【改寫】簡評《唐朝的官話研究 (1) 》

■ 前言：

這篇文章的原作是周乃昕，用華文寫 -兮，經過伊的同意，我 pat4 揢做一點仔修改，主要是箸標音的部分，因為伊自底是用進前的TLPA；另外，伊日語漢音用現代かなずかい，羅馬音標用英文小寫。文章的內容，是針對邱從容《唐朝的官話研究 (1) 》內底，引證的方法參所舉的語料，提出無 kang5 的看法佮質疑。最近拄網友虎豹有咧提起，我著揢改寫做台文，佫補充一屑仔資料發表 -出來，期以就正有道。

■ 本文：

聽 (邱從容先生，下稱邱君) 講2004年間，中研院李遠哲前院長 pat4 公開表示：
如果唐朝美女楊貴妃從墓地跑出來，他講的話跟我們現在說的閩南語是一樣的。

邱君認為李前院長的這段話：
意即閩南語是唐時的官話 ……
於是 (邱君) 蒐集了日本人編的《漢和字典》及《唐詩三百首》、《台灣閩南語辭典》等相關資料，同時結合漢文、日文及閩、客語文的專家學者 (下稱邱團隊)，做文字、語音的分析比對。

並將伊分析的內容佮結果發表箸《客家雜誌2006‧3》標題是《唐朝的官話研究(1)》(下稱邱文)。(案，請參閱「日語音讀123」頂懸的附圖)

楊貴妃用佗一種語言，是唐代的官話 -無？阿日語的漢譯音詞是毋是著是唐官話，本文無欲討論。阮 kan1 naN7 針對邱文內面，所引用材料有違常理參悖離事實的部分提出看法。因為邱文論述粗糙謬誤百出，阮無法度隨條仔詳評，kan1 naN7 會當約而言之。

評論之前我先做五點聲白：

1. 本文語言材料採用漳泉廈濫的台北話 (下稱台語)，佮阮較了解的苗栗四縣話 (下稱客語)。雖然阮平常時仔有法度用客語參人交談對話，但畢竟這毋是阮的母語，減采若有失覺察的所在，歡迎指教。

2. 日語漢字譯音用該刊編輯委員羅肇錦總主筆認為「與客語接近的漢音」 (案，羅氏 pat4 講：「以台灣閩客語言比對，閩方言接近吳音，客方言接近漢音)，主要的是一般都計認定日語漢音是按唐朝的長安傳 -入去兮。

3. 國語是指台灣國語，毋是揢「友誼、馴養」講「友ㄧˋ、ㄒㄩㄣˋ養」的普通話，嘛毋是「學問、名角」講「ㄒㄧㄠˊ問、名ㄐㄩㄝˊ」的北京話。

4. 台、客語標音基本上用TLPA。

5. 本評介非學術論文，引據資料無注出處，人名毋加敬稱。

● 歸納邱文，大概有三個理由與邱君認為客語比台語較接近日語。不而過，伊論述的根據並非事實：

第一，邱文搦準誠濟漢文的入聲字箸台語的話音內底無「入聲音」。

台語的話音入聲有陰陽兩調，收 -p、-t、-k 佮 -h 別於平上去，哪會無「入聲音」？

邱君將一寡像「尺 che、白 bei、舌 ji、鐵 ti」等入聲字的台語話音誤標、錯認做舒聲，當然著毋是入聲音嘍 (案，台語的入聲無讀做舒聲；我佫強調一遍，阮 tsia5 的「台語」是指漳泉廈濫的台北話，無包含宜蘭腔等)。若講喉塞音 -h 著免講徦羅常培、魏建功、董同龢、周祖謨、李新魁等諸家的說法，連羅肇錦亦講：「閩南語的入聲有 -h (甲)、-t (骨)、-k (六)。」

其實中國方言佮域外漢音入聲收 -r、-l 或者讀舒聲兮，亦大有所在。

第二，邱君認為台語話音雜混收 -h 或舒聲，入聲音無完整 (案，非，如上述) ，無親像客語平時講話的語音著是讀書音。

準若「平時講話的語音就是讀書音」著表示較有文化水準，安呢著有標榜的價值；不過，隈 (ui3) 另外一個角度來看，嘛表示講祖宗言的消失或者根本都無祖宗言。

少缺平時講話的語音著用讀書音的漢語方言，阮的看法是愈慢形成的語言愈有這囉現象。國語的話音著是讀書音 (案，「嗆聲」讀 「嗆 siaN55」、「凸槌」讀「thut55 槌」等是外來語，這無算)，嘛無咧外ライサン，並未改變伊是漢語方言的「細漢 -兮」這個事實。

