留言回覆July 2012

■(G) 「可」台語讀khah4

mysky箸2012年7月29日下午8:08留言：

台語"比較"義的khah，這馬大多數人的共識是寫做"較"，毋過，施炳華教授根據白話本"荔鏡記"，發現其中的"可"，ma7會使當做"比較"的khah。(http://tw.myblog.yahoo.com/tai5uan5-kua1a2tsheh4/article?mid=186&prev=187&next=178&l=f&fid=16)

"可"字依照漢字的字辭典的解釋，並無"比較"的意思，是按怎"荔鏡記"會按爾用?對我來講，這是一段難解的公案。

"可"字無"比較"義，毋過，唸作khah是講會過的。因為，依照聲韻學，"可"是"歌韻"，有學者認為歌韻的上古擬音為-a。

就"歌、柯、河"等字來講，華語誠一致，攏是發ㄜ韻，台語則有-ua、-o等無仝的韻，攏無法度印證學者的擬音。另外，我有注意著日語的發音，竟然攏是發-a，毋知影遮敢會當算是佐證?

以上的發言，佮恁討論的問題無啥仝，敬請包涵!

mysky：

多謝汝提供資料。

1. 在我所知，台語「較」嘛未使讀做「khah4」。

2. 我有影毋知佗一條音理與「可」讀做「khah4」講會過，請賜教。

準若無欲管字義，「可」台語讀「khah4」會使根據《康熙字典》引《字彙補》的「苦格切」。

3. 中古漢語「歌」韻，箸日語應該是讀「ア」行的音無毋著，王華南先生的見解是因為日語的語音體系無「o」這音的關係，所以用「ア」；安呢毋知會通 *未，我未曉。

不而過，有兩點我想無，(1)根據書面資料，韓國話有「o」的韻，比論「菩[po]、蒲[pho]、謨[mo]」，但是怹「歌」韻嘛是讀「a」，比論「歌[ka]、河[ha]、多[ta]」。(2)「歌」韻的字，台語嘛有讀「a」，比論「他[tha1]、阿[a1]、那[na2]」。(2012年7月30日上午5:40)

■(F) sio1 kah4、kah4車的「kah4」

dongxie箸2012年7月28日下午5:50留言：

關於「岑」的讀音，你之「另外才佫寫 *一擺」，沒發文分享，殊為可惜。汝諸多見解，如「風火、藥膏」確是少聞。此文雖字數較多，可分批。
也是潘科元的看法，彼云「來kah--一下」、即个 kah，語源可能是「較[kàu]」、「校[kàu]」。
其說與你不謀而合？然而，于《蘇東坡規頭全屎》及留言：相較(sio1 kah4)的kah4，甲「尬車」的「尬」…你謂：同款意思，有人寫做「較」，我認為應該是「校」。
如何是「校」，願聞其詳。

dongxie：

1. 準若欲發，雖然無啥大問題，不過我愛略仔小巡 *一下，he1畢竟是與汝私人的回覆批，可能有未少不當的措辭。拍算愛刪改的部分tsam2 lien5 a2濟，我小佫想bai7 *咧。

2. 誠害，我哪會去寫安呢。

當時我的想法是「較、校」做「較量、校量」攏是引申義[注]。「較」會使讀古岳切，中古漢語「覺」韻台語無唸「-ah」的字例。「校」字書做去聲，台語嘛毋是讀「kah4」，但是有讀「ka3」；「校場」講「ka⁴² tiuN²⁴」，參「kah4場」共音。有學者認為古早有去聲，有兮主張古無去聲，以我的程度無才調理解佗一個講法才正確。不而過，我主觀想講台語有去、入不分的現象，比如，「冷ki3 ki3、冷kih4 kih4，澀kiN7 kuaiN7、澀kiNh8 kuaiN8」，「khi⁴² ut³²(去鬱)、khih⁴⁰ ut³²(去熨)」。

其實這證據傷薄弱，嘛無考慮著閩南語的腔口，這款推論毋是介成熟，不可取。用貴有當，不可牽強，「我認為應該是『校』」的結論，我落了傷免強、傷潦草，真不住，揢恁回(he5/her5/hue5)失禮。

