嗚嗚睏 (之一)

     昨方箸網路看著一條新聞，講新婦介紹大姊與怹ta1 kuaN1做後siu3(著是「續絃(siok8 hien5)」)，報導講：

這樁婚姻已在中國完成結婚登記，這家子究竟該如何論輩？光是稱呼就一個頭兩個大！

這…簡直是一場災難！

這講了有較嚴重，其實早時台灣嘛有人「姑換嫂」、「爸囝對母女」，欲怎稱呼攏未要緊，叫慣忕著好；毋是災難、亦無啥通奇怪 *兮啦。  最近佫再看著林政華先生參建輝先的大作，攏有提起「ooN1 ooN1睏」，與我想起著魏晉時期，有一位賈充先生，伊兩個查某囝，一個嫁司馬炎的小弟司馬攸、一個嫁司馬炎的後生司馬衷；司馬衷著是晉惠帝，所以賈充變國丈(kok4 tiong7)。

    《世說新語‧惑溺》：「(賈)充自外還，乳母抱兒在中庭，兒見充喜踊，充就乳母手中嗚之」，陳冠學先生箸《一本白話書》內面講：

句中用了一個白話字：「嗚」，台語oⁿ，有「嗚嗚睏」之語。(《臺語之古老與古典》第一，民73：269。  案，作者所標之「oⁿ」，寬式IPA為﹝ɔ̃﹞、教育部用「onn」、教羅「o^‧n」，本文做「ooN」)

著，古漢語「嗚」的音、義計有合(hah8)台語的對應規律。

     嗚，《廣韻》：哀都切；影模平合一遇攝。 「影」母咱發無聲母是常例，像「烏、鴉、冤、枉」。 「模」韻合一等的字咱會使唸「ooN」，像「模(模範)、惡(可惡)、梧(梧桐)、吳(東吳)」。

     台語「oN1」的本義毋是「睏」，做「睏」解說，是後 *來衍伸的五仁話。  《台日大辭典》「oN1」的注解是「唸欲與幼嬰仔緊睏的聲音」，「睏」著歸類做「戲言」，這嘛正確；因為箸其他的辭典嘛無將「oN1」講是「睏」：

1. 搖與嬰仔睏的聲，甘為霖《廈門音新字典》：「o^‧n-iⁿ, tsiū-sī iô eⁿ-á hō^‧-i khùn ê siaⁿ. (嗚嬰，就是搖嬰仔與伊睏的聲)」(台灣教會公報社，2006：512)

2. 諞(pien2)囡仔與睏，台灣教育部網路辭典寫做「唔」：「哄小孩入睡。  例：共囡仔唔予伊睏。  Kā gín-á onn hōo i khùn. (把小孩哄入睡。)」

3. 諞嬰仔與睏，周長楫《閩南方言大詞典》：「唔，ɔ̃¹ 哄嬰兒睡覺；唔細囝哄嬰兒使睡│唔唔睏哄嬰兒睡的口頭語。║“唔”，近音字。(tsia5的﹝ɔ̃¹﹞著是「ooN1」)

     是「聲音」抑「諞囡仔與睏」，攏著、攏會通，因為這計是「慈愛、痛惜(thiaN3 sioh4)」的行為。  個人嘛認為tsia5的「ooN1」愛寫做「嗚」，這個「嗚」的意思，雖然箸文獻頂頭有幾那種無sang5的解釋，但專(著是「全部」的意思)計是咧指「慈愛、痛惜」。

    我根據楊勇先生的《世說新語校箋》做一點仔補充，《世說新語》賈充怹某這段故事，《晉書‧賈充傳》亦有記載，而且佫有「續集」(賈充妻有害死兩個奶母的前科，攏是因為看著賈充對奶母抱的囡子有親密的行為，飵醋引起殺機。  賈國丈拍徦死嘛欲飵雞腿，呵呵)，但是內底的「嗚之」，根據無kang5的版本，著有無sang5的用詞。  比論，「欽定四庫全書薈要」《晉書‧卷四十》做「就而拊之」；王隱的《晉書》講「(嗚)一作『戲』」。  吳士鑑、劉承幹注的《晉書斠注》寫了介清楚，資料上濟：

黎民(賈充的後生)見充入，喜笑，充就而拊之……(斠注：)《世說‧惑溺篇》作「兒見充喜踊，充就乳母手中嗚之」；《類聚》三十五引王隱《晉書》作「就乳母手中戲之」；《御覽》三百七十一引《異苑》作「充外入，就乳母抱中嗚撮」。