事實上客人「平常講話的話音」嘛無的確是「就是讀書音」，像講 in1「億」-字，雖然箸邱文標讀書音「it」，但是 in1 今仔計讀舒聲「i」；「客人、客話」的「客」，kan2 毋參「客觀」的「客」共款用讀書音，唸做「khiet4」？

日本話漢字音讀內面的漢音、吳音或唐 (宋) 音、慣用音、百姓讀、訓讀都是日語；孔子白咸土音都計是廈門話。當然，台語的話音參讀書音嘛計是台語。敢講無揢 fu kua (苦瓜) 改講做 khu kua，揢 kak ngin m too (參人未合) 顛覆做 hap ngin m tshok 才算客語？阿 se pan ga (西班牙：讀書音)、hap tong (合同：讀書音) 的確愛讀做話音的 sai pang ge、kap tang 才是台語？「雨水」唸 hoo tsui (天頂落的雨：話音) 抑 u sui (節氣名稱：讀書音)，「等閒」唸 tan ing (等待有時間：話音) 或者 ting han (一般、尋常：讀書音) 著計是台語。邱團隊敢毋是有「閩語的專家學者」？未講連台語的文、白讀都捎無？這是台語的一兩 (nng7) 三 neNh4。

第三，邱君認為有一寡字詞，日、客語的「相似度」懸過台語。我先來講幾個仔邱文中較具代表性的例字「忒、鑊、遽」：

1.「忒」有「變更、差錯、邪惡、疑惑、甚 / 過於」等義；客語的用法有兩種，一種是借字，比如：除忒 (除了)、跌忒 (拍無 -去)；另外一種用法是上述五義中的最後一個，比如：忒多 (傷濟)、撐忒飽 (飵傷飽)。阮的了解，頭前四義，古漢語宋代進前攏有用例，客語做「甚 / 過於」應該是宋代才有的後起義。根據段玉裁的講法，阮推測客語用「忒」訓「甚 / 過於」，是「太」等的俗用土字。根據章太炎的講法，阮嘛知影楊貴妃未揢「傷短」講做「忒短」，因為，伊毋是章太炎口中的「今人」。

這字台語讀 thik4。

2. 台、日語無用「鑊」-字做食器，就像客語無用「鼎」-字共款 (案，部分閩客有咧使用)，楊貴妃用佗一字，阮無清楚。但是「鼎」-字做食器，箸唐人的著作內面並毋是罕見 -兮，包括《史記》三家注。丁邦新 pat4 就古文獻中指稱今仔台灣國語「鍋子」的炊具「鼎、釜、鑊、鍋」等字的相關語詞，檢索三家注《史記》頂仔各字出現的情形：「鍋、鑊」各只一擺，「釜」出現十四遍，「鼎」有一百見；《正義》、《索隱》唐人所撰，《集解》作者為劉宋時人亦近於唐，阮認為這嘛是一個值得注意的現象。in1 毋知影閩西的客語嘛有用「鼎」-兮，照羅肇錦的講法，客語的 -m、-n、-ng、-p、-t、-k 完整，是遷往粵東以後，佮粵語往來頻繁才有兮，閩西一帶無 -m 參 -p、-t、 -k；阿「鑊」咧？siang5 敢掛保證客語毋是學廣東人講 -兮？(案，我的看法是對吳語學來 -兮)

這字台語讀 hok8。

3.「遽」《廣韻》去聲九御，其據切，邱文中日語標 KYO， 亦不是入聲；參客語做「迅疾」的kiak，攏無一致。阮的看法，客語的「遽」著親像台灣國語的新詞「凸槌 (捸箠)、凍蒜 (當選)」相同 (tang5)，是借字。若欲講「一聲之轉」，阮認為羅翽雲氏的「亟」轉著較高明，上無，人嘛是一個入聲字。有一篇論文講：「遽 kiak，快也。音，唐韻，奇逆切」 (案，該論文作者所編的客語字書「遽」亦作 kiak) ，阮檢視過相關材料都未獲印證：《唐韻》殘葉內底，「遽，其倨反」是去聲，阿箸入聲「奇逆反」的音切內面並無收「遽」-字。羅肇錦講：「解釋《經典釋文》中的通假時，用客語比較合適，因為《經典釋文》是唐陸德明所著，而客語保有較完整的唐宋音韻」，但是箸《經典釋文》，有直音或音切的「遽」攏總二十七見，無徦一個是讀入聲兮。

