「摕」、「提」無共音

■ cit_lui_hoe 箸 2009-07-27 11:31:34 踮 台湾語の広辞苑-肉酥／魚酥 的留言有提起：

「『提hú-á hú』(拿擦子擦)、『提hú-á hú-hú—leh (拿擦子擦一擦)』」

個人認為這字「提」字，用了無妥當。

2007年12月我有寫一篇相關的看法，囥箸我舊的 blog。今仔 hiau1 出來添兩個仔補充，佫將網友的回應佮我的答覆摘錄，重新發文。

「to take」台語講「thueh8 / theh8」，本字是「摕」。

■ 摕，《廣韻》捎取，徒結切。定母台語會使讀 th-，像：團、頭、糖、槌 ……；屑韻山攝台語有讀 -ueh / -eh，比論：節 tsueh8 / tseh8、八 pueh4 / peh4、楔 sueh4 / seh4。徒是濁母，讀陽聲調。

《說文》：「摕，撮取也」，《方言》：「摭，取也」。《思玄賦》：「摭若華而躊躇」，李善注，摭取也。我的看法，這個所在「摭」就是「摕」；《儀禮》：「乃摭於魚腊俎」，鄭玄注，古文摭為摕。

聲、韻、調，佮中古漢語的常例，攏計有對同；字義從漢朝以前，著佮今義相 sang5。

講「摕物件 (thueh / theh8 mngh8 / mih8 kiaN7)」，參「捎 (sa1) 物件、取物件」的意思共款，一般「摕」講 theh8 較濟。比喻：摕錢、倩鬼摕藥單，坪林彼角勢猶有人講 thueh8。

「提」台語讀 the5，像講：提親、提醒、提早、提議、提防，攏是讀第五聲陽平。清朝以前的字書，「提」字音切的下字，在我了解的，上聲有「禮」、去聲有「計」以外，「兮、之、支、奚、齊、泥、黎」攏是舒聲的平聲韻，無入聲的切音。

「摕起來」阮講 theh55 khiai11 (「起來」唸連音，下同)，「提起來」阮講 the24 khiai11；beh55 theh55 (欲摕) 敿 beh55 the24 (欲提) 嘛有爭差。

「摕」、「提」這兩字無共音的。

thueh8 / theh8，林金鈔先生的《閩南語研究》做「擇」，場伯切，陌韻梗攝台語有讀「-eh」的字例，像：「伯、宅、冊 ……」，但這寡字例，並未使讀「-ueh」。

■ 補充：

● 年初參表細兮去新東街夜市仔一間鵝肉店兮 piah4 點 (飵點心)，頭家媽 (tau5 ke1 ma2) 是一位阿婆仔，報阮一個空位，招呼講：「tsia24 坐 (tser7) 啦。」我著揣機會參伊罔牽，尾仔才知影毋是坪林若爾，「摕」in1 平溪人以前嘛講「thueh8」。過去，「菁桐坑」我攏聽人講「tsheN33 tang33 kheN44」，阿婆仔 in1 計講「tshiN33 tang11 khiN44」。伊徙來台北市有三十外冬阿，猶有保留部分的偏泉、同特有的腔口。

● 王小姐是偏漳腔，「提醒、提早、提議 ……」應該是講「the33 tsheN42、the33 tsa42、the33 gi33 ……」，「摕hú-á hú」是「theh11 (摕) hu44 a42 hu42」未講「the33 (提) hu44 a42 hu42」才合理。

● 這字，箸我較有咧參考的，古早台灣出的字書：

《日臺新辭典》(杉房之助)、《臺日大辭典》(小川尚義)、《廈門音新字典》(甘為霖) 寫做「提」。

這字，箸我較有咧參考的，最近台灣出的字書：

《國台雙語辭典》(楊青矗)：用「摕」。

《台灣話大詞典》(陳修)、《臺灣閩南語辭典》(董忠司)：用「提」。其中陳氏講「提出、提示、提早、提存、提交、提名」等的「提」讀「theh8」，這毋著。台灣偏泉腔的所在，「the5、theh8」的前字變調攏是低平調，無法度區分。但是，陳氏是偏漳腔，這寡詞條的「提」變調是中平調。這款情形我咧蒦，是漳泉濫的關係。