[注]

照蔣禮鴻氏的講法，毋是引申義：

校者，木田也(據唐寫本《說文》木部殘卷)。較者，《說文》作䡈，車較也。非有較量之義。而為校量、較量字者，其字借為斠。《說文》：“斠，平斗斛量也。”《廣雅‧釋詁》三下：“斠，量也。”小徐《繫傳》曰：“斠量之字今做較(各本《繫傳》脫字字，今補)。”朱氏《辭通》以較量、校量、角量、斠量為銅條，以謂較字古亦作斠。斯為得之。而段氏注：《說文》，於斠篆云：“今俗謂之校。音如教。因有書校讎字作此者。音義雖近。亦大好奇矣。”此拘虛之論耳。於䡈篆則云：“。惟䡈可辜搉尊卑。故其引申爲計較之較。”斯尤憑臆穿鑿，不可為訓。(《蔣禮鴻‧第2卷》浙江教育，2001：63；《義府續貂》，「覺跌」條)

(2012年7月29日下午2:59 )

■(E) 看汝用啥角度去對待

新鮮料理人箸2012年7月26日上午9:20留言：

諸位先進：
我以為許--先生這兩音讀了有問題，首先伊詩題讀「江suat」，「獨釣寒江雪」卻改成siet。依照《廣韻》，絕、滅、雪都是薛韻，但絕、雪是合口，滅是開口；最重要是《甘典》、教育部《台灣閩南語常用詞辭典》、《當代泉州音字彙》等等全無許--先生這種讀法。赫--先生的說法亦是不對，如果每一个人攏為了押韻，無根無據就凊彩唸，好聽是好聽，台語也可以自詡是古音，是活化石。毋拘，按呢有啥mih意思？敢有才調證明這就是唐音或宋音。有樣趁樣，客語、粵語、國語、日語等等，也可以比照呀。拜託先兮，你毋通閣講：袂要緊啦，習非成是，「是」著是「是」，橫直攏是「是」。

料理人：

汝講得有道理，但是我認為這是高雅的休閒活動、正當的娛樂，無必要用hiah4嚴格的態度去審視怹的音韻。佫再講，這寡計是民間團體或個人的興趣，毋是教育單位，對母語的推廣嘛有好無歹(phai2)，欲提倡著未赴 *嘍，無去鼓勵著咧悽慘了，哪著去共(kang7)講huai2五四三兮。準若有人對我講這才是「正音」，kau3時才來討論嘛a2未慢。

這款答覆汝一定未滿意，ROROさん較meN2仔看 *著，無的確會佫罵我鄉愿(這句誠毒、誠歹聽，哈)，鄉愿著鄉愿，無法度，siang2教我目前確實是這種想法。(2012年7月26日下午6:59)

■(D) 關於許澤耀「絕、雪」的讀音等

philip箸2012年7月25日下午5:16留言：

ian、ien真容易分，哪著使遮濟氣力，我想你應該是欲證明堅持用ian替ien的人是顢頇(buân-han)、橫柴夯入灶。兩個問題請教，1，許澤耀先生《江雪》共「絕、雪」讀為「tsie̍t、siet」，敢是正音？2，有網志佇plurk分享此篇文章，有人講王老師「幽」是唱hiu，我仙聽嘛是iu，「幽」會當、猶有人讀hiu嗎？謝謝。

philip：

𠢕早。

1. 使氣力？未啦，趣味趣味。根屬著「真容易分」哪著佫「證明」？

是拄有提起，話汰話，我著加減仔講 *一下。

2. 個人認為詩詞的吟詠是風雅的代誌，用民俗、藝術、文化的角度去看待，讀啥都(to1)未要緊。當然，汝若用語言、教育的角度去看，著另當別論。

3-1. 幽，《廣韻》於虯切，影母，中古漢語「影」紐台語有發h-的字例，比論「郁(hiok4)」，理論上「幽」會使讀iu1、hiu1。實際上有人讀這音，阿《廈門音新字典》、《台日大辭典》計iu1、hiu1兩讀，記徦真清楚；《彙音妙悟》囥箸「秋」韻「喜」音，敿「休、庥」同音。

