魚落鼎開始puē，一爿那puē，一爿用煎匙共tshng-á魚「gíng」開。這過程中愛閣hē豆油、酒、胡椒、五香。

3.靠一支煎匙，一直píng、一直gìng。細細塊的tshng-á魚，佇鼎裡「脯」甲變魚脯，水份愈來愈少，但是無法度像市仔咧賣的魚酥遐礁鬆、遐酥。

這馬的人毋知影魚脯，我推斷，可能是食品加工專業化、商業化，有「魚酥」這款產品上市了後，罕兮有人佇厝家己脯魚脯，「魚脯」這个詞才會變歷史去。若毋是拄好阮阿母會脯魚脯(足厚工!)，我可能嘛毋捌這味；自細漢到大漢，我嘛干礁食過阮阿母脯的，毋捌佇別位看過魚脯。(愈寫腹肚愈枵…)
cit_lui_hoe 於 2009-07-26 12:01:02 留言

板主回覆：

感謝一蕊花的通報，原來真是我的孤陋寡聞。
還好我沒有附和【魚脯】就是【魚酥】的說法。

我的看法：

敢安呢？

在我的了解 cit_lui_hoe 咧講淡水名產的「魚酥」，是魚漿去 tsiN3 的，kui1 條、kui1 塊 (te3) 的。

毋是王先生咧形容的：

「台灣人的傳統菜餚裡絕對少不了這兩樣加工食品，因為這是小孩子最喜歡的食品之一。」

「【肉酥】、【魚酥】的能見度絕對超過【肉脯】、【魚脯】」。

「照理講，【鬆】無可能讀作【soo1】。感謝汝的說明，我即知道為何民間一般攏寫作「肉鬆」，原來有語源的背景。」

我參王先生咧會本來是是台灣國語「魚鬆」，cit_lui_hoe 無去注意著，阿王先生煞亦未記兮去，呵呵。

● 歹勢，脯魚脯的方法3.，是「gíng」較著(「輾」的意思)，我拍毋著去…
cit_lui_hoe 於 2009-07-26 12:13:08 留言

板主回覆：

請問【脯魚脯】的第一個【脯】是不是也讀作hu2？
如果是的話，那麼【脯】也可以當作動詞了。

我的看法：

「hu2 魚 hu2」的頭一個 hu2 欲講是名詞做動詞，個人認為，這猶有一睏仔通 (thang1) 討論咧。

● 無錯，是讀「hú」，做動詞用。

華語的「橡皮擦」，阮講是「hú-á」(hú變調變第一聲)，譬如：鉛筆字寫毋著去，「提hú-á hú」(拿擦子擦)、「提hú-á hú-hú--leh」(拿擦子擦一擦)、「hú-á hú起來、hú清氣」(擦子擦起來、擦乾淨)，才閣重寫。

「hú-á」的「hú」佮脯魚脯的「脯」，我想有可能是講仝一个動作(狀態？)，就是共一細塊物仔(如：橡皮擦、鮪魚)，透過手力，磨甲變「hu」(灰)、毋過閣猶未夠「hu」(粉狀)的程度。hú「hú-á」的時，會產生「hú-á屎」(橡皮擦屑)，「hú-á屎」的形，佮魚脯略仔有成...

這只是我個人的理解佮推測。「hú」做動詞，用華語我會安呢解說「施力於塊狀物，使其『屑』化」。除去「hú-á」、魚脯、肉脯，我目前閣想無其他的「hú」。
cit_lui_hoe 於 2009-07-27 11:31:34

板主無回覆。

我的看法：

1. 有的所在 an eraser、a rubber 講號做「拭仔、石拭仔、樹奶拭仔、樅奶拭仔」，in1 是講「摕拭仔、石拭仔 …… 拭拭咧」，這是用動詞做名詞。

用「hu2 仔 hu2」的 hu2 無定著參「拭仔」同款，是動詞做名詞嘛無的確。

2. 董忠司的辭典嘛講做「脯肉脯、脯魚脯」，不過，講「擂 (lui5)、研 (ging2、gaiN2)」的所在，in1 嘛講「肉脯、魚脯」，並毋是講「肉擂、魚研」。

注意，有的講「擂、研 (gaiN2)」的所在，並無用「hu2」這個近似語詞。

3. 董先生寫做「脯肉脯」是根據啥貨，這我未曉啦，因為這字傷深。

準若有人講「牌 (排) 牌仔」、「磚仔磚磚 (裝裝) 與 (hoo7) 好勢」，我著知影寫毋著。

「hu2 魚 hu2」的動詞參名詞，嘛有可能是 kang5 音無 kang5 字。
(2009,08,24補)

周長楫教授語錄簡評018---洋蔥

■ 網友 J 君講箸台灣的網路頂頭，有人 (下骹稱伊做「某君」) 安呢寫：

「廈門大學中文系教授周長楫在廣播節目介紹閩南語的源流，他最近主導完成了《閩南方言大詞典》，雖然不知道這本辭典是否有統戰意味，但它證明福建閩南語和台灣閩南語的相似程度非常高，90% 的台灣閩南語詞彙都能在漳泉廈三地的語言尋得，這對一些昧於事實，硬要聲稱台語和閩南語是兩種不同語言的人，是一個有力的反證。」
網頁是：http://blog.yam.com/joshua_yap/article/9057378
(2009.07.14 補)

問我看這寡話有正確無，我回 J 君講無意見，無意見毋是接受佮無接受的問題；因為這 kan1 naN7 是 giah8 香綴拜、 khioh4 屎尾的角數 (kioh4 sio3)。若是某君家己有才調寫新的論述，J 君欲問我講有正確無，這嘛較差不多。

J 君對我坦白講，伊對某君有成見，雖然知影這段話，絕對有問題，但是無法度指出問題箸 to2 位，叫我無論如何著愛參伊討論一下。

我講準伊 mail 與我的這段話無抄毋著，若安呢，問題是出咧「思路」，in1 兩個計犯著思路無清楚的毛病。

毋是講 hau3 呆的、頭殼歹 (phai2) 去的人，思路才會無清楚；巧巧人咧會 (he7) 代誌，準若去與某種「思維定式 (mind-set)」的定身法釘著 (tiau5) 咧，有時仔アタマ嘛共款仙轉 (tng2) 著轉未過來。

