留言回覆Jan. 2012

■

■ 資訊豐富，欲寫台文真簡單

tiga2001箸2012年1月30日上午9:41留言：

請問一下,寫台語要怎麼學?

tiga2001：

汝好，歡迎。

個人的感覺，準若汝欲學寫台語，拄開始有一個上簡單的方法。因為汝的條件真好，(1)會曉漢字，(2)會曉台灣國語：

1. 先上台灣教育部《台灣閩南語常用詞辭典》的網站，網址是http://twblg.dict.edu.tw/holodict_new/default.jsp。

2. 未曉寫的台語語詞，拍共款意思的國語詞彙落去揣，選擇「模糊查詢」參「對應華語」或者「全文」，著有汝欲用的資料。

3. 拄陣一半個仔揣無抑是看無兮，小問人 *一下，網路頂仔有真濟熱心的網站。

用汝的留言「請問一下，寫台語要怎麼學？」做例：

「請問」的「對應華語」台語語料有三個，「請問、請教、借問」。

「請問一下」的「全文」台語語料有兩個，「車頭、借問」。

汝會使發見華語「請問一下」台語嘛是講「請問一下」，或者換做「請問、請教、借問、請教一下、借問一下」攏會通。

「寫」的對應華語」台語語料有誠濟，不過汝會曉華語，所以會選「描寫、寫」，未選「寫字、代筆、寫生……」等。

依此類推，「要」是「愛、欲」、「怎麼」是「按怎、按怎樣、怎樣」、「學」是「學」。因此汝留言的台語寫：

請問一下，寫台語愛按怎學？

請問，寫台語愛按怎學？

請教，寫台語愛按怎學？

借問，寫台語愛按怎學？

請教一下，寫台語愛按怎學？

借問一下，寫台語愛按怎學？

請問一下，寫台語愛按怎學？

請問，寫台語欲按怎學？

請教，寫台語愛按怎樣學？

借問，寫台語欲怎樣學？

請教一下，寫台語欲按怎學？

借問一下……

隨在汝排列組合，攏會通。

準汝若有影有興趣，照按呢練習 *幾擺仔，真緊著會上手。了後，汝著會使參考別人的寫法，個人認為王昭華小姐的「花埕照日」敿「潘科元台語文理想國」較正範、材料較濟；對初學者嘛較輕鬆。(2012年1月31日下午6:18)

■ 換我請汝

Haiker箸2012年1月13日上午1:29留言：

若是音韻語文沒話說，是台灣人也沒錯，可是一客沾美牛排外加居酒屋喝到倒都求不到他一張選票。這個人磨咖抓，他說只要有人承諾要設立台語電視台，不分顏色，他負責出動從不投票的家族一齊去擁護他，附贈政黨票和立委票，別的免談。

哇ㄌㄧㄝ~~

Haiker兄：

寒徦欲死 *去，我寧可蹛處 *兮罔勼燒，出 *去毋拄好去感著風，毋加衰兮。

無，安呢啦，我條件放較ling7 *咧，準汝支持的人選著(tiau5)，任期內有講欲設一個台語電視台，我輸；換我一月日請汝飵一擺王品、一擺欣葉，連sua3一年，每擺佫一枝Johnnie Walker藍節 *兮佮掛。

阿若無講，開(khai1) *幾百箍仔著好，汝送我一罐一升瓶的月桂冠準煞。(2012年1月14日上午11:13，2/2)

■ 王華南嘛講阿扁政權為德不卒

mysky箸2012年1月12日下午11:25留言：

您真正有夠利!
施老師捌講過，佇台南蹛20偌冬，加上教育部所採用的是高雄強勢腔，為著教學佮學習方便，伊無堅持用家己的鹿港腔!
伊講當初拄搬去台南的時，有一擺冷氣敗去，就敲電話請師傅來修理，師傅問講:"請問汝的地址佇佗?"老師就回答:"我遮是xx街(kue)"。對方聽無一直問，老師莫明其妙，猶毋知是按怎講遐濟遍，怎會koh聽無。到尾仔還是師母替伊解圍。
至於這个"咱"到底是指啥?這應該愛問施老師本人才著；不過，汝知，我知，汝做球予我，我當然勿(會)當浪費這个機會。
咱是台灣人，咱支持代表台灣人的政黨執政，汝講按爾著無?

mysky：

1. 雖然毋知楊維哲教授用啥腔口的台語教數學，但是我保領伊彼寡學生仔tshim2開始的時，逐個嘛聽徦瞀sa3 sa3。

準若咸施教授有熟似，我一定建議伊開鹿港音或者泉州話的課程。

2. 應該是講「時勢音」，這未當(tang3)避免。毋koh8嘛愛想辦法努力，其他音腔的語料、音腔會使保存外濟算外濟，我一直安呢想。若無，「弱勢」的下場，著是行入歷史，佫 *幾年仔，骨頭著會拍鼓。

3. 哈，我的想法真簡單，阿普普仔嘛蒦會 *出來，施教授這個「咱」可能是指本土政權。

我未了解的是，做八年的阿扁先生in7，敢無算本土政權？(2012年1月14日上午11:13，1/2)

■ 現階段，台語「用字」免計較

mysky箸2012年1月7日下午10:21留言：

我佮小明網友有幾次的對話。伊共家己的見解當作寶，愛人共捧，無法度參人討論無仝的觀點。
伊出版這本冊，我感覺誠遺憾!
進 前雖然毋知伊"葫蘆裡賣啥乜藥"，總是普普仔知影伊的把戲，當時我就有提醒伊愛注意一寡問題，表面上是點著為止，事實上扑蛇扑三分，可惜伊對"語言文字" 的知識有較欠缺，竟然還是硬蹽了!
可能伊認為出一本冊，就算是"專家學者"，會當名利雙；殊不知這款沽名釣譽，隨時會予人看破跤手!

