蘇東坡是鳥 (tsiau2)

參頂篇 (「蘇東坡敿五柳枝」) 上大的差別，是這篇有根據。

● 蘇東坡揢佛印和尚講：
「古早人定定用『僧』對『鳥』，像講『鳥宿池邊樹，僧敲月下門』；又佫講『時聞啄木鳥，疑是叩門僧』。」
表面上看 khiai9，蘇東坡是咸 (案，ham5，「佮 kah4、參 tsham1、敿 kiau1、共 kang7、同 tang5」的意思；進前我攏用「含」，J 君同意我講是「咸」字有理，叫我 mai3「隨波逐流」) 佛印咧討論做詩的修辭方法，暗中是將對方比喻做 ta1 poo1 人的下部。

佛印講：
「老和尚今仔日卻是對相公汝。」
看 khiai9 佛印是將蘇東坡排比做「鳥」，阿嘛會使講是將對方倒剾做男陰。

兩個人是愛講笑咧拍鬧涼，毋是正經咧冤家相罵。

● 資料、包括解說，攏是按曹德和《詈詞演變與雅化傾向 ── 從“鳥”等的語音、語義漢和字符演變說起》(《漢語史學報‧六》上海教育，2006：215、221) 這篇論文來兮，我 kan1 naN1 揢翻做我的母語。曹氏用馮夢龍《廣笑府》的記載，引述這段對話。伊佫講，這個笑話是典出蘇軾家己寫的《東坡佛印問答》，可見毋是人杜撰兮。

我欲講的是東坡先生的氣度：

1. 寫事實。
2. 有喙講別人，阿嘛敢消遣家己。

講 ka1 lo2 (3)

● 陳冠學先生用《尚書》中「度乃口、杜乃擭」參《說文》的「[度攵]」，講這三字同音；講周成王時代令彝的金文「受卿事察、令 [彳出] 同卿事寮、令及同卿事寮」的「卿事」，著是「卿士」、《說文》：「士，事也」等，證明自西周就沒有所謂的「濁上聲 (陽上)」的存在。

陳先主張：

自從有佛經及西名漢譯以後譯家開始注意到漢語聲母的問題，慢慢地便產生了所謂字母 (代表某聲母的字)。字母產生運動起於唐，定於宋。大概到了北宋時代，已有定型而完備的字母系統，我們稱為三十六母。三十六母雖名字母，並非純是聲母的全範疇，而是包含聲調在內的。三十六母是聲調與聲母同再的一套語音系統。

伊先舉「東、通、同」的「端、透、定」三母，用佛經佮西名對譯，揣無讀做 d-、dh- (d-、dh- 計是濁母) 的證據，講「定母」真正的標音應該是 t-、th- (t-、th- 攏是清母)；「定母」完全是調母，是「端母」抑是「透母」的陽聲調。又因為各地送氣、無送氣無一致，勢必無法度分立兩母。像「同」有的所在讀做「東」的陽聲調，有的所在著讀「通」的陽聲調，字母家無法可施。陳先講日本的假名亦有這款的困難，in1 的カ、キ、ク、ケ、コ ……，攏是不分送氣、無送氣，著是事實上無法度分立。

了後，陳先生佫舉例欲證明除去「定」以外，三十六字母中的「群、定、澄、並、奉、從、邪、牀、禪、喻、匣」十一母實在是為著聲調而設的調母，並非真正的聲母。
(《臺語之古老與古典》，第一，民73：60-134)

這是飵晝咧反 (ping2)《新語校注》的時，hiong5 hiong5 去想著 (tioh9) 兮。緊摕冠學先兮這本書，佫簡單餾一擺。揢欲 tih8 的資料拍踮頭前。

● 一般認為《新語》的作者陸賈之學出於荀子。

《鹽鐵論‧毀學》：「李斯與包邱子俱事荀卿。」

《漢書‧楚元王交傳》：「交與申公受《詩》於浮邱伯，伯者，孫卿門人也。」孫卿即荀卿，浮邱伯即包邱子。

《新語‧資質》：「鮑丘之德行，非不高於李斯、趙高也，然伏隱於蒿廬之下，而不錄於世，利口之臣害之也。」鮑丘即包邱子。

陸賈，楚人也，與浮丘同時相善，私淑相聞。《漢書‧藝文志》語。
(以上引自王利器《新語校注‧前言》北京中華，1997：7-8、17)

正本《新語》之文，或作「浮」，或作「包」作「鮑」，古字相通。
(王，1997：32)

劉向《孫卿書錄》：「春申君死，而孫卿廢，因家蘭陵，李斯嘗為弟子，已而相秦，及韓非號韓子，又浮丘伯皆受業為名儒。」鮑、包、浮，一音之轉。
(王，1997：113)

