林氏閩南語

他K 箸 2011,10,30,16:13 留言：

http://www.hokkienese.com/?p=22#more-22

admin 說道：廈漳濫。漳州讀著像廈門話，廈門儂聽像漳州話。
台語也是不漳不泉，台灣哪些地方的口音跟admin一樣？
這是他們的優勢音嗎？否則為什麼讓初學者學這種廈漳濫？

他K：

歡迎。

1. 建輝先講是廈漳濫，確實。是毋是「漳州讀著像廈門話，廈門儂聽像漳州話」，這我毋知，因為我毋是廈門人抑是漳州的人。

伊若(naN2)pat4講過，廈門腔敿in1龍海腔真共款，拍算有影。以前我聽過伊漳州話的音頻，感覺伊的口音並毋是我所想的漳州話，像講伊ee、or韻無穩定，比如「冊」有時唸tsheeh4，有時唸tsheh4，「無、學」唸bo5、oh8毋是bor5、orh8；無聽著iooN韻，比如「傷」講siuN1，無唸siooN1；有部分的音是泉州音，比如「播」唸poo3……當然，佮咱tsia5共款，口音嘛會濫來濫去，例，「先生」有時像宜蘭唸sin1 seN1，有時像台南講sien1 seN1。這寡計無可厚非，今仔交通利便、資訊發達，五路的人來往頻繁，著是像王華南先生這款老先覺，有時仔hiong5 hiong5嘛會puh4幾句仔偏泉的口音。聽林 *先音頻的當時，我有做簡單的筆記，只是過足久啊，阿臨當臨時無te3去hiau1。

阿漳州音嘛分真濟款，比論海澄腔聲調的調值，有兮著敿林 *先咧講的無sang5。

2. 汝講「台語也是不漳不泉」這嘛著。台語有參伊共款的個別語詞或單字的讀音，但無啥物所在咸這款口音相sang5；我的意思是，台灣無建輝先這te3音頻的口音。這是我個人的看法，理由請參看下骹的解說。

3. 我歇熱的時，有去廈門等所在，來來去去，加khiai9的時間嘛無算短。在我所知，這毋是廈門的優勢音。我的粗想，應該是林 *先個人的腔口，抑是講伊特殊的發音方式。其實使用廈門音的人，箸閩南地區算少數；阿而且廈門音內部的一致性算未下(ke7)，毋kuh8差異性嘛猶佫存在；雖然周長楫講同安音無ir、er，但這無合事實，我的觀察啦。

4. 按怎會用這款口音做初學者教程，我毋知。

5. 林 *先的腔口，尖音猶保留去真完整，無啥去與顎化 *著，這參我箸閩南地區所聽 *著兮，無啥kang5。In1今仔，尤其三十左右歲以下的少年兮，大部分會變團音。

6. 另外，汝2011,10,30,14:59 留言講欲唐藍先生的原文，我無法度遵辦，這毋是我的服務項目。哪有用一廿字，著叫人拍一兩千字，傷過分啦。阿嘛未使掃描，全文copy，我驚去khah8著智財權。

【解說】斟酌聽過兩擺了後，第三擺我才記音。以下廈門音用青色表示，漳州音用紅色表示，個人的見解怙茄色表示。畢竟廈門話佮漳州話毋是我的母語，能力所限，無掛保證，總是，我盡量啦；欲補正，竭誠歡迎。

第一課 相借問

課，kho3，廈音，台語有；偏泉講khoo3，台南、高雄講khor3，同漳音。

問，bng7，廈音，漳音是buiN7；台語除了宜蘭、桃仔園一部分地區講buiN7，其他無論偏泉、漳，普遍計講bng7。

1. 汝好

好，廈音是ho2，台語有，少數偏泉有唸hoo2；發音人唸hor2，是漳音，台南、高雄有。

2. 逐个好

3. 歡迎 !