這字台語讀 ki7。

日語漢音是用 in1傳入去日本彼當陣的漢語讀書音共字書做基礎，佫再納入 in1 家己的音韻體系整理形成兮。各種漢語方言的讀書音大多數亦是經過這款模式；因此，多有互相對應的規律。各種漢語方言有音無字是不可避免的，但絕對無像邱文所想兮，搦準某一寡日、客語有音的漢字，唯獨台語無音。其實這寡邱君未曉 -兮的台語字音，比如「忒、鑊、蹶 ……」，箸羅肇錦過去的著作所引用參考書目的書內，每一個字的台語字音都計標徦清清楚楚。

● 毋免專業，用一般常識，著會當知影阮講邱文是粗糙、謬誤百出，一屑仔嘛無過分。

一、邱文中的日語漢字的讀音不但夾雜吳音、漢音、慣用音，漫無標準；也有不之所云的「自創音」，像：尺CHAKU、日NITSU、劇SATSU …… 非驢非馬，佫較更離經的是揢「五」標做「GO (U)」。邱君錯解「《漢和辭典》前言「日本漢字的發音 …… 由於發音的難易，所以有一些轉化，像是鼻音 ng 就變化為長音 o」。而且為著欲附會伊 「此音不就正是客語的五 (ng) 字音嗎？」竟然削別人的骹來合家己的鞋，硬揢日語 (GO) ゴ的後壁加一字U (ウ) 成做長音 (GOU) ゴウ。

這真簡單阿，準邱君的見解若是對的，安呢日語的「五」著變愛講做無聲母的 OU (オウ)，毋才會參客語的 ng (五) 對應；日語哪猶佫會有一個輔音 g-？按上大部 -兮 (siong7 tua7 pho7 e9) 徦一般的日本字書，或者日本人的正常口音，「五」攏是GO (ゴ)，毋是OU (オウ)，嘛毋是GOU (ゴウ)。這款未輸天才的做法，有影與人嘆為觀止。(案，這個部分我箸 日語音讀123 寫了較詳細)

舉幾個仔漢字的字音來說明較緊，按 / 台語 / 日語 / 客語 / 的順序照排：

1. 台語發 ong，日語漢音是オ段字母的長音 (著是 oo ＋ ng)，相對應的字，客語發 ung。
東 (股東) ----- tong / トウ / tung
紅 (紅顏) ----- hong / コウ / fung
公 (公主) ----- kong / コウ / kung
翁 (富翁) ----- ong / ヲウ / vung

2. 台語發 ang，日語漢音是ア段字母的長音 (著是 a ＋ ng)，相對應的字，客語發 ong。
江 (江山) ----- kang / カウ / kong
港 (香港) ----- kang / カウ / kong
幫 (幫忙) ----- pang / ハウ / pong
忙 (幫忙) ----- bang / バウ / mong

3. 台語發 iong，日語漢音是ヨ的長音 (著是 ioo ＋ ng)，相對應的字，客語發 ung。
用 (用心) ----- iong / ヨウ / iung
重 (重要) ----- tiong / チョウ / tshung
種 (種種) ----- tsiong / ショウ / tsung
松 (松山) ----- siong / ショウ / tshiung

所有的字例，韻母台語攏有舌根鼻音尾韻 -ng，日語漢音計對應唸長音ウ；這才符合「《漢和辭典》前言 ……「日本漢字的發音 …… 由於發音的難易，所以有一些轉化，像是鼻音 ng 就變化為長音 o」這句話。邱團隊的日文專家對《漢和辭典‧前言》的內容，確實創了無清楚，m7 koh8 這是一般常識阿。

4. 但毋是所有的對應計 hah4 niN7 仔照規律，比如講台語發 -ing，日語漢音 kan1 naN7 有長音 (著是 ng)，相對應的字，客語發 -en、-in、-irn。
烹 (烹調) ----- phing / ハウ / phen
興 (復興) ----- hing / キョウ / hin
幸 (幸福) ----- hing / コウ / hen
證 (證婚) ----- tsing / ショウ / tsirn

台語佮日語漢音的鼻音韻尾有合，但是介音 (抑是元音) 著對未起 -來。客語除了元音無 kang4，猶讀做 -in、-en 抑是 -irn 三款舌尖韻尾 -n；而且台語、日語漢音讀 ong 的客語讀 ung，台語、日語漢音讀 ang 的客語讀 ong。

箸邱文《(一) 比較數字語音》，伊的結論講：
…… 像是鼻音 ng 就變化為長音 o。」此音不就正是客語的五 [ng] 字音嗎？證明客語跟日語的數字語音最為相似。難道這一串數字的語音及聲韻如此的相似都是巧合嗎？

