台灣土棋---直兮的行法

■「直兮 (tit8 e3)」有人講「行直兮」、「行直棋」、「塗礱棋」。

古早的人咧行直兮，差不多攏計是蹛 (tua3) 塗骹畫畫咧，無專用的棋枋 (棋盤)。子仔 (li2 a2 / ji2 a2 / gi2 a2) 普通是用破瓦碎仔 (紅色的) 佮細粒石頭準。徦尾仔，學生囡仔著摕畫圖紙來畫棋盤，子仔用塑膠紐仔代替。

這個行法敿 (kiau1) 規則，是我請教人的，ui3 2007 徦 2009年二月為止，有問過將近六十個人，攏是五十歲以上的。

女性占六個，無人會曉這種棋，其中有一個講伊做囡仔的時，別 (pat4) 看過的款，略仔有印象。

偆兮 (tshun1 e1) 的男士，無分教育程度，台北市裏，六十歲以下的攏無人會曉，超過六十歲的，有兩個別 (pat4) 行過，一個蹛頂搭悠 (ting2 tah4 iu1)，一個踮第二水門附近；市郊超過六十歲的，有七成以上的人，毋別 (m7 pat4) i7 過抑是聽過。

台北附近的縣市，共款無啥人別；全部統計起來，知影這款土棋的無徦三割 (saN1 kuat4，「割」，源於日語的台灣外來語，わり，十分之一)。

其他的地區猶無機會通 (thang1) 請教人(讀陰去聲)。

■ 基本規則佮行法

一、[ 棋盤 ]：
大、中、細三個四角箍仔相叠 (thah8)，上細的箍仔裏，寫一字「牛」，大箍仔四朋的中心點參四個角攏畫一條直線，經過中箍仔四朋的中心點參四個角，畫到 (kau3) 細箍仔四朋的中心點參四個角。

四角箍仔的四邊我定義為「橫線」，連結橫線中心點叫「直線」，連結四個角的線號做「斜線 (tshia5 suaN3)」 (圖一：棋盤)

二、[ 棋子點 (ki5 li2 tiam2) ]
所有的棋子毋管是囥子(khng3 li2)、行子(giaN5 li2)，攏未使超出棋盤頂頭個24個點。(圖二：棋子點，白色圓箍仔的所在)

三、[ 行法 ]

1.分做兩方 (liong2 hong1)，雙方各有12子，攏總24子。

2.開始由一方先囥子，雙方一來一往，一擺一子； 24子囥煞才 (tsiaʔ8) 會使「行 (kiaN5)」，雙方輪流一擺一步 (照線行，未使用跳的)。

3.飵子 (tsiah8 li2) 三之一：
「摃死 (kong3 si3)」，囥子、行子將對方箸直線中央的子仔，頂、下包圍，欲飵的時陣愛先喝「摃死」，就會使揢對方彼粒被包的子飵掉。(圖三：摃死)

圖三的例，表示烏子彼方，箸白色的棋子點囥子，或行子到 (kau3) 白色的棋子點，攏會使將對方被包的 (紅色點) 的子仔飵掉摕起來 (theh8 kiai3)。

與人 (hong7) 摃死的一方會用兮 (e7 ing7 e1) 佫踮原位補子。

4. 飵子三之二：
「擔 (taN1)」，有一方箸橫線的兩朋各有一粒子，對方若箸中央囥、行子的時陣愛喝「擔」，就會使揢對方彼兩粒被擔的子食掉。(圖四：擔)

圖四的例，表示烏子箸白色的棋子點囥子，或行子到 (kau3) 白色的棋子點，攏會使將對方被擔的兩粒紅子仔飵掉摕起來。去與人擔的一方會用兮佫踮原位補子。

5. 飵子三之三：
「直」，任何一方伫直線、橫線抑是斜線，有三子連做一條線的時 (囥子、行子)， 就愛喝「直」，會使揢對方箸棋盤頂面的子仔，隨在揀一粒飵掉。(圖五：直)

6.輸贏：將對手12粒棋子飵了著算贏。

四、「行直的」嘛號做「塗礱棋」(thoo5lang5 ki5)，棋盤中央寫一字「牛」字，表示牛咧挨塗礱 (ue/e1 thoo5lang5)，行棋的人若有法度將棋佈局做「塗礱」，勝算就足大的。

