旋桶---台語連放尿嘛古雅

to urinate，台語講「放尿」，嘛號做「旋尿、旋桶」。有人叫是這儕 (連音讀tsuai44，這寡) 的話詞毋是介 (kai3) 好聽，亦嘛無外有水準，其實這是足大的誤會。

旋，《廣韻》辝戀切，邪母線韻，台語讀 suan7。《左傳‧定公三》：「夷射姑旋焉。」杜預注，旋，小便。大概三國時代，這字「旋」就已經無啥人會曉講是放尿的意思啊。韓愈《張中丞傳後敘》：「巡起旋」(有人講是伊仿《左傳》的用詞)。杜預是三國晉初司馬懿的囝婿，可能彼個時陣的人，普遍干但知影「小便」，了解「旋」字的，可能無外濟囉，所以伊才著去加注。

毋管按怎，台語講「放尿」的同義詞「旋尿、旋桶 (thong2)」，攏是既「古」(三國的時著無啥人會曉) 又「雅」(經書頂頭的用詞)，現代各漢語方言，大概無幾個綴會著 (te3 e7 tioh8)。

附記：
尿，《說文》人小便也，从尾从水，徐注，奴弔切。台語泥母讀 [ l -]，嘯韻讀 [-io]像「釣、叫」，泥是濁母，讀陽去 lio7無問題。
「尿」是泥母 (紐)，有的所在讀參娘母的「膩」同款講 [dz-]；毋知「染色、相讓」日母的「染、讓」等猶有人發 [dz-] 的音，講做「jiN2 sik4、sio1 jiuN7」無？照這囉情形看起來，張慧美先生箸《論王力先生上古日母不歸泥娘的問題》 [1] 結尾所講的：「還是有待商榷的。」有可能嘛無一定。

不過，伊引用「章炳麟指出，今閩廣方言無日母。唐作藩先生認為章氏此說有一定道理」，這著無啥妥當。
唐氏怎解說我無清楚，章氏的講法顯然就有問題；我的了解，今仔閩南的漳州敿 台語偏漳腔的地區、小部分偏泉腔地區，猶有未少人，將日母讀 [dz-] 參泥、娘二母的讀法完全無同。

[1]《音韵論叢》齊魯，2004