歷史記憶

這站仔有人咧鼓吹，講「不同族群相互分享歷史記憶 才有真正的和解」，著抑毋著，無欲箸 tsia5 寫意見。
無欲寫意見，毋是講完全無看法；只不過是這個 blog 的定位問題，我 kan1 naN7 欲討論參母語有相關的代誌。

咱咧講的「歷史記憶」，其實著是「集體記憶」，是一種社會性的集體記憶。

一般認為族群的認同愛倚靠 in1 的「歷史記憶」來維持 (i5 tshi5)，基本上，這囉情形是無重 taN5。
亦著是因為安呢，毋 tsiah4 有人會去創造「歷史記憶」；「創造」是未要緊啦，準若無去礙著別人，麻餈手內出，在人的啦，欲怎變 (piN3) 都隨在 in1。講正經兮， 這嘛無「著」佮「毋著」的問題。

不而過，歷史記憶毋是講的確著會去牽涉 kau3 族群認同。比如講：民間故事、歌謠、偏方 ……，這寡著共族群認同無絕對性的關係。

「創造」著是隈 (ui3)「無」變「有」。按無變做有的「歷史記憶」，當然是假的、是錯誤的；阿既然是「創造」，當然嘛是有心兮，未講是無拄好的啦。
換一句話講，創造出來的歷史記憶，著是挑意故去編一個假的物件；欲講徦好聽的，嘛會使號做「建構」。

咧創造歷史記憶，方法真濟，有一部分的做法是對家己有利的代誌，著 pong3 與 (hoo7) 較大咧；阿萬一若有彼囉未見眾 (bue7 kiN3 tsing3) 的往事，會拊 (hu2) 的著揢拊拊掉，拭未起來的，著去揣一個理由來交代，甚至講講與別人去坐數 (tse7 siau3)。
當然，用顛倒反 (ping5) 的方式去對待別人，嘛是一種辦法。

但亦毋是講所有錯誤的歷史記憶，都計是人去挑工去創造的。有的是因為年久月深未當 (bue7 tang3) 考究、有的是故老的口述以訛傳訛，當然嘛有一寡是家己想了傷濟煞想毋著去的。

先講一個較細項的：

「港都夜雨」的「港都」有人講是基隆，有人講高雄才著 (tsiah4 tioh8)；「搐搐銅 (tiuh4 tiuh4 tang5，丟丟銅)」的「磅空」，有人講是四骹亭、猴洞仔、頭城彼角的磅空；有的講是內灣抑是竹南彼朋的磅空，in1 講新竹、苗栗的客人上濟，佫種茶的嘛攏是客人，參歌詞才有合。
這是徦路尾有人去查出來，若無恐驚兮亦會變做當地的歷史記憶。

佫來講一個範圍較闊的：

古早箸雲嘉地區有一個足普遍的講法，著是 in1 的開臺祖是綴鄭成功來軍屯的，學者講這應該是 in1 囝孫仔共同的歷史記憶誤謬使然，毋是後代刻意附會。
嘉義《嘉城賴仁記家譜》賴時輝撰的〈譜序〉講：「考乎我渡臺始祖斌來公諱恂行，其出何派其先何諱，渺不可考，但聞系第十二世孫，隨鄭成功開臺職任屯田」，結果咧，in1的來台始祖賴斌來生於鄭王朝消滅了後的八年，根本著無可能佮鄭氏做陣來台。in1 認為：「今欲子孫灼知祖先來歷，不必依附貴族，濫邀光寵」。

我欲講的是「歷史記憶」，虛虛實實，無定著是攏正實的 (tsiaN1 sit8 e3)。
若有法度通 (thang1) 摕著資料，將毋著的所在改過來上好，佫較無嘛愛小注神一下。
啊知當時仔 (tang1 si5 a2) 咱 tsia5 煞啊咧佮人流行「先講先贏」、「講久著著咧 (tioh8 tiau5 le3，tiou5 嘛有寫『牢』，看有著好啦)」。
箸這種風氣之下，所產生出來的物件，會變做新的歷史記憶嘛無定著。
物件若著的，嘛未要緊，毋著的咧？準若無去踏著人的頭，人嘛無彼囉美國時間去 lap4 伊的尾，我的看法，嘛未要緊啦。
上驚的著是摕假的物件，去揢人侵門踏戶，這著較無法度通 (thang1) 容允囉，著算是無 tiuN1 ti5 的，人嘛未講激扂扂。

阿這敿這個 blog 欲討論母語敢有關係？
這喔，免講嘛有，無我哪著先寫 khiai42 囥。