留言回覆June 2012

■ 目前台灣話無人講「-eng」

philip yen箸2012年6月26日上午12:17留言：

拄才去內湖予人請，搪著阮阿叔，伊講參阮阿嬸坐客程車來兮。司機的台語小可仔個樣，「彼爿」講「hit pêng」，伊以為是永靖腔，毋拘永靖應該是講「hit pên」，著問司機。司機講伊福建人。阮叔--仔感覺好奇，閣問福建佗位？司機規晡才講金門、福建一半一半，老爸金門、老母福建。阮阿叔閣較憢疑，金門毋是福建？啊，是台灣？阮阿叔著講恁媽媽是福建啥所在，因為司機「街」講「ke」，毋是司機イ因老爸的金門腔。司機一直應袂--出來，只好講我欲五十歲，誠久無轉--去，袂記。阮阿叔毋死心，著講福建啥市？司機講毋是市，是縣。「啥縣？」「袂記，阮『錢』講lui。」到落車，阮阿叔猶想無。伊問我這个司機敢是阿陸仔？
我欲請教--你，以你的看法，這個司機是啥所在的口音？
阮老師罵我無大無細，以前直接你的呼名，失禮，真失禮。

philip：

(A) 歹勢lamh9，若毋是我的母語，我實在是無半撇；只會當照汝的引述，用書面資料去歸納。

因為書面資料無介齊全，歸納的結果無一定是正確 *兮；ia2有，汝提供的語料樣品傷少，當做心適代咧開講著好。

這個歸納愛有有兩個前提：(1)轉述的記音無重𧸖(ting5 taN5)，(2)準司機是阿六仔(無的確，按南洋來兮講的「福建話」，口音有的敿咱嘛無共款)。

1. 在我的了解，目前的台語無人發-eng的韻母，司機講了若無走音，伊毋是台灣人。

2. 泉州腔有-eng韻母niaN5一個惠安，「lui1」一般是做「銅錢(sien2)仔」講，寫做「鐳」，嘛會使準「錢」的代稱。不過in1「街、雞」計講「kue1」。司機毋是舊泉州府轄區的人，這包括金門、廈門。

3. 漳州腔有-eng韻母有真濟所在，雲霄、東山、平和、長泰，包括一部分的詔安；詔安嘛有人用-ing，in1這兩音並無對立。一般來講，「lui1」箸漳州會使用做「錢」的代名詞。

漳浦有-eeng(-εŋ)韻，參-eng欲倚欲倚；不過「街、雞」講「kiei1」著差較濟，司機是漳浦人的可能性真細。

雲霄、詔安「街、雞」講「kei1」。「kei1、ke1」的分辨，普通人計未外困難，所以司機應該毋是雲霄抑詔安腔。

平和嘛應該排除，因為in1的調值較特殊，參咱離了較遠。in1的陰平唸中平調，佮咱的陽去差不多；陽平是低升調，阿陰入的連讀變調嘛有差。準in1有「彼爿」這句語詞，應該是唸做「hit¹³ peng¹²」，「雞、鐳」應該是講「ke³³、lui³³」。

安呢著tshun1東山、長泰兩位。

(B) 看khiai9這個司機是咧刻意隱瞞出身，減采是「非法勞工」，哈。阿毋著南洋來兮？無，哪有人講「老爸金門、老母福建」(東南亞真濟所在「福建話」是指「閩南話」)？五十幾歲若爾，連家己的故鄉箸陀著去與未記 *兮，傷顑啦。

(C) 來tsia5無咧分大細啦，叫我啥攏未要緊。自然著好，稱呼了傷好聽顛倒礙謔(gai7 gioh8)。(2012年6月26日下午7:05)

■ 台語羅馬拼音、祁奚舉善

dongxie箸2012年6月24日下午9:21留言：

「所以我一直無贊成人主張-ien音標拼做-ian；咱著maiN3講啥學理，現不現這兩音著無才調分(pun1)嘛。」
主張不用-ien的人都 知道學理，卻固執使用-ian，一定有他們顧慮的地方，恐怕不是吾人所能理解的。
這樣說對否？
「晉平公這個人素素 -仔，一般人較知影的是伊咸祁黃羊內舉不避親，外舉不避仇的彼段」
你確定是晉平公？

dongxie：

1. 這款學理釐釐仔pat4的人都計知，何說講是學者專家。

重點是若正經箸口語唸-ian的人，欲叫in1怎標音？咱敢會使講唸-ian的人著無唸-ien，無這款困擾，免煩惱hah4濟？若安呢「b、d、g」抑「p、t、k」ah8使著箸hia5爭徦頷䫀筋這大條？

汝用「固執」這兩字真正有夠寫實，哈。

當然，人的想法別人哪有才調理解。不而過有人講(我會記得是洪惟仁教授的款)若無使用這套，主張用羅馬拼音的人，驚講歷來台灣話羅馬字的文獻，有變廢紙之虞(大意是安呢)。設使乾若是這個「顧慮」，個人是認為有較免強。

因為今仔的台灣教育部的台羅拼音，咸本底的羅馬拼音嘛無一致，kan2著會使接受，無這款「顧慮」？上重要的是這寡「文獻」嘛是有專人咧研、讀 *兮。無，哪有「學者、專家、達人」這種名詞敿行業、抑是講尊稱？無可能因為台語羅馬拼音未普遍，這寡物件著會去與拍損 *去。

哪有啥通奇怪，著算現仔時漢字這呢普及，四書五經、廿四史、諸子百家……攏嘛愛是專人咧研、讀。maiN2將讀羅馬拼音的文獻當做全民運動，代誌著解決 *啊嘛。準文獻有影hah4呢寶貴，網路嘛是有人「翻」做漢字。真正有心欲推廣，無的確著叫人學羅馬拼音，佛典、聖經敢毋是計安呢才傳 *開兮？

講一個無輸贏兮，準汝講四書五經……he1毋是台灣的物件，無需要；這是汝的自由，意識形態是感性 *兮，我buai2參汝諍。阿若用漢字寫的台灣文獻 *咧？比論賴和的作品，這幾年中研院台史所嘛整理幾那部(pho7)別款的文獻出版，人著未「顧慮」準以後逐個用羅馬拼音，這寡冊毋著tan3兮字紙籠？

其他的「顧慮」我無清楚，汝敢欲小提供 *一下？做話題phoh4 tau7，加減仔議量(gi7 liuN7)。

2. 若《左傳‧襄三年》是講解狐箸晉平公in1老爸晉悼公坐位的時著死 *去啊，祁奚舉善是晉悼公彼陣的代誌，祁奚著是祁黃羊。

嘛kuh8《呂氏春秋‧去私》：「晉平公問於祁黃羊……外舉不避讎內舉不避子。祁黃羊可謂公矣。」有學者認為這毋著，佫講：「高(誘)不糾其(《呂氏春秋》)失」。我的想法介簡單，準《左傳》有影毋是劉歆先生編造的偽書，安呢《呂氏春秋》的「作者群」敢無人看過這本冊？敢毋知這本冊頂頭寫這是晉悼公彼陣所發生兮？

這我外行，阿嘛未了時間去想、討論。不過若有人欲提供答案，毋管正確抑無，我攏真感謝。(2012年6月25日上午5:27)