留言回覆---「用字」音比義較重要

資料來源：http://www.epochtimes.com/b5/10/2/24/n2826266.htm

他K箸2012年2月1日下午12:52留言：

關於台語漢字用字的原則，種種無仝的看法，鄭良偉先生認為盡量選用某詞的本字，但是若有通用性真高，本字另有用途，會引起混亂時，就另外選字。如果無明確的本字，或者本字的「連貫性」無強，就利用假借、諧聲、訓用另外選字。伊強調系統性、連貫性、通用性、標準性、易解性以外，尊重已經通用的俗字。洪惟仁先生也相同，但是洪--先生主張聲韻比字義優先。其他猶有，各有道理。所以我贊成你講的用字隨在人發揮，無必要傷計較。因為現在計較也無路用，教育部也干焦用「建議」，予時間去解決。就是無合時勢个自然會淘汰，前例蓋濟，呷(食)、甲(佮)、啥乜(啥物)、[口的]、[口母]、[イ否]、[勿會]，包含[イ因]將來也可能有仝樣的下場。
毋拘若攏用本字，寫讀會有困難，比如「米麷、風颸、重[貝廉]」，有幾个人會曉寫、會曉讀？所以我亦贊成你「本字」佮「用字」分開。
捌漢字含國語的人「寫臺語其實不難」，你說得極是。但如果有一日教育部的網路辭典關站，就較無方便。基於我寫台語閣贊成你的主張，請你再介紹幾个常用又罕見的本字做獎勵，因為我想你捌--的，應該袂少。

他K：

改用台文阿？媠！揢汝拍噗仔。

我pat4想 *過，tsia5的網友回應若計使用台語，毋知著等徦當(tang1)時；加減仔期待，畢竟這是寫台文的blog。

參汝共款，準若是借字，我較贊成洪教授的看法，kang5音或者音近者優先，好處是若讀會出 *來，佫看一下仔頂下文，意思大概著會清楚。

另外，對台語的「本字」我有影別無濟、亦無外深入，我認為這囉物件免傷鼓吹。除非有特殊的目的或者場合，比如，欲臭屁、顧面水、咸人相諍、開講做話題、學術上的需要、靠這飵飯求財利兮……，若無，基本上「字」寫 *出來，愛與人看有才有效。

欲與人看有，上好是從眾、使用同音字；就這個前提，簡單摕兩個仔汝咧問兮「常用又罕見的本字」做例來回覆。講我pat4未少是有較hau1 siau5，總是趣味代罔議量：

1. 箢、𩌑

頂回參philip開講的時，我問in1「四兩箢仔有小除 *咧無」(留言回覆---「航」台語怎讀等)，這句俗語的意思是咧講咱欲做代誌，家己愛先了解外濟真正的實力，有時仔無拄好顑㾈(ham3 pu6/pu7)咱搦準是較大箍。tsia5的「箢仔」讀做ng2 a2，宜蘭腔講uiN2 a2，在早一般是用竹篾仔編(piN1)兮，淺盤仔形，有兮邊仔做三個耳，貫(kng3/kuiN3)索仔，縛咧秤仔下骹；有兮直接搦一個圓栱形(uan5 kong1 hing5。案，「圓拱」教育部用字，栱，《玉篇》：「居冢、渠恭」二切，渠恭切群鍾平合三，台語讀kong5才合常例，不過南北朝的時聲調無分陰陽。個人認為若寫「圓穹」嘛比做「圓光、圓弓」較合適；有人寫做「彎弓」，無啥通，因為有足濟偏泉的所在講uan11 kong33 門，毋是講uan33 kong33 門)會使毌(kuaN7)、會使吊的橋架仔，挂(kui3)咧秤鉤兮。是以前下(he7)物件秤重的工具，拄頭仔拍算著有怙竹仔做 *兮，嘛有亞鉛鉼(a1 ien5 phiaN2)等的金屬製品(參閱頂頭的附圖)。竹製品囥tam5的物件會滴水，秤蚶仔、魧貽(kong2 tai7)、蜊仔粉蟯之類的水產，較未與人講偷秤頭；金屬製品是密(bat8) *兮，秤幼物(iu3 mngh8/mih8)、粉類的物件，未落(lak4)徦規下(e7)、抑是著(tiau5)咧箢仔，好拭好整理；像咧秤魩仔魚、片栗粉(phien3 lik8/leh8 hun2)、魚脯(hu2)、熟滸菭(hoo2 thi5)、蜜耆(bit8 ki5)等藥材。