3. 歡迎 ……

4. Gâu早！

5. 汝即擺好無？

擺，廈音是pai2，嘛講tshit4 maN2，台語有；maiN2是漳音，台語有，箸偏漳地區，電視頂頭素珠仔、黃西田、鄭弘儀等嘛計講maiN2。

好 *無，ho2 bo9廈音，漳音是hor2 bor9；台語除去台南、高雄同漳音，其他無論偏漳、偏泉計唸ho2 bo9。

6. Hàm-hàm代, 費神汝

ham3 ham3代，馬馬虎虎的意思，台語無。

7. 即暂會無閒bōe？

無閒 *未，bo5 ing5 bue9，廈音，台語偏泉有；漳音講bor5 ing5 be9，台語台南、高雄同，其他偏漳bo5 ing5 be9。

8. 即暫咧無閒啥？

無，廈音，台語大多數共款；漳音講bor5，台南、高雄有。

啥，廈音是siaN2，台語有，偏泉亦講siaNh4；saN2是漳音，偏漳有。

第二課 問姓名

二，廈門是li7，少數人講ji7，台語偏漳、偏泉老派亦講ji7，比如三角湧、新竹市郊等；箸偏漳地區有講gi7，比如大溪。

姓，siN3，廈音，台語偏泉有；漳音seN3，台語偏漳有。

1. 請問咱貴姓?

2. 我姓林，雙木林.

3. 汝號做啥物名？

號做，唸hor7 tsue3，前者漳音，後者廈音，台語若像無的款，一般「號」讀hor7的人，「號做」會講hor7 tso2。

啥物，雖然標sim2 mih8，發音人唸sim2 mi1，是漳音，廈音喉塞尾真明顯，講sim2 mih8或sim2 mih4；毋管sim2 mih4、sim2 mih8抑sim2 mi1，台語一般攏無人咧用，用siaN2 mih4較普遍，偏泉有講siah4 meh9、連讀變siamh4 meh9。

4. 我叫做林美周。

做，標tso3，是漳音，實際發音是廈音tsue3，應該是音標了［貝廉］*去。

5. 啥? 汝名 號做"啉美酒"喺?

啥，siaN3廈音，參台語偏泉的「siaN2、siaNh4」略仔有爭差；漳音是saN3，敿偏漳的「saN2、saNh4」嘛有一滴仔無sang5。用陰去調，嘛有可能是標音的問題，因為我聽 *起來，較像陰入調。

喺，heeN3，是漳音，廈音無ee，箸廈門這段時間，我毋pat4聽過heN3、heNh3這款句尾疑問語助，台語無。標音可能咸頂頭共款，陰入標做陰去。

6. 無啦,是"林美周",汝听毋着去啊.

無，廈音bo5，bor5是漳音，台語計有，口音的所在參「好」kang5。

著，tioh8是廈音，漳音是tiorh8，台語有，所在同「好」。

7. 林先，即位是陳小姐。

8. 熟似汝，真歡喜。

9. 我來自我介紹一下。

下，e7廈音，台語有；漳音是ee7，台語無。

10. 即張是我的名片

張，tiuN1是廈音，漳講tiooN1，除了台南，無論偏漳、偏泉台語計講tiuN1。

11. 真歡喜，會當佮汝做朋友。

做，音標tsue3是廈音，發音人唸tso3，是漳音；tsue3、tso3台語有，一般來講，前者箸偏泉地區，後者是偏漳。

12. 叨一个是方主管？

叨，to2是廈音，漳音是tor2。

方，png1廈音，漳音puiN1；除了宜蘭、桃園大溪(老派)以外，偏漳地區亦唸png1。

13. 我着是。請問汝是….？

14. 高主任即个儂,汝敢有熟似？

任，發音人唸jim7，廈音是lim7，少數人講jim7，台語偏漳、偏泉老派亦講jim7，比如三角湧、新竹市郊等；箸偏漳地區有講gim7。

15. 歹勢啦，我毋捌伊呢。

歹，廈音、漳音唸phaiN2，台語有；但，非偏廈的偏泉音計講phai2。所以以前偏廈音雖然歸泉，參其他的偏泉腔差異較大，尤其是上聲、陽平的連讀變調。

16. 無要緊。

無，見第二課6。

17. 即位朋友是？……

18. 伊是阮鬥陣的啦,姓「蔡」名「英龍」，儂攏叫伊「阿龍」。

阮，gun2，廈音，我印象中漳音計講guan2，參台語共款，口語偏泉大部分講gun2，偏漳講guan2。

19. 免客氣，做夥來去厝裡奉茶。

做夥，唸tsue3 he2，廈音，台語有；標音做tso3 hue2參發音人唸兮無kang5，這是漳音，台語嘛有。