周長楫教授語錄簡評016---氣口

■ 我 tiu1 tiu1 去王順隆的 blog 聽台語的老曲盤，若是較有閒，小斟酌一下，往往 (ing2) 著會發見一寡真趣味的資料。

資料毋是全面性的、無褿 (tsau5)、量真少、亦散 (suaN3) ia7 ia7，這是事實，欲摕來做母語研究的參引資料，效果可能有限 (iu2 hien7)；不過，準若有心，小 ka1 整理理咧，嘛加減仔有路用。欲參人開講免驚兮無話題，阿嘛 thing3 好做 gi7 niuN7、未無聊、未無代誌做。
像我這兩工仔，著參人咧會「湯島白梅記」內底，播講員的漳泉濫、老台語的特殊語詞、尖團音、佮 in1 箸央元音 -er、高後元音 -ir 的表現，不只仔有話通 (thang1) 講，亦介心適。

聽王先生的「黑膠唱片」好處有影介濟，像講一寡毋別 (m7 pat4) 聽過、有印象但是無啥人咧用的、意思別 (pat4) 了無透、甚至家己都無致覺的，都會使趁這個機會去了解，或者問人、反 (ping2) 書、揣資料。

2007年12月初，網友C君問我台語「疏開」是啥意思，我揢回覆：

「…… 特點：(a) 與人摕的計無啥心甘情願，(b) 揢人摕的全是『無償』的。『疏開』是按日語『疎開 (SOKAI)』來的，疏、疎兩字音、義攏同，台語真少用『疎』字，所以用『疏開』。這句的意思是，第二次世界大戰的時，美國仔飛龍機來轟炸台灣，市內的人佮物資、工場的設備，攏愛疏散去莊骹 (恁可能說hiuN1 e7)。因為欲走空襲，厝內物件較濟的人著叫人鬥搬，鬥搬的人有時仔會向貨主分淡薄仔物件，甚至有的是半硬欲的；這種方式著是『疏開』」。

徦箸音頻聽著卜吉仔講：「heh8 著驚兮賊仔 (tshat8 a2) 揢我疏開去」的時 (2009,05.23 台湾語の広辞苑-糊塗燒酒仙)，才知影我對「疏開」這個語詞的意思了解了無齊全。

原來「疏開」亦會使參「賺 (tsuan2)、賺飵、khiang1、搐 (tiuh4)、接收、thong2、so5」共款，除了講「摕無討的、摕無 tin1 兮」的以外，猶會使衍伸做「偷摕」。

共這塊 (te3) 曲盤，另外一個演播的，號做久松，伊有一句口白：「汝毋別啦，這著是香港的禮數，好額人 (ho2 giah8 lang5) 的氣口 (khui3 khau2)。」

台語「氣口」有幾仔種用法，這 liah4 的「氣口」是「派頭」的意思，換準這句話久松若講做「好額人激 (khik4) 的氣口」，意思著變做是「有錢人咧激的派頭」。

■ 周長楫講：

台灣閩南話：氣口 khùi kháu
廈門話：風謗 hong1 pong3 (誇口)
(周長楫《閩南話的形成發展及台灣的傳播‧叫法不相同的詞語舉例》台笠，1996：294)

【氣口】〈廈〉口氣：伊人細 ~ 大 他人小口氣大。
(周長楫《閩南方言大詞典》福建人民，2006：238)

■ 事實上：

● 台語「氣口 (khui3 khau2)」會使有幾仔種的解說，其中亦會使當做「口氣 (khau2 khi3)」的意思，但是無徦一種是周教授所講的「誇口」。

● 台語「誇口」直接講「誇口」，亦是用「大聲話」嘛會通。

不過，周先生所謂的「誇口」是咧講：「肆意誇大；胡亂吹噓」(周，2006：469)。這款詞義箸台語內底，有不只仔濟的近義詞，比如講：「kai3、臭 kai3、彈 (tuaN7)、臭彈、屁 (phui3)、臭屁、煎 (tsuaN3)、死煎、讆虎卵 (lan7)、讆山水、讆龍讆鳳、歕、雞 kui1、歕雞 kui1、肨 (phong3)、肨風、肨風龜、pong3」等，但是，這有的是「多義詞」，無限定一定是咧講「誇口、肆意誇大、胡亂吹噓」。

■ 我的看法：

● 台語的「氣口」是多義詞，有的解說的界限毋是講介清楚，我小 ka1 歸納一下，若有落鉤抑是毋著的所在，請指正。

1. 口氣、聲嗽：

伊講話的氣口無通好。(他說話的口氣不很友善)

2. 口味、口韻：

紅標兮透冰的維大力 (讀做 ue24 ta42 li42) 上合我的氣口。(米酒兌冰涼的維大力，我最對味了)

這泡茶氣口未 bai2。(這茶的香味跟喉韻都不錯)

3. 氣味、韻味：

這本雜誌的內容真好，著是宗教的氣口有較重一屑仔。(這雜誌的內容很好，就是宗教味濃了些)

白冰冰唱エンカ，有日本婆仔彼囉氣口。(白冰冰唱演歌，有日本女人的風味)

4. 氣運、氣勢：

拍幾環 (khuan5，古早台灣麻雀一輾四骹攏做過莊，算一環，一 tshong3 四環) 啊？氣口按怎？(摸幾圈了？手氣如何？)

近來氣口好無？(最近運勢好嗎？)

5.作風、風格：

阮粗作人的氣口，直來直去啦。(咱幹粗活的，就不拐彎抹角)

汝毋別啦，這著是香港的禮數，好額人的氣口。(你不懂啦，這就是香港的禮貌，有錢人的氣派)

6. 胃口：

對方氣口傷大，咱 ha5 lak4 伊未倒。(對方胃口太大，我們沒法應付他)

頂頭 2. 3. 4. 5. 嘛會使單用一字「氣 (kui3)，比如「激氣口」講做「