慣忕

     台語有用「習慣(sip8 kuan3)」這個語詞，箸tsia5「慣」是唸文讀。  「習慣」有當時仔嘛會講做「慣si3」，比如：「用冷水洗身軀我未習慣」咸「用冷水洗身軀我未慣si3」，是共款意思；但是，「咬掌甲是歹習慣」著無人講做「咬掌甲是歹慣si3」。  「慣si3」的「慣」在早唸文、白讀攏有，看所在；一般計寫「慣勢」，基本上無問題，字音有合、字義有倚。

     林金鈔教授講「慣si3」寫做「慣忕」：

si^ɔ「習慣」：﹝忕﹞

  廣韵「忕，忕習。時制切」；蟹開三去祭禪(祭)。聲調、聲母與中古漢語的對當，合乎常例；至於韵母，同韵的世si^ɔ，厲li^ɔ等，在廈門和永春話有-i韵母……。

  說文繫傳狃字注「忕，慣習也」。  集韵「忕，習也」。  爾雅釋詁「貫，貫習也」注，「貫忕也」；貫忕是同義複詞，即慣習。

  廈門話kuaĩ^ɔ si^ɔ、永春話kuĩ^ɔ si^ɔ﹝慣忕﹞猶「習慣」。

  忕，甘典(甘為霖《廈門音新字典》)音si^ɔ (頁348慣字下)。  當是與「慣」字連讀而居下字時的變調。  和廈門話au^ɔ _cni「後年」的「年」字，與「後」字連讀而居下字時，音ni^ɔ一樣(請參閱漢語方音字匯頁13)。(《閩南語探源》竹一，民69：120-121)

「習」*字會當(e7 tang3)有六、七種用法，愛注意的是，這角的「習」是「習性」的意思，毋是做「學習」解說。

咱講「慣si3」，林 *先怹永春人講「慣si7」。  我pat4請教過永春的朋友，其實，怹亦有人講「慣si3」，而且去聲本調分陰陽、無陽上調、中古漢語「日」紐發「l-」；咸林 *先有陽上的永春話無同，永春話內面本身嘛略仔有爭差。  不過，個人ia2是認為「慣si3」寫做「慣忕」比寫「慣勢」較合理，因為「勢」無唸陽去調。  當然，欲解說做古音不分陰陽調嘛可以，較輸古冊頂頭揣無「慣勢」的用例。

林教授有講「貫忕是同義複詞，即慣習」，用華語解說，這是著 *兮；不而過「貫忕」佮「慣習」這兩個語詞，箸台語著小可仔無sang5。  咱講「貫忕」，一般是指「長期養成(比如：肢體語言、飵飯愛配茶)」抑是「逐漸適應(比如：水泥叢林、無手機仔著未當過日子)」的習慣；「慣習」無後義，但會當做「習俗(比如：鹽水放蜂炮、München的Oktoberfest)」使用，是團體性、地域性 *兮。  阿參「抽象、賓語、閩南人、繞指柔、觥籌交錯、詰屈聱牙……」共款，計是書面語，口語中無人咧用「慣習」。

     寫做「忕」，古冊頂頭的記載不只仔濟，先來看王念孫的《廣雅疏證》：

䃷、裔、翫、𨽸、俗，習也。  䃷、裔，《方言》：「䃷、裔，習也」；郭璞注云：「謂玩習也。」  《後漢書‧馮異傳》：「忸忕小利」，李賢注云：「忸忕，猶慣習也；謂慣習前事而復爲之。」  《爾雅‧釋言》：「狃，復也。」  《詩‧大叔于田》《正義》引孫炎注云：「忸忕，前事復爲也。」  《釋詁》《釋文》云：「忕，張揖《雜字》音曳。」  《說文》：「𢘽，習也。」  《左傳‧桓公十三年》《正義》引《說文》又作「忕」。  魯，公山不狃，字「子洩」，亦取慣習之義。  「𢘽、洩、忕、裔」竝字異而義同。

有hah4濟引證，咱會使確定「忕」有「慣習」的意思，這點無爭議。  讀音的部分，林教授根據《廣韻》音切，講讀做「si7」，這著；「禪」是濁紐嘛，傳統上中古漢語的濁紐，咱是唸陽聲調。  但是：

1. 頂頭王氏引用「李賢注云」的全文是：「忸忕，猶慣習也；謂慣習前事而復爲之……忸，音尼丑反；忕，音逝。」 tsia5「忕」讀「逝」。

2.《史記‧漢興以來諸侯王年表》：「漢定百年之間，親屬益疎，諸侯或驕奢，忕邪臣計謀爲淫亂，大者叛逆，小者不軌于法，以危其命，殞身亡國。」《索隱》：「忕，音誓；忕訓習。  言習於邪臣之謀計，故《爾雅》云『忕猶狃』也。  狃亦訓習。」  tsia5「忕」讀「誓」。