五、「塗礱挨」陣勢就是有兩組「直」，每行一步，攏會使喝「直」飵對方的子。(圖六：塗礱挨)

圖六的例，烏子著有兩套「塗礱」(各有兩組「直」)，箭頭的記號表示烏子彼方，兩位白色的棋子點 (棋子是一粒) 每行一步，計有三粒子仔連做一條直線，攏會使喝「直」飵子。

米麷 bi2 phang1

台語 bi2 phang1 ( popcorn )，華語，爆米花，個人認為本字是「米麷」。 麷，《廣韻》敷空切，敷紐東韻； 敷紐台語讀 ph-，比論講「紡、丕、品、篇、烹」等； 東韻箸台語會使唸 -ang，像「空、東、公、蔥、翁」等； 東，平聲，敷非濁母，讀陰 (上) 平調；麷，台語讀做 phang1，聲韻調合乎常例。「麷」中古音唸 phang1 無問題；上古音幫母東部，台語話音也是 phang1。[1]

根據諸橋轍次《大漢和辭典》縮寫版，大修館，昭和51，麷，《周禮‧天官》朝事之籩，其實麷 ……，[疏] (案，賈公彥疏) 熬麥曰麷。《孫詒讓正義》：「《說文》熬，乾煎也，古所謂熬，即今所謂炒也。」
《說文》麷，煮麥也，从麥豐聲，讀若馮。段注云，程氏瑤田曰：「熬煮蓋通稱。熬，乾煎也。」…… 煮麥，非麥粥也。意思參孫詒讓共款，頂頭講的「麷、熬、煮」，著是「乾煎，即今所謂炒也」。
台灣以前的米麷是用炒的，有機器了後，才 (tsiah4) 用「磅的」。所以「一的炒韭菜，二的炒米麷，三的 tshiang5 tshiang5 滾，四的炒米粉 ……」這條囡仔歌，應該比「新娘新娘媠噹噹，褲底破一空，後壁磅米麷 (放炮仔)」較早有的。[2]

孫畢《章太炎〈新方言〉研究》[3]：
1.《漢語方言辭典》：「米麷」(名)爆米花。(一)江淮官話。(二)吳語。江蘇。(三) 西南官話。武昌。
2.《新方言》：“郝懿行曰：今江南人烝稬米暴乾焣之呼米麷。章炳麟案：今武昌語如是。”

黃晉波教授講：
「我的看法是，米芳很可能是一種較新式的食物，而米芳這個名稱應該是直接源自口語，無證據顯示其與「麷」這個古字相關。」(網友S君轉述)

我的看法：
新的事、物，百面 (pak4 bin3) 無法度按古冊的頂頭揣 (tshe7) 著用例，但亦毋是講定著計用「新音新字」；何況有啥麼 (sia2 meNh4) 「證據」講「米麷」是一種較新式的食物？
「米麷」外久以前就有，這我嘛毋知，不過，上慢大概箸清乾隆的時陣，就有「米麷」這句話。

以前支票台灣講號做「手形」，用遠期支票與 (hoo7) 人準當，扣利息借現金，叫做「斣 (tau2) 手形」( 尾仔有人講「斣支票」) 抑是「斣現金」。「支票」敢毋是新的物件？「斣支票」的歷史敢有比「米麷」猶較短，用字亦是「無證據顯示」的「古字」。

台語有音無漢字的「口語」， 嘛有一部分是失落去、咱毋別、無人教咱的，所以毋才有爭議、討論、考求。 鞋油、絞齒仔、齒 khok4 仔、揯仔 (king1 a2，彈簧，spring)、塑膠袋仔、樹奶箍仔、電火 ……，照黃氏的標準，共款計無「證據」參「油、齒、揯、塑、膠、樹、電、火」這寡古字有相關，敢有講這用了毋著？

揢 (ka7) popcorn 講做「米麷」的，並非只是台語或閩南語若爾 (naN7 niaN7)，這著是「證據」。

[1] 段玉裁參「東」字共款，攏囥箸第九部；《古韻通曉》照章炳麟、周祖謨等的意見，歸入「冬」部 (陳復華、何九盈，中國社會科學，1987)。上古音「冬」部，台語亦有讀 -ang 的，比如「降 hang5、kang2」、「冬、苳 tang1」、「蟲 thang5」、「膿、隆 lang5」。