閩南話字書，較早的：

《彙音妙悟》(黃謙)「杯、西」兩韻的下入聲無收這字。
《彙集雅俗通十五音》(謝秀嵐)「稽」下入聲全韻空音。

最近的：

周長楫、林寶卿出版的閩南語辭典，計用本字「摕」。

● 教育部《臺灣閩南語常用詞辭典》：theh8、the5 計用「提」：
詞目：提 (替)
音讀：the̍h (theh8)　又唸作e̍h (eh8)
釋義：拿取，獲得。例：無錢，做你共我提。Bô tsînn, tsò lí kā guá the̍h (theh8).

1.「詞目：提」後壁的「(替)」表示「借字」的意思，寫辭典的人嘛知影「提」毋是「theh8」的本字。

2. in1 講「又唸做 eh8」，我看 in1 「提 (theh8)」方言差表列，所列的「鹿港偏泉腔、三峽偏泉腔、台北偏泉腔、宜蘭偏漳腔、台南偏漳腔、高雄通行腔」無徦一位講「eh8」，讀「eh8」敢會像阮外甥仔三、四歲的時陣，揢台灣國語的「動物園、養樂多、民生東路 ……」講「貢物園、養樂鍋、民生公路 ……」共款，算是個別的音訛？

● 兩年前，我寫《論證「台語本字」佮「台語討論」會使有閣較多元的思考參做法 (2-2)》，添注 ④ 有提起一絲仔李壬癸先生《閩南語喉塞音尾性質的探討》(《中研院史語所集刊‧第六十本第三分》民78：487 - 492) 內面所論述的問題。

李先生講：

「(閩南語)出現在音節尾的 -h 只是使聲調短促。在句子裏，如果後頭皆有其他音節，這個 -h 便會自然消失 ……。」

我認為閩南語系 -h 的消失是時間參空間的關係，有的有消失，有的無消失；甚至「後頭無其他音節」的「個讀」，有人 -h 嘛讀做舒聲。比如，「好飵tsia42」、「真熱 jua42」、「毋著 tio42」等；像文夏 (台南市)、劉福助 (中和廟仔尾大漢的福州裔)、白冰冰參陳美鳳 (倚基隆)、游錫堃 (宜蘭) ……，當然我咧講的是 in1 的習慣音。但是，猶有真濟所在箸「個讀」時，有 -h 敿無 -h 分徦清清楚楚，「小飵」未變「小姐」。

尤其是李先 in1 宜蘭，昨暗拄有一位宜蘭人 (二十外歲) 來阮 tau1，我證實 in1「偷摕 (thau1 theh8)」講做「thau33 the33」，較精確的應該標做「thau33 thε33」，「番麥」 in1 講「huan33 bε33」，「後頭沒有其他音節，這個 -h 嘛會自然消失」。

● 偏泉腔「摕」按 thueh8 → theh8，應該是這幾十年仔的代誌。民國初年的廈門，猶講做「thueh8」，今仔嘛講「theh8」。廈門漳泉濫的速度，會比台灣偏泉腔地區較緊，因為基本上in1 漳泉雜居的程度，比台灣的偏泉腔地區較早、較褿 (tsau5)。

箸 鹭水芗南《相諍歌》 內面，「齊 (濟)、齊、做、提 (摕)」讀 tsue7、tsue5、tsue3、thueh8，才會鬥句。我的了解，現仔時 (hien7 tsir2 si5) 前三字廈門猶保留講 -ue。