3-2. 我聽khiai9王老師嘛是唱「iu1」。

3-3. 今仔「幽」ia2有人唸「hiu1」，像「烏白郎君幽靈馬車」黃俊雄著唸做「hiu1靈馬車」。(2012年7月26日上午6:10 )

■(C) 自在著好

Haiker箸2012年7月22日下午1:23留言：

積極些，怎都沒發文呢？拿以前寫的也行，光周長楫語錄評論不是還有一二十篇？提出來討論也不錯滴。
我看人家的東抄抄西湊湊，好像很有成就感捏。要不要考慮下下，添些熱度。

Haiker兄：

1. 多謝汝的責督。m7 kuh8，我是想寫著寫，想發著PO，涼涼仔著好，咸「積極」無治代。

彼幾篇仔物件無啥通討論，留咧家自看爽 *兮著好。

2. 老兄的意思是若無「東抄抄西湊湊」著無成就感？哪有這種心態？較有歲生成著會變安呢 *啊？哈哈。

反對別人設限，煞揣索仔來縛家己？著無咧kham2子弟講(「講」讀變調)。

■(B) 愛烏白想，誠閒

dongxie箸2012年7月3日下午1:21留言：

你明明就在指這些不放棄ian反動，死命維護教羅，為何不乾脆講出來？
將進酒「岑夫子、丹丘生」，「岑」台語讀「琴」或「吟」。
《伶俐》：骹手帇疌(liap8 tsiap8)、做代誌扭搦(liu2 liah8)。
liu2 liah8，教育部常用詞辭典有，liap8 tsiap8辭典沒有，古文獻上有「帇疌」一詞否？
《過熨斗》：「紀念、紀要」著讀去聲。
潘科元認為「ki3念」是「記念」。

dongxie：

1. 汝家己想兮啦！

DT用-ian/-en、TLPA、楊秀芳(《台灣閩南語語法稿》)、張光宇(《閩南方言的特殊韻母-ing》)、許極燉(《台語文字化的方向》)、李如龍(《閩語研究》、周長楫(《閩南方言大詞典》)……攏嘛用-ian，怹參「維護教羅」有啥治代？其中甚至嘛是有敿教羅死忤逆 *兮。

2.「岑」台語「琴」、「吟」計有人讀。

3.「帇、疌」有證書，無書證。台語有，閩南語嘛有。台語的辭典有 *無，我毋知；林建輝寫做「立捷」，拍算是照周長楫辭典的用字，無通。

4. 潘科元認為「ki3念」是「記念」，有道理，古冊嘛有用例。

以上簡單回覆。真趣味，我感覺第2、3、4會使做一點繫聯，揣一個時間，我另外才佫寫 *一擺，OK？(2012年7月3日下午6:48)

■(A) 同安話「saN1 khoo1」

他K箸2012年7月2日下午6:16留言：

建議：「將進酒」太長，一般程度是真僫消化，由你來記音，是不是較合適？最少共重點的字標示，像我即款無真內行的人，較方便理解。
問題：同安話「三箍是」啥tong tong？僻話嗎？(你在鷺水薌南的留言)

他K：

1. 應該無問題，我才來去(「來去」讀連音，lai²⁴)YouTube揣看有較短、較合適 *兮無。

2. 同安話「saN1」咱tsia5講「sio1」較濟，比如「sio1 kap4、sio1 招、sio1 siang5」。

若「khoo1」是普通用語毋是僻話，参「sai2、kan3(前者是泉州用語，後者是廈門用語，咱tsia5無分)」共意思。

不過，頂回我有機會敿in1一寡在地人鬥陣一兩禮拜，毋別(pat4)聽怹(in1)講過「saN1 khoo1」。台灣嘛無人安呢講的款，極加是講「khih⁴⁰ hong¹¹ khoo⁴⁴」意思著是「去與人(「與人」讀連音，hong¹¹)kan3」。偏漳地區大部分講「去與人躃(khih⁴⁰ hong¹¹ phih³²)」、嘛有講「khih⁴⁰ hong¹¹ huaiNh³²」。(2012年7月2日下午8:25 )