[2] 林建輝講，今仔 (tsim1 ma2)：「廈門遮攏是講 “pōng米芳“，無講過 “炒米芳“。Hit條囡仔歌，阮是唸講 “一的炒青蔥，二的炒韭菜，三的chhiāng-chhiāng滚，四的炒米粉，五的五將軍……“」。
不過，箸泉州地區，也 (ia2) 是有人用「炒米麷」；這，除了箸線上收聽「刺桐之聲」廣播別 (pat4) 聽見，亦向泉州的在地人確認過。

[3] 華東師大出版社，2006

周長楫教授語錄簡評007---直

■ 這篇文章，我有發表過。上頭仔兩擺是欲請教網友相關的問題，因爲對象無講攏別 (pat4) 台語或閩南語，所以計是用華語來做表達。
後來一個網站已經結束，另外一個嘛是半停睏的狀態。tsun2 年我有改做台語，爲著配合「體例」(虎兄所講的)，我佫 ka1 シアゲ一擺。

箸「過熨斗」裏面，有講著彼個問問題的學生 in1 阿伯，對學生的老爸講「汝哪 hiah4 直啦」；這角的「直」，是咧講人「性地未彎蹺 (uan1 khiau1)，抑是未曉變竅」的意思。不過「直」字，箸台語裏底，會使做幾仔種無同的解說。

■ 周長楫講：

語詞：直
● 台灣閩南語：①成直綫或跟地面垂直的 。②(言行)無顧忌，(性格)直爽③一直。
廈門話：①同台灣①②③。②清楚，了結：一條代志 ~ 咯。③民間一種簡易的棋。
(台笠《閩南話的形成發展及台灣的傳播》台笠，1996：295)

●【直】…… ⑥一種簡易的棋，規則類似圍棋，流行於閩南。
(《閩南方言大詞典》福建人民出版社，2006：581)

●【行直】一種棋類遊。人們稱是閩南創造的一種「土圍棋」。……
(《閩南方言大詞典》福建人民出版社，2006：524)

■ 事實上：

● 台灣話講：

「伊有夠茹兮，仙講著未直。」(華語：真是不可理喻，無論怎麼說，他都搞不清楚)

「兄弟仔代，講講摵摵 (tshik8，借字) 與直著好啊嘛，哪著一定愛比拳比拇啦。」(華語：都是哥兒們，扯清楚不就沒事了？幹嘛非得動手動腳啊)

「我苦，這聲未直囉。」(華語：糟了，這下沒完沒了囉)

「代誌計攏撨直 (tshau5 tit8) 啊。」(華語：事情都擺平啦)

……

頂頭所有語例裏底的「直」字，著是「清楚、了結」的意思，敿厦門話幷無差別。

● 雖然參周教授講的「民間一種簡易的棋、規則類似圍棋、流行於閩南」，行法 (kiaN5 huat4) 可能無共款，但是台灣確實亦有「行直兮 (kiaN5 tit8 e3)」參「龜殼兮」等等的土棋。

「直」箸台語亦絕對是「土棋」的一種。

■ 我的看法：

● 就這個「直」字的個案來講：

其實周長楫先生對廈門話「直」的解說，箸台語裏底攏計用有著。

周長楫教授强調，「一些不太友好的台灣人跟他爭辯：台灣方言和閩南語是兩碼事 …… 編寫一部厦漳泉三地閩南方言詞典的念頭越來越强烈 …… 如果把台灣方言和三地的閩南語方言比較，90％ 以上都脫離不了其中，那麽台灣人就會知道，台灣話的“老祖宗”就在閩南 …… 福建閩南方言與台灣閩南方言是源與流的關係 ……。」pien7若有機會，伊著會提一寡語例做證據，來支持伊的主張。甚至伊編寫《閩南方言大詞典》亦是欲「以大量的語料不容辯駁地證明海峽兩岸人民同根、同緣、同語的事實 ……。 (泉州晚報，2007,2,10：http://www.qzwb.com/gb/content/2007-02/10/content_2386623.htm ) 。