鮑，《廣韻》薄巧切，並巧上，照音切台語讀 p-、ph-；咱有保留平聲古音調，「鮑」讀平聲，如「鮑魚」講 pau1 魚，「鮑」讀平聲。

包，《廣韻》布交切，幫肴平，照音切台語讀 p-。

浮，《廣韻》縛謀切，奉尤平，古無輕唇，上古音為「並母」，照音切台語讀 p-、ph-。

準「鮑、浮」的「並母」，若是濁聲母，安呢參清聲「幫母」的「包」著未使讀 kang5 音。

當然囉，若有人欲解說做「音近」通假、一聲之轉、傳抄訛誤 ……，嘛是在 in1 的自由。

歷史記憶

這站仔有人咧鼓吹，講「不同族群相互分享歷史記憶 才有真正的和解」，著抑毋著，無欲箸 tsia5 寫意見。
無欲寫意見，毋是講完全無看法；只不過是這個 blog 的定位問題，我 kan1 naN7 欲討論參母語有相關的代誌。

咱咧講的「歷史記憶」，其實著是「集體記憶」，是一種社會性的集體記憶。

一般認為族群的認同愛倚靠 in1 的「歷史記憶」來維持 (i5 tshi5)，基本上，這囉情形是無重 taN5。
亦著是因為安呢，毋 tsiah4 有人會去創造「歷史記憶」；「創造」是未要緊啦，準若無去礙著別人，麻餈手內出，在人的啦，欲怎變 (piN3) 都隨在 in1。講正經兮， 這嘛無「著」佮「毋著」的問題。

不而過，歷史記憶毋是講的確著會去牽涉 kau3 族群認同。比如講：民間故事、歌謠、偏方 ……，這寡著共族群認同無絕對性的關係。

「創造」著是隈 (ui3)「無」變「有」。按無變做有的「歷史記憶」，當然是假的、是錯誤的；阿既然是「創造」，當然嘛是有心兮，未講是無拄好的啦。
換一句話講，創造出來的歷史記憶，著是挑意故去編一個假的物件；欲講徦好聽的，嘛會使號做「建構」。

咧創造歷史記憶，方法真濟，有一部分的做法是對家己有利的代誌，著 pong3 與 (hoo7) 較大咧；阿萬一若有彼囉未見眾 (bue7 kiN3 tsing3) 的往事，會拊 (hu2) 的著揢拊拊掉，拭未起來的，著去揣一個理由來交代，甚至講講與別人去坐數 (tse7 siau3)。
當然，用顛倒反 (ping5) 的方式去對待別人，嘛是一種辦法。

但亦毋是講所有錯誤的歷史記憶，都計是人去挑工去創造的。有的是因為年久月深未當 (bue7 tang3) 考究、有的是故老的口述以訛傳訛，當然嘛有一寡是家己想了傷濟煞想毋著去的。

先講一個較細項的：

「港都夜雨」的「港都」有人講是基隆，有人講高雄才著 (tsiah4 tioh8)；「搐搐銅 (tiuh4 tiuh4 tang5，丟丟銅)」的「磅空」，有人講是四骹亭、猴洞仔、頭城彼角的磅空；有的講是內灣抑是竹南彼朋的磅空，in1 講新竹、苗栗的客人上濟，佫種茶的嘛攏是客人，參歌詞才有合。
這是徦路尾有人去查出來，若無恐驚兮亦會變做當地的歷史記憶。

佫來講一個範圍較闊的：

古早箸雲嘉地區有一個足普遍的講法，著是 in1 的開臺祖是綴鄭成功來軍屯的，學者講這應該是 in1 囝孫仔共同的歷史記憶誤謬使然，毋是後代刻意附會。
嘉義《嘉城賴仁記家譜》賴時輝撰的〈譜序〉講：「考乎我渡臺始祖斌來公諱恂行，其出何派其先何諱，渺不可考，但聞系第十二世孫，隨鄭成功開臺職任屯田」，結果咧，in1的來台始祖賴斌來生於鄭王朝消滅了後的八年，根本著無可能佮鄭氏做陣來台。in1 認為：「今欲子孫灼知祖先來歷，不必依附貴族，濫邀光寵」。

我欲講的是「歷史記憶」，虛虛實實，無定著是攏正實的 (tsiaN1 sit8 e3)。
若有法度通 (thang1) 摕著資料，將毋著的所在改過來上好，佫較無嘛愛小注神一下。
啊知當時仔 (tang1 si5 a2) 咱 tsia5 煞啊咧佮人流行「先講先贏」、「講久著著咧 (tioh8 tiau5 le3，tiou5 嘛有寫『牢』，看有著好啦)」。
箸這種風氣之下，所產生出來的物件，會變做新的歷史記憶嘛無定著。
物件若著的，嘛未要緊，毋著的咧？準若無去踏著人的頭，人嘛無彼囉美國時間去 lap4 伊的尾，我的看法，嘛未要緊啦。
上驚的著是摕假的物件，去揢人侵門踏戶，這著較無法度通 (thang1) 容允囉，著算是無 tiuN1 ti5 的，人嘛未講激扂扂。

阿這敿這個 blog 欲討論母語敢有關係？
這喔，免講嘛有，無我哪著先寫 khiai42 囥。