無 hah4 複雜、無 hah4 單純

RORO - 2011年6月16日下午1:58 留言：

(a)您這是支持蔡英文的表態？

甚麼原因讓你破例

放棄這部落格不涉政治的原則

應該很有趣

要不要談談呢

(b)TEST上兩首“家後”

做甚麼用？

(c) 蔣為文說

台灣作家不用台灣語文、卻用中國語創作，可恥

黃春明說

我們的國語一直在變，像是「白目」、「喬不攏」、「歹勢」都是閩南語進入國語，國語變得越來越在地化，他進一步舉例，「中南美洲作家也用西班牙語寫作，更有五人得到諾貝爾獎，也沒有人說他是西班牙文學，用殖民語言寫作沒辦法啊！」

您贊成哪個人說ㄉ？

RORO：

(a) 誤會，誤會。我這個連結是因為箸「講 ka1 lo2 (9)」回覆 philip留言的時，引用蔡英文的講話，想講蔡主席講演的內容不只仔濟所在會使摕來參考，著揢留囥箸 tsia5。著算講安呢，我注神兮，不過是敿我母語有牽連的議題；其他兮，我有影無才調去理解，因為我毋 pat4，阿嘛 pin5 tuaN7 去學、去想。

箸參我的母語有相關的問題，蔡英文有伊一寡看法，這部分有兮我聽了會入耳，阿嘛有無共款思考的所在。若講著母語政策，聽 -起來是無啥通好期待兮。比如箸「蔡英文講演」內底，我新連結「變動中的新世界 - 青年世代與未來」中央大學 part_1的當中，蔡主席講伊進前絕大部分是專業性的生涯，表達的方式是專業性的訓練，參一般群眾的距離誠遠，因為欲溝通有困難。伊講，tshim2 開始，上少，民進黨的群眾聽無伊這個主席咧講啥。伊一直想，欲用啥辦法揢伊頭殼內的物件講與上基層的支持者了解；阿這兩三年來，這寡群眾嘛一直咧想，欲按怎才會當 (tang3) 理解蔡主席的想法。今仔伊嘛有法度用台灣話講演，而且講了亦未 bai2；雖然箸講演的中間，會 tsham3 一寡台灣國語，但基層的人嘛會當接受。所以今仔民進黨普遍有另外一種新的語言，著是變做台語、國語相濫，這嘛是台灣一般、尤其是中下階層，愈來愈濟人用的一種表達方式；亦著是講人佮人鬥陣久了後，in1 會創造一種新的溝通文化。這種共同營造 -出來的文化，咱必須去親近伊 (i7)，共享這個新的文化，安呢自然著有法度互相溝通。

蔡主席講的未傷離經，因為伊講的是事實。但徦 taN1 我猶無看著 in1 講欲如何保護台語，抑是對台語欲做啥麼 khang1 khe3。真簡單嘛，台語參國語佗一個是優勢語？這兩種語言的資源有天壤之別。毋知 in1 有去想 -著無，相濫的「新文化」會與台語 naN2 濫 naN2 少，結局是被優勢語吞噬。

有啥麼政策真正會當保護我的母語，對任何一個總統候選人或者政治人我攏無期待，但是這是我唯一關心的問題。所以，目前我無投票與蔡英文的拍算，包括講欲參選的馬英九、黃越綏嘛 sang5 款。我講的是「目前」，表示將來有變數，比如講準若有候選人承諾當選就職兩年內，會當成立一個台語電視台開播，而且主事者毋是交與台灣教育部相關的人，競爭是好代誌；若安呢，我才有投票的意願，著會去投與伊 (i7)。當然，我未數想講這個電視台愛照人口比例去編預算，不而過上無，嘛愛比其他語言的電視台加 -一屑仔。

阿若所有的候選人計有承諾 -咧？有兩個辦法，(1) 啥人先公布，投與siang5；(2) 若 (naN2) 去買物件 -咧，平價數 (一票)，當然嘛揀好飵、大碗佫滿墘兮。

所以，我毋是「支持蔡英文的表態」，嘛無「放棄這部落格不涉政治的原則」。引用蔡英文的講演、連結伊的視頻，是因為伊的內容有 khah8 著台語的關係，無汝想兮 hah4 複雜啦。