既然「直」字的意涵，厦門話佮台語有百分之一百的相似度，是按怎周先生顛倒會講有差異咧？(案，其實若照周長楫的辭典來講，in1「直」字的解說，參台語用法嘛有部分無同，但毋是周氏所講的「清楚，了結」、「民間一種簡易的棋」這兩項)

這免蒦，骹頭 u1 / hu1 想嘛知，周長楫教授未曉兮，功課做了亦無頂真；若無，按周先生磕一著 (khap8 tsit8 tioh8，有人用「磕未著」khap8 bue7 / be7 / bi7 tioh8，華語「動不動就 ……」的意思；照《閩南方言大詞典》，毋管「磕一著」、「磕未著」，漳泉廈攏無用啊，閩南語毋是我的專門，這個部分周氏寫了著毋著，我未曉) 著欲 tshe7「語料」來「證明海峽兩岸人民同根、同緣、同語的事實」的作風，無冬節著咧挲圓囉，海龍王哪會辭水？

猶有，周教授講伊編這本辭典，台灣人著會知影台語參閩南語的源流關係；這未輸咧講印一本冊，教人講出國旅行愛 tsah4 護照，抑 a7 是教人講寫字愛 giah8 筆、人若欲活著毋通未記得喘氣 (tshuan2 khui3，呼吸 hoo1 khip4)、飵飯毋通 pe1 對耳空入去 …… 共款。
拜託 e3，台語源於古早的閩南語，箸台灣，這算是絕大部分人的通識好無 (bo3)，哪著愛看伊這本書才會知？
敢會是周長楫先生不但對台語無深入，對台灣亦共款無瞭解？

● thong11 頭仔看著《閩南話的形成發展及台灣的傳播》這個「直」字的解說，我的感覺是：可能周氏對台灣話的瞭解毋是足深入，當然嘛有可能因爲無正確或者適當的材料通(thag1)參考，所以寫了落鈎。
想講既然台灣參閩南計有這款土棋，應該是共款的，因爲台灣現仔時猶有真濟物件、土俗佮閩南地區相同。

而後手佫看著《閩南方言大詞典》頂頭的資料，伊寫講是「一種簡易的棋，規則類似圍棋，流行於閩南」、「民間一種棋類遊戲，人們稱是閩南創造的一種『土圍棋』」。準周氏的講法是著的，安呢，以前我一直認為台灣這種棋，是對閩南傳過來的，這著有問題囉。因爲台灣的「行直兮」毋是「圍棋」的行法，佮周氏所講的無共款。

爲著欲進一步的瞭解，兩年前，我箸兩個福建的網路語言文化論壇發帖，先將台灣的「行直兮」做一個紹介，想欲確認：

1.台灣的「行直兮」箸閩南敢有人會曉，抑是有印象。
2.看周教授所謂閩南的「行直」這種「圍棋」生做啥款，有機會也通好請教 in1 彼朋的センパイ (先輩，台語讀做sien24 pai42，前輩)，想講古早台灣無的確嘛有這種土棋。

真可惜，這兩個願望攏無法度達成；不過卻是有其他意外的收穫 (siu1 hik8)，比論講加別 (ke1 pat4) 一寡閩南地區的民間土棋，也加少 (ke1 tsio2) 瞭解一寡 in1 箸這方面受重視參傳承的程度 ……。

■ 附記：

我尾仔彼篇，箸台灣有人照抄，收入去伊家己的 blog。
抄是未要緊啦，但是箸我原文所用的第一人稱，煞變做是伊；我有建議抄的人小改一下，不過伊無接受。
抄的人佮照我內文所講的另外一個論壇，去 tse7 「西瓜棋」，了後，綴我講號做「龜殼棋」，寫一段行法，參我的文章濫鬥陣，這亦未要緊。

但是，伊補充的資料，我認為：
1.有毋著，伊講的龜殼棋，行法是伊家己想的，顯然伊去另外一個網站看「西瓜棋」的時陣，並無去斟酌詳細讀。
2.參抄我資料的內容，有互相矛盾的所在。顯然伊 kan1 naN1 顧抄，無去注意我寫的內容。
3.我發表文章紹介行法的時，攏有附圖，可能傷費氣，伊歸事著 ka1 刪節掉，顯然伊認為這毋是介重要的；不過，我無相信以我的水準，kan1 naN7 用寫的免佮圖人著看有。