閒話無愛講傷齊 êng-oē bô-ài kóng siūⁿ-chōe

一筆勾消遘遮齊 it-pit-ko·-siau kàu chia chôe

後日漸漸再佫做 āu-ji̍t (jit8) chiām-chiām chài-koh chòe

欲買去看才來提 beh bóe khì khòaⁿ chiah lâi tho̍eh (thueh8)

頂頭是建輝先標音的，「一筆勾消」阮讀「it4 pit4 kio1 siau1」、「再佫來」一般白話是「tsiah4 koh4 lai5」，若寫「佫再來」才講「koh4 tsai3 lai5」；廈門或者其他的閩南話是毋是有講「tsai3 koh4 lai5」，我未曉。

● 進前黃晉波《當代泉州音字彙‧補遺》講：「tuê8，拿 to fetch or acquire」(案，「補遺」這個網頁今仔無PO箸伊新版權的網路字典。黃教授的拼音方案「tuê8」換做TLPA著是「thueh8」)；伊的「摕」字有dê5 (te3)、dê6 (te7)、diat8 (tiat8，捎取)、tuê8 (thue8，例：偷摕) 四個讀音。上尾彼個伊當做是「方言、南曲用音」，毋是「本字、正音」，所以箸「補遺」佫列入這條。

其實，黃教授這前三個讀法是照《廣韻》的「都計切、特計切、徒結切」三個音切去推出來的讀音。黃先無考慮著「《廣韻》的音類和現代方言之間的對應有常例，變例和特例。」(李如龍「考求方言詞本字的音韻論證 – 兼評閩方言本字58例」，《方言語音韻論集》香港：中文大學，1996：97-108，網路版)，謹慎了若有較過頭的款。
(2009,08,30 補)

■ 附記：

● 網友 C君回應：
我母親習慣說thueh，我習慣說theh
這種現象是否像 會（解）老泉音ue ，新泉音e

我回覆：
毋知汝「身體」、「查某體 (nance)」的「體」讀法敢有共款？

我tiu7 tiu7 咧說 (serh4)，語言會隨著時、空會一直改變，徦路尾有時仔嘛會成做兩種的語言，老音佮新音就是這款現象，無法度避免。

理論一大堆，這我無深入，咱講實在，我未曉 e3 。照我理解的範圍佮所看著的現象，新音起勢 (khi2 si3) 的原因 tsiaN5 濟，我加減寫加減記，汝罔看，不足的所在，才麻煩汝相添 (thiN1)、鬥指教：

1.文白讀濫，像：「第八」本來說 tue pueh，「進士第」說 tsin sir te (「八、士」無讀peh、su，是泉腔的特徵)，今仔in1「第八」大部分亦說 te pueh。有的所在「偉大」讀 ue tua，「滿意」唸 muaN i。文白讀法無同的字，最後有可能是並存，亦可能與其中一種失落，箸台灣，一般看起來，是話音較輸勢 (su1 se3)。

2.訛讀、自創、將錯就錯，這囉情形，聲、韻、調計攏有。比論「我」說 ua，「產」唸 tshan，「啉 (to drink)」講 lin，「khiu7 (elastic、flexible)」中平變高平調，連字嘛借用英文的「Q」，哈哈。

3.時勢音，我咧蒦，汝說 theh (摕)、e (會 / 解) 應該是屬於這款情形。老一輩的語音已經說慣忕、定型啊，未啥會受影響，參外口的人接觸的機會，亦無像少年的遐捷 (tsiap8)。下沿的就無共款囉，亦較容易接受新的物件。箸台北，偏泉腔的，「火.、尾、炊、粿」大部分攏變說 -ue，-er罕咧聽少年人咧用，-e 嘛愈來愈少囉；偏漳腔的「煩惱、上好、約會、豆醬」無說 huan nau、siang ho、iak hue、tau tsiooN；「契約」差不多計攏用 khe iok，偏泉的無說 khue iok，偏漳的嘛無講 khue iak。箸竹南，偏漳腔的老輩「子弟、問題」講 kiaN te、bun tai，新音閣分兩派，去新竹飵頭路人的講 tsir te、bun tue，踮台中市做生理的人講 tsu te、bun te。