(b) 是安呢啦，「台語外老？」寫煞的時，我著開始佫寫「台語外嫷？」。彼工，寶姊夫來，拄看 -著，文內有用江蕙 in1 唱的「家後」做例，伊講我 blog 的文章誠濟愛與人跳開 文章的頁面，才看會著 You Tube 的影像，攏未進步，著教我直接搦囥箸文章內底，這個「TEST」是伊示範 -兮，尾仔佫箸「懷念的城市」PO王昭華「【演唱】一 」的視頻。m7 koh8 等我揢「台語外嫷？」寫好欲發表的時，仙變 (piN3) 著未好勢，只好先留 -咧，等伊後 tsua7 來才講。

(c1) 蔣為文「台灣作家不用台灣語文、卻用中國語創作，可恥」這個標語，減采有問題。鄭南榕、陳水扁、呂秀蓮、謝長廷、林義雄、姚嘉文、康寧祥、林濁水 …… 計有寫文出冊，攏毋是用台灣語文，有「可恥」-無？汝諍 in1 毋是「作家」，好啦，隨在汝定義，雖然姚嘉文的《台灣七色記》嘛是誠有名長篇小說。王拓、廖永來、吳念真、李昂、廖輝英、楊青矗、李筱峰 ……，這寡作家的「台灣」無徦一個會較輸過蔣為文，但是佗一個有怙台灣語文、卻無用中國語創作？個人並無認為 in1「可恥」。昨方新聞報講阿扁仔欲寫專欄，咱才揢看，等伊「成為雜誌專欄作家」(民視，「扁化身專欄作家 一篇稿費2萬」) 的時，敢有人會因為毋是用台文，著講伊「可恥」。

(c2) 若黃春明講國語愈來愈在地化，敢有影？「白目」、「喬不攏」、「歹勢」敢算國語？算講我是古井底的水蛙啦，麻煩知的人才小拍報 -一下，佗一本國語辭典、教科書或者是官方正式的文件書類頂頭有這寡用詞？這參「3Q、紅不讓、LKK、雞雞歪歪、很牛、小三、媽寶 ……」共款，是特定的人佮特定的都合咧用兮；阿古早嘛有新住民講「莫宰羊、甲蹦」，這毋是國語在地化。共款意思，汝敢會使講「這是尺」讀「這數ㄘㄨˊ」著是國語在地化？

(c3) 我知影汝實在是欲了解這擺的衝突，毋著的人是 siang5，著 -毋？m7 koh8 這個代誌我並無啥去咧注意，汝會使先看蔣為文「感嘆一個台灣作家良心 ê 死」這篇。準蔣為文寫的是事實，這個衝突的背景佮是非，著毋汝問的問題 hah4 單純。總是，拄撞 (tng7) 我若有看著黃春明「清楚表達自己看法」的文章，我會佫報 -汝。

(c4) 換講一個較輕鬆兮，頂頭彼篇蔣為文的文章，是按怎有「台文、中文」兩種版本？真簡單阿，逐個嘛知，因為伊欲訴求的對象，真濟人看無伊寫的台文。套蔡英文的講法，我認為台文並毋是咱一般人普遍表達、溝通的方式抑是工具，這是專業抑半專業的人才有法度摕來互動的物件。這種事實的現實，in1 絕對有致覺，若無，in1 未放棄 in1 用全羅的主張。這真巧 (khiau2)，阿嘛是好代；m4 kuh8 做了若 (naN2) 像 a2 無啥夠。準若欲一直堅持揢台 (教) 羅定義做「字」，恐驚兮路會愈行愈狹 (ueh8)，使用者較按怎嘛是固定的群組 (tsoo1)，對台語的推廣抑保護，作用有限 (hien7)，我個人的想法啦。

講 ka1 lo2 (9)

philip yen - 2011年6月10日上午11:57 留言：

我跟Hiker先生有同樣的問題,在"西北雨",你的引據幾乎都有清楚的交代,除了應劭那段.然在這一篇,羅常培,高本漢.....乃至黃典誠的說話,甚至"呂氏春秋",孫元衡的詩,出處均未詳.是否我也來個大膽假設,這些材料是從網上抓的?自然我也求證,或者也不算小心吧,有些網路上還是沒找着.我想了解,我的假設正確否,我更想知道,如果是您的第一手資料,怎不PO上來源呢.這很重要,就是你說的"說服力"吧.

philip：

汝好，就汝頂頭的留言，回覆如次：

1. 先講一個ポイント ── 我發文引用的資料，大部分是按以前的筆記抄兮，想 -著、抑是拄好看 -著，我著捎來用，較省力；「說服力」並毋是我寫文所欲追求兮，連這款動機著無。當然，發文的內容準有人有無 sang5 的的看法，我接受討論、辯難，所以才設這個 blog。若有人毋相信我引述的資料，嘛未要緊；不而過若參我較熟的網友有這款疑慮，準都合會拄好，普通我是會詳細回答，阿汝嘛會使講我看人咧 suah4 鹽。