mysky：

我嘛毋pat4 *伊，個人的看法：

第一，可能小明先生只是咧談論「用字」規則，參「本字」無關。

我贊成「用字」的主張會使隨在人發揮，有市場抑無，是另外一回事；有人認為拼音(POJ)嘛是一種「用字」，著、佮毋著無重要，這是一個過程，咱應該有機會看著結果。箸現階段，台語的「用字」無必要傷計較。

我講徦毋愛講 *啊，語文會當(e7 tang3)清楚的表達，別人聽有、看有、欲接受著好。今仔有各種的堅持，未要緊，物競天擇嘛。

第二，準若伊「用字」的意思著是「本字」，安呢伊著是無視咧本字考求的時，「音、形、義」的要件佮原則；或者講伊根本著無「小學(音韻、文字、訓詁)」上基本的素養。

第三，汝毋是講彼本冊無掛作者的正名？所以「名利雙收」應該是汝有所誤會啦，呵呵。(2012年1月12日下午7:12)

■ 美中不足

mysky箸2012年1月7日下午8:20留言：

誠奇怪!施老師這篇文我怎會無看著?雖然幾偌工無上FB，但是阮互為"好友"，應該會自動通知才著。
誠感謝您的轉載，阿無老師若敲電話予我，就講無話了!

mysky：

是 *喔？我是偎(ui3)汝hia5看著台灣民間文學歌仔冊資料庫這個網站才知兮，因為對早我著加減仔有咧賞(sng2)樂器，阿按南管嘛可能會使看著一寡老泉音的語料，施 *先鹿港人，網站紹介伊的專長是專長是「台語，泉州話，閩、台民間文學，詩經，南管音樂與文學，歌仔冊研究」，當然會引起我的興趣。不而過我發見箸網站「內容介紹」內面，伊並無啥保留著老派鹿港腔調，論真講khiai9，是一般的老偏泉腔，部分語詞佮語調，嘛有濫著偏廈腔。拍算汝較了解，咸伊講電話，伊日常的口語敢是用鹿港腔？我是想講伊這個單元的內容，若完全用鹿港腔來唸，毋知欲加外好 *兮。箸唱腔的部分，一寡咸廈、漳有明顯的差異。

施教授這篇文，大部分我有同感，毋kuh8亦有看無抑是講未了解的所在。親像伊講「是咱無la̍k著權，無法度隨時教育台語佮台語書寫。」這個「咱」到底是指啥人？是個人？是團體？是單位、抑是政黨？(2012年1月12日下午7:01)

■ 韻書的音切是考求台語本字的依據

小明箸2012年1月2日下午11:16留言：

古漢語不是用韻書的切音來標示，韻書標的是讀書音，不是語音（白話音）。就是因為古漢語有一字多音的問題，才會有韻書制定標準音的出現。

台語用字很簡單，但若用韻書來切音，就會像推薦用字一樣，讓人摸不著頭緒。想知道台語字的規則，去找一本＜講臺語其實不難＞的書，第八頁開始是用字規則，根本不須要韻書，字的對映關係就在裏面。

很多臺語發音，目前都走調了，當然找不到字，但您看完明代話本三言二拍，就可印證＜講臺語其實不難＞的規則。

小明：

汝好，歡迎。

1. 台語無法度全怙白話音表達，阿白話音嘛會受標準音的影響，一直咧改變。當然，標準音嘛一直咧變，南北朝、唐宋、明，嘛未一致。

2. 韻書共款亦有一字多音，標準音是通語的意思，毋限定是一字一音。

3. 台語的用字本來著真簡單，但是欲討論抑考求本字，著無像桌頂拈(niN1)柑hiah4涼、hiah4聳(sang2)勢。

4. 韻書的音切，所有漢語方言的文白讀參域外漢字譯音，絕大多數攏會當(tang3)揣著對應關係，是一種佐證的依據。我了解的推薦用字，準若照音切的音，大部分計無問題。汝「摸不著頭緒」，敢pat4想 *過，是毋是家己的原因？

5. 講台語並無困難，全世界有幾那千萬同語系的人咧用。台語用字的規則著是「從眾、約定俗成」，嘛無外複雜。

6. 歹勢啦，我著讖 *過啊，汝彼本《講臺語其實不難》的內容不過如此如此，阿我嘛毋是空喙哺舌(像是汝「礤床兒」硬摕一個辭典無收的新詞彙「菜擦子」來鬥；「刨擦」哪是同義詞？「刨」是削，「擦」是磨)。

無，汝講我聽bai7 *咧，「誰毋知影『辛』為『辣』之義？為著解釋『辛』的字義，佔去遮大的篇幅，敢有這个必要？反觀，『辛』是按怎會使唸作hiam？卻連一句話攏沒交待」。(這是網友mysky箸《互阿明師的公開批》的意見之一，http://tw.myblog.yahoo.com/myway-letusgo/article?mid=561&prev=565&next=550)。

7. 不只台語，所有漢語方言包括北京話，都攏有有音無字的現象，原因誠濟，連讀合音、語音的轉變、訛傳是其中之一。不過，講誠濟台語發音，因為「走調」所以揣無字，這我的較有興趣，敢會使摕兩個仔例來分享 *咧，逐家罔研究。

8. 準若有欲佫回應，我建議汝用台文寫，漢字、拼音都可以，kun1 luh8「寫臺語其實不難」，敢毋是？(2012年1月4日下午12:19)