因為 J 君著是去與「對某君有成見」這個 mind-set 的綑仙索縛著咧 (pak8 tiau5 le3)，所以頭腦未清楚，無法度做客觀的分析。

其實，某君講的這寡話，一般人真簡單著會使搦 (liah8) 出來伊無合理的所在。譬喻講：

1. 廈門大學中文系教授周長楫寫辭典，準若有「統戰意味」這嘛無毋著，阿飵人的飯生成 (siN1 sing5) 著犯人的問，這毋是問題，OK啦！

某君家己講的，連周先生這本辭典有咧統戰無，伊著毋知，是按怎會使認定周教授講的是「有力的反證」，阿「硬要聲稱台語和閩南語是兩種不同語言的人」著是「昧於事實」？

拜託兮，從 (tsing5) 古早 kau3 這當今，世界上正常的外交、條約、協定有的著真真假假啊，欲用來統戰的物件敢的確著是正實 (tsiaN1 sit8) 的？某君啥麼攏毋知，叫是長頭鬃兮著是查某兮，凊采著捎來引用。分明是唱白的 (tshing3 peh8 e3)，著算是統戰的文宣、刊物，無是欲按怎。

mah4 kuh4 準若是安呢，阿伊寫這句「雖然不知道這本辭典是否有統戰意味」，毋著咧加無閒兮？抑是咧放屁安狗心，叫人愛綴伊相信？這是我講伊思路無清的頭一點。

當然，我毋知彼寡「聲稱台語和閩南語是兩種不同語言的人」，到底是啥人，代誌好好仔講毋才著，哪會使講用「硬要 (硬欲 ngiN7 beh4)」的？這敢是真早已前揢鳳飛飛、康弘、黃西田禁唱的彼班 (hit4 pang5) 人？若無 kan2 會 hiah4 拗蠻 (au2 ban5)。(案，毋知有影抑無影，是最近康弘箸電視節目頂頭講一層囥著心肝內幾仔十年的秘密，當年白色恐怖的時代，因為鳳飛飛無愛陪一個「大粒 lu1 兮」去飵飯，著去與人叫伊以前的骹仔，khia1 空揢修理，禁唱幾仔月日。這個節目是于美人主持的，來賓猶有林淑容。)

是講彼個單位箸二十幾年前著與人「勘定 (カンジョウ) 去啊」，阿無某君敢會是咧餾古早當原初的古董？

2. 漳州話參泉州話的「相似程度」，會比閩南語敿 (kiau1) 台語的「相似程度」較下無 (khah4 ke7 bo3)？安呢，漳州話參泉州話是一種相同的話，抑是兩種無同的話？或者著一定愛「硬要聲稱漳州話和泉州話是兩種不同的閩南語」才會使的？

某君毋考慮「兩種不同語言」這句話會使做幾仔種的解說，著掃射 giah8 咧亂亂 tsuaN7，指責人「昧於事實」，這是我講伊思路無清的第二點。

3. 其實，周教授 kan1 naN7 講：

「可拿該 (《台灣閩南語辭典》) 所收的詞語跟本詞典所收的方言詞語做比較，大約 90% 左右的詞語與廈門、泉州和漳州三地閩南方言的詞語是相同的。」
伊並無提出具體的資料講 90% 這個數據是對 to2 來兮。

啥人知影，這 90% 敢有包括：

a.) 今天在福建閩南話裏已經少用或不用，而在台灣閩南話裏還經常使用。(周長楫《閩南方言大辭典‧台灣閩南方言概述》福建人民，2006：29)

b.) 像「乌狗」、「乌猫」就是从台湾流传过来的 ……。(《帅哥叫"乌狗"靓妹称"乌猫" 闽南语新词拟编入方言词典》)

c.) 原本 (箸福建) 是講做廁所（chhè-sò·：屎礐）的「便所」參福建原底無對應的講法的「便當」。 (林建輝2009年5月3日 下午 8:56 )

…… 等等，周教授若無講，啥人會知？這攏會使咧隨條仔摕出來討論。

足濟無 saN1 sang5 的「狀況」，我摕頂篇 周長楫教授語錄簡評017---青紅燈 講的「蔥頭」做例，佫寫一篇仔。

我講某君思路無清的第三點，著是伊用這款無確定的資料做相罵本。

4 某君引用人的材料，替人宣傳，煞咧煩惱人周教授有咧統戰抑無；按結果論來看，顛倒是某君咧做統戰。阿知是某君揢人準做 gien3 頭兮，抑是伊家己 gien3 毋知，這是我講伊思路無清的第四點。

阿某君的 mind-set 是啥？雖然我毋別 (m7 pat4) 伊，以我的的經驗，嘛普普仔 (phoo2 phoo2 a3) 蒦會出來。這個人穩當是若看著、聽著、甚至是想著「台語」或者「台灣話」的字眼，著會 giah8 狂、睏未去；有的較嚴重兮，無定著佫會ヒステリー (hysteria)、語無倫次。

是講準某君亦是「飵人飯兮」，我以上的推論著計未成立。據 J 君的看法，無啥可能啦；所以我著加減講、加減寫，罔做消遣。

■ 周長楫講：

普通話 (國語) 062：洋蔥
臺灣閩南話：北蔥 pakchhang (pak4 tshang1)
(周長楫《閩南話的形成發展及台灣的傳播》台笠，1996：247)

■ 其他字書及文獻：

【洋蔥】yángcōng∥〖北蔥〗bākcāng〖霸蔥〗bàcāng〈泉〉。
(林寶卿《普通話閩南方言常用詞典》廈門大學出版社，2007：646)

蔥頭 tshang33 tau24 洋蔥頭
(張振興《臺灣閩南方言記略》福建人民，1983：95)

