鋤頭、豬頭、奶 (lin1)

三月初三「鹭水芗南」建輝先有一篇「觸喙股——犁畻」，文內一句「伊栽番仔蕃薯，有夠番的蕃薯。貧懶 kah [勿會] 哭 piāng 去，攏毋捌去 thî-thoáⁿ」，我無啥清楚；問伊講「thî-thoáⁿ」是「thî 草」佮「thoáⁿ 草」？林 -先應講：「『thî-thoáⁿ』是『thî 草』佮『thoáⁿ 草』。俗語講『無 thî 無 thoáⁿ，蕃薯較 hai 飯碗」。

tsia5 的「ti5 草」是掘草的意思，愛寫「鋤草」，毋是「除草」，雖然「除、鋤」咱攏講共音，讀 tir5 / tu5 / ti5。

「thuaN2 草」寫做「剗草」。

「鋤」台語的讀音真心適，這字古漢語聲母是「莊」組「崇二」，林金鈔先生講讀 t- 是特殊的變例 (《閩南語探源》竹一，1980：40)。個人認為講變 -兮是中古漢語字書的音切；阿拄仔好「剗」-字嘛相 sang5，古漢語亦是「莊」組的字。

「hai1」《台日大辭典》寫做「奒」，著。《集韻》：「奒，大也」；有兩個音切：

1. 丘哀切，中古漢語溪紐，一般讀 khai1、kai1，無合。

2. 柯開切，中古漢語見紐，台語會使讀 hai1，比如「梟、驍、懈」計會使發 h-。

俗諺「鋤頭毋顧，顧糞箕」，「鋤」是陽平，連讀變調偏泉腔是低平調 11，參陰平的「豬」變中平調 33 無同。偏漳、廈連讀的時，前字陰、陽平計變中平調 33，「鋤、豬」無分，所致佫有另外一句「豬頭毋顧，顧鴨母卵」。

順手罔記，毋知外久進前，pat4 咸建輝先講起台語的「奶」有 lin1、niN1、ling1、neN1 四款講法，林 -先的意思是講無「neN1」，囡仔講「欲 neN1 neN1」大概是像今仔講「pa1 pa1、maN1 maN1」共款，是新的語詞。我箸「台北偏泉腔」有提起：

(關於「奶」) 我知影台語有人講 neN1，像「嬰仔吐 neN1 a2，毋肯，maN42 maN42 hau42」……；二月二六「豬哥會社」謝麗金演短劇的時講「腰束 neN1 phok4，尻穿 ting7 khok4 khok4」

最近有人報我講漳州音亦有講「neeN1」兮，漳音的字書《十五音》寫做「乳」，箸「經、居、梔」三韻計有收，講「ling1 (乳中液)、ji2 (汁也，育也)、jiN2 (豆乳、牛乳)」，「嘉 (ee)、更 (eeN)」無收。不而過，周長楫《閩南方言大詞典》有：

[奶] nai3 (案，調號「3」是陰上) 俗〈廈〉ni1〈泉〉lin1〈漳〉liŋ1、nε1 (福建人民，2006：923)

聽講是老俳優邱罔舍講的笑話，有一個人問欲出嫁的姑娘仔講：「欲嫁啊，敢有佮 (kah4) 冷氣？」姑娘仔聽一下氣徦一個面仔肨 (phong3) 獅獅，出手按喙 [甫頁] (phue2) 著揢伊 (連音，ka1) 撅 -落去。誤會有影誠大，呵呵；敢欲蒦看 bai7 -咧，問的人參姑娘仔是佗位腔口的人？趣味趣味。