「摕」、「提」無共音

■ cit_lui_hoe 箸 2009-07-27 11:31:34 踮 台湾語の広辞苑-肉酥／魚酥 的留言有提起：

「『提hú-á hú』(拿擦子擦)、『提hú-á hú-hú—leh (拿擦子擦一擦)』」

個人認為這字「提」字，用了無妥當。

2007年12月我有寫一篇相關的看法，囥箸我舊的 blog。今仔 hiau1 出來添兩個仔補充，佫將網友的回應佮我的答覆摘錄，重新發文。

「to take」台語講「thueh8 / theh8」，本字是「摕」。

■ 摕，《廣韻》捎取，徒結切。定母台語會使讀 th-，像：團、頭、糖、槌 ……；屑韻山攝台語有讀 -ueh / -eh，比論：節 tsueh8 / tseh8、八 pueh4 / peh4、楔 sueh4 / seh4。徒是濁母，讀陽聲調。

《說文》：「摕，撮取也」，《方言》：「摭，取也」。《思玄賦》：「摭若華而躊躇」，李善注，摭取也。我的看法，這個所在「摭」就是「摕」；《儀禮》：「乃摭於魚腊俎」，鄭玄注，古文摭為摕。

聲、韻、調，佮中古漢語的常例，攏計有對同；字義從漢朝以前，著佮今義相 sang5。

講「摕物件 (thueh / theh8 mngh8 / mih8 kiaN7)」，參「捎 (sa1) 物件、取物件」的意思共款，一般「摕」講 theh8 較濟。比喻：摕錢、倩鬼摕藥單，坪林彼角勢猶有人講 thueh8。

「提」台語讀 the5，像講：提親、提醒、提早、提議、提防，攏是讀第五聲陽平。清朝以前的字書，「提」字音切的下字，在我了解的，上聲有「禮」、去聲有「計」以外，「兮、之、支、奚、齊、泥、黎」攏是舒聲的平聲韻，無入聲的切音。

「摕起來」阮講 theh55 khiai11 (「起來」唸連音，下同)，「提起來」阮講 the24 khiai11；beh55 theh55 (欲摕) 敿 beh55 the24 (欲提) 嘛有爭差。

「摕」、「提」這兩字無共音的。

thueh8 / theh8，林金鈔先生的《閩南語研究》做「擇」，場伯切，陌韻梗攝台語有讀「-eh」的字例，像：「伯、宅、冊 ……」，但這寡字例，並未使讀「-ueh」。

■ 補充：

● 年初參表細兮去新東街夜市仔一間鵝肉店兮 piah4 點 (飵點心)，頭家媽 (tau5 ke1 ma2) 是一位阿婆仔，報阮一個空位，招呼講：「tsia24 坐 (tser7) 啦。」我著揣機會參伊罔牽，尾仔才知影毋是坪林若爾，「摕」in1 平溪人以前嘛講「thueh8」。過去，「菁桐坑」我攏聽人講「tsheN33 tang33 kheN44」，阿婆仔 in1 計講「tshiN33 tang11 khiN44」。伊徙來台北市有三十外冬阿，猶有保留部分的偏泉、同特有的腔口。

● 王小姐是偏漳腔，「提醒、提早、提議 ……」應該是講「the33 tsheN42、the33 tsa42、the33 gi33 ……」，「摕hú-á hú」是「theh11 (摕) hu44 a42 hu42」未講「the33 (提) hu44 a42 hu42」才合理。

● 這字，箸我較有咧參考的，古早台灣出的字書：

《日臺新辭典》(杉房之助)、《臺日大辭典》(小川尚義)、《廈門音新字典》(甘為霖) 寫做「提」。

這字，箸我較有咧參考的，最近台灣出的字書：

《國台雙語辭典》(楊青矗)：用「摕」。

《台灣話大詞典》(陳修)、《臺灣閩南語辭典》(董忠司)：用「提」。其中陳氏講「提出、提示、提早、提存、提交、提名」等的「提」讀「theh8」，這毋著。台灣偏泉腔的所在，「the5、theh8」的前字變調攏是低平調，無法度區分。但是，陳氏是偏漳腔，這寡詞條的「提」變調是中平調。這款情形我咧蒦，是漳泉濫的關係。

