sin7 sua3 寫一下仔「生」

進前我有寫過：
「生」文讀 sing1，話音偏泉腔講 siN1、tshiN1，偏漳腔是 seN1、tsheN1，讀做 sing3 抑 siN3是音訛。(案，我 tsia5 是指台語，閩南有人講 sng1) ……

「生」讀「色敬反、所敬反、所幸反」，台語計攏讀 sing3 參「性」同音。

「性」阮文讀唸 sing3，話音是 siN3，偏漳腔的講 seN3，敿 (kiau1) 「姓」計攏相同。
(台灣話敢有「生命」？)

目前讀「sing3、siN3」kan1 naN7 用箸「生命」這個語詞。

生母、生囝、生卵、生湠、生日、生成、生疥、生相 (siuN3)、生 siuN5、生蟲、生利息、生菇生殕、生年月日、生頭發尾、生長 (tng5) 命短 ……，攏讀 siN1 抑 seN1。

生飵、生冷、生茶、生菜、生魚、生蠔、生肉、生花、生傷、生鐵、生炭、生字、生手、生疏、生跳跳、生塗豆、生雞卵、生牛奶、生面虎、生石灰、生擒活搦、生米煮成飯 ……，攏讀 tshiN1 抑 tsheN1。

有人講「生魚、生肉」愛寫做「腥魚、腥肉」，因為「凡肉未熟曰腥」，這我無意見，雖然感覺這款解說有較免強。台語的 tshiN1 / tsheN1 並毋限定是咧講魚佮肉，若講「生飵、生冷、生茶、生菜」等攏寫做「腥」-字，這著不對嘍。阿嘛免 hah4 功夫，講「魚、肉」用「腥」，其他兮才佫用另外一字。

有人講「上 tshiN1」的本字是「上鮮」，阿「tshiN1 / tsheN1 甜 (tiN1)」-咧？寫「鮮甜」抑「生甜」？

寫 kau3 tsia5，去想著一個笑話：

舊年參六、七個朋友去海產擔，逐個坐好勢，頭家娘著入來介紹 in1 的菜齣，徦阮著計點好 -啊，伊佫問講敢欲用 (iong7) 一個蟳仔米糕。有人講蟳仔若有 tshiN1，創來飵看 bai7 -咧嘛好。

頭家娘講：「活 -兮 neNh4，包汝 tshiN1兮啦！」

一個號做アブラ -的，介五仁，著應伊講：「啊有彼囉代誌，阮某嘛活 -兮，嘿嘿，著無以早 hiah4 tshiN1。」

我坐箸門邊仔，著聽見一個徛箸外口摕おしぼり拄欲入來的阿さん，一聲仔囝唸箸喙內，講：「夭壽死囡仔。」

言歸正傳，台語猶未煮過的物件，講「生兮 (tshiN1 / tsheN1 e1)」，煮了無足熟 -的號做「半生 (tshiN1 / tsheN1) 熟」；物件煮了佫會當 (tang3) 保持像猶未料理過的原味 hah4 甜兮，著是「tshiN1 / tsheN1 甜」，寫做「生甜」較合理。若寫「鮮甜」，可能有爭議：

台語同時有 -iN (偏泉腔)、-eN (偏漳腔) 的字，箸中古漢語是「梗」攝的字。鮮，《廣韻》相然切，中古漢語是「山」攝，「山」攝的字台語有讀 -iN，像：「邊、鞭、篇、天、纏、錢、扁、變、片、箭、扇、見」等，但是這寡字偏漳腔並無對應做 -eN，大家計是讀 -iN。

物件新鮮，包括偏漳腔在內，咱台語若攏講 tshiN1，安呢寫做「鮮」，讀音著無啥問題。毋 kuh8，準講若有人用 tsheN1 -咧？

偏泉腔講「tshiN1 甜」，偏漳腔講「tsheN1 甜」；魚、肉有 tshiN1，嘛有人講「有 tsheN1」，我講 -的無準算，「冰冰好料理」的大師 (sai1) 郭泰王，箸節目內底嘛講「tsheN1」。共款maiN3 準算好啦，因為例證傷少。不而過小川尚義的《臺日大辭典》嘛有安呢寫：

「星、腥、生、鮮、青、菁」，漳州音計讀「tsheN1」。(《臺日大辭典‧上》武陵，1993：792)

tshiN1，鮮。1. 魚類など新鮮な。新しい。此尾魚真 ~ (tsit4 be2 hi5 tsin1 ~) = この魚は大層鮮しい。……【鮮 (tsheN1)】。 (同上‧下：109)

其實，個人的感覺，寫做「鮮」-字，毋管是本字或者是用字，攏無介理想。

「鮮」是生魚，《禮‧內則》冬宜鮮羽，《註》鮮，生魚也 (《康熙字典》北一，1974：1398)。是現刣的生肉，《書‧益稷》暨益播奏庶艱食鮮食，《傳》鳥獸新殺曰鮮 (同上)；《左太沖《蜀都賦》：「割芳鮮，飲御酣」，劉淵林注：「鮮，新殺者也，一曰生肉也。」(《昭明文選‧卷第四》文化，1975：62)。

生魚、生肉的「生」本來著會使讀做 tshiN1 咸 tsheN1，佫若用箸「生飵、生冷、生茶、生菜 ……」的時陣，嘛攏會通。另外，「保鮮、海鮮、鮮美、時鮮、新鮮味、烹小鮮、生炒三鮮」欲怎讀？

鮮，《玉篇》生也 (《康熙字典》北一，1974：1398)。意思敢毋是講「生」著是「鮮」？會使 -兮啦，「生」嘛有「新鮮」的意思：

歐陽修等《新唐書‧卷七十六》：「(貴妃楊氏) 妃嗜荔支，必欲生致之，乃置騎傳送，走數千里，味未變已至京師。」tsia5 的「生」著是「新鮮」。

我是認為毋免 hah4 麻煩，歸氣寫做「生」無較簡單？管伊讀 tshiN1 抑 tsheN1，音、義計嘛有合。當然，這攏計是我家己想 kau3 hia9 寫 kau3 hia9，減采有無周至所在，有興趣欲鬥陣討論兮，我無上歡迎。

佫想著一項未了解的代誌，我有一個囡仔伴，細漢的時生做古錐古錐 (koo2 tsui1)，面仔圓圓，性地真好，大人攏叫伊 「鮮大王」，「鮮大王」講做「sien24 大王」，「鮮」讀上聲。較大漢一屑仔的時，我箸枋橋嘛聽偏漳腔的人共款講「sien24 大王」，算是較特殊的現象。彼當陣未曉揢 in1 請教，過一廿年 (it4 liap5 niN2) 阿，人事已非，有影拍損，罔記。