當然，漢藥店秤藥的釐戥，嘛用金屬的箢仔。所以「箢仔」有大有細，無定著是四兩 *兮(案，有兮叫是「箢仔」固定是四兩，毋著。這著像俗語「三做四歇睏」無的確著是做三歇四，「媠，媠未十全」毋是十項計褿全，「十喙九尻穿」嘛無限定拄十支喙九個尻穿。阿參「四兩箢無除」共意思的「臭kue5無除箢」著無講是「四兩箢」)；無咧秤物件的時，嘛會摕來準囥物件的工具，有當陣仔挂箸壁 *兮，較大奇(kha1)兮嘛有人吊蹛中脊楹(案，一般講tiong1 tsit4 iN5，阮講tiong1 tsih4 iN5)兮，下東掛西(khe7 tang1 khua3 sai1)真利便。

箢，《集韻》：「委遠切，竹器。」中古漢語影阮上合三，影紐台語無聲母，像「醫、影、畏」；元(阮願)韻合三字發-ng/-uiN，像「阮、勸、園」。「箢」的讀音有合對應常例，字義嘛有倚，所以編辭典的學者嘛有用這字，比如楊青矗的《國台雙語辭典》、周長楫的《廈門方言詞典》敿《閩南方言大詞典》。

另外，董忠司的《台灣閩南語辭典》寫做「鈗」；鈗，《說文》：「侍臣所執兵也，从金允聲。《周書》曰：『一人冕，執鈗』，讀若允」；《廣韻》無收這字；《集韻》的解說據《說文》，讀「庾準」切，這字中古音屬準韻，諄(準稕)韻組的字台語並無發-ng/-uiN的字例，唯一的例外是「十全(tsap8 tsng5/tsuiN5)ka1 nng5/nuiN5)」有人寫做「十全交圇」，「圇」是明朝才有的後起字，「諄」韻合三，減采嘛是借字。咱maiN3用hah4嚴格的標準，極加「鈗」嘛算借音字，字義無合。

甘為霖《廈門音新字典》敿小川尚義的《台日大辭典》寫竹字頭下骹加一個允 *字，應該是綴《彙集雅俗通十五音》兮，我常用的辭書頂仔揣無這字。

陳修《台灣話大詞典》做「盎」，嘛是借字，「盎」从皿或从瓦，盆也，意思無合。無管字書所載的「烏朗切、倚朗切」，攏屬中古漢語唐韻開一的字，這類的字台語無-ng/-uiN的對應。

看 *起來用「箢」較適合，不過，「箢」是竹器，極加會使講做秤物件的工具是衍伸義(案，確實有人解說做安呢，佫讆徦一枝柄，我認為這款講法未免太一廂情願，無證據)，或者講以早的字書解說了傷簡省。而且《集韻》進前的文獻無這字字，是古早有音無字、抑是「箢仔」是宋朝才發明兮？這寡問題咱會使maiN7考慮，阿欲存疑嘛毋是無道理；總是，無直接、充分的證據來支持，是事實。

這字的本字是「𩌑」，《集韻》嘛寫做「䩩」。「𩌑」，《說文》：「量物之𩌑。一曰抒井𩌑。古以革。从革冤聲。」《龍龕手鏡》寫了著佫較清楚：「秤物之𩌑，與『䩩』亦同。」𩌑，中古漢語委遠切、於遠切，台語讀ng2/uiN2參「箢」的讀法共款，音、義攏有合。

pat4「箢仔」的人絕對比pat4「𩌑仔」的人較濟，這是用本字的缺點。咱若未曉，來(讀本調)查字書，略仔有基礎的人，著知「箢」的音、義。若「𩌑、䩩」*咧？較大部(pho7)兮，比如《辭源》、《辭海》都無收，罔論一般的辭典。阿若拄著「鈗、盎」著無采工嘍，任汝程度外好，音、義計捎無；若是撞著新創字，佫khah4慘，性地較䆀 *兮，氣死tsuan5(「自安呢」連音省)驗無傷。所以我贊成洪教授的看法，聲韻比字義優先。「用字」愛從眾，若乾若發明新用字的人寫的辭典才揣有，當然是未普遍，凡勢亦擋未久。