閩南話字書，較早的：

《彙音妙悟》(黃謙)「杯、西」兩韻的下入聲無收這字。
《彙集雅俗通十五音》(謝秀嵐)「稽」下入聲全韻空音。

最近的：

周長楫、林寶卿出版的閩南語辭典，計用本字「摕」。

● 教育部《臺灣閩南語常用詞辭典》：theh8、the5 計用「提」：
詞目：提 (替)
音讀：the̍h (theh8)　又唸作e̍h (eh8)
釋義：拿取，獲得。例：無錢，做你共我提。Bô tsînn, tsò lí kā guá the̍h (theh8).

1.「詞目：提」後壁的「(替)」表示「借字」的意思，寫辭典的人嘛知影「提」毋是「theh8」的本字。

2. in1 講「又唸做 eh8」，我看 in1 「提 (theh8)」方言差表列，所列的「鹿港偏泉腔、三峽偏泉腔、台北偏泉腔、宜蘭偏漳腔、台南偏漳腔、高雄通行腔」無徦一位講「eh8」，讀「eh8」敢會像阮外甥仔三、四歲的時陣，揢台灣國語的「動物園、養樂多、民生東路 ……」講「貢物園、養樂鍋、民生公路 ……」共款，算是個別的音訛？

● 兩年前，我寫《論證「台語本字」佮「台語討論」會使有閣較多元的思考參做法 (2-2)》，添注 ④ 有提起一絲仔李壬癸先生《閩南語喉塞音尾性質的探討》(《中研院史語所集刊‧第六十本第三分》民78：487 - 492) 內面所論述的問題。

李先生講：

「(閩南語)出現在音節尾的 -h 只是使聲調短促。在句子裏，如果後頭皆有其他音節，這個 -h 便會自然消失 ……。」

我認為閩南語系 -h 的消失是時間參空間的關係，有的有消失，有的無消失；甚至「後頭無其他音節」的「個讀」，有人 -h 嘛讀做舒聲。比如，「好飵tsia42」、「真熱 jua42」、「毋著 tio42」等；像文夏 (台南市)、劉福助 (中和廟仔尾大漢的福州裔)、白冰冰參陳美鳳 (倚基隆)、游錫堃 (宜蘭) ……，當然我咧講的是 in1 的習慣音。但是，猶有真濟所在箸「個讀」時，有 -h 敿無 -h 分徦清清楚楚，「小飵」未變「小姐」。

尤其是李先 in1 宜蘭，昨暗拄有一位宜蘭人 (二十外歲) 來阮 tau1，我證實 in1「偷摕 (thau1 theh8)」講做「thau33 the33」，較精確的應該標做「thau33 thε33」，「番麥」 in1 講「huan33 bε33」，「後頭沒有其他音節，這個 -h 嘛會自然消失」。

● 偏泉腔「摕」按 thueh8 → theh8，應該是這幾十年仔的代誌。民國初年的廈門，猶講做「thueh8」，今仔嘛講「theh8」。廈門漳泉濫的速度，會比台灣偏泉腔地區較緊，因為基本上in1 漳泉雜居的程度，比台灣的偏泉腔地區較早、較褿 (tsau5)。

箸 鹭水芗南《相諍歌》 內面，「齊 (濟)、齊、做、提 (摕)」讀 tsue7、tsue5、tsue3、thueh8，才會鬥句。我的了解，現仔時 (hien7 tsir2 si5) 前三字廈門猶保留講 -ue。

閒話無愛講傷齊 êng-oē bô-ài kóng siūⁿ-chōe

一筆勾消遘遮齊 it-pit-ko·-siau kàu chia chôe

後日漸漸再佫做 āu-ji̍t (jit8) chiām-chiām chài-koh chòe

欲買去看才來提 beh bóe khì khòaⁿ chiah lâi tho̍eh (thueh8)

頂頭是建輝先標音的，「一筆勾消」阮讀「it4 pit4 kio1 siau1」、「再佫來」一般白話是「tsiah4 koh4 lai5」，若寫「佫再來」才講「koh4 tsai3 lai5」；廈門或者其他的閩南話是毋是有講「tsai3 koh4 lai5」，我未曉。

