小可可憐

● 以前台語「可憐」有六種讀法，攏會通 (thong1)，意思嘛計仝 (kang5) ：

khooN2 lien5
khooN2 lin5
khoo2 lien5
khoo2 lin5
kho2 lien5
kho2 lin5

所有的「可」計用文讀，可，《廣韻》枯我切，溪哿上開一果；中古漢語「歌哿箇」韻的字讀 -oo、-ooN 是偏泉、同的腔口 (案，-oo 是又音，黃晉波「當代泉州音字彙」) ；古早歸偏泉的偏廈口音，有讀「-oo」嘛有讀「-o」；偏漳腔一律讀「-o」。

「憐」讀「lien5」是文讀，講「lin5」是話音。憐，《廣韻》落賢切，「先」韻開四字；中古漢語「先 (銑霰)」開口四等字的「眠 (啽〜)、編 (〜針)」計讀「-in」。

今仔「khooN2 lien5、khooN2 lin5」較少人講，偆 (tshun1) 偏泉、同地區保留老派口音的人若爾；「khoo2 lien5、khoo2 lin5、kho2 lien5、kho2 lin5」猶真濟所在咧用。若照台灣教育部《台灣閩南語常用詞辭典》的講法，都無外久，才偆一個「kho2 lien5」，有影「kho2 lien5」。

● 我了解的範圍，台語「小可」有文、白兩款讀法，意思無同 (tang5)：

文讀：siau2 khooN2，參「小 -人、在下、不才、鄙人、區區 ……」共款，是對家己的謙稱。敢有人讀「小 khoo2、小 kho2」？我 m7 pat4 聽 -過，毋知。

話音：sio2 khua2，是「一點仔、略略仔、淡薄仔、算猶免強會使 -兮」的意思。普通箸「小可」後壁佫加一字「仔 (a2)」，這個「仔」-字，除了表示小稱詞尾以外，箸書面嘛有辨義的功能。比論：

「小可可憐」欲講「我真可憐」抑「一點仔可憐」，計會使得。若寫「小可仔可憐」著一定是咧講「一點仔可憐」。

「小可仔別 (pat4) 字」是「略略仔 pat4 字」，若寫「小可別 (pat4) 字」，會使讀做「siau2 khooN2 pat4 li7」，安呢著可能會 hong7 搦準咧臭屁，假使有人欲摕來做題消遣，嘛無冤枉。

小，私兆切，心小上開三效，中古漢語「心」紐讀 s- 是常例，「宵小笑」韻的開三字，像「燒、表、秒、舀」，台語話音講 -iau，「心」非濁母，「小」是上聲，講「sio2」無問題。

可，枯我切，溪哿上開一果，上古漢語「溪」紐讀 kh- 是常例，「歌哿箇」韻的開一字，像「拖、歌、籮、我」，台語話音講 -ua，「溪」非濁母，「哿」是上聲，講「khua2」有合對應。

「小可」做「一點仔、略略仔、淡薄仔、算猶免強會使 -兮」解說，從 (tsing5) 早著有，比如：

王羲之《與人書》：
頃猶小差，欲極游目之娛，而吏卒守之，可歎耳。東陽花果似小可，何日得卿諸人。
(案，tsia5 的「小可」是「猶會使 -兮」的意思，書面語是「尚可」。這字「尚」-字佮「上」台語會使讀「siong7、siang5」共音，「第一好、第一生 (tshiN1 / tsheN1)、第一姣 (hiau5)、第一大」是「上好、上生、上姣、上大」；「尚好、尚生、尚姣、尚大」是「一點仔好、略略仔生、淡薄仔姣、猶算大」；意思完全無 sang5。另外這字「姣」，《廣韻》：「胡茅切，姣婬」，這字是本字；《台日大辭典》做「嬲」，台灣教育部《台灣閩南語常用詞辭典》參《台語辭典(台日大辭典台語譯本)查詢‧編號19579》做「嬈」，計有問題：黃晉波讀做「hau5」，是照音切去推兮，其實中古漢語「肴巧效」韻的開二字會使讀有介音「i」，比如「抄、巧」等。)

《舊五代史‧卷一百四十七》：
近日諸道百姓，或諸多違犯，或小可鬥爭。

《大宋宣和遺事‧元集》：
且說那晁蓋八個，劫了蔡太師生日禮物，不是尋常小可公事 ……。

《三國演義‧第七十一回》
今操引二十萬衆，分屯十營，將軍在主公前要去奪糧，非小可之事。

《水滸傳‧第一、四回》：
這代天師，非同小可！
苦也！前日這畜生醉了，今番又醉得不小可。

《增廣昔時賢文》：
若爭小可，便失大道。

這款語料，揣 -三幾十個啊，無啥困難，「小可 (sio2 khua2)」這句語詞，音、義攏OK，有「證書」亦有「書證」，應該著是本字。

● 台灣教育部《台灣閩南語常用詞辭典》嘛主張用「小可 (sio2 khua2)」，不而過伊的說帖有一位講了可能「小可仔」有走精，我做一絲仔補充，若無正確，歡迎指正：

閩南語「可」的音讀除了在「小可仔」一詞唸 khuá 以外，大部分唸成文讀音 khó，例如：可愛、可惜、許可（hí-khó）。泉州音也唸 khónn，用於「可惡」（khónn-ònn）一詞。
(「【小可（仔）】」)

「khónn-ònn」我計標做「khooN2 ooN3」，看有著好，這無問題。

「可」偏泉音不但 (m7 naN7) 讀「khooN2」，嘛會使讀「khoo2」，比喻，洪一峰的「可憐的戀花再會吧」，著是唱「khoo2 憐戀花」。

「khooN2」毋孤用箸「『可惡』一詞」，「可惱」「kho2 惱、khoo2 惱、khooN2 惱」計攏有人講，計著。「可愛、可惜、許可」偏泉腔嘛是讀「khooN2」抑「khoo2」，像講：

洪一峰「男兒哀歌」：「酒女面容若親像可愛冤仇人」，著唱「酒女面容若親像 khoo2 (可) 愛冤仇人」。

「龍兄虎弟」鄭日清「春風歌聲」亦唱「khoo2 (可) 愛鳥隻吟歌詩」。鄭先生有保留老偏泉腔的 -ir、-er，但是漳泉濫濫去上功夫。

陳淑樺「月夜愁」唱「心內真 khoo2 (可) 疑」。陳小姐這條歌的口音，完全是新偏泉腔，無徦一字唱 taN5 -去。

「河邊春夢」，「可比月當圓」鳳飛飛「可比」唱「khoo2 比」、「月」唱「gueh8」，一句內底有兩種腔口。林慧萍唱「kho2 比 geh8 當圓」是偏廈腔的音，阿黃妃唱 -兮，著參鳳飛飛相 sang5，嘛是兩款腔口。