● C君再回應：
身體、查某體、體諒 這些詞基本上用文讀音的te，而沒有白讀音tue。

我回覆：
1.阮 tsia5 蟹攝開口字，像「體」育、進士「第」、「齊」國 ……讀 -e 的所在，有的人，查某「體」、「第」一、合「齊」…… 猶是講 -ue；是文白讀的區分，到尾仔，有的就參恁共款，相濫去囉，是接受時勢音，不過 in1 閣有部分猶原保持白話音，像：買賣解題改鞋洗雞 ……。

● C君網路開講的時，講 in1 有一位長輩，普通時仔講「thueh8」，準講話的對象若講做「theh8」，伊嘛變做講「theh8」。

周長楫教授語錄簡評020---簸箕

■ 我箸周長楫教授語錄簡評017---青紅燈 有寫講：

「…… 咱 tsia5 有一寡對母語熱心的人士，有人揢稱做『工作者』，有的揢號做『志工』。部分的先兮，啊知是無閒，抑是無注意，著若發現較奇巧或者罕咧看著的資料，啊免小過濾一下，著像 khioh4 著寶，趕緊抄囥踮網站的頂頭。
比如講，有人毋知華語的「洋蔥」台語號做『蔥頭』、毋知『簸箕 (pua3 ki1)』敿『畚斗 (pun3 tau2)』根本著無 kang5、毋知『涂』參『塗』同音無同義 ……；阿著照抄不誤。類似這款的情形，以訛傳訛我是毋敢講啦，但，受影響的人，拍算嘛加減有一寡仔。」

「洋蔥」我寫過啊，今仔來講「簸箕」。

我講編寫辭典無「詳」毋是問題，有「實」無 (bo3)，才較要緊啦。
意思是講編辭典的人刪枝削葉，準伊保留的部分是「著」的，這無可厚非。但是若講了含咧糊咧，甚至參事實有所出入。人若有話欲講，這毋通去 kang5 擋，mai3 想講是咧苛責、指摘啦，當做咧探討、補充；上無，準做心適代，安呢著好啊嘛。

這篇，我欲用辭書頂頭一寡參「簸箕」相關的詞條做例，簡單講一寡我認知的「詳」佮「實」。
嘛用參「笳䇭 (ka1 lo2」) 相關的俗語做例，看咱 tsiah5 的「母語工作者、志工」有影有影響力無 (bo3)。

■ 周長楫講：

普通話 (國語)：簸箕
台灣閩南話：糞斗 pùntáu
(周長楫《閩南話的形成發展及台灣的傳播》台笠，1996：249)

【簸箕】bò‧jī∥buàgī ① 用竹篾或柳條編成的器具，三面有邊沿，一面敞口，用來簸糧食或暫時盛東西。也有用鐵皮製成的，多用來清除垃圾。[糞箕] bùngī [糞斗] pun3 tau2。② 簸箕形的指紋。◇ [簸箕] buàgī 直徑兩尺長的圓形竹器，周圍有一市寸高的邊沿。
(周長楫等《普通話閩南方言詞典》福建人民，1982：55)

【簸箕】pua3 ki1 ① 一種淺圓形竹器，周圍有邊沿。通過搖晃簸揚可除去混在榖中的糠殼沙土等東西，也可以盛裝東西等。② 手指簸箕形的指紋。
(周長楫《閩南方言大詞典》福建人民，2006：75)

■ 事實上：

有人講：「木頭做的叫『畚斗』，竹篾做的叫做『畚箕』」，這無毋著。不過以前著有用亞鉛鉼 (a1 ien5 phiaN2，a zinc plate) 做的，尾仔計用塑膠去せいけい的 (成型，mold)，嘛號做「糞斗」。猶有，聽人講古早亦有用竹篾去做的，講搦法 (liah8 huat4) 有一點仔 sing5 咧做「烘爐扇」。所以無限定講是愛怙 (koo7) 柴釘的才叫做「糞斗」。