● 進前黃晉波《當代泉州音字彙‧補遺》講：「tuê8，拿 to fetch or acquire」(案，「補遺」這個網頁今仔無PO箸伊新版權的網路字典。黃教授的拼音方案「tuê8」換做TLPA著是「thueh8」)；伊的「摕」字有dê5 (te3)、dê6 (te7)、diat8 (tiat8，捎取)、tuê8 (thue8，例：偷摕) 四個讀音。上尾彼個伊當做是「方言、南曲用音」，毋是「本字、正音」，所以箸「補遺」佫列入這條。

其實，黃教授這前三個讀法是照《廣韻》的「都計切、特計切、徒結切」三個音切去推出來的讀音。黃先無考慮著「《廣韻》的音類和現代方言之間的對應有常例，變例和特例。」(李如龍「考求方言詞本字的音韻論證 – 兼評閩方言本字58例」，《方言語音韻論集》香港：中文大學，1996：97-108，網路版)，謹慎了若有較過頭的款。
(2009,08,30 補)

■ 附記：

● 網友 C君回應：
我母親習慣說thueh，我習慣說theh
這種現象是否像 會（解）老泉音ue ，新泉音e

我回覆：
毋知汝「身體」、「查某體 (nance)」的「體」讀法敢有共款？

我tiu7 tiu7 咧說 (serh4)，語言會隨著時、空會一直改變，徦路尾有時仔嘛會成做兩種的語言，老音佮新音就是這款現象，無法度避免。

理論一大堆，這我無深入，咱講實在，我未曉 e3 。照我理解的範圍佮所看著的現象，新音起勢 (khi2 si3) 的原因 tsiaN5 濟，我加減寫加減記，汝罔看，不足的所在，才麻煩汝相添 (thiN1)、鬥指教：

1.文白讀濫，像：「第八」本來說 tue pueh，「進士第」說 tsin sir te (「八、士」無讀peh、su，是泉腔的特徵)，今仔in1「第八」大部分亦說 te pueh。有的所在「偉大」讀 ue tua，「滿意」唸 muaN i。文白讀法無同的字，最後有可能是並存，亦可能與其中一種失落，箸台灣，一般看起來，是話音較輸勢 (su1 se3)。

2.訛讀、自創、將錯就錯，這囉情形，聲、韻、調計攏有。比論「我」說 ua，「產」唸 tshan，「啉 (to drink)」講 lin，「khiu7 (elastic、flexible)」中平變高平調，連字嘛借用英文的「Q」，哈哈。

3.時勢音，我咧蒦，汝說 theh (摕)、e (會 / 解) 應該是屬於這款情形。老一輩的語音已經說慣忕、定型啊，未啥會受影響，參外口的人接觸的機會，亦無像少年的遐捷 (tsiap8)。下沿的就無共款囉，亦較容易接受新的物件。箸台北，偏泉腔的，「火.、尾、炊、粿」大部分攏變說 -ue，-er罕咧聽少年人咧用，-e 嘛愈來愈少囉；偏漳腔的「煩惱、上好、約會、豆醬」無說 huan nau、siang ho、iak hue、tau tsiooN；「契約」差不多計攏用 khe iok，偏泉的無說 khue iok，偏漳的嘛無講 khue iak。箸竹南，偏漳腔的老輩「子弟、問題」講 kiaN te、bun tai，新音閣分兩派，去新竹飵頭路人的講 tsir te、bun tue，踮台中市做生理的人講 tsu te、bun te。

● C君再回應：
身體、查某體、體諒 這些詞基本上用文讀音的te，而沒有白讀音tue。

我回覆：
1.阮 tsia5 蟹攝開口字，像「體」育、進士「第」、「齊」國 ……讀 -e 的所在，有的人，查某「體」、「第」一、合「齊」…… 猶是講 -ue；是文白讀的區分，到尾仔，有的就參恁共款，相濫去囉，是接受時勢音，不過 in1 閣有部分猶原保持白話音，像：買賣解題改鞋洗雞 ……。

● C君網路開講的時，講 in1 有一位長輩，普通時仔講「thueh8」，準講話的對象若講做「theh8」，伊嘛變做講「theh8」。