無咧擔心グレシャムの法則的問題啦，根屬資料著便便，過幾工仔，我圖重畫一個，佫再收錄一擺仔，嘛未講外費氣。

周長楫教授語錄簡評006---古意

■ 毋止一位網友批評我，用字 / 詞、標音、體例 …… 攏無統一，有的猶建議我 (其實是咧 thuh4 tshau3)，發表文章愛有系統性；哈！in1 ka7 我估價了傷懸 (kuan5)，當做我咧寫書、做論文。
ah8 煞有，我是無聊的時，著若 (naN7) 看徦 toh4 著想徦 toh4，若想徦 toh4 著寫徦 toh4，家己寫暢看爽的。準講有人有無同的意見參看法，提出來指教回應、做討論，我著加減仔增長知識 (ti3 sik8) ，度時間、罔做 gi7 niuN7，著是安呢若爾。
不而過，在我看 khiai3，所有的指教計是好意的，我盡量改進啦。

這篇亦是臨當時 (liam5 tong1 si5) 去想著，才緊 ka1 寫出來的。
箸「過熨斗」裏面，有講著西裝店的頭家照師，「古意徦有偆去」，煞去與我想著對周長楫先生評介的頭一篇 001---功課做了敢有頂真 內文，所引述周先生接受訪問的談話，起致著是「古意」這句語詞。我佫 ka1 反 (ping2) 出來詳細看、斟酌想，認為猶有必要另外做一個評介；不過，這篇主要的，毋是欲講某 mih4 人是頂真抑潦草 (lo2 tsho2)；是我感覺箸ロジック (loo33 jih4 khuh32，logic) 的頂仔，若有一屑仔怪怪，所以摕來敿逐個做參考。

■ 周長楫講：

有一位台灣學者說，“古意” 在台灣閩南語意爲 “忠厚老實”，而厦門閩南語除此意之外，另有 “古道熱腸” 之意。周長楫說，這位學者能够發現 “閩台” 之間的差異，說明他曾經做過功課；但是他又不仔細做功課、張冠李戴，因爲 “古意” 這個詞，事實上只有漳州話才是 “古道熱腸” 之意，而厦門閩南語則與台灣閩南語一樣，有 “忠厚老實” 之意。
(東南早報，2007,2,8, 網頁是 http://www.dnzb.com.cn/gb/content/2007-02/08/content_2383905.htm )

注，這個網頁若因為故障，有人開未起來，又佫毋相信我這段引用、或者欲知前後文的網友，參我有熟似的，半月日裏，會當 (tang3)「張貼意見」或者 mail 與我，我會寄原文與 lin7。

■ 事實上：

● 周長楫教授並毋是箸這個訪問才講「古意」在台灣閩南語意爲「忠厚老實」，而厦門閩南語除此意之外，另有「古道熱腸」之意。
箸《閩南話的形成發展及台灣的傳播》 (台笠，1996：295) 伊嘛安呢寫：

語詞：古意
台灣閩南語：忠厚老實
廈門話：①同台灣。②古道熱腸。

● 周先生箸《閩南方言大詞典》 (福建人民出版社，2006：108)，換做安呢：

【古意】〈廈漳〉koo3‾1 i3 〈泉〉koo3‾2 i3 ①老實厚道；憨厚：伊真 ~ │ ~ 人。②指熱情誠摯待人，好客：一到 (亻因 in1) 兜，伊著請你食，煮甲真多，真 ~ 噢 一到他家，他就請你吃飯，做了很多菜，真是熱情好客。 (案，原文用 IPA，koo3‾1、koo3‾2 頭前的數字「3」是本調陰上聲的調號，後壁的「1」佮「2」是變調做「陰平」佮「陽平」)