■ 事實上：

an onion 台語講「洋蔥」、「蔥頭」…… 老沿的有人講「タマネギ (玉葱，tamanegi)；無人講「北蔥」，像：

蔥頭。玉蔥。(小川尚義《臺日大辭典》)
蔥頭。草本植物。原產在地中海東岸、西亞細亞、伊朗。葉子中空，形狀像蔥但很細。花小，色白。長在地下的鱗莖也稱為「洋蔥」，為扁球狀，紅紫色或白、褐等色，可供食用。有人講「大蔥頭」。(教育部《臺灣閩南語常用詞辭典》)
【蔥頭】洋蔥。(董忠司《臺灣閩南語辭典》、楊青矗《國台雙語辭典》、陳修《台灣話大詞典》)

但是頂頭這寡辭典的詞條計無收「北蔥」。

「北蔥」是閩南話的一般的講法 (周，2006；林，2007)，箸福建，東山島講「番蔥」，福州、莆田、永安講「洋蔥」。(中嶋幹起《福建漢語方言基礎語彙集》東京外國語大學アジアアフリカ言語文化研究所，1979：34)

若咱台灣「北蔥」佮「三星蔥」、「四季蔥」共款，攏計是蔥仔，差別是品種、產地無同。

有的辭典講「蔥頭」亦會使解說做：

蔥の白根。(小川尚義《臺日大辭典》)
根莖類。指蔥的根莖部分。(教育部《臺灣閩南語常用詞辭典》)
蔥之頭。蔥根。(陳修《台灣話大詞典》)

這小可有問題，事實上，台灣口語無安呢講啦，計嘛講「蔥仔頭、蔥仔根」，毋才未參「洋蔥」濫鬥陣。阿若書面資料，我著無清楚囉，但是欲安呢寫嘛無啥可能；譬喻講藥單、食譜，若揢「蔥仔頭、蔥仔根」記做「蔥頭」，免驚兮人知影汝咧講啥。

■ 我的看法：

雖然張振興這本《閩南語方言記略》內底，亦有一寡寫了無正確的所在，但是伊講台語的「蔥頭」是「洋蔥頭」，比周先生誤做「北蔥」(周，1996) 有影加較高明。

周教授《閩南話的形成發展及台灣的傳播》的「主要參考文獻」五十二本內底：

我會使確定是箸台灣發行的有《切韻與方言》(張光宇，台灣商務，1990)、《台灣閩南語語法稿》(楊秀芳，大安，1991)、《臺灣河洛話聲調研究》(洪惟仁，自立，1990)，攏總3本 (案，這本書的書名小可仔怪怪，我才查看 maiN7 咧)。

無法度確定出版地點的是林書嘉《南靖與台灣》(華星，1993)，佮兩篇張光宇刊箸《中國語文》有關吳語的論述。

有關台語的專著，kan1 naN7 一本1983年福建人民出版社發行，張振興的《臺灣閩南方言記略》。

佔這本書 (周，1996) 編幅一半的「閩南話在臺灣的傳播和發展」，周教授參考台語的相關著作，竟然只是一本毋是箸台灣出的、毋是由台灣人寫的《臺灣閩南方言記略》，佮一本咧講語法、一本咧講聲調的書。

我欲講的是，周這本冊的台語語料，伊的根據是啥？阿敢有佫チェック過？

所以伊毋才會毋知影華語的「洋蔥」，台語是講「蔥頭」，嘛會使直接講做「洋蔥」。不但安呢，佫去摕一個閩南語的「北蔥」，櫼落去做台語，講著是台語的「蔥頭」。

這本書其他的內容，我未曉兮，毋敢評論，但是箸台語的這部分，講一句較失禮的，實在是毋啥的通恭維 (bo5 siaNh4 e3 thang1 kiong1 ui5)；因為伊寫著的 (tioh8 e3)，咱一般的人計嘛知，但是有一寡箸台灣的日常用語，伊嘛會鬥毋著去。残念的是台灣亦有人照抄，PO箸網路頂面，拍算是將這寡錯誤的講法，叫是台灣個別地區的流通語。

毋是我講的著完全正確，因為這是根據我主觀的認知，雖然較無把握的計有經過求證，但我期待有人提供無共款的看法，這是我欲箸網路發表的目的。
一方面是欲留存紀錄，有外濟作用我無法度預測，根屬咱啊毋是咧亄著啥 (it4 tio3 siaNh4，《方言》荆汝江湘之閒，凡貪而不施者謂之亄。郭璞注講：「亦中國之通語」，但古籍頂仔，若無用例。周長楫做「忆 (憶)」，非)。不而過，上少會與一部分的人，感覺著「盡信書不如無書」這句話，可能有一點仔道理。

周長楫教授語錄簡評017---青紅燈

■ 有人問我講「ハンドル (a handle)」台語敢會使講「方向盤 (hong1 hiong3 puaN5)」，我應伊人聽有著會使的。

伊佫問「ネオン (a neon lamp)」台語講「霓虹燈 (ge5 hong5 ting1)」敢有問題？我講用是會用兮，但是無外理想。

伊講 kah4 ah4 奇 (kah4 hiah4 ki5 的連音，實際音值「kah4、ah4」阮計唸高平調)，「hong1 hiong3 puaN5」會通，按怎用「ge5 hong5 ting1」著無理想，安呢敢未傷矛盾？

我回答伊，「霓裳」有人讀 ge5 siong5，阮長輩讀做 gue5 siong5，「霓虹燈」讀 ge5 虹燈、gue5 虹燈，計會使兮，不而過咱日常著無人咧用。
阿若咧寫台語歌是有啦，但是唱法嘛無啥 kang5，有人唱「ni hong」，像：

紅紅的霓虹燈，閃閃熾熾
( 陳小雲---舞女 )

不是我欲離開，是你逼阮離開，霓虹閃爍妖嬌的台北市
( 黃乙玲---台北SaYoNaRa )

來到霓虹閃爍的都市，阮是漂泊的男兒
( 小鳳女---漂泊的男兒 )

有的著唱做「ne hong」：

西門町霓虹像雨網，路淡淡，車在動，電影街全是人
( 張清芳---八○年代美麗的哀愁 )

