客話「柿」唸「khi」代表啥

[未刊稿]

    頂回牟平方言「痣」毋是唸「ki」寫徦「對台語來講，『照』組的字毋免分『照二』佮『照三』，這組字除了『歸端、歸精』以外，咱ia2有『歸見』的字」的時陣，乾若 (kan1 laN7) 有講著「照三歸見」(案，「照三」著是一般講的中古漢語「章昌船書禪」這幾個聲紐) 的字例。今仔共款借用張光宇先生的話，繼續來談台語一個「照二歸見」的字例，張教授講：

舌根音 ……「柿」khi在古音考求上屬於逸軌現象，一般都置而不論，客家話也唸khi …… 漢語方言一般「柿」多唸tʂh-〜ʂ，「歲」多唸s〜ɕ。 (董忠司《臺灣閩南語辭典‧序》五南，民90：1)

    張教授的意思減采是想欲用另外一種漢語方言來解說中古漢語「照二 (案，這包括中古漢語「莊初崇山」四個聲紐。一般我攏會箸「照二、照三」的頭前加一個「中古漢語」，是因為個人認為上古音無「莊、章」這兩組聲母)」的字，發舌根音毋是閩南語系才有的孤例，因為「照二」的轄字，咱發舌根音的字著乾若一個「柿」，箸一般的認知內底是唯一 *兮。準「柿」的客話自本著是唸「khi」(案，頂遍未記得交代，我標音用引號「…」是表示台語拼音方式，無特殊的情形，一般是用TLPA；用方括號﹝…﹞代表IPA，後均仿此)，這著有影會使講中古「照二」可能有去濫著古音發舌根音的字，可惜這是一個無效的證據。理由真簡單，因為客話的「柿」本底並毋是唸做「khi」，會唸做「khi」是部分的台灣客語受著台語影響的新讀音。

    柿 *字，台灣四縣客語唸﹝ts^hï﹞、台灣海陸客語唸﹝k^hi﹞，何石松等《現代客語詞彙彙編》佮教育部網路試用版《台灣客家語常用詞辭典》攏是安呢講 *兮，四縣客語這字的聲母是發舌尖前音 (箸台語是「ts-、tsh-、s-」)，海陸客語是舌根音 (若台語是「k-、kh-、g-」，絕大部分有佫加一個「ng-」，我今仔無用「m-、n-、ng-」)。

台灣四縣客古早是按嘉應州來兮，海陸客語是按海、陸豐來兮，今仔梅縣參陸豐客話的「柿」是唸共音，聲母攏是舌尖前音﹝s-﹞。梅縣音阮根據饒秉才的《客家音字典》，陸豐客語是呂崇雁教授調查的論文內面寫 *兮，呂教授佫講 (《客語〈陸豐方言〉的百年語言演變析探》，這篇文章網路頂懸著有，真好揣)：

「柿」字中古音從母 (案，應為「崇」母。這字《廣韻》是「鉏里切」，若據《康熙字典》「柿」箸古字書有「鉏里切、上史切、上紙切、時吏切」，音切頭個是「崇」母，其他三個是「禪」母)，客語讀做舌尖前音，顯然海陸客語的k^，i移借自閩南音。

另外，閩西永定、上杭、長汀的客話，「柿」攏唸﹝sɿ﹞(案，這幾個材料是根據怹hia5出版的縣志方言篇)，嘛毋是讀舌根音的﹝k^h-﹞。阿照教育部《台灣客家語常用辭典》所記載，台灣饒平客語亦講﹝k^hi﹞，毋佫廣東的饒平話「柿、水柿」講﹝pi、fi pi﹞，箸「トマト」寫做「西紅柿」，著揢「柿」唸做﹝sї﹞(根據徐貴榮《台灣饒平客話音韻的源與變》)。「柿」唸做舌根音的﹝khi﹞只是箸台灣通行客話特殊的現象，徦目前為止，ia2無發見別位的客話有人安呢讀；準若有，是阮了解了無徹，阮會補正。

    張教授講了無毋著，「柿」*字箸台灣的客話是有人唸做「khi」，但這毋是客話自本的讀法，是綴閩南音系講的語音，根本著是閩南音。摕閩南音做閩南音「照二」字讀舌根音並無「脫線」的他證，是有較免強。準若毋是，張教授講「柿」的「客家話也唸khi」，無，是咧代表啥？