非關研究---唐官話

RORO - 2010,09,16,10:58留言：

沒錯

所有的讀書音計是照字書的音切推 -出來兮

有歷時共時

唐詩有

詩人用韻風格

使用的語言 (方音)

韻目分合

等等問題

也有為了湊韻

改變讀法

甚至文白相混

說哪種音腔較像合唐詩

沒有人統計

如果照某些學者的擬音

不論漳泉

都不是唐朝的官話

但是

有沒有較確實的根據

來證明某種音腔的特點

跟唐代是相同的呢

RORO：

箸非關研究---唐詩韻我所舉的唐詩韻類，漳音是「陽」韻開三字，參同韻的合三字以及「唐」韻未鬥韻。唐、五代的關中文人的韻文「陽唐」兩個韻系是混用兮；按唐明皇開元五年 (717年，公元，下放此) 徦唐昭宗光化四年 (901年) 這中間，進士科考試題詩賦用韻亦「陽唐」同用。這是事實，是有根據的。

我一再講並 (phing7) 這無意義，對這種代誌我無興趣，嘛毋 pat4去注神過。講正經兮，這方面我無內行別毋成物。

若是古漢語的擬音，個人認為有閒的時摕罔看著好，這對咱這款程度的人無啥幫助。何況做古音構擬的學者規大堆，一人講一款；有兮講講咧愛改著改，咱毋是飵這途飯兮，欲佗討 hah4 濟性命去了解、深入？

不而過，針對汝所講兮：

有沒有較確實的根據

來證明某種音腔的特點

跟唐代是相同的呢

著就我所知兮，提供與汝做參考。

泉州話確實有一個特點，參開漳聖王彼個時代的官話相 kang5。開漳聖王是唐朝的人，彼當 (tang1) 陣的官話著是「唐官話」。「唐官話」是唐朝的帝王佮皇族咧使用的話音，參做官兮咧講的話音無啥關係。因為，並毋是所有的官員攏是京畿附近的人氏。

未少人主張閩南語形成於唐朝，大概是箸陳政、陳元光 in1 爸仔囝入閩南開始，徦唐末王氏據閩的這段時間。有人無贊成，in1 認為陳氏參後來王審知兄弟帶來的，是閩南語的讀音系統，話音應該是箸進前著已經存在兮。這無容易去考究，嘛有學者講閩南語參中原古語的分流，是箸殷商的時陣。啊知，留與專家去揣答案。

史書古籍並無記載閩南語佮唐音的關係，但是咱會當 (tang3) 按古冊頂頭片鱗碎甲的當中，看著一寡資料。

唐明皇總章二年 (669) 陳政 in1 來福建，武則天垂拱二年，漳州建郡，頭一任的刺史是陳元光。武則天平常時敿大臣咧談論、溝通的話語，應該是當時的「官話」，這點毋知有爭議 -無？

下骹是隈 (ui3) 唐人筆記所抄落來的幾句仔話：

侯思止出自皂隸，言音不正，以告變授御史。時屬斷屠，思止謂同列曰：

「今斷屠宰，雞云圭 豬云誅 魚云虞 驢云平縷，俱云居不得喫云詰，空喫結米云弭麵泥去，如云儒何得不饑！」

侍御崔獻可笑之。思止以聞，則天怒，謂獻可曰：「我知思止不識字，我已用之，卿何笑也！」獻可具以雞豬之是對，則天亦大笑，釋獻可。

(唐‧劉肅《大唐新語》，北京中華，2004：190)

武則天的話音，豬 / 誅、魚 / 虞、驢 / 縷的平聲、俱 / 居、如 / 儒，讀無同音。照《廣韻》的音切：

豬 ----- 陟魚切，知魚平合三

誅 ----- 陟輸切，知虞平合三

魚 ----- 語居切，疑魚平合三

虞 ----- 遇俱切，疑虞平合三

驢 ----- 力居切，來魚平合三

平縷 -- 力俱切，來虞平合三

俱 ----- 舉朱切，見虞平合三

居 ----- 九魚切，見魚平合三

如 ----- 人諸切，日魚平合三

儒 ----- 人朱切，日虞平合三

看會 -出來，開漳聖王 in1 的官話，「魚、虞」這兩個韻是無 kang5 音兮；佮泉州音、甚至咱台語偏泉腔共款，計是「魚虞有別」。

按泉、廈、漳腔的順序排，讀音是：

豬 ----- tir / tu / ti

誅 ----- tu / tu / ti (黃俊雄讀 thi)

魚 ----- gir / gu / gi

虞 ----- gu / gu / gi

驢 ----- lir / lu / li

平縷 -- lu / lu / li

俱 ----- ku / ku / ki

居 ----- kir / ku / ki

如 ----- lir / lu / ji

儒 ----- lu / lu / ji

一般認為是唐代長安音譯的日語漢音，共款「魚虞有別」，嘛會使摕來參考做旁證：

豬チョ (cho) / 誅チュ (chu)、魚ギョ (gyo) / 虞グ (gu)、驢リョ (ryo) / 縷リュ (ryu)、俱ク (ku) / 居キョ (kyo)、如ジョ (jo) / 儒ジュ (ju)。

準漳州音是聖王公 in1 -帶來兮，哪會「魚虞不分」咧？有可能是而後身才合流，有可能陳元光 in1 -帶來兮著毋是當時的官話。阿毋，敢會是漳州音敿陳元光無關係？當然，這個可能性真下 (ke7)。

嘛未使講泉州音的確著是「唐官話」，抑是講泉州音「魚虞」的音值著咸「唐官話」相 sang5。因為隈 (ui3) 南北朝開始「魚虞」著分化做無共的讀音嘍。啥人會知泉州的讀書音是承續六朝音抑是唐音？咱極加 kan1 naN7 會使講這個特徵有 kang5。這著像台語佮現仔時的閩南語，有相 kang5 的特徵共款，比如無輕唇音、無舌上音；但台語的偏漳音並毋是漳州音、偏泉音亦毋是泉州音。台語參今仔的閩南語是同源，但是攏計咧變。閩南人參原屬閩南語系的莆仙人，已經無法度交談，莆仙話早著脫離閩南話，成做另一支閩語系，這是事實，嘛是現實。