另外箸「續集」，「四庫全書」版的《晉書》講黎民戀念乳母，發病而死，了後，賈充佫生一個囝，「復為乳母所抱，充以手麾其頭，郭(賈充的某)疑乳母，又殺之」。  王隱《晉書》講這個囡仔「乳母抱在中庭，充過，拈兒頰；郭又疑之，復鞭殺乳母。  兒又死，充遂無嗣。」

嗚，「相tsim1」的意思。  楊勇先生講：「嗚，亦作歍。 《說文》：『歍，口相就也。』 段注：『口與口相就也。』 今人謂之吻也。」 《漢語大詞典》嘛共款：「親吻。 《世說新語‧惑溺》：“充自外還……充就乳母手中嗚之。”  金，董解元《西廂記諸宮調》卷五：“貪歡處嗚損臉窩。”  明，湯顯祖《牡丹亭‧尋夢》：“他興心兒緊嚥嚥，嗚著咱香肩。”」 

拊，輕輕仔挲(so1)。  《說文》：「拊，揗也」；《荀子‧富國篇第十》：「垂事養民，拊循之……」，楊倞注：「拊與撫同，慰悅之也」；郝懿行曰：「循與揗同；拊循者，謂撫摩矜憐之也」。 《漢書‧外戚傳》：「子夫上車，主拊其背曰：『行矣！強飯勉之。  即貴，願無相忘！』」顏師古注：「拊謂摩循之也」。  韓愈《鄆州谿堂詩并序》：「吹之煦之，摩手拊之」，方世舉注：「拊摩，以手循之也。」

戲，箸tsia5是「賞(sng2)、弄(lang7)」的意思。  《方言‧卷十》：「江沅之間謂戲為媱，或謂之愓(惕，台語會使唸「thit4」)，或謂之嬉」，這是講「賞」。  《幼學瓊林‧卷二》：「戲綵娛親，老萊子之孝」，著是「弄」。

嗚撮，著是tsim1頷椎(am7 tsui1，頷䫀後壁的部位，著是頸椎，「頸椎」唸做「king2 tsui1」)。 《莊子‧人間世》：「會撮指天」，《經典釋文》：「崔云：『會撮，項椎也』；司馬云：『會撮，髻也』。  古者髻在項中，脊曲頭低，故髻指天也。」 這字讀做「tsue3」，《集韻‧去聲夳第十四》：「撮，祖外切，會撮，頭椎也。」 所以咱嘛會使知影「嗚」毋的確是「喙拄喙」，楊勇先生嘛引用劉盼遂《世說新語校箋》講：「嗚之，聲轉則為燠休。 《左傳》昭公三年：『嗚，若今小兒痛，父母以口就之，曰燠休。』」  tsia5「就之」的部位敢定著是「喙」？

麾其頭，應該照楊 *氏的版本是「摩其頭」才著，意思是「輕輕仔挲頭殼」。 《陳書‧徐陵傳》：「家人攜以候之，寶誌手摩其頂」，tsia5「摩」做「撫摸」解釋；另外，佮頂頭的「拊」共款，「拊摩，以手循之也。」 

拈頰，著較簡單，「輕輕仔liam3喙䩉(tshui3 pue2)」的意思。

按tsia5咱會當了解「吻、撫摩矜憐、嬉、弄、tsim1頷椎、挲頭殼、liam3喙䩉」這寡動作，攏是表示大人對囡仔「痛命命、惜命命」，咸「睏」無關係。

     箸冠學先進前，連雅堂這字著用「嗚」阿，伊的《雅言》頂仔有記一條「育兒歌」：

搖也搖，阿囝be7困著來搖；嗚也嗚，阿囝be7困著來嗚。  嗚嗚困，一冥大一寸；嗚嗚惜，一冥大一尺。 (「be7」原文用[忄麥]，這字我毋別，準若是無根據的代用字，著無理想；因為這音有人講「be7」、嘛有人講「bue7」。 「麥」有人講「be7、bee7」，但是大多數的人白話音計講「beh8」、讀書音是「bik8」；比論「麥門冬」古早迪化街tsia5攏唸「bik8 bun5 tong1」，今仔講「beh8 bng5 tang1」共款會通)

     林政華先生箸《許成章、吳坤明探尋台語正字工程比較研究》「吳氏台語正字研究發現示例」內面，有一個嬰兒用語「愔愔inn inn(或onn onn)：安靜睡覺」。  「愔」是「安詳和樂、深靜、扂扂無聲」、無「睏」的意思。  愔，《廣韻》「挹淫切」，古漢語「影」紐「侵」韻，照一般的對應規律，這字台語唸「im1」;「侵」韻、甚至整個「深」攝的轄字，箸台語若(laN2)像無讀「iN、ooN」的字例。