3.《龍龕手鏡》：「忕，太、大二音，奢也。  又音逝，─(忕)習。」  tsia5用箸「忕習」的時，「忕」嘛讀「逝」。

「逝、誓」照《廣韻》敿「忕」共款，攏是「時制切」，「禪」紐、去聲。  「逝、誓」這兩字咱攏有唸陰去調「se3」，土音亦好、俗讀亦好，「逝、誓」唸陰去是事實，共音切的「忕」當然嘛會使讀陰去調，按怎「忕」著是「連讀而居下字時的變調」？。

事實上，林教授講的「後 *年」是下字唸輕聲，頂字「後」唸本調；「慣忕」講「kuan2 si3」，實際音值是「kuan⁴² si¹¹(罐四)」，並毋是「kuan¹¹ si¹¹(灌 *死)」，頂字有變調。  我嘛有請教過永春的朋友，永春話的語詞、或者句讀的尾字，嘛有唸輕聲、前字無變調的情形，比論「許 *氏、後 *日、轉 *來、拆 *開、欲講 *毋、是去搦賊 *喔」。  林教授「連讀而居下字時的變調」tsit4 liah4，解說了有重𧸖(ting5 taN5)。

     聽長輩講，「慣忕」較早有真濟種唸法，較早乾若台北老市區著分幾那款。  像，雙連hia5講「kuaiN3 si3」，這進前計歸偏同安腔，但是怹陽平、上聲的變調、無-ir、-er韻，所以算較倚偏廈門腔。  「亦宛然」的大師李天祿怹某號做「te¹¹ a²⁴」，是老師府陳悅記的人，怹彼箍圍仔攏講「kuiN3 si3」，嘛是同安裔，但是部份的人佫保留陽平、上聲咸偏漳、廈腔無同的變調、有-ir、無-er韻，是偏同安腔。  高玉樹先生怹大安庄hia5，敿阮先兮怹同款講「kiriN3 si3」，這屬偏安溪腔。  大粙埕這朋佮艋舺，五路的人攏咧出出入入，毋知當時開始，著計講「kuan3 si3」；「慣」唸「kuan3」是目前台灣的時勢腔，嘛是文讀優勢的實例。  七、八年前pat4聽人講「kuiN3 si3」，taN1敢(kam2)ia2有人咧講「kuaiN3 si3」，這著誠歹講嘍。

     《爾雅‧釋詁》：「閑、狎、串、貫，習也。」郭璞注：「串，厭串；貫，貫忕也。  今俗語皆然。」(宋本《爾雅》，藝文，民77：11-12)  「閑」減采著是「䃷」的假借字；「狎」，《說文：「犬可習也」，段注：「引伸爲凡相習之偁。」  「厭串」阮先兮講伊未曉，啊我嘛準煞，無興趣去想。  「串」古早參「貫」通，嘛是讀「kuan3」，《荀子‧大略篇》：「國法禁拾遺，惡民之串以無分得也。」高誘注：「串，習也；工患反。」敿《廣韻》、《集韻》共音。  「貫忕」著是「慣忕」，若欲較paiN2 thaiN7(著是「孽、激骨、𠢕捙盤反」的意思，林建輝先生講這是同安的特有詞；但是較少年兮都攏無啥知阿，我pat4問過幾那個怹hia5的人) *咧，揢(ka7)寫「串忕」，是無語詞的用例若爾，論真講khiai9，嘛是有根有據。

《玉篇》：「䃷，弋成切，翫習也。」中古漢語「以」母「清」韻，台語會使唸「ing5」。  王氏引用《方言》、郭璞注的原文是：

䃷、裔，習也。  謂玩習也。音盈。(暗青色的字是郭注，下同)

「䃷」讀做「盈」；彼當陣的實際音值是啥，阮毋知，「盈」今仔台語亦讀「ing5」。  「閑」現仔時攏寫做「閒」，台語文讀「han5」，話音是「ing5」；較早有咧講的特殊口音，像：「aiN5、uiN5、iriN5、an5」，taN1著毋pat4聽人咧講啊，這個情形參「慣忕」的唸法共款。  「閑、盈、䃷」 三字台語共音，sua3 手罔記。

     台語「串」是常用語，嘛會當做「習也、復為之」解說，例：「串講都彼寡五四三兮、串看嘛是日本齣、串交嘛王 *哥、柳 *哥」。  做「習也、復為之」解說的時，亦會使用「串串」、「慣串」、「貫串」。

「貫串」ia2有一個做「專門、內行、精通」的詞義，這個時陣著未使寫做「慣串」，例：「吟詩作對伊上貫串、tshng2厚刺的魚我介貫串。」  這個「貫串」亦會使寫做「貫穿」，《廣韻》：「尺絹切，貫也」，台語讀「tshuan3」；《漢書‧司馬遷傳》：「亦其涉獵者者廣博，貫穿經傳，馳騁古今，上下數千載間，斯以勤矣」，tsia5的「貫穿」嘛讀做「貫tshuan3」。