阮無客氣的講，毋是「巧合」啦！若毋是未曉 -兮亂主鬥，著是刻意的人為加工。因為邱文十四個數字語音的比較，講了正確 -兮，五枝掌頭仔 (tsing2 thau5 a2) 都遏 (at4) 未 tiN7。所謂「講了正確 -兮」包括邱文認為閩南語亦「跟日語都相近」，準若講了著的部分，請參閱「日語音讀123」。

二、邱文客語的標音基本上無問題；台語的標音則莫名其妙，像講：

[ts-] (案，方形括號內面是國際音標，下同) 用 z- (zit「一」) 、用 j- (jia「呷」)、用 J- (Jio「石」)、亦用 c- (cai-khi「早起」)。阿 c- 嘛會使當做 [ts’-] (cing「千」)。

[ts’-] 用 ch- (chit「七」)、亦用 c- (cing「千」)、或者用 ts- (tsai「菜」)。

g- 會使當做 [k-] (gau「九」) 會使做 [g-] 用 (gak「獄」)。阿 [g] 有時仔嘛標 gh- (gho「五」)。

[b-] 有時仔標 bh- (bhan「萬」)、有時仔標 m- (mei「糜」)、有時仔標 v- (vut「物」)、有時仔嘛標 b- (bah「肉」)；阿 b- (bak「腹」) 有時仔嘛變做 [p-] 咧使用。

有異讀的「鐵」標「ti / thiat」、「割」標「gua / kat」。

繁不勝舉，聲母安呢，韻母共款茹 ka3 ka3。阮不禁懷疑邱君所結合的「閩語文」學者是佗一方面、佗一角勢的專家，因為這些疏失根本著毋是校讎上的問題。欲記台語的語音，pat4 拼音是上基本 -兮敢毋是？

三、箸「比較生活詞彙」這個部分，邱文有比對十二個字 / 詞例。阮 kan1 naN7 摕出半數做無同的看法；這無表示阮同意伊其他的分析，比論講阮認為楊貴妃用「批」的可能性懸過用「信」、台語 chu (tshu3，a house、home) 的本字不是邱文誤用的「厝」…… 這寡議題攏計需要較濟的材料說明佮引證，無合適作簡評。

1. 邱文「早餐」日語用「朝食」客語用「食朝」，台語用「早頓」。

客語「早、午、晚餐」攏有幾仔囉種講法，未貧乏徦只 kan1 naN7 會當 (tang3) 用「吃早餐」(食朝) 來對應「早餐、朝食」；羅肇錦嘛講過客語「朝」著是早餐、「中晝」就是午餐。邱團隊的客語專家走佗去 -啊？

邱文講：
(日、客語) 最為相近，只是日語的用詞習慣，將動詞放在後面而已。

日語「將動詞放在後面」準若是邱文講的彼種囥法，阿「定食 (テイショク)、洋食 (ヨウショク)」是咧飵啥？「夕焼 (ユウヤケ，晚霞)」毋著變做「燒暗時仔」，「飯炊 (メシタキ，炊事工)」 毋是咧炊飯 neNh4。「朝食を食べる」毋煞變做「吃『吃早餐』」？這是日語初步 e9；邱團隊日語專家的程度有影敢才安呢若爾？我是無啥欲信啦。

唐人筆記中的「學禪務於不寐，又不夕食」，這 liah4 的「夕食」，無論解釋做「晚餐」或「吃晚餐」，邱文的講法計攏是未當 (tang3) 能成立 -兮。

若講台語用的「頓」，真可能為唐時用語，因為有用例。

2. 台語稱「午餐」為「中晝飯」或「下晝飯」，甚至用一字「晝」來表示嘛會使 -兮，比如「飵晝 (tsiah8 tau7)」著是「飵中晝」。邱文誤為 tsiah tau (吃中飯) 著是「午餐」，無定著邱君有影毋別，嘛可能又佫是削別人的骹來合自己的鞋，欲配合客語的「食晝」(吃中飯)。

華語的「早、午、晚餐」箸香坂順一等日本人編的字書是以「朝飯 (アサメシ) / 朝食 (チョウショク)、晝飯 (ヒルメシ)、晚飯 (バンメシ)」來對應。「朝食、晝食」並非唯一日本日常活上常用的漢字詞彙。