「糞斗」參「糞箕」上大的差別是：

1.「糞斗」有「柄」，「糞箕」無「柄」。

2.「糞斗」無「耳」，「糞箕」有「耳」通縛索仔掛鉤仔，所以「糞箕」會使用擔 (taN1) 兮、phaiN7 兮 (準若糞箕無 tue2 物件，著會使縛孤頭，pin1 taN1 抑是鋤頭著 phaiN7 蹛一朋的肩胛)。較早做塗水的小工，計用「糞箕」咧擔沙、石 so2 仔 (案，本字應為「瑣」字的 斜 "tshia5" 玉朋改做石字朋，細粒石頭仔的意思) ……。

3. 「糞箕」若無耳著毋是「糞箕」，台語號做「臿箕 (tshah4 ki1，有人講 tshiah4 ki1)」。

準若有人用「糞箕」去鬥柄，敢 uan1 naNh8 會使講是「糞斗」？我有請教過人，伊講 heh8 號做「糞箕鬥柄」，毋是「糞斗」。理由是：

一、「糞箕」比「糞斗」較大，下底有弧度，「糞斗」是平底的。

二、「糞箕鬥柄」是臨時性的物件，無人做這款產品咧賣。

■ 我的看法：

● 台語「pun3 tau2、pun3 ki1」的「pun2」，本字電腦字庫揣無，是「畚」字的「田」改做「土」，林金鈔《閩南語研究》有考證過。「畚、糞、奮」攏是借字，其中「畚」是上聲，調無合。

● 普通話的「簸箕」是毋是「糞斗」，我毋知；台灣國語的「簸箕」絕對毋是台語的「糞斗」：

1.「糞斗」咱國語計講「畚斗」，無人講「簸箕」。

2. 按小學徦研究生，汝揢問「簸箕 (ㄅㄛˋ ㄐㄧ)」看有人會應講著是「畚斗」無 (bo3)？

3. 台灣較大部 (pho7) 的漢語字書，包括《辭源》(臺灣商務，1979)、《辭海》(臺灣中華，1980)、《中文大辭典》(中國文化大學，民國79)、《大辭典》(三民，民74) ……，無人講台灣國語的「簸箕」著是「畚斗」。

4.《國語辭典簡編本》網路版 (教育部，2002，網址：http://dict.concised.moe.edu.tw/main/cover/main.htm) 講「簸箕」：「用來除去穀類糠皮的箕形器具」，這我毋別 (m7 pat4)，我欲報逐個看的伊彼張圖，著是台語的「臿箕」。

另外，恁佫看「畚箕」條的附圖，這號做「畚箕」喔？敢未傷顑 (ham3)？鹽田大冒險內底 he1 才是「畚箕」。

5. 2007年底，教育部網路版《重編國語辭典修訂本》網路版的「簸箕」解說做：

「①一種用來揚去穀類糠皮的器具，以竹篾或柳條等編成。唐詩紀事˙卷六十二˙鄭嵎˙津陽門詩：『大開內府恣供給，玉缶金筐銀簸箕。』亦稱為『畚箕』、『畚斗』。②掃地時盛塵土的工具。」

這參《教育部異體字典》的解說共款，毋知 in1 根據啥？佫揢「畚箕」、「畚斗」講是：

「簸箕的別稱。見『簸箕』條。」

意思是講台灣國語的「簸箕」著是「畚箕」、「畚箕」著是「畚斗」？阿有人摕畚斗來做「揚去穀類糠皮的器具」？

毋著！台灣國語的「簸箕」毋是「糞斗」。

● 台語的字書，我看著的除了楊青矗氏的辭典有小可仔拂毋著去以外，其他的攏會通過。會通過的意思，是 in1 講了有倚意，毋是100分。

比論，董忠司的辭典是安呢解釋的：

【簸箕】pua3 ki1，一種圓形竹箕，直徑大約兩尺，周圍有約一寸高的邊沿，可以用來揚米糠、也可用來盛東西。

台灣的「簸箕」kan1 naN7一種サイズ (size，台灣一般講サイス)，直徑73公分，墘3.5公分，因為是手工的物件，寸尺會差分分仔，所以兩尺四、兩尺半計有人講。
pin2 是搦密的 (liah8 bat8 e3)，計用去皮的竹篾，平底，囥踮塗骹未 hian2 (搖來搖去)。

