周長楫教授語錄簡評008---支票

■ 箸「過熨斗」裏面，有一句「摕支票去 kang5 借錢，號做『tau2 支票』」，這句話無深，別 (pat4) 台語的人計知影意思。不過，亦無講逐個攏計知影，「支票」這兩字，箸台灣話亦算是「外來語」 ── 源於華語的外來語。
毋是講國民政府來台灣進前，台灣無「支票」這囉物件，是因為華語的影響，取代原來的講法。這種的語詞，有的會參舊的名稱濫咧使用，有的舊語詞著會漸漸失落。

比論，古早台語講「去與先生看」，今仔有人講「去看醫生」；「剃頭」、「鉸頭毛 / 鬃」、「剪頭」亦講「理髮」；「写真」(sia33 sin42) 差不多攏計講「相片」啊 ……。電視華語節目講漸漸將「冷氣」講做「空調」，「錄影」亦有改講「攝象」、「光碟」變「光盤」、「飛彈」用「導彈」……。箸日本，「傘」講カサ、アンブレラ人攏聽有；筆、矸仔的蓋 (kua3)，「カブセル鞘、フタ」，今仔嘛用キャップ (khiah44 puh32，cap)。阿若中國的普通話，今仔有一寡所在，講「電腦」的比講「計算機」、講「簡體字」比「簡化字」、講「夫妻」或「老公 / 老婆」的比講「愛人」的猶較濟。我的感覺，箸廈門等的閩南地區，有一工「啤酒 (pi5 tsiu2)、米仔酒 (bi2 a2 tsiu2)」會與「麥仔酒 (beh8 a2 tsiu2)、ビール (bi42 lu11)」所取代，「屎礐 (hak8)」、「廁所」漸漸會改講「便所」。這款的變化真正常，任何一個年代佮所在攏有可能發生。

■ 周長楫講：

台灣閩南語：錢票。
廈門話：支票
(台笠《閩南話的形成發展及台灣的傳播》台笠，1996：292)

■ 事實上：

● 台灣民間徦箸當時，才開始用 cheque 這種金融工具，我猶無資料證實。不過，按台灣的銀行史來看，日治時代才有cheque 這項物件，拍算未重 taN5。

1895年5月，日軍在貢寮澳底登陸，臺灣踏入日本統治時代，四月日後，「大阪中立銀行」的『基隆出張所』」，可能是台灣的頭一間銀行；同彼年「大阪中立銀行」併入「三十四銀行」。到 (kau3) 1899年6月，正式成立「株式會社臺灣銀行」進前，這寡日本銀行若像攏無參一般的百姓、店頭有咧取引。
臺灣銀行，除了臺北本行之外，亦箸臺灣各地設有支店：
新竹支店，1899年10月2日
臺中支店，1899年10月2日
臺南支店，1899年10月2日
宜蘭支店，1899年10月2日
淡水支店，1899年10月2日
基隆支店，1899年12月1日
澎湖島支店，1899年10月2日
高雄支店，1900年9月1日
嘉義支店，1910年7月1日
屏東支店，1910年7月1日
花蓮港支店，1912年7月1日
臺東支店，1914年4月1日
桃園支店，1918年7月1日
南投支店，1918年11月1日
彰化支店，1934年5月1日

這個中間，後來被稱做「三商銀」的一銀、華銀、彰銀亦陸續設立。
「臺灣貯蓄銀行」(1899年11月26日)； 著是以後的「臺灣商工銀行」、「臺灣工商銀行」、「臺灣第一商業銀行」、「第一商業銀行」
「株式會社彰化銀行」，由吳汝祥糾合台灣中部地方士紳集資，創設於明治38年(1905年6月5日)，迄今已歷超過一百年。總行初設彰化，了後徙去臺中市，。
「株式會社華南銀行」(1919年01月29日) 是由枋橋林本源家族的林熊徵參海外鉅商等發起的，總行設箸台北市表町二丁目二番地（即現仔時館前路的行址）。