其實我一直咧強調，語、文愛有法度清清楚楚的表達，愛與對象看有、聽有、欲接受，才有路用。
照講「ge5 hong5 ting1」的字音計無毋著，m7 kuh8 若安呢講，人敢知影是咧表達啥貨？凡勢若用日語抑英語，甚至歸氣著講做「ㄋㄧˊ ㄏㄨㄥˊ ㄉㄥ」，無定著人 suah4 顛倒捎較有。

朋友換一個話題，講「霓虹燈」應該是日本時代著有物件，敢講台灣人無 ka1 號名，全綴阿本仔叫？

我的了解，無錯啦，這嘛免啥大驚小怪，少缺 (tsio2 kheh4) 這囉情形。是國民政府來了後，才有 naN2 改一部分，像「機車、棒球、支票、病歷表 ……」。

朋友佫問：「敢講自早徦 taN1，台灣人計用日本話，講做ネオン？無像『カルテ (病歷表)』安呢，佫號一個新的名。kan1 naN7 唱歌的時才有唸做 ni / ne hong？敢從古早著一直唱安呢？」

若這我著別 (pat4) 問人過，古早台語應該著是攏講ネオン，但若箸咧寫歌曲的時，意思佮用字著五花十色囉。

聽講，文夏的「歌女悲歌」本來是照日本歌詞「ネオンの明るい，いうの町へ」，翻唱做「ネオン照落來的，這個夜都市」，毋知啥麼時陣煞改做「五彩燈照落來的，這個夜都市」。

洪一峰的「再會夜都市」，「繁華的青紅燈，難忘的夜景」，箸日本的歌詞是「赤い灯青い灯，ともる街角に」。

吳晉淮的「夜半賣花女」的台語歌詞有一句「青紅燈，閃閃熾熾 (sih4)，照著一位的女兒。」

以前的歌詞若欲用台語表示「ネオン」，上少有人用過「五彩燈」參「青紅燈」。
口語有安呢講無 (bo3)，我確實毋別聽過 koh8。

今仔「青紅燈」一般攏當做交通信號燈 (traffic lights)。traffic lights 台灣若講做「紅青燈」，人嘛知意思；不過這是「雞母屎級」的台語，毋是正範 (tsiaN3 pan7) 的啦。

「雞母屎級」敢亦算「台語」？
這，欲諍有 (tsiN3 u7) 嘛會使的。
本來著是啊！「地瓜腔」嘛是「腔」，「藍青官話」嘛是「官話」。

■ 周長楫講：

台灣閩南話：紅青燈
廈門話：紅綠燈
(周長楫《閩南話的形成發展及台灣的傳播》台笠，1996：293)

■ 事實上：

台灣國語「紅綠燈」，箸台語應該是用「青紅燈」做對應。

極少數的人才講做「紅青燈」，論真講起來，這款「半烏白」的台語，算是個案，毋是通例。

■ 我的看法：

●「紅綠燈」可能毋是「閩南方言特有詞」，箸周長楫教授的《閩南方言大詞典》無收這條語詞，包括辭典內底的「普通話閩南方言對音詞」，嘛無這個詞條。

準閩南地區的人有「紅綠燈」的講法，可能嘛是照 in1 的普通話翻過來，只是讀法改用土音，意思是：

「紅綠燈」讀做 ánlíkdīng (ang5 lik8 ting1，伊「紅」標音的上尾仔，可能有脫一個「g」)，著像「毫毛」讀 hóbbnoó (hoo5 mooN5) 共款，算「外來語」。
(林寶卿《普通話閩南方言常用詞典》廈門大學，2007：212、204)

● 頂頭所講的「雞母屎級」的台語，我佫略略仔 (lioh8 lioh8 a2) 交代一下。

「雞母屎級」台語的形成，一般是因為平常時仔無講台語的習慣，拄陣 (tu2 tsun1) 愛用的時，若碰著 (pong7 tioh4) 一半句仔未曉、恍惚講未輾轉 (lin3 tng2) 的用詞，著去摕華語的語詞照翻，這是上介大的因素。
tsiah 有一個實例：

「姆婆，阿嬤 (ma2) 去 tng42 頭，愛佫斷兩三個掌頭 (tsing44 thau24) 才會好。」

這是舊年一位同事L君講 in1 查某囝參 in1 阿姆箸電話中的對話，in1 查某囝今年欲考大學。

一寡同事 naN2 蒦 (ioh4) naN2 會 (he7)，過點外鐘久猶攏捎無，L 先生才公布答案，原來彼個MM是欲揢 in1 姆婆講，阿嘛去電頭鬃 (「tng42 頭」是「燙頭」)，著佫電兩三點鐘 (「斷兩三個掌頭」是「燙兩三個鐘頭」)，才會好。

另外猶有一個，可能亦算是原因之一，著是咱 tsia5 有一寡對母語熱心的人士，有人揢稱做「工作者」，有的揢號做「志工」。部分的先兮，啊知是無閒，抑是無注意，著若發現較奇巧或者罕咧看著的資料，啊免小過濾一下，著像 khioh4 著寶，趕緊抄囥踮網站的頂頭。
比如講，有人毋知華語的「洋蔥」台語號做「蔥頭」、毋知「簸箕 (pua3 ki1)」敿「畚斗 (pun3 tau2)」根本著無 kang5、毋知「涂」參「塗」同音無同義 ……；阿著照抄不誤。類似這款的情形，以訛傳訛我是毋敢講啦，但，受影響的人，拍算嘛加減有一寡仔 (tsit11 kua11 a11)。

● 箸《閩南方言大詞典‧台灣特有閩南方言詞語舉例》有收錄一條「青紅燈」，做「交通信號燈」解說。

揢「紅青燈」改做「青紅燈」是參考董忠司的《臺灣閩南語辭典》的關係，不而過，這一條周氏可能無照伊家己所講的，有經過「調查、補充」；準若有，嘛「調查、補充」了無清楚。