2. 佫來，汝所問兮這兩篇發文引用資料的來源，有兩個是隈 (ui3) 網頂搦 -兮，計箸「台語外老？」 ：(1) 納蘭性德的《蝶戀花》箸「納蘭性德詞全集《飲水詞》 ；(2) 廣瀬旭莊的《阿部野》箸「日本の漢詩一覧」 。這兩個資料我攏無佫對 -過，理由是我講 -過：「這兩款例夭壽濟」，準資料的內容略仔有爭差，但未影響我欲表達的意思，這並毋是重點。其實我進前讀黛郎《磨刀集》著 pat4 看著乃木將軍的漢詩；若講漢人寫 -兮，母語無入聲或消失的人做入聲押韻的詩，不過是其中的現象之一，我加講兩個仔，少缺人母語無合唇鼻音韻尾 -m，嘛會曉用深、咸兩攝的字做韻寫詩；郭茂松「人、春」互押，汝未使講新莊、新竹、台中的語音「人、春」同韻 (郭氏新莊生兮，細漢搬去新竹，退休了去箸台中)，這我箸《新生詩苑》看 -著兮。總講一句，毋是詩詞的用韻著的確會敿實際的語音有對同 (tui3 tang5)，自古至今皆然。

3. 關於我引用羅常培、高本漢等諸學者的講法，計是我親目看過 -兮，羅常培的是箸《廈門音系》、陳冠學是箸《臺語之古老與古典》、吳在野《河洛閩南語縱橫談》、黃典誠《黃典誠語言學論文集》。其他兮是四年前我質疑梁烱輝《臺灣閩南語正名 ──「河洛」乎？「福佬」乎？「貉獠」乎？》，內底引用的資料。欲佫勻 naNh8 去 hiau1，隨頁仔去掀，kan1 naN7 想著嬾。不而過，除了高本漢是一本台灣商務出的中譯本，冊名我未記得；另外丁邦新的作品我有看過幾仔篇，敢是箸《台灣語言源流》，我無把握以外，其他兮我猶有印象，有幾本仔今仔猶囥箸身邊：袁家驊《漢語方言概要》、王力《漢語史稿》、董同龢《漢語音韻學》、林金鈔《閩南語研究》。

4. 其他兮因為我書猶未收 khiai9，我有詳細的資料：(1) 應劭《風俗通義》世界，1963：卷六5 – 6；(2) 許維遹《呂氏春秋集釋‧下》北京中華，2010：628；(3) 周祖謨《魏晉南北朝韻部之演變》東大，1996：183、203；(4) 孫元衡《客以海圖見遺漫賦一篇寄諸同學》，《臺灣府志三種‧下》北京中華，1985：2709。

5. 網頂各色的資料計真豐富，用 -起來亦真利便，蔡英文講：

以前，我們覺得有學問的人，叫做飽學之士，也就是什麼東西都在他腦袋裡啊，叫做飽學之士。那今天，什麼東西都在電腦裡啊，那作為一個讀書人，作為一個知識份子，你跟電腦不同的地方，電腦跟你做不到的地方，才是你競爭的開始啊，跟別人不一樣。所謂競爭，就是 making in difference。就是 making in difference，你必須要找出差異性嘛。也就是說，在今天電腦做不到的地方，才是你取勝的地方。你千萬不要靠電腦來取勝，你要靠你自己在電腦之外的這些元素來競爭。 (詳細的內容請link 本 blog 正朋上頂懸，蔡英文講演：「變動中的新世界 - 青年世代與未來」中央大學 part_2，按6分40秒的所在開始)

伊的意思是講電腦毋是替某一個、或者特定的人咧服務，任何人計攏會使利用電腦。靠電腦有影加真輕可，但是逐個煞變像一個模印 -出來兮，毋是因為利用電腦的資料著會佔贏面。蔡主席的要求、抑是講期待，對別項代誌我毋敢有意見，阿我著有影毋 pat7。準若是對咱母語的探究，這種要求可能有較懸；至少這是我個人的看法，我較愛鼓吹人使用網頂的資源，三四年前箸舊的 blog 我著主張 -過。若正經會曉利用、毋通揢網頂的資料錯解、誤用、用誤、胡亂衍伸、斷章取義、自我詮釋、偷換概念，安呢著阿彌陀佛啦！安呢敢著比別人較懸，我無清楚啦；上無，落屎馬 (lau3 sai2 be2) 無咱份。當然，看書嘛相 sang5，咱鬥陣勉勵。