3. 邱文用日語「齋食」、客語「食齋」對應「吃素」。其實日語的「齋食」是指僧侶的、或者佛事法會上所饗的飯食，毋是指「吃素」，亦毋是指「素食」。

國語「素食」，日語嘛會使稱做「素食 (ソショク)」，亦會使講做「菜食 (サイショク)」，抑是「精進物 (ショウジンモノ)」。「茹素不食葷」日語是「精進物を食べるが腥を食べない」，著是「菜食主義を守る」。「吃素」的日語是「菜食を食べる」、「精進物を食べる」，毋是「齋食」好 -無。

客語的「食齋」毋是日語「齋食」。

4. 邱文講「稀飯」日客語都用「粥」，台語用「糜」。邱君準若未曉台語「粥」-字正確的讀法，阮未感覺奇怪，與人想無兮是連客語嘛有人咧用「糜」，邱君竟然亦無清楚。羅肇錦不只一擺箸伊的著作當中提及，甚至猶佫講「糜」這個「客語語詞保有古字古音，但長久不用，被遺忘了」。

事實上阮認為客語的「糜」抑「粥」可能攏是源自周邊其他語系的外來語，參豬紅 (豬血)、拄好 (剛好)、菜頭 (蘿蔔) …… 共款。

4-1. 客語上晏箸十六世紀著揢「稀飯」講做「糜」，明世宗嘉靖二一年的《惠州府志》著記載徦真清楚：
郡城中多正音，歸善、河源相類，畧近正 …… 海豐近潮，謂「粥」為「糜」。

今仔海、陸豐的客人嘛無諱言講 in1 的字音、用詞足濟足濟計是學潮州話兮。大家 (tai11 ke33) 敢知，in1 對「粵語、廣東話」這個名詞，與 (hoo7)「廣府話」「獨佔」，嘛未有意見、去抗議；果然，所在大、世面看濟，人著未雞腸鳥仔肚。

4-2. 謝重光指出，有台灣客籍的學者講台灣客家人無飵糜，講這參 in1 先人南遷，飯較好 khaiN2 (案，好 khaiN2，意思是好整理，款款咧著會使 tsah4 咧行) 的因素有關係。嘛有共款是台灣客籍的學者講台灣客家人一工三頓，一般無計攏飵飯，中上的家庭暗頓飵「粥」，有兮是早、暗兩頓飵「粥」；但是，客家人飵「粥」，毋是「稀飯」，是「饘粥」(案，「饘粥」著是「洘頭糜」)。這位福建的客籍學者認為兩種講法攏各道理，飵飯無飵糜是客人的傳統，飵「饘粥」是台灣客家人的新習尚。

4-3. 謝重光佫講：
在台灣，與客家關係最密切的族群是福佬人，因此客語受閩南語的影響最大。

謝氏引用吳中杰的研究，列舉客語受閩南語影響，有代表性的詞彙內面，其中著有這條：

普通話：稀飯
大陸客語通常說法：粥
閩南語通常說法：糜
台灣客語特殊說法：糜
特殊說法通行地區：海陸話、台灣饒平話、東勢話、基隆豐順話

講「受影響」，著是「綴 -人」抑「學 -人」的意思，毋是偷亦毋是搶，這哪有外歹聽？有啥通見笑 (kien3 siau3)？佗一種語言會當避免？包括台語共款嘛是有受其他語言影響，才「綴人講」、「學人講」的外來語；毋是用詞若爾，有當陣仔連語法嘛綴咧變，比如，「去與先生看」→「去看醫生」。

無毋著啦，客語這種「受影響」的講法，今仔變較少啊，計改講「接近」閩南話，抑是講做「古漢語」。這攏未要緊，根屬汝 -知知 (tsai9 tsai9)、我 -知知，pat4 的人自本著心知肚明；但是毋知的人千萬著毋通摕這來揢人相諍，若無，隨時著 hong5 (與人) 看破骹手，因為，事實著是事實。這個問題的事實 kan1 naN7 一個，阿講事實 -兮嘛毋是台灣人若爾，客籍的學者老早著有白紙烏字，未 hau1 siau5 咧。

5. 邱文講日客語用「斜」台語用「趄」。

阮的了解，日語「斜」是ななめ、はす …… 的訓讀借字，除了漢字語彙如「斜雨、斜徑、斜谷 ……」以之外，日語多用かたむく、ななめ來指稱不正、偏歪。

「斜」台語唸 tshia 或 sia， (案，有人講又讀chuah8，疑是借字) ，一般人都會當正確使用。客語有兩讀，「斜斜」本來有人讀 tsia tsia 不過少年兮都計講做 tshia tshia 較濟。