2. ka1 chi3

藏經閣外的掃葉人箸2009年10月30日下午11:06留言：

小時候，家人會帶一種藺草編的袋子，
稱之為ka1 chi3
這個音，嘉義縣、南投縣、彰化縣都有人講，請問，
台灣文獻上有人記錄這個名稱嗎？
它可能和＜林投＞一樣，是來自平埔族語。

我認為毋是來自平埔族語，2009年11月1日上午7:02回覆 *伊；「ka1 tsi3」，台北雙連講「ka1 tsu3」；自早大粙埕、大 long7 pong7、艋舺計講「ka1 tsir3」，今仔「ka1 tsu3、ka1 tsi3」亦濫咧用；枋橋、中和講「ka1 tsi3」較濟；新竹講「ka1 tsir3」、香山有一部分講「ka1 tsi3」……阿阮計講「ka1 tsir3」。本來講做「ka1 tsi3 / tsu3 / tsir3」的所在，參 in1 咧講「魚(hi5 / hu5 / hir5)、語(gi2 / gu2 / gir2)、鋸(ki3 / ku3 / kir3)」，攏計有對應箸咧，準若外來語，應該無這款現象。有人寫做「茭薦、茭自、茭芷、加志、加薦 ……」。當時我講「本字」是啥，我未曉。

一般「茭薦、茭自、茭芷、加志、加薦」計有人寫，頂字的音讀ka1計無問題。

茭，《說文》：「乾芻也。」段注：「(茭)乾芻，《粊誓》曰：『峙乃芻茭』。鄭注同。」粊，讀祕結的「秘」，同「費」；黃俊雄「費仲」唸pi3 tiong7，著。《粊誓》著是《費誓》，「峙乃芻茭」鄭注：「積芻茭供軍牛馬。」《韻會》：「草名。苽，刈取以用曰芻，乾之曰茭」，草割khai3(起來)用，號做「芻」，「茭」是ta1了後的草，ka1 tsi3 / tsu3 / tsir3是怙ta1的草搦 *兮，用「茭」比「加」較通。不而過我未諍講「茭」才是本字，因為這嘛是猜測 *兮，無證據，講「我未曉」是指這字。

若是下字，除了「自」，其他「薦、芷、志」台語計無tsi3 / tsu3 / tsir3對應的讀法，絕對毋是本字。毋koh8「自」亦是借音字，因為字義未通。

䉀，《玉篇》：「失御切，筐也。」中古漢語書御去合三，書紐台語話音讀ts-是常例，像「書、少、叔、守」；魚(語御)韻合三的字，台語偏漳/廈/泉拄會使讀-i/-u/-ir，像「居、舉、據、渠、拒、遽」。「䉀」音、義都計有合，ka1 tsir3寫做「茭䉀」，頂字毋知，下字未𧸖。「未𧸖」的意思是講未毋著，阿若是本字，有人主張是［甾庶］*字，《廣韻》：「章恕切，筐［甾庶］」，音、義參「䉀」共款。《集韻》有箸［甾庶］、［甾庶］加竹字頭、［畚庶］三種寫法，王念孫認為參《廣雅》的［由庶］*字聲近義同。個人贊成用「䉀」，無啥特殊的原因，著是筆劃少，取一步好寫。

毋koh8「茭䉀、加䉀」亦好、「茭［甾庶］、加［甾庶］」亦好，事實上看有知影意思人必定是少數。若是用字，照洪教授的標準，廈門音「茭自」是首選，雖然「自」無發tsir3、tsu3、tsi3，不過周長楫先生講廈門有ka1 tsu7、ka1 tsu3兩款講法，上無，講ka1 tsu7的人讀有。「志」無人唸tsir3、tsu3，乾若漳州腔會合用。「芷」是上聲，藥材界「白芷」計講peh8 tsi2；嘛無人讀白tsir2、白tsu2，韻調攏無合。「薦」有「草蓆」的意思，在早咱「草蓆」嘛講「草薦」，拍算以前草蓆敿茭䉀的用料參工序欲sang5欲sang5，就計用「薦」*字，毋koh4草薦是唸tshau2 tsien3，寫「茭薦、加薦」毋未輸咧做謎hong7蒦？「茭䉀」聲韻調符合各地音腔的對應條件，較未困擾，所以我贊成洪教授的看法，聲韻比字義優先。