因為，台語「青紅燈」的用法，除了是當做華語的「紅綠燈」參「霓虹燈」以外，嘛會使解說做「船燈」。

箸 文鶯---爸爸是行船人 頭一葩描述一對爸仔囝 (pe7 a2 kiaN2)，踮港邊等船欲啟航的歌詞，寫講：「青紅燈點點熾，港邊黃昏時」。tsia5的「青紅燈」著是第三葩寫船開了後，查某囝的心情，其中「看見船燈點點熾，親像地表示」這句的「船燈」。

● 我講用「紅青燈」，是「半烏白」的台語，算是個案，毋是通例。根據是：

1. 我了解的範圍，毋是台語歌曲計用「青紅燈」，像頂頭所舉的「舞女」等三條歌以外，猶有西卿的「命運青紅燈」、秀蘭瑪雅 的「台北青紅燈」，詹雅雯「無情的十字路燈」、陳一郎「紅燈碼頭」內底的歌詞 …… 這寡若爾。其他像廣播節目「法律青紅燈」，佫有一本號做《愛情青紅燈》的雜誌，徦 taN1 猶有人咧數唸 (siau3 liam7)。
網路小查咧，著會當 (e7 tang3) 了解。

2. tsia5 有三個繁體中文網頁搜尋結果的資料 (2009,07,05,01 :55 ~ 2:04 am)，罔做參考，用「紅青燈」的根本著毋成 (m7 tsiaN5) 比率。

google搜尋結果(繁體中文) ---紅青燈 322個
google搜尋結果(繁體中文) ---青紅燈 335,000個
台灣yohoo搜尋結果(繁體中文) ---紅青燈 485個
台灣yohoo搜尋結果(繁體中文) ---青紅燈 307,000個
yam搜尋結果(繁體中文) ---紅青燈 270個
yam搜尋結果(繁體中文) ---青紅燈 334,000個

這是當今網路統計的情形，欲若以早，著佫較免講囉。

● 華語的「霓虹燈」，我想講台語準若寫做「ネオン燈」，講做「ne33 oong24 / oong44 ting44」；參塑膠、樅 / 樹奶 (tsing5 / tshiu3 lin1) 軟 kong2，寫做「ホース (a hose) kong2」，講「hoo42 sir42 / su42 kong42」；鋼纜等寫做「ワイヤ (wire) 索」，講「uai33 a44 soh32 / uai24 a44 soh32」共款。

安呢，毋知會較簡單明瞭無 (bo3)？

周長楫教授語錄簡評016---氣口

■ 我 tiu1 tiu1 去王順隆的 blog 聽台語的老曲盤，若是較有閒，小斟酌一下，往往 (ing2) 著會發見一寡真趣味的資料。

資料毋是全面性的、無褿 (tsau5)、量真少、亦散 (suaN3) ia7 ia7，這是事實，欲摕來做母語研究的參引資料，效果可能有限 (iu2 hien7)；不過，準若有心，小 ka1 整理理咧，嘛加減仔有路用。欲參人開講免驚兮無話題，阿嘛 thing3 好做 gi7 niuN7、未無聊、未無代誌做。
像我這兩工仔，著參人咧會「湯島白梅記」內底，播講員的漳泉濫、老台語的特殊語詞、尖團音、佮 in1 箸央元音 -er、高後元音 -ir 的表現，不只仔有話通 (thang1) 講，亦介心適。

聽王先生的「黑膠唱片」好處有影介濟，像講一寡毋別 (m7 pat4) 聽過、有印象但是無啥人咧用的、意思別 (pat4) 了無透、甚至家己都無致覺的，都會使趁這個機會去了解，或者問人、反 (ping2) 書、揣資料。

2007年12月初，網友C君問我台語「疏開」是啥意思，我揢回覆：

「…… 特點：(a) 與人摕的計無啥心甘情願，(b) 揢人摕的全是『無償』的。『疏開』是按日語『疎開 (SOKAI)』來的，疏、疎兩字音、義攏同，台語真少用『疎』字，所以用『疏開』。這句的意思是，第二次世界大戰的時，美國仔飛龍機來轟炸台灣，市內的人佮物資、工場的設備，攏愛疏散去莊骹 (恁可能說hiuN1 e7)。因為欲走空襲，厝內物件較濟的人著叫人鬥搬，鬥搬的人有時仔會向貨主分淡薄仔物件，甚至有的是半硬欲的；這種方式著是『疏開』」。

徦箸音頻聽著卜吉仔講：「heh8 著驚兮賊仔 (tshat8 a2) 揢我疏開去」的時 (2009,05.23 台湾語の広辞苑-糊塗燒酒仙)，才知影我對「疏開」這個語詞的意思了解了無齊全。

原來「疏開」亦會使參「賺 (tsuan2)、賺飵、khiang1、搐 (tiuh4)、接收、thong2、so5」共款，除了講「摕無討的、摕無 tin1 兮」的以外，猶會使衍伸做「偷摕」。

共這塊 (te3) 曲盤，另外一個演播的，號做久松，伊有一句口白：「汝毋別啦，這著是香港的禮數，好額人 (ho2 giah8 lang5) 的氣口 (khui3 khau2)。」

台語「氣口」有幾仔種用法，這 liah4 的「氣口」是「派頭」的意思，換準這句話久松若講做「好額人激 (khik4) 的氣口」，意思著變做是「有錢人咧激的派頭」。

■ 周長楫講：

台灣閩南話：氣口 khùi kháu
廈門話：風謗 hong1 pong3 (誇口)
(周長楫《閩南話的形成發展及台灣的傳播‧叫法不相同的詞語舉例》台笠，1996：294)

【氣口】〈廈〉口氣：伊人細 ~ 大 他人小口氣大。
(周長楫《閩南方言大詞典》福建人民，2006：238)