6. 邱文中日、客語用「禾」對應國語的「稻」，阮揢日本字書相關的注釋抄錄於下：

禾：(1) 榖類の總稱，(2) あわ (案，粟)，(3) 稻「禾榖、禾稻，禾穗」。

稻：イネ (案，「稻」的訓讀)、イネ科の一年生作物。

日語稻刈 (イネカリ)、稻作 (イナサク)，未講禾刈、禾作；台語下冬 (e7 tang1) 阿本仔著號作「稻の第二期」。真明顯嘛，kan1 naN7 用「禾」，日語並無法度辨別是毋是咧指稱イネ，日語イネ kan1 naN7用「稻」-字。

四、綜上所述，邱文的分析比對，是毋是只靠一知半解的書面材料，雖無從得知，但欲為文立說，阮認為邱團隊的語文水平應該猶有加強的空間。尤其是台語文，阮孤 ta1舉兩個事例著好。

1. 邱文講「濕」-字閩南語一般習慣用澹 damp (案，即 tam，台語無 -mp 韻) ，文讀的例變做「溼 sip氣 khi 重 dang (案，即 tang)」。

錯 -了！

台語「濕」文白攏講 sip，「氣」的話音亦會使講 khi，例，khi3 thiong3 lun2 (氣暢忍)、khi3 si2 giam7 bo5 siong1 (氣死驗無傷) (案，有人講「khui3」的正字是「喟」)。「重」文白各有幾仔款唸法，tang是話音則無爭議，邱文「溼 sip 氣 khi 重 dang」是台語的一般話音。

台語「tam」敿「濕sip」是兩種無 sang5 的狀態，與大雨淋了 (lam5 liau3)，衫會 tam5 tam5。拄著毛毛仔雨，抑是八九分 ta1 的衫仔褲著就是 sip4 sip4。南風天水氣較重，若無除濕設備，有時仔箪笥 (タンス) 內的衫仔褲會 lun3 lun3；盒仔蓋 kam3 無密，過 -一久仔有當時仔餅嘛會 lun3 lun3。去海埔仔佚陶 (thih7 tho5)，曝日流汗穿 (tshing7) 的紗仔衫猶未過洗、猶未 ta1 -去的時，小可會黏黏滫滫 (siuN5)，號做 khi5 khi5，有的所在講 tshi5 tshi5。

「濕 (sip4)」參「tam5」相 sang5，絕對是台語的一般用語。

2. 邱君搦準講台語無用「蹶」-字，而且有字無音。

嘛錯 -了！

台語「蹶」有兩讀，話音kuat4，共「撅」同音。

蹶，蹴也，例：
kuat4 loh9 khi9 (蹶 -落去)
kuat4 hoo7 to2 (蹶與倒)
i1 sio1 tsiu2 tsui3, khia7 to1 bue7 tsai7, ing7 kha1 khing1 khing1 a2 ka1 kuat4, tsit8 siaN1 tioh8 hoo7 phak4 leh8 thoo5 kha1 e1 (伊燒酒醉，徛都未在，用骹輕輕仔揢蹶，一聲著與仆咧塗骹兮)。

撅，手擊也，例：
kuat4 tshui3 phue2 (撅喙 phue2) (案，王華南講正字是「喙【面甫】」，有理。這字《楚辭》、《淮南子》等計有用例，有兮寫做「輔」)
kuat4 pai5 2a / ang1 a2 phiau1 (撅牌仔 / 俑仔標)。
koh4 kong2, tioh8 kuat4 nng7 e7 a2 hoo7 li7 (佫講，著撅兩下仔與汝)。

攏是台語一般用詞。

● 這種比較只是各取所需，做DM好若爾 (naN7 niaN7)

漢文有幾仔萬字，差不多攏會當按日本字書的頂頭揣 (tshe7) 著音讀，佗一種現代漢語方言能有才調計全用 -著？甚至有兮字有用 -著，嘛毋知影。摕方言的特殊用 / 借字做研究，可能對族群自信的建立或語文訓詁有所幫助嘛無定著；但是用一寡似是而非的論說，來參其他的語言做比較優劣的工具，著大可不必嘍，我著摕幾個仔 in1 自以為豪的入聲字做比喻：

「秫」，日音シュツ，もちごめ，指「糯米」。
「捸」，日音トツ，なめらか，「滑溜」的意思。
「扴」，日音カツ，けする，是「削、刮、刨」。

台語依次讀做：tsut8、thut8、kuih4 / kueh4，攏是入聲字，亦是一般用語，像：秫米、捸箠、扴破紙 ……。

箸日常用語，「放尿」台語嘛講「旋尿」抑「旋桶」(桶，音 thong2)。「旋」做「小便」解說的用例，會使按元代上溯到漢唐、春秋戰國。 (案，日語亦有「放尿」讀做ホウニョウ，嘛是咧指 to urinate、urination )