3. 蠘、蠞

台北人講「台灣蟳無膏」，小川尚義講這是咧鄙相台灣研究學問的人無內才，毋著！咧形容人乾若好看頭無實力，「無實力」包括無錢、無勢、無才情、無人面、無夠力、無步數、無人法……，攏會使笑伊「無膏」，這是第一。第二neN3，身體勇健、氣色好，台語會使用「紅膏赤蠘」做譬喻(案，著傷、生頭發尾的空喙見著幼肉，嘛會使用「紅膏赤蠘」形容)；蠘仔著有膏阿，蟳仔哪會無膏？我聽新竹人in1講「菜蟳無膏、糠蟳無膏」，較順耳、較合理。

市面上流通閩南語系的辭典、字書，對早徦taN1，都攏寫做「蠘」。蠘，疾屑切，疾，中古漢語從紐，台語發tsh-是常例；屑韻開四台語讀-ih的字有「捏、鐵」等，「從」紐濁母是陽聲調；「蠘」台語會使讀做tshih8。《康熙字典》有收「蠘」*字，進前的字書無，這字應該是明代才有的新創字，用中古漢語佮台語對應的規律審音，無適合；但可能亦無是湊拄坎，因為《康熙字典》這字的音、義是根據清朝康熙年間吳任臣撰的《字彙補》：「疾屑切，音截。蟹類。《閩中海錯疏》蠘似蟹而大殻，螯有稜鋸」，阿《閩中海錯疏》著是咧寫福建海域水族的冊。

今仔有一個問題，「蠘仔」這款節肢動物毋是明代才有的新物種，準以前的毋知，所以無這字字，阿「蠘仔」這個名是按怎號 *出來兮？準以前著知影有這款物件，阿號做啥？有字 *無？

我的看法是咱的先民從早(tsing5 tsa2)著知影「蠘仔」這款海產，爭差我毋知in1講tshih8、tshik8抑tshiet8，這字寫做「蠞」。

我的了解「蠞」*字上早是出現箸《玉篇》，在節切，似蟹。《切韻》系的字書，《王三》：「昨結切，蟹屬」、《廣韻》：「昨結切，蠞似蟹，生海中」、《集韻》：「昨結切，蟲名，海蟹也」；《康熙字典》講《唐韻》有這字丛昨結切，不過我箸《唐寫本唐韻‧十六屑》頂頭揣無，這本殘卷「昨結切」收「截、䟌、㞯、巀」四字。在節切、昨結切中古漢語攏是從紐、屑韻入聲開四，台語會使讀做tshih8，意思嘛有對同。

清華先認為「蠘」毋是明代的後起字，這字《說文》寫做「蠽」，徦宋朝進前俗寫作「𧓷」，《集韻》著有收；「𢧵」是「截」的本字，「𧓷」箸《字彙》寫講咸「䘁」相kang5。先兮講漢文的聲符、義符橫排、直排攏會通，像「鵝鵞、群羣、桃𣑯」，所以「蠽 → 𧓷 → 䘁 → 蠘」這是正常的演化，上晏東漢著有「蠘」*字。我的看法咸伊無sang5，「帕帛、枱枲、忙忘、昍昌、唄員」這寡字根本著讀法無kang5，字義嘛風馬牛；上重要 *兮，《玉篇》、《切三》、《王二》、《廣韻》、《集韻》……這寡字書計講「蠽(𧓷)」是一款像蟬仔的蟲，爭差有兮講比蟬仔較細隻，《說文》著直接講是「小蟬蜩也」，「蜩」嘛是「蟬」。

「蠘」毋是本字，但因為造字的時伊的音有合，著流用至今。像「啲(e5，我e5)、伓(m7，m7免)、［上木下土］(khit8，牛khit8)、［上水下石］(tshiang5，tshiang5水、tshian5雨、tshiang5身軀，瀑布嘛講水tshiang5)……」，這寡音未對同的字，人讀無、看無，慢慢仔會淘汰消失(案，有兮是後尾知影「本字」，譬喻tshaing5寫做「潨」)，所以我贊成洪教授的看法，聲韻比字義優先；市場的魚架仔有人寫「花市仔」，網路亦有人安呢用，毋知咸寫「蠞仔」佗一個效果較好；不而過「蠞」*字無啥人pat4，一般的辭典嘛無收，所以我一直堅持「用字」maiN3去限制，留與時間處理，輕可徦死無人 *去。