漢藥店攏摕來曝藥仔、披藥仔。

董教授講了無「詳」，小可仔有「實」。周長楫氏講是「直徑兩尺長的圓形竹器，周圍有一市寸高的邊沿」，伊的兩尺應該亦是「市尺」，董先生應該知影「市尺」參「台尺」是有差的。我大膽的猜測，董先生可能是參考周教授的資料，助理拍算抄了傷 hiong5，無去注意著。哪無，73公分是台尺兩尺四，伊應該講「直徑大約兩尺半」才較合理。

【畚箕】pun3 ki1，盛土的工具、盛垃圾的工具。竹子做的叫畚箕。
【畚斗】pun3 tau2，盛土的工具、盛垃圾的工具。木頭做的叫畚箕。

這嘛講了無完全，因為我拄即 (tu2 tsiah4) 有講過，「畚箕」參「畚斗」上大的差異毋是箸材質。不過伊講的彼部分亦屬「實」。

董教授無將台語的「畚斗」講著是台灣國語的「簸箕」。

● 楊青矗的辭典講了著無董教授 hiah4 「實」，若無「實」的時，佫較「詳」嘛是無采工。

【簸箕】① 用來上下顛動以清除穀物中碎雜物的用具，同畚箕。② (台語) 用篢仔做簸箕。竹編，圓型，捲起一兩寸邊沿。

楊先生講「同畚箕」，毋知是咧講台灣國語「簸箕」的用途「同畚箕」，抑是咧講「簸箕」著是「同畚箕」。

伊講：「(台灣的) 簸箕。竹編，圓型」，這著 (tioh8)。

伊講：「捲起一兩寸邊沿」，這毋著。

因為，有一款竹器，外型、寸尺，參「簸箕」相 sang5，阿墘的懸度是寸八。竹篾是搦十字弧 (sip8 li7 hoo5)、pin2 是 lang3 空的，這毋是簸箕，有人講「豆乾篩 (thai1) 仔」，有人講「麵線篢 (kam2)」，無彼囉兩寸墘的「簸箕」。

(台語的)【糞斗】畚箕。

這嘛毋著，我實在無法通了解楊氏竟然連「糞斗」佮「畚箕」著捎無。

楊青矗嘛無將台語的「糞斗」講是台灣國語的「簸箕」。

● 小川尚義《臺日大辭典》：「簸箕，箕。」
林俊育先生揢翻做「簸箕，畚 (pùn) 箕。」
這毋著啦，小川講「簸箕」的「箕」毋是「畚箕」，這咱佫來看小川「箕」的解說著知。

小川的「箕」。(一) 姓，箕。(二) 箕の如き形らのもの。糞 ~＝箕の如き形らのもの。簸 ~＝穀物を簸ふ圓い形らの箕。
林俊育的翻譯，是著的：
(1)(姓)。 (2)箕形 ê 物件。
(2)的例句：糞 ∼; 簸 (pòa) ∼＝簸粟ê圓形箕。
不而過，林先生無去注意著小川講「簸箕」的「箕」毋是「糞箕」是「穀物を簸ふ圓い形らの箕」、是「穀類をあおってふるい、殻‧ごみを除く農具。」

●教育部《臺灣閩南語常用詞辭典》：

詞目：簸箕
音讀：puà-ki
釋義：一種以竹篾或柳條等編成的器具，可揚去穀類糠皮，也能用來盛物。例：用簸箕來貯。Iōng puà-ki lâi té. (用簸箕來裝。)　

