蛣蛚

     蟬，箸台灣有幾那種講法：「sien5、sien5 a2、am1 poo1 tshe5 / tse5……」，「教育部網路辭典」寫去介清楚；佮人較無共款 *兮是鹿港的「青吱仔」敿新竹的「蟬蠳、蛣蛚」。  「青吱仔」按怎號兮，我毋知，若「蛣蛚」嘛會使寫做「蛪𧊿」，這個語詞的來歷我普普仔有了解；阿「蟬蠳」，個人認為應該著愛寫做「蟬蛉」比較理想。

    在我的了解，「蟬」新竹人講「kiet4 leh8」，漢字寫做「蛣蛚」。  今仔怹真濟人變講「蛣le1」，「蛚」*字煞無喉塞韻尾「-h」。  這著像「竹篾」，怹傳統唸「竹bih4」，「箍桶篾」少年輩 *兮差不多著攏講做「箍桶bi1」，連帶「竹篾」嘛變「竹bi1」；「烏釘蠓」怹講「烏sir1蠓」，亦講「烏sir1蠛」(這款蠓仔，一隻仔囝，誠惡。  「蠛蠓」箸《爾雅》等古冊計有用例，著是一種愛烏白飛的細隻蠓仔)，一般的人tsia5「蠛」的「-h」嘛無 *去，講做「oo³³ sir³³ bi⁴⁴」；「必(一)裂」傳統講「pit4(tsit8)leh8」，嘛有人講「必(一)le1」。  不而過，箸目前怹這款連讀後字入聲喉塞韻尾消失情形真少。

 蛣，《廣韻》：「去吉切」，音切頂字中古漢語「溪」紐，像講「枯、杞、券」等，咱發「k-」；音切下字咱自底著唸「kiet4」；「溪」非濁母、「質」入聲，讀陰入；「蛣」台語會使讀「kiet4」，符合敿中古漢語的對應。

這字箸古冊除了有「蛣蜣(牛屎龜)、蛣𧌑(木中蠹蟲)、璅蛣(一種體內有細隻蟹仔寄生的貝類)、蛣蟩(古井內細隻蟲)」等的記載。  箸《廣雅‧釋蟲》：「䗁、蛣，蟬也」，王念孫《疏證》：「䗁、蛣，聲之轉也。  《方言》云：『蟬，楚謂之蜩，秦晉之閒謂之蟬，海岱之閒謂之䗁』；郭璞注云：『齊人呼爲巨䗁。』  蛣，曹憲音『去結反』；《玉篇》：『蛪，古頡切』，《廣韻》：『苦結切』，竝云：『蛪蚼，似蟬而小』。  『苦結』(應為『古頡』)之音與『去結』同，疑『蛪』即『蛣』也。」

「蛣」做「蟬」，書證、證書計齊，音、義攏無問題。

蛚，《廣韻》：「良薛切」(sua3手記 *一下，「薛」一般讀「sih4」，新竹人有人講「suh4」，嘛有人講「sirh4」)，音切頂字中古漢語「來」紐，咱發「l-」做陽聲調是常例；「薛」韻三等字新竹人會當唸「-eh」，比論「說(seh4，說謝、解說)、缺(kheh4，缺欠、少缺)、絕(tseh8，絕種、死絕)、踅(seh8，轉踅、踅頭) 、雪(seh4，落雪、雪梨)……」(注，「雪梨」唸「seh4 lai5」是一種梨仔，毋是Sydney)，怹「蛚」唸「leh8」參中古漢語音切的對應有合。

《說文》，蛚，蜻蛚也，从蟲列聲。  一般的講法，「蜻蛚」是一種會叫的蟋蟀，《爾雅‧釋蟲》：「蟋蟀，蛬」，郭璞注：「蟋蟀今促織也，亦名青𧊿」，「蜻、青」箸《廣韻》攏有「倉經」的音切，共音；照《康熙字典》，「蛚」會使寫做「𧊿」；「青𧊿」著是「蜻蛚」。