■ 事實上：

● 台語「氣口 (khui3 khau2)」會使有幾仔種的解說，其中亦會使當做「口氣 (khau2 khi3)」的意思，但是無徦一種是周教授所講的「誇口」。

● 台語「誇口」直接講「誇口」，亦是用「大聲話」嘛會通。

不過，周先生所謂的「誇口」是咧講：「肆意誇大；胡亂吹噓」(周，2006：469)。這款詞義箸台語內底，有不只仔濟的近義詞，比如講：「kai3、臭 kai3、彈 (tuaN7)、臭彈、屁 (phui3)、臭屁、煎 (tsuaN3)、死煎、讆虎卵 (lan7)、讆山水、讆龍讆鳳、歕、雞 kui1、歕雞 kui1、肨 (phong3)、肨風、肨風龜、pong3」等，但是，這有的是「多義詞」，無限定一定是咧講「誇口、肆意誇大、胡亂吹噓」。

■ 我的看法：

● 台語的「氣口」是多義詞，有的解說的界限毋是講介清楚，我小 ka1 歸納一下，若有落鉤抑是毋著的所在，請指正。

1. 口氣、聲嗽：

伊講話的氣口無通好。(他說話的口氣不很友善)

2. 口味、口韻：

紅標兮透冰的維大力 (讀做 ue24 ta42 li42) 上合我的氣口。(米酒兌冰涼的維大力，我最對味了)

這泡茶氣口未 bai2。(這茶的香味跟喉韻都不錯)

3. 氣味、韻味：

這本雜誌的內容真好，著是宗教的氣口有較重一屑仔。(這雜誌的內容很好，就是宗教味濃了些)

白冰冰唱エンカ，有日本婆仔彼囉氣口。(白冰冰唱演歌，有日本女人的風味)

4. 氣運、氣勢：

拍幾環 (khuan5，古早台灣麻雀一輾四骹攏做過莊，算一環，一 tshong3 四環) 啊？氣口按怎？(摸幾圈了？手氣如何？)

近來氣口好無？(最近運勢好嗎？)

5.作風、風格：

阮粗作人的氣口，直來直去啦。(咱幹粗活的，就不拐彎抹角)

汝毋別啦，這著是香港的禮數，好額人的氣口。(你不懂啦，這就是香港的禮貌，有錢人的氣派)

6. 胃口：

對方氣口傷大，咱 ha5 lak4 伊未倒。(對方胃口太大，我們沒法應付他)

頂頭 2. 3. 4. 5. 嘛會使單用一字「氣 (kui3)，比如「激氣口」講做「激氣、激蔘仔氣」，puah4 kiau2 的氣運講做「kiau2 氣」等。

● 我抄一寡語例，逐個不妨參頂頭的解說罔鬥看 maiN7 咧，看 to2 一款妥當，或者另外有較合適的。
咧鬥的進前，先用「誇口」解說一下，看敢會通。

(A) 一蕊花的作品：

A1. 台語稱呼「茨頭家」，習慣上攏是咧講查甫人，「茨頭家娘」彼字「娘」字，永遠黏佇尾溜，若無頭前彼三字，根本毋知是啥物身份。「收租婆」的氣口就無仝，是毋是有「收租公」？he佮恁祖媽無治代，阿婆我就是即間茨的茨主，就是欲來收茨租……
(艋舺收租婆)

A2. 阮屏東人有力擱熱情的氣口，向在場的媒體朋友宣告：「……
(1989衝！衝！衝！)

A3. 俊傑即個少年仔，有hah南哥的氣口。
(這阮堂的啦！)

A4. 因為，較 há 阮阿媽怹伊彼個年代咧罵人的氣口。
(怪老子阿伯)

A5. 華語會當用「綠油油」、「綠茸茸」來形容，台語，我干旦會曉講「青~青青」，一字做三字用，以加強的氣口，三字疊作伙，代表足青、介青、有夠青。
(清明kui7，穀雨穗)

A6. 是毋是有一工，我會當家己寫一條仔南管的曲、歌仔戲的調、或者是布袋戲氣口的歌，來給唱看mai7？……
(原味的一)

(B) limkianhui 的作品

B1. 這明顯是用較 khok8-khe1 的氣口來咧唸。
(2009,03,12 葫蘆問（葫蘆運）)

B2. 比論講，咱會當換 hit-lō 較倚“英語音”的氣口。
(2008,06,08 26个羅馬字母的閩南語讀音（二）)

B3.「汝這句話，我想著李炳輝」「呵呵。著是學伊的氣口啦」
(2008,02,20 在線學閩南語－閩南語的輕聲)

B4. 我按網頂下載一篇落來，儂自本是用 TLPA 標音，我照家己的氣口 kā 換做 POJ
(2007,05,24 昔時賢文（閩南語）)

B5. 裝潢是無底的，各儂氣口嘛無共款。
(2007,04,20 家己搭Wordpress blog)

B6. 實在真適合亲像站長即款 pīn-tōaⁿ 侬的氣口。
(2007,04,19 金門踅一lìn)

B7. 即齣戲 soah 愈搬愈合我的氣口，愈哺愈有味。
(2007,04,19 華視8點檔《舊情綿綿》，有儂講「漚戲拖棚」，敢安呢？)

B8. 即款撇步，当然有合 (hah8) 遐个無品味侬的氣口；
(2007,04,19,Ùi台灣民視(FORMOSA TV)來講起)

B9. 講實在的，he無合 （bo5 hah8） 咱閩南語的氣口 （khùi-kháu）。普通話即个「刷卡」，閩南語會當講做「luh 卡」。
(2007,04,19 《闽南之声》广播错误的读音实在有够侪)

B10. 我 ka7 翻做漳泉語，當中小可 (sió-kóa) 有保留一寡原封 ê 氣口，
(2007,04,18 《長征》)

B11. 文章可比天顶的仙文，有建安的氣口；
(2007,04,18 《宣州谢朓楼饯别校书叔云》)

B12. 了後看觀眾的氣口啥款 chiah 佫來調整下一个单元的剧情、佈景 hām 演員的安排等等。
(2007,02,02 中國頭一齣閩南語生活片，台廈合作)

B13. 當中有寡詞句寫了真正 bōe 嫌咧，比論講“將半暝仔的露水，當做傷心的知己，愈冷愈合意。”氣口真正讚的！
(2006,12,12 《酒佮淚》)