總講一句，台灣有使用 cheque 的時間，大概是1899年以後的代誌。

● cheque 台語除了講「支票 (tsi1 phiau3)」，古早亦有講「手形 (tshiu2 hing5)」、「khoo33 khit32 teh32」、「錢單」。「手形」是日語「テガタ」直接用漢字讀的，「khoo33 khit32 teh32」是日語「小切手」的台式讀法，「小切手」的カナ (仮名) 是コギッテ，ギ是塞擦濁音，讀做 gi 或 ngi，可能是因為日本話「切手 (キッテ)，a postage stamp，講做khit32 teh32」的關係，「小切手」的ギ煞講做送氣清音 kh-。「錢單」是土話，概指支票、匯票。

今仔台灣計講「支票」，「支票存款」亦是新的辭彙，古早銀行攏講「甲種的」，開「支票存款帳戶」著講「開甲種的」。

■ 我的看法：

● 台語的「支票」，從 (tsing5) 古早著有 tsiaN7 濟講法，我理解的範圍，除了「錢單」這個代用詞，其他計是外來語，理由嘛真簡單，這毋是台灣自本著有的物件。

● 周長楫教授講台語「支票」號做「錢票」，這個語詞我毋別 (m7 pat4) 聽過，字書、文獻頂仔，亦無發見有相關的資料。但是有人安呢用亦毋的確。因為新的事物欲用土話表達抑是欲形容，各所在可能有 in1 特殊的講法。

有一個朋友講「錢票」是「支票」的音訛，這毋是台灣的通語，原因是 in1 的鼻化元音無別義的作用，講「錢票」的絕對是「跛骹」講 paiN2 kha1、「歹看」講 phai2 khuaN3、「差異」 tsha1 iN7、「蔭豉仔」im3 siN7 a2、「肉羹 (bah4 ke1)」=「肉雞」……，而且上聲、陽平計變調做高平調的地區。這，我無清楚，罔記。

亦有人認為這參「正實的 (tsiaN1 sit8 e3)」講做「驚實的 (kiaN1 sit8 e8)」、「換準講 (ua7 tsun2 kong2)」變「越主講 (uat4 tsu2 kong2)」、「啥麼 (siaNh4 me3)」講「thamh4 me3」 ……共款，是少數人特殊的話音，聽是聽有啦，一般是無這囉講法。這，我嘛未曉，亦罔記。

不過，若聽著「錢票」，會去想著是咧講「支票」的，應該亦毋是介濟；欲像我這範的 (tsit4 pan7 e7)，著無彼囉才調。其實，箸這幾工，我嘛有做過調查，對象是我有咧用支票的朋友，南北二路計有，無人別。

● 假設，假設的啦，準若台灣有人揢「支票」講做「錢票」，個人認為這亦會使算台語。不過，前提是愛有出處的證據，毋是用「阮 tau1 著是安呢講的」著算數。

「台語」歸「台語」啦，周長楫教授頂頭彼個解說 / 比較，嘛是無外通。
1.今仔的台語 (包括1996年進前)，百分之九十五以上 cheque 都計講「支票」，a cheque-book 嘛攏講「支票簿仔」。
2.新竹人的「蓮霧」號做「挽霧 (ban2 bu7)」、「處治 / 鼠治人」高雄人講「lo33 ling55 人」，未使講「ban2 bu7、lo33 ling55 人」毋是台灣話；但這是極少數人咧用的，其他百分之九十五以上毋是無安呢講若爾，是根本著聽無；敢會使摕這來做「台語」參某某方言的比較語料？
3.周教授做比較的時，伊揢這條歸類為「同一個事物或概念，叫法各不相同」(周1996：290)。伊放棄百分之九十五「叫法相同」的辭彙，去 tshe7 一個人毋別 (lang11 m11 pat32)咧用的語詞來做比較。照安呢的方法，我會使提出台語參閩南語毋是周先所講的「一些小差異」(周1996：290)，保領穩當「差很大 (用國語讀 ㄔㄚ ㄏㄣˇ ㄉㄚˋ)」。