■ 我的看法：

● 台灣學者說「古意」在台灣閩南語意爲「忠厚老實」，而厦門閩南語除此意之外，另有「古道熱腸」之意。
這句話並無講了毋著，因為，周長楫教授家己嘛安呢講。

台灣學者 ah8 無講廈門話像漳州話共款：「古意」kan1 naN7 一個「古道熱腸」的意思，所以參台語無同。
既然是安呢，按怎周長楫先生會去講人：「曾經做過功課；但是他又不仔細做功課、張冠李戴」咧？

我實在無才調理解周先生咧講的，台灣學者的「張冠」是啥麼 tong44 tong44。
毋知影「張冠」是啥，當然佫 khah4 毋知周先咧講的「李戴」是咧指講啥貨。

人明明著參伊的話共款，講這 (「忠厚老實」加「古道熱腸」) 是廈門話意思，周先生煞 kang7 彎 (uan5) 對漳州話去。
周教授的意思敢會是講，廈門話是「張冠」，漳州話是「李戴」。m7 kuh8 安呢嘛未通 (bue7 thong1)，因為周先生是咧講台灣學者「張冠李戴」，著毋是咧講伊家己。

列位啊，看有人較別 (pat4) 無 (讀陰去，有人講是「輕聲」，凊采啦，意思知影著好)，才拜託小教一下。

● 周長楫教授講「目前台灣編的閩南方言詞典公認的是《台灣閩南語詞典》，我把這本所收的詞拿來跟我們的一條一條地對比，他們跟我們的詞彙90％ 以上是一樣的。」 (網頁： http://www.gophor.com/fujian/viewthread.php?tid=3073&extra=page%3D8&page=9 #70)，這我欲相信 (案，是相信「90% 以上」，毋是相信伊的「公認」)；有人欲佮我相輸無 (讀陰去)？新台幣一箍著好，我穩贏的。若欲用「辭典」來比對，佫三、五年仔周先生若有新編、改版的辭典、或者新的論述，無的確「他們跟我們的詞彙」會變做「99％以上是一樣的。」

毋信喔？我報 lin2 看：

周長楫先生毋是講：「事實上只有漳州話才是「古道熱腸」之意，而厦門閩南語則與台灣閩南語一樣，有「忠厚老實」之意」？
哪是啊！

《閩南方言大詞典》白紙烏字：
「【古意】〈廈漳〉koo3‾1 i3 〈泉〉koo 3‾2 i3 ①老實厚道；憨厚 …… ②指熱情誠摯待人，好客 ……。」
換一句話，著是講「古意」箸廈、漳、泉，計攏嘛有「老實厚道」、「指熱情誠摯待人，好客」的意思。

有看兮無，伊用講的時陣，著解說做台灣話 kan1 naN7 佮漳州話無同；用寫的 (編辭典) 的時，著變做攏共款啊。パーセンテージ (pha24 sien44 the42 tsi11，percentage) 定著會一直浮 khiai3。
原因應該有幾仔款，較主要的是台灣的電視節目參流行歌，箸 in1 hia5 亦真時行；台語的特有詞箸閩南用久，一般人哪會知影這寡話詞的源頭，真正常啦。
這毋是「個案」neNh4，我無烏白講啦，以後的「簡評」會陸續提及。
論真講起來，這嘛無啥的啦，南朝鮮毋是講端午祭典、豆奶的原產國計是 in1。(案，這個代誌發生的時，我是 ui3福建的網站看著的。箸台灣，中時電子報、TVBS 新聞攏有報導，原來的網站我 tshe7 無，會使去 http://tw.myblog.yahoo.com/jw!ge5yHEqYAwJclp5zYbw-/article?mid=2871 參考一下)

● 人先講汝有做功課，才佫唱 (tsiang3) 汝講功課做了無頂真；是 to2 一箍台灣學者？ooN2 kau2 (啞口) 啊？hong7 正摳倒削 (tsiaN3 khau1 to3 siah4)，佫箸報紙 hong7 刊徦 hiah4 大篇，攏未曉應一句？平平嘛十個月生的，汝敢比人較細漢？

ah8 知是「好神」抑是「卵神 (lan7 sin5)」。

● 我嘛毋知台灣學者咧講的這句話 (「古意」台語 kan1 naN1 是咧講人忠厚老實，箸廈門著有兩款意思)，周先生哪會去摕「古意」只有箸漳州話才無「忠厚老實」的意思來反駁？這，一點仔都無關係嘛。