B14. He是一出政治氣口真重的印度寶萊塢（Bollywood）電影。
(2006,12,04 「尾代港督」不平凡的人生)

B15. 是講，有噹時仔咱 nā 感覺講氣口有合（hah8），著大膽 kā 開落去，呣免觀前顧後、頓teⁿ 躊躇。
(2006,11,17 刣毒軟體：Kaspersky（卡巴斯基）)

B16.「福州話」即款的講法，實在「【勿會】傷甜，也【勿會】也傷鹹」，氣口 (khùi-kháu) 拄拄好，值得吹銷。
(2006,11,17 福州話：是語言？是方言？（譯文）)

B17. 儂哺過了後，chiah thang 摕來哺一遍，不但氣口無對同（tùi-tâng），哺著嘛真無味。
(2006,11,17 閩南語，安怎死的。)

B18只有安呢，chiah有法度又佫包含「露骨」的意味，又佫包含著「淫穢」的氣口。我發現講，佮 即種「氣口」相對應的漢字寫法，佇《台/華》寫做「褻體」。
(2006,11,16 「Siat-thái」，啥物意思，汝敢瞭解？)

B19.“方旻五筆”是其中的一種，尤其適合中國儂的氣口。
(2006,11,15 吹銷幾个閩南語的輸入法)

(C) 呂興昌教授的作品：

1. 論真講，台語詩因為伊所使用的表達語言是本土的母語，ti7 聲嗽佮氣口方面，攏佮台灣的土地有真深的感情聯 ……
(2000,03,14 上網 扑開門窗，看著台灣 ── 台語詩中的台灣意象，下仝)

2.「我的一族有二千，雖然無刀也無槍 … 眼前何有警備兵」，表面是 leh o-lo2 霧社事件的主角泰雅族人對絕對強勢的敵人無 ka 看在眼內，但是順頭前的詩句讀 --落來，實在有真強烈的全台一同準備佮日本人做徹底輸贏的氣口。
這種氣口，伊 ti7 隔轉年所寫的另外一首台語詩〈故鄉的挽歌〉 ma7 有仝款的表現：詩分二段，伊用「同胞們呀」「兄弟們呀」做每一段的開頭，這種強烈的呼籲hou7 人感覺熱切的向望 ……

3.對殖民當局的 hiau-pai sang2-se3，表達了嚴厲的控訴。這種氣口雖然無一定有實質的結果，不過，參楊華彼種消極性的悲曲比 --起來，伊加真有「知其不可為而為之」的悲壯精神。

● 我講台語的「氣口」未使當做「誇口」，著毋是頂頭這寡語料才有法度證明。減采閒的時陣，去網路頂仔揣一下，看敢有做「誇口」的用例。

周長楫先生講「氣口」箸廈門著是「口氣」的意思 (周，2006)。準若是安呢，伊箸進前的著作 (周，1996) ，敢是著愛變做囥踮「詞義範圍大小的不同」，寫做：

語詞：氣口
台灣閩南語：①口氣、聲嗽。②口味、口韻。③氣味、韻味 …… ⑥胃口
廈門話：①同台灣。無 ② …… ⑥義

未使歸箸「叫法不相同的詞語舉例」，毋才較合理。

● 有一個較特殊的現象，建輝先19個用著「氣口」的例句當中，若親像無徦一個是當做「口氣」的。(案，例句是箸今仔日按伊的 blog 揣出來的，這19個例句應該是徦 2009,07,02 為止，所有用著「氣口」的文句。)

另外佫小注明一下，周長楫教授《閩南方言大詞典》的版權頁雖然寫講是2006年12月第一版、第一次印刷；不而過，實際發行是過幾仔月日後的代誌。

● 廈門話講「誇口」會使用「風謗」，讀做 hong1 pang3 (周，1996、2006)，《臺日大辭典》pong3的意思會使解說做「肨風」，亦安呢寫。

這字「謗」字應該是同音借字，因為「pong3」的意思並毋是 kan1 naN7 用箸咧「講話肨風」。

「pong3」是「放大、擴大」的意思，比如講：

灶骹 pong3 對巷路兮出去。

這雙鞋揢我 pong3 較闊咧。

田岸路 (tshan5 huan7 loo7 有人講 tshan5 nuan7 loo5，應該是連音的順行同化，毋是訛讀。「田」有人講本字是「塍」) 著 pong3 較闊咧，豬哥機仔才會得過。

● 有的時陣，「pong3」嘛會使講「hun3」，像講「路 pong3 與較大條咧」，參「路 hun3 與較大條咧」共款意思。

這個「hun3」，若 (naN2) 像是洪惟仁先生講的，本字是「鞋 hun3」的「hun3」，未記兮伊是講「楦」抑「楥」。不過，兩字攏著、計會用咧。

「楥」箸古早是用柴去車抑是削的，咧刺鞋仔用的模仔，台語講號做「楥頭、鞋楥」，老師兮 (lau7 sai1 e1) 計講「楥頭」較濟。

模仔是摕來咧揢鞋仔定型的用的，《說文通訓定聲》講：「楦頭，削木如履，置履中，使履成如式，平直不皺。」

刺皮鞋的時，做鞋面的皮仔裁好，會先繃與緊 (piN1 hoo7 an5) 釘箸楥頭兮，會記兮皮面 kan2 naNh8 (若親像) 愛一直抹水的款，這寡是「楥鞋」的穡頭。