段玉裁認為《說文》的「蜻蛚」毋是指蟋蟀：「按楊雄、李巡、郭璞、《玉篇》、《廣韵》皆云蟋蟀一名蜻𧊿；許書不與上文『𧍓』篆為伍(「𧍓」著是「蟀」，「蟋蟀」《說文》作「悉𧍓」)，蓋不以為一物與。  鄭注《考工記》曰，以注鳴者，精列屬。」  《考工記》這段：「以脰鳴者，以注鳴者，以旁鳴者，以翼鳴者，以股鳴者，以胸鳴者，謂之小蟲之屬」，歷來有一致佮無同的解說；一致的像「以脰鳴者」計講是蛙類、「以旁鳴者」攏講是蟬類。  「以注鳴者」有兮講是蟋蟀，有的講是蠑螈；講蟋蟀的根據是《爾雅》郭璞注；講蠑螈兮，認為「注」是「咮」之假借，「精列屬」杜猴煞變杜定；毋，敢會「精列」咸「蜻蛚」是兩項物件？  阿蟋蟀嘛有兮講是「以股鳴者」，若《說文》講「蜙蝑」是「以股鳴者」，「蜙蝑」著是「螽斯」；「螽」，《說文》寫做「𧍸」，蝗也；「螽斯」著是「蝗蟲(hong5 thiong5)」。  「蝗蟲」咱tsia5有人講「草蜢」，有人講「草蛉公(tshau2 niN3 / niNh4 kong1」，新竹人用後者。  毋知教育部網路辭典對佗調查兮，講新竹人亦講「草蜢仔」，我咧蒦怹調查的對象減采是新竹的「新住民」。  「草蛉公」怹講「tshau²⁴ niN⁴² kong⁴⁴」，「niN⁴²」是陰去字、嘛可能是陰入的連讀變調，「kong⁴⁴」本字是「蜙」，「蛉、公」攏是借用字。

事實上，「蜻」嘛是一種「蟬仔」，《方言》頂頭有記載。

毋管古人怎樣注解，個人認為這寡攏是會吼(hau2)的「小蟲之屬」，「蟬」會吼佫是「小蟲之屬」，「kiet4 leh4 / le1」著是寫做「蛣蛚」。 

     今仔換來講「蟬蠳」，先看教育部網路辭典「田嬰」這個詞目：

音讀 tshân-enn / tshân-inn

釋義 蜻蜓。昆蟲名……

確實有影，這個語詞台語有人講「tshan5 eN1」亦有人講「tshan5 iN1」；講「tshan5 iN1」兮，若照這部辭典的記載，只有馬公偏泉腔，毋著。  阮台北偏泉、偏廈計講「tshan5 iN1」；較早新竹人嘛講「tshan5 iN1」，顛倒無人用「tshan5 niN1」這個「新品種的外來語」(「較早」指我箸新竹讀冊的時交談 *過，在地的老沿兮，攏是同窗或朋友的長輩，今仔計箸60歲徦80外的用語，上少pat4五十位以上。  這個blag所講的「新竹人」是指老市區的在地人，但是，講「tshan5 iN1」兮，嘛包括市郊，比論「樹林頭、箍內、崙仔、隙仔、潭後、竹蓮國小、溪埔仔、湳仔、水田……」附近。  注，「樹林頭」怹講「tshing5 gua7 thau5」，「潭後」一般講做「tham5 mauN7」)。  林金鈔先生根據《方言》注參《集韻》，箸《閩南語探源》講：

廈門話tshan5 niN1或tshan4 iN1晉江和永春話tshan5 iN1 [(田)𧉅] 是「蜻蜓」。  𧉅，本音i1，受上字tshan5韻尾-n的影響，而唸niN1或iN1。(原文用IPA標音)

林 *先引用的文獻，段玉裁的解說是：

蛉，蜻蛉也。  《戰國策》曰：「六足四翼。飛翔乎天地之閒。」  《方言》曰：「蜻蛉謂之蝍蛉。」  郭云「江東謂之狐黎，淮南人呼䗧𧉅。」 ……即蜻蛉也；今人作蜻蝏、蜻蜓。

蛉，《廣韻》唸做「郎丁切」，中古漢語「來」紐「青」韻；「來」紐的字，咱tsia5無論啥腔口，話音有鼻化元音兮，攏有發「n-」(案，台語的鼻化音是按韻頭著一韻貫穿，聲母亦會受影響，變鼻音。同安kua1 *先講同安無﹝m-、n-、ng-﹞，清華先、晃司怹認為台 / 閩南語的﹝m-、n-、ng-﹞是﹝b-、l-、g-﹞受鼻化元音影響的音變，《彙音妙悟》、《彙集雅俗通十五音》的記載會使證明這個看法)，唸陽聲調的例字，比如「林、卵、籃」；「青」咱自本著唸「tshiN1、tsheN1」。  所以「田iN1」有可能是「田𧉅」，阿「田niN1」應該是「田蛉」。

同款的概念，「蠳」參「嬰」共音，中古漢語「影」紐，咱無發「n-」的字例，新竹人講的「sian5 niN1」愛寫做「蟬蛉」。