老台語重注 ---- 包準

■ 詞條：

台語「包準」是指
(A)百發百中
(B)可以替代
(C)保證可以
(D)一定猜對(RORO箸2012年3月21日上午9:10的留言，欲與我選)

RORO：

我複選，台語「包準」是多義詞，看用箸啥所在。「免驚，我銃法包準 *兮」是(A)百發百中；「算命先講伊料事如神，包準 *兮」，是(D)一定猜對。「水溝未通，叫里長去處理，包準無問題」，是(C)保證可以。(C)是台語「包準」傳統的用法，算特有詞。若(B)可以替代，我著毋別。

■ 重注：
包準(pau1 tsun2)，著是「保證/的確/必定/穩當(un2 tang3)會按怎」的意思，有當時仔(u7 tang1 si5 a1，有當陣仔)嘛會使孤用一字「包」、「穩」。例：

看伊一箍神神，拍算麻雀拍徦天光，規暗攏無睏，今仔若與駛車，包準害兮(隨前變調，下同)。

看伊一箍神神，拍算麻雀拍徦天光，規暗攏無睏，今仔若與駛車，包害兮。

看伊一箍神神，拍算麻雀拍徦天光，規暗攏無睏，今仔若與駛車，穩害兮。

接著這攤工程，汝這聲包準挑 *死。(「挑」讀thio1，bau2的意思)

接著這攤工程，汝這聲包挑 *死。

接著這攤工程，汝這聲穩挑 *死。

所以講「包穩」嘛會通，「包穩」有人講「保穩」、「穩當」，「包穩好勢」敿「保穩妥當、穩當妥當、包準妥當、包妥當、穩妥當」無爭差。

亦會使講「包管(pau1 kuan2)」，參台灣國語的「包管(ㄅㄠ ㄍㄨㄢˇ」同義。咱猶有其他的講法，譬喻：

包領(pau1 niaN2)，毋運動，包領快死未老。「包領」另有「たんとう(担当，咱讀tam1 tng1，寫做「擔當」)」一義；像講：兩個新婦，洗衫、煮飵一人包領一項，著攏未有事屎。

「包領」用「保領」亦可以，例：

1. 雖然毋知楊維哲教授用啥腔口的台語教數學，但是我保領伊彼寡學生仔tshim2開始的時，逐個嘛聽徦瞀sa3 sa3。(回覆網友意見)

2. 照安呢的方法，我會使提出台語參閩南語毋是周先所講的「一些小差異」(周1996：290)，保領穩當「差很大 (用國語讀ㄔㄚ ㄏㄣˇ ㄉㄚˋ)」。(周教授語錄簡評008)

頂頭的「保領」改做「包領、包準、包穩……」，規句話的意思完全共款。