鞋仔傷短，毋是 hiN3 sak4 著是分人 (pun1 lang3)，其他著無步啊。若傷 ueh8 的時，有的猶有救，會使摕去與人 pong3 與較闊咧。

「pong3 鞋」參「hun3 鞋」是無兩種無共款的代誌。「hun3 鞋」是咧刺新的鞋，「pong3 鞋」是咧修改鞋。

準後來「楥」有引申做「放大、擴大」義，安呢，洪教授講的著會通。若無，咱著 kan1 naN7 (只有) 會使當做伊是借字。

● 周長楫先生辭典 (周，2006) 內面的「台灣特有閩南詞語舉例」有收：

「【□】pong3，擴大 (空間)：客廳 ~ 對陽台出去。」

伊認為「pong3」只是用箸空間的放大。毋知影其實台語叫人 mai3 臭彈，嘛會使講做「雞 kui1 mai3 pong3 徦 hiah4 大粒。」

因此，伊所講的：

「【謗】pong3 ①〈廈泉〉肆意誇大；胡亂吹噓：伊 ~ 講伊有幾十萬銀 …… ② 誹謗：伊胛脊後共你亂 ~。∥《廣韻‧宕韻》補曠切，“謗，誹謗。”古漢語已用之。《論語‧子張》：“信而後諫，未信，則以為謗己也。”」(周，2006：469)

① 的「謗」，參台語意思共款。

② 的「謗」，參台語無 saN1 sang5，比如講：「我著無影 hiah4 gau5，毋通 (thang1) 揢我 pong3 徦安呢」、「這個先生的醫術普通普通，但是有人揢 pong3 徦未輸華佗再世咧」、「伊胛脊後共汝亂 pong5，講汝外才情、外顧家咧」。可能這寡話是「pong3」了有影較顑 (ham3)，但嘛毋講一定是咧「誹謗」。哈！減采彼個「伊」著是媒人婆仔亦無的確。

論真講起來，周先生「謗」字的①佮②兩義，嘛無講有真大的差別；毋是 in1 在地人，著區分無啥會出來。。

廈門話我毋別 (m7 pat4)，準若是台語，「謗」應該是借字才著。

歷史記憶

這站仔有人咧鼓吹，講「不同族群相互分享歷史記憶 才有真正的和解」，著抑毋著，無欲箸 tsia5 寫意見。
無欲寫意見，毋是講完全無看法；只不過是這個 blog 的定位問題，我 kan1 naN7 欲討論參母語有相關的代誌。

咱咧講的「歷史記憶」，其實著是「集體記憶」，是一種社會性的集體記憶。

一般認為族群的認同愛倚靠 in1 的「歷史記憶」來維持 (i5 tshi5)，基本上，這囉情形是無重 taN5。
亦著是因為安呢，毋 tsiah4 有人會去創造「歷史記憶」；「創造」是未要緊啦，準若無去礙著別人，麻餈手內出，在人的啦，欲怎變 (piN3) 都隨在 in1。講正經兮， 這嘛無「著」佮「毋著」的問題。

不而過，歷史記憶毋是講的確著會去牽涉 kau3 族群認同。比如講：民間故事、歌謠、偏方 ……，這寡著共族群認同無絕對性的關係。

「創造」著是隈 (ui3)「無」變「有」。按無變做有的「歷史記憶」，當然是假的、是錯誤的；阿既然是「創造」，當然嘛是有心兮，未講是無拄好的啦。
換一句話講，創造出來的歷史記憶，著是挑意故去編一個假的物件；欲講徦好聽的，嘛會使號做「建構」。

咧創造歷史記憶，方法真濟，有一部分的做法是對家己有利的代誌，著 pong3 與 (hoo7) 較大咧；阿萬一若有彼囉未見眾 (bue7 kiN3 tsing3) 的往事，會拊 (hu2) 的著揢拊拊掉，拭未起來的，著去揣一個理由來交代，甚至講講與別人去坐數 (tse7 siau3)。
當然，用顛倒反 (ping5) 的方式去對待別人，嘛是一種辦法。

但亦毋是講所有錯誤的歷史記憶，都計是人去挑工去創造的。有的是因為年久月深未當 (bue7 tang3) 考究、有的是故老的口述以訛傳訛，當然嘛有一寡是家己想了傷濟煞想毋著去的。

先講一個較細項的：

「港都夜雨」的「港都」有人講是基隆，有人講高雄才著 (tsiah4 tioh8)；「搐搐銅 (tiuh4 tiuh4 tang5，丟丟銅)」的「磅空」，有人講是四骹亭、猴洞仔、頭城彼角的磅空；有的講是內灣抑是竹南彼朋的磅空，in1 講新竹、苗栗的客人上濟，佫種茶的嘛攏是客人，參歌詞才有合。
這是徦路尾有人去查出來，若無恐驚兮亦會變做當地的歷史記憶。

佫來講一個範圍較闊的：

古早箸雲嘉地區有一個足普遍的講法，著是 in1 的開臺祖是綴鄭成功來軍屯的，學者講這應該是 in1 囝孫仔共同的歷史記憶誤謬使然，毋是後代刻意附會。
嘉義《嘉城賴仁記家譜》賴時輝撰的〈譜序〉講：「考乎我渡臺始祖斌來公諱恂行，其出何派其先何諱，渺不可考，但聞系第十二世孫，隨鄭成功開臺職任屯田」，結果咧，in1的來台始祖賴斌來生於鄭王朝消滅了後的八年，根本著無可能佮鄭氏做陣來台。in1 認為：「今欲子孫灼知祖先來歷，不必依附貴族，濫邀光寵」。

我欲講的是「歷史記憶」，虛虛實實，無定著是攏正實的 (tsiaN1 sit8 e3)。
若有法度通 (thang1) 摕著資料，將毋著的所在改過來上好，佫較無嘛愛小注神一下。
啊知當時仔 (tang1 si5 a2) 咱 tsia5 煞啊咧佮人流行「先講先贏」、「講久著著咧 (tioh8 tiau5 le3，tiou5 嘛有寫『牢』，看有著好啦)」。
箸這種風氣之下，所產生出來的物件，會變做新的歷史記憶嘛無定著。
物件若著的，嘛未要緊，毋著的咧？準若無去踏著人的頭，人嘛無彼囉美國時間去 lap4 伊的尾，我的看法，嘛未要緊啦。
上驚的著是摕假的物件，去揢人侵門踏戶，這著較無法度通 (thang1) 容允囉，著算是無 tiuN1 ti5 的，人嘛未講激扂扂。

阿這敿這個 blog 欲討論母語敢有關係？
這喔，免講嘛有，無我哪著先寫 khiai42 囥。