台語的「一紀 (十二) 年、領 (衣物量詞)、變相反形、東朋西朋 (東邊西邊)、老母、後母、新婦、洋 (煬) 銅、搦 (liah8)、波稜菜、奢花、分張、分減、排比 (安排的意思) ……」，箸唐古籍抑是唐變文攏有有明確的記載。著算是安呢，嘛 kan1 naN7會使講用字 / 詞相同，未當 (tang3) 講台語比某一種語言較接近日語或者唐朝的官話，除非有佫較濟的證據。因為語言有伊的層次，台語嘛有先秦、兩漢、魏晉南北朝的用語，無可能隈先秦徦唐代攏未變 -兮。

邱君講：「閩南語許多的文讀音變成客語音」，毋值兮識者一駁 (案，當然亦會使解釋做是咧講客語音是按閩南語的文讀音「變成」兮，但綜觀邱文，阮認為邱君是咧講閩南語的讀書音是按客語音「變成」兮)。只不過坊間類似的論調蔚起，阮想欲佫摕幾個仔事實供大家參考。

一、一般來講，「讀書音」遠遲於「話音」，是絕大部分的學者所公認的。台語讀書音的形成，一般與人會當接受的講法是陳元光或者是王潮的時陣。但是客語族根據羅香林的考據，與唐時的長安並無地緣上的關係。丁邦新佫較明白的指出：「 (宋末元初) 之遷徙即形成後來所謂『客家人』及『客家話』。」 黃遵憲《梅林詩傳‧序》：「此客人來者，自河洛由閩入粵傳世三十歷年七百年」(案，黃序於1901年)，拄會使支持丁氏的講法。照安呢推估，客語的形成較台語讀書音猶晏幾囉百年。

二、阮比照羅肇錦分析統計《長恨歌》的押韻字，比對了一寡唐詩的韻腳，下面是部分的比對情形。

陰聲韻：《登金陵鳳凰臺》韻字「遊、流、丘、洲、愁」，台語、日語漢音韻母攏是 -iu，客語為 -iu、-u、-eu，國語計讀 ㄧㄡ。

《八陣圖》韻字「吳、圖」，台日語都唸 -oo，客語唸 -ng、-u，台灣國語計讀 ㄨ。

陽聲韻：《新安吏》韻字「兵、丁、行、城、俜、聲、橫、情、平、營、京、輕、明、兄」，台語計讀 -ing，日語漢音韻母エイ、アウ，客語唸 -in、-en、-ong、-ang、-iung，國語讀ㄧㄥ、ㄥ、ㄩㄥ。　

入聲韻：《夢李白》韻字「惻、息、憶、測、黑、翼、色、得」，台語都唸 -ik，日語漢音「黑、得」讀唸 -OKU，其他計讀 -YOKU，客語唸 -et、-it (案，「憶」字讀塞尾音 -t，是照字書去推兮，實際上客語是讀舒聲 -i，梅縣客語亦共款)，國語讀ㄜ、ㄧ、ㄟ。

看 khiai9 除了入聲的押韻以外，客語的讀音連國語這個漢語方言的幼齒 -兮，著較輸。其實嘛無定著啦，看下骹這條著知。

三、幫組的聲母梗攝陌韻的開二字「陌、佰、白、帛、舶、伯、迫、百、柏、拍、魄、珀 ……」，韻母台語全是 -ik，日語漢音計 -AKU，客語有 -ak、-ok、-et (案，「迫」梅縣唸 pit) ，國語讀ㄛ、ㄞ。 入聲 -兮，客語的「相似度」敢會贏過國語？

按頂面三個材料看來，台語、客語、日語漢音、參國語，若 (naN2) 會使揣出互相對應的規律；但如果是「變成」兮，未「變」徦有 hiah4 niN1 仔大的落差。

當然，邱文講部分日語的漢字語音，大致上是受著客語的影響，亦是經未起檢驗兮。

用家己無熟的語文，kan1 naN7 怙書面材料抑是幾個發音人的紀錄作論證的依據，絕對有一定的難度。就算治學態度嚴謹如王力、董同龢，亦難免有出錯的時陣。一位學者無先探究粵語「馬騮」的詞源，亦毋知影台語稱螞蟻為 kau2 hia7 的由來；佫較無去注意前哲的考釋，著輕易的講人：「廣州的馬騮 (猴子)，廈門的狗蟻 (螞蟻)，都是指馬為猴，稱蟻為狗了」，汝會使講恁的母語有外古雅、外正統，阮無興趣去參恁把會 (pe2 he7)；何必消遣其他的語族來突顯家己咧？準若是想欲「創造歷史的共同記憶」，用這種方式絕對是下下之策，逞一時之快才與人當做話題，算未和 (ho5) 啦。阮尊重邱君維護祖宗聲的用心佮勇氣，不而過這款若辦公會仔的論述，恐驚兮會適得其反咧。