這個解說有夠簡單、亦無齊全，但有講的攏著，無講「無實」。

詞目：畚箕
音讀：pùn-ki　
釋義：掃地時盛塵土、垃圾的工具。例：講甲規畚箕，做無一湯匙。Kóng kah kui pùn-ki, tsò bô tsi̍t thng-sî. (講了一大堆，做不到一丁點兒。)　
異用字：糞箕
近義詞：畚斗
這條的解說，參「簸箕」的釋義同款「無詳」，mah4 koh8有講的攏的部分計著，包括講「畚斗」是「畚箕」的近義詞 (毋是同義詞)，無講「無實」。
in1 的「簸箕」參「畚箕」釋義明明無同，卻用 kang5 一張附圖，這點有較可惜。這張圖是「畚箕」毋是「簸箕」。

詞目：畚斗
音讀：pùn-táu　
釋義：掃地時用來盛塵土、垃圾的器具。木頭做的叫「畚斗」，竹篾做的叫做「畚箕」。
異用字；糞斗
近義詞：畚箕
這個詞條的附圖，是「畚斗」，參 in1 咧講的「簸箕」、「畚箕」無 kang5，這著 (tioh8)。

in1 嘛無將台語的「糞斗」講是台灣國語的「簸箕」。

● 周教授的辭典有講普通話的「簸箕」是閩南話的「糞箕、糞斗」(周，1982)、將閩南語的「糞箕」講是普通話的「簸箕」，但無揢閩南語的「糞斗」講是普通話的「簸箕」：

【糞箕】① 簸箕，撮土、糞或其他東西的器具 ……。
【糞斗】盛垃圾的用具，用鐵皮、木板或塑料做成。
(周，2006：361)

● 普通話的「簸箕」是毋是閩南語的「糞斗」，我未曉兮，未曉是正常的，因為普通話佮閩南語我計無講真通 (thong1)。這個部分無才調做評論，阿阮嘛認份認份。
不而過，台灣國語的「簸箕」絕對毋是台語的「糞斗」，這點我敢確定。

阿知 siang5 (啥人的連音) 教周先生的，講台灣國語的「簸箕」是台語的「糞斗」(周，1996)，這個人應該拍三大板。是講周教授嘛咧條直，總 mooNh4 未曉佫加問幾個仔。

■ 加減仔記：

● 古早咱台灣有真濟種竹器，後來，一部分去與新的產品取代，比如講今仔用金屬、抑是塑膠類的桶 (盆) 仔洗米、洗菜；阿 taN1 嘛無人創椅轎與嬰仔坐 a7。
有的是用未著啊，像講今仔一般家庭攏買現成的，無咧用篢壺仔 (kam2 oo5 a2) 撋粿 (nuaN2 ke2)、挲圓 (so1 iN5)。

「篢壺」真濟所在講「篢模 (kam2 boo5」，講這種竹器倒蓋 (to3 khap4) 的時，形體著像是一模；有人講這像「金仔」kim1 a2 → kim1 ma2、「店仔」tiam3 a2 → tiam3 ma2 共款，是逆行同化的連音變，in1 認為「b-、m-」是同音位。我無了解徦 hiah4 深，若知的朋友才勞煩恁指教一下。

顛倒是「店仔」的「店」是去聲，實際音值是 tiam11，照前字變調的規則，「店仔」愛講做 tiam42 ma42。但是，箸咱 tsia5，偏泉同 (安) 腔 的所在，一般計講 tiam24 ma42，偏漳廈腔的著講做 tiam44 ma42，「店」煞變做上聲，對這個現象嘛真特殊，我較有趣味。

「篢壺 / 模」的規格，大、細計有，有分「硬篢 (ngin7 kam2)」佮「軟篢」，「軟篢」墘的唇攏用藤去搦的較濟，pin2 是密的，蔑仔比「簸箕」較細板，有的無去皮。