箸閩南地區，亦有彼囉講「古意」孤做「忠厚老實」一個意思的所在，從古早徦這當今；這雖然參周先生所講的廈門話、漳州話的意思略仔有差，但卻是佮台語完全一模一樣。
欲用「古意」這句話詞的台、閩話語的差異來做比較，叫人相信今仔的台語參今仔的閩南語同源，用這個佐證，人敢毋是聽了會較入耳？

欲佫蒦 (ioh4) 一下無 (讀陰去)？
周長楫教授是無去想著？抑是功課做了無頂真？或者是根本著無做功課？

周長楫教授語錄簡評005---交陪

■ 這是一個怪現象，台語電視節目的頂仔，播音、演員、主持人的語音、用詞，竟然較輸過電視廣告片。

「我」講 ua2、「經紀人」講「經濟人」、「台灣巧囡仔」講「台灣巧印仔」、「用心、音樂」變「用新、因樂」……；毋是新譾 (tsiN2) 仔、「國語人」才安呢，「天下第一味」男主角的名號做「聖傑 (kiet8)」，所有演員攏叫伊「聖吉 (kiet4)」，包括石峰、廖峻、楊烈，老生照常跋落戲棚骹。
總是，「有」較贏「無」，計較啊會完。

頂禮拜，看「王牌大賤諜」的重播，梁赫群詼 (khue1) 另外一個主持人，講「黃媽媽 tsioo44 kan44 sin44 e44 (足感心兮)」。「感心」兩字，講了計無標準，因為伊是「國語人」，欲講著好，免傷要求啦，我是認為安呢。

不而過，這款雙唇合口的鼻音尾韻 -m，一部分90後的囡仔，發音計無正確，攏會講做 -n 去。自從電視有「足感心」這個廣告詞了後，我發見著這款現象，改善未少。哈！這間 3D 通路商有影功德無量；三不五時仔，拄當 (tng7) 有需要，我嘛會 tshe7 in1 交關。tsiah5 咧講的「交關」是去 ka1 買物件，毋是另外「要緊的關頭」等等的意思。頂回箸周長楫教授語錄簡評004---檨仔有寫著：「伊 (周長楫先生) 咧交陪的台灣人應該亦都攏是學者」；其實，台語的「交陪」亦有生理上「交關」的意思。

■ 周長楫講：

● 語詞：交陪
台灣閩南語：①交際、結交。②有交情
廈門話：①同台灣①②。② (跟人家) 交易或買東西：共我 ~ 幾矸牛奶粉好伓？
(《閩南話的形成發展及台灣的傳播》台笠，1996：295)

■ 事實上：

參「足感心兮」共款，「交陪」這句語詞，有一段時間，台灣二、三十歲以下的人較少咧用。
最近因為電視廣告有這句話詞做スローガン (讀 sir33 loo44 kang42，a slogan)，佫有流行歌 ka1 摕來做歌名、歌詞，「半死語」煞變做「常用語」。這，按聽人日常的交談，佮網路頂仔的文章，著感覺會出來。

不而過，敿周長楫教授講的同款，今仔 in1 攏用箸「①交際、結交。②有交情」的意思。
這亦莫怪，無人 ka1 in1 講，大部分的書頂頭亦無安呢寫，一般的人哪會去想著、哪會去注意著。

我簡單查過幾本仔人較定咧用的台語字 / 辭典，in1 對「交陪」解說的情形，計差不多，比論：

甘為霖《廈門音新字典》，有收 kau-pôe 這個詞條，無解說。(台灣教會公報社，2006：299)
楊青矗《國台雙語辭典》，交際應酬，使彼此情誼密切。(敦理，1992：18)
董忠司《臺灣閩南語辭典》，交，人與人間的往來，例，交陪。交陪的意思是，彼此往來，交際應酬。 (五南，2001：578-579)
邱文錫、陳憲國《新編華台語對照典》，箸「交際」條下；交陪，有佮人交陪。(樟樹，2002：210)
許極燉《常用漢字臺語詞典》，即交際。(自立，1992：158)
李春祥《李氏台語辭典》，互相盡友誼的交往，陪是不論喪喜事的互相應酬。(李明豐，2001：492)
劉長雄《台語通俗字典》，交際往來。(自行出版，1998：222)
教育部《台灣閩南語常用詞辭典》，1. 應酬、交際往來。2. 交情。( http://twblg.dict.edu.tw/tw/index.htm )
《台文 / 華文現頂辭典》，打交道 / 交往 / 交接 / 交際 / 相交 / 結交 / 過從。(http://203.64.42.21/iug/Ungian/soannteng/chil/chha.asp )
王育德《台灣語常用語彙》，無收。 (武陵，1993)
許成章《台灣漢語辭典》，無收。(自立，1992)