■ 後記：

1. 這篇文章是學弟箸2006年寫 -兮，當時的TLPA猶未「整合」，伊的標音是用以早的方式；寫好的時，伊有咸一張批交代我轉交與一位長輩，拜託長輩揢做修改，抑是提供一寡意見。彼位長輩看看咧，kan1 naN7 講一句「傷閒毋才安呢」，佫揢原稿摕還 (theh4 haiN5) -我。

2. 但是這篇文章與我的啟示足大的，了後，我根據伊文章的內容，去問人、去揣資料，就安呢上北京大學語文論壇等等的網站，去看人的講法。

2007年四月開始箸閩南地區的語文論壇參人討論相關的問題，獲益良多，嘛結交了未少程度真好的朋友；佫決心欲將我過去看過聽過 -兮、所想所寫的物件 naN2 整理 -起來，這攏是學弟這篇文章的致蔭。

3. 經過學弟的同意，我有做小可修改，佫揢這篇文章原文【轉載】，留箸我舊的Weblog；這毋是因為我認同伊的觀點若爾，上重要的是欲提醒我家己，是因為學弟的這篇文章，才引起我對母語的注心佮熱情。

4. 伊 pat4 答應 -我，欲將伊對邱文的「詳評」重新改過了後，交與我翻寫做台文，隨在我發表。不過，這個「詳評」徦 taN1 猶未完成。

5. 這篇文章囥箸我舊 blog 了後，有網友提供補充的意見，以下是參本文較有關係兮 (用字、標點符號我有修改過)：

◆ 網友R 2008/02/27 12:00 回應：

客語「早、午、晚餐」都有好幾種說法，不會貧乏到只能用「吃早餐」(食朝) 來對應「早餐、朝食」
可以簡單賜告客語「早、午、晚餐」還有哪些其他的說法嗎？

我2008/02/27 20:39回覆：

客語「早、午、晚餐」確實有幾囉種的講法。

我所了解的，像：「朝、早飯、天光飯、清早飯、清早頓、晝、中晝、晝飯、上晝飯、夜飯、暗晡、暗哺頓」等等。

◆ R君 2008/03/06 14:43 佫回應：

格主說的這些客語是聽說的還是有確切的根據？比如早飯、夜飯等，我找過客語詞彙都沒有，其他的就更別說了可不可以再請教你

我箸2008/03/06 23:32回覆：

1. 有聽人講，亦嘛有根據。

2. 有一個朋友，in1 阿公毋知是三灣抑是南庄的人，伊台語參客話攏計100%，完全無腔口，聽未出來是佗一族群的人。in1 某是苗栗市兮，箸處 -兮敿囡仔攏用台語佮客話，用客話的時，飵早起「食朝、食早飯」濫咧用。若欲知影較濟咧，上網 (tsiuN7 bang7) 查就有。

3. 毋知汝 tshe7 過啥麼款的冊，出書有固定訴求的讀者層，無一定愛寫 kah4 攏褿勻 (tsau5 un5)。我的看法，加 (ke1) 參考 -幾本仔，比較會 khah4 好。

4. 不但「夜飯」，連「晚飯」客話嘛有用，這毋是講最近受國語的影響才有的新話詞。

日本時代的《廣東客語辭典》頂頭著有，箸「ユウメシ 夕飯」這條，客語就是「晚飯、夜飯」，下骹佫講：「『ユウメシヲタヘル』食夜」，意思就是客話講「食夜」就是「飵暗」的意思。

另外箸「アサメシ 朝飯」這條，嘛有講：「『アサメシヲタヘル』食朝」，意思就是客話講「食朝」毋是「早起頓」，是「飵早起」的意思。

這著證明邱團隊的日語實在有問題，因為日本話「朝食」的「食」，小可別 (pat4) 日語的人攏嘛知影不是動詞 (飵)，是名詞 (食物) 的意思。阿這本辭典是採用台灣北部客話的四縣語音做譯語 -兮。