「篩仔」的 pin2 有空，底有平的、亦有參「篢壺 / 模」相 sang5 略仔彎彎 (uan5) 有弧度，大細共款分幾仔種。

「笳䇭 (ka1 lo2)」底較深、差不多呈半圓形，底的竹篾毋是片狀、是一條一條、像較薄的「箍桶篾」。uan1 naNh8 有幾囉種サイズ，pin2 的搦法參「篢壺 / 模」無 kang5，「簸箕、篢壺 / 模」是篾片雙十字弧相扯 (sio1 tshe2)，「笳䇭」pin2 的竹篾經緯有分，經篾較闊、較厚，pin2 (動詞) 緯篾的時，一條箸經篾的頂懸，一條箸下骹，懸懸下下 (ke7)，兩條緯篾的中間變做有閬縫 (lang3 phang7)，漏水性、通風性較好，會使摕來洗米、洗豆仔。聽講「米粉 pin2」亦是這種搦法，實物我毋別 (pat4) 看過。

「簸箕」、「篢壺 / 模」、「笳䇭」計是圓形的，三種竹器欲 kang5 欲 kang5，但是攏有小可爭差。

古早台語有一句「著歹症 (tioh8 phai2 tsing3)，笳䇭輾 (lin3)」咧罵人的話，意思是咧詈人 (lue2 lang3) 講致著重症，藥仔飵毋知 (tsai1)、先生看無法，人艱苦無爽倒咧輾來輾去。
「笳䇭輾」無人講「簸箕輾」、「篢壺 / 模」的原因，著是「簸箕」平底，「篢壺 / 模」底小可仔彎彎但是較淺，「笳䇭」底深佫圓，上 gua5 遨 (go5)、上 gau5 輾。

佫一句「無話講笳䇭」，意思是咧嫌人攏講一寡五四三、遨來遨去無重點、毋是正經有路用的話，台灣國語是「說話不著邊際、扯淡」。

網路頂仔流傳講「無話講笳䇭」，是「講話時沒有話題，只好就講一些無聊的話」，有倚意。

但若講這是咧比喻「自找麻煩，自討苦吃。」這未免著有較離譜囉。

佫較散 (suaN3) 的，竟然講「笳䇭原是平埔族話，意義是原住民酋長，引申為麻煩，無聊的話。」這有影「俺某拂去俺祖」，一丈差九尺。

我講這囉錯誤的解說箸網路上咧流傳，並無肨風。是 to2 一位先兮先發明的，無需要去 khing5 究，我抄幾個仔網址，有興趣的人才去小揢 (sio2 ka1) 眼一下：

台灣諺語 (【123台語教學網 http://www.taiwanese-oki.idv.tw　支援教學：王啟陽】 提供)
台語俗諺
台灣諺語查詢(電腦作業)
忠和國小閩南語教學網
yahoo 知識+「有關於台灣諺語..」
元長無極慈濟公 blog
母語教學
快樂屋台灣俗語─古早
母語教學「每週俗諺」
某校班級論壇

這句亦 pat4 聽人講做「無話講傀儡 (ka1 le2)」，這我著毋未曉。

● 照周長楫教授的講法，閩南的「笳䇭」是「口大底淺」，阿咱 tsia5 的「笳䇭」是「口大底深」。

看起來都毋是台語佮閩南語無 kang5 若爾，台灣的「笳䇭」佮閩南的「笳䇭」亦可能有差。

● 注，「笳䇭 (ka1 lo2)」的「䇭 (lo2)」字【上竹下老】，著是「竺」字竹仔頭下骹的「二」換做「老」字。這字嘛是愛參 New Gulim 字體相容的介面，才有法度顯示出來。

拍報與逐個知，R君教我講若拄著New Gulim 字體顯示未出來的介面，揢 (ka1) copy 踮 Microsoft Word 或者 Microsoft Excel 著看會出來。