另外有兩本，頂頭著有別款的注解：
小川尚義《臺日大辭典》，買ふ。來交陪咧 = 買って呉れ。(武陵，1993：205)
陳修《台灣話大詞典》，同「交關」，商人招呼語，「來交陪」著是「來買」的意思。(遠流，1991：825)

這表示台語毋管箸日治時代，抑是 1991年的時，「交陪」攏有「交易或買東西」的意思。雖然大部分咧寫字 / 辭典的人計毋知，或者恍惚無去注意著。

有一個阿さん，lih4 欲九十啊，頭腦猶 tsiaN7 好，我定定愛佮伊拍 la11 涼，敿伊講一寡有的無的。兩三年前，伊 pat4 講古早有一條獎券歌，欲教我唱。不過，伊毋知影歌名，kan1 naN7 會記的頭一葩的後半段。一方面無愛促 (tshik4) 伊的意，老大人囡仔性，橫直閒閒著綴伊加減仔 haiN1。
前幾工仔，咧寫「檨仔」的時陣，看著周教授《閩南話的形成發展及台灣的傳播》「檨仔」詞條的下骹，有收「交陪」這句，我知伊的解說無周全，著去 phien2 資料。結果箸網上 tshe1 著歌詞，趕緊摕去讀與阿さん聽，叫伊想看會起來無。可能時間過了傷久啊，無定定咧餾，亦毋 pat4 有人咧唱，伊 khak4 唱嘛是彼幾句。無法度，我只好先照伊唱的 ka1 記一個簡譜，等若問會著，才來補充。

頭一段上尾句講「福氣的人來交陪」，「來交陪」著是「來買」、「來交關」。(獎券小姐)

■ 我的看法：

● 照阿さん的講法，這條獎券歌是箸伊少年開加工部 (成衣製造) 的時，in1 倩咧車衫的查某工 (tsa1 boo2 kang1) 規日嘛咧唸，是當時足時行的流行歌。
伊講加工部箸 in1 大漢後生 (hau7 siN1) 公學校 (國民小學) 二年的時陣著無做啊。我參 in1 孫 ka1 算算咧，大約仔是箸民國四十三年，著是講這條歌是 1954 以前著有的。換一句話講，台語的「交陪」是「買物件」，箸彼當時猶是「常用語」。

因為歌詞裏面有「一張五元無外濟」、「第一特獎二十萬」這兩句，參阿さん咧講的年代，實際的情況有合 (hat8)，伊的講的時間點，應該會使相信。

● 在我的了解，雖然知影「交陪」有「(跟人家) 交易或買東西」這個意涵的台灣人，猶有真濟，但是亦罕 lih4 咧用，當然 in1 嘛未去想著「傳承」、「解說」這款的問題。
毋知欲去 to2 位講、欲怎樣表達，是原因之一。

● 古早人咧注解古冊，加減會有一寡所在無去注著；大概是注的人，認為這個部分是簡單的通識，普遍攏了解，毋免注。另外一種原因，著是注解的人亦未 hiang2 的。若是後者，較工夫亦是講較負責的，著會寫講伊毋知這句、或者這字的意思。

編寫字 / 辭典的，無這囉問題，準若發見有愛修改亦是愛補充的，再版的時陣才落去處理，安呢就可以啊。
不過，個人希望有一個「補遺」ah4 是「勘誤」的對照表。董忠司先生的辭典後壁著有附一張表欲 hong7 添，這個做法毋 naN1 是有創意，亦是一種負責的態度。Ka1 拍噗仔！

● 這個テーマ周長楫教授 sang5 款有所疏忽。