西北雨

昨方暗 (連讀，tsang1 am3) 咧寫「台語外老？」的時，摕陳冠學的《台語之古老與古典》khiai2 反 (ping2) ，佫看著伊彼篇「西北雨」，去想著以前有寫一篇「周長楫教授語錄簡評035---西北雨」。自安呢捎出來罔利用、罔改。冠學先認為台語「西北雨」的本字是「夕暴雨」，伊講：

其實「西北雨」是轉音之後的白字，追尋得出它的本音，自然可以查出它的正字來。按「西北雨」的正字是「夕暴雨」，古音 siak8 pak8 hooa7，經數千年長時間的轉變，「夕」siak8 轉變 sia，再轉變為 se，就變成「西」。「暴」，(說文解字造有正字「瀑」字) pak8 和「北」同音，是這一音將「夕」siak8 拉向「西」字轉音的。這種雨有兩個特徵：第一個特徵是暴起於傍晚，第二個特徵是其勢兇暴，故得「夕暴」之名；有時也可單名叫「瀑」，土俗寫成「報」字。(第一，1984：271 - 272)

先講這內面我毋 pat4 -兮，免標調號，因為照冠學先的「轉音」，是無分陰陽調兮，比如「北」是幫母，今仔是陰聲調，「暴、瀑」攏是並母，陽聲調：

1. 入聲的「夕」是啥款的過程，才會 iak → e？先兮講是受「pak」的影響，這點我未曉。阿咱若 (naN2) 像計講「sai1 北雨」，敢講轉 e 了後才變做話音？

2. 夕，中古漢語據《廣韻》、《集韻》祥易切，昔韻梗攝，上古漢語歸「鐸」部，參「席」共音。一般讀 sik8，老鹿港音才有人讀 siak8，這是文讀音。我是咧想講 iak → e，阿準若 ik → e 毋知會成立 -無？因為「sai1 pak4 雨」毋 kan1 naN7 鹿港才有兮，著像冠學先講 -兮，「呼西北雨的，不僅同安一地」(陳1984：270)。

佫來，是我看有，但是有疑問、想無兮：

1. 冠學先對「夕暴雨」的寫法，準若是因聲求字，應該猶會使有其他的寫法，比論網友Y君箸三年前 pat4 寄一封 (pang1) mail 與我，講伊認為愛寫做「颸暴雨」。「颸」有「疾」的意思，台語會使讀 thai1， Y君講 a typhoon 本字是「風颸」，有道理，因為「颱」字是後起的新創字，《康熙字典》無收，連《廈門音新字典》嘛無這字。阿「颸」亦會使讀 sai1，伊的意思是「颸暴雨」著是「疾雨」。

寫「西北雨」的音嘛無問題，若講寫「三八雨」、「獅豹雨」或者「屎潑雨」著差了有較遠。

2. 準若是因義求字：

2-1. 冠學先咸Y君有一個相同的看法，著是西北雨無的確按西北方來兮 (e5)，這著。不而過：東西案 (uaN3) 排菜碗、菜園仔與風颸掃徦東倒西歪、南征北戰的結果歸身軀無一liah4 通下針、北港古早號做笨港 ……，這寡台語用詞敿方位一滴仔嘛無關係。我欲講的是「西北雨」減采嘛共款，「西北」這兩字嘛毋是指方位的意思。

2-2. 先兮主張「夕」暴雨主要的原因是因為伊所講的「第一個特徵是暴起於傍晚」，所以，準若無這個特徵，用「夕」字著失其義。簡單看一寡字書的「西北雨」是按怎解說：

小川尚義：夕立，俄雨，村時雨，村雨。 (《臺日大辭典‧上》武陵，1993：551)

台灣教育部：熱雷雨、雷陣雨。臺灣溼熱的夏季午後，因為空氣受太陽輻射加熱作用，使得強烈上升氣流發展形成積雨雲所下的雨。此雨特徵為強度大、雨時短、雨區小、常伴有雷電和短暫強風。 (《台灣閩南語常用詞辭典》)

周長楫：多發生在炎熱天氣的一種雷陣雨 (《廈門方言詞典》，江蘇教育，1993：133)

周長楫：指夏秋悶熱天氣突然釀成的猛烈而強大的陣雨，有時伴有雷鳴電閃 (《閩南方言大詞典》，福建人民，2006：252)

《台日大辭典》的「夕立 (ゆふだち)」嘛會使講做「夏の午後に降る激しいにわか雨，雷を伴うことが多い (箸熱 -人過晝的時，忽然間發生的大驟雨，普通是會 tan5 雷較濟)」，其他的解說，計攏無講定著是「傍晚」落的雨。個人的看法，林寶卿先生講「【西北】◇ 驟然發生的猛而大的 (風或雨)」(《普通話閩南方言常用詞詞典》，廈門大學，2007：600)，寫了上合實際。「透西北」是突然間起透風，並無限定時間參方向；「落西北」是突然間落彼囉大佫急的陣雨，亦無限定時間參方向。

應劭《風俗通義‧聲音第六》有一 te3 短古，毋知參「西北雨」有關係 -無，我罔記。晉平公這個人素素 -仔，一般人較知影的是伊咸祁黃羊內舉不避親，外舉不避仇的彼段；嘛有人知影伊敿師曠的「秉燭之明」這層 (tsan5)。應劭寫的是根據《韓非子‧十過》-兮，主角亦是晉平公佮師曠。

師曠用瑟替 (毋是替代，是「為 (ui7)」的意思) 晉平公演奏清徵之音，彼個中間有十六隻烏色的鶴鳥，按南方飛 -來，排列引頸長鳴展翅而舞。晉平公歡喜 gah8，酒捧 -咧行倚去師曠 hia5，揢祝壽煞了後，轉去伊的座位兮，著問師曠：「無比清徵佫較與人感動兮啦 hooN4？」師曠講清徵不如清角。晉平公希望師曠奏來聽看 bai7 -咧，m7 koh8 師曠揢擋毋通 (thang1)，

師曠講過去黃帝駕馭象車蛟龍，率畢方、蚩尤、風伯、雨師 …… 鬼神會師，箸泰山的頂頭做清角調；阿主君德行淺薄猶未使聽，聽了恐驚兮有敗害。晉平公講伊老 a7，著是興音樂這味，希望會當 (tang3) 聽 –一下。姑不將，師曠著順伊的意，開始演奏的時，西北朋著起雲；佫奏 -落去，大風隨 kau3 位，雨落徦 pin3 piang2 叫，棚篷 sie3 徦裂裂 (lih8) -去，碗盤摃摃 (kong3) -破，處瓦掀掀 khiai9，落徦歸塗骹。在座兮散了了，晉平公驚徦躃蹛 (phih4 tua3) 壁角 -兮；晉文公自安呢著病，阿晉國洘旱赤地三年。

佫再強調 -一擺，我無講的確這著是台語「西北雨」的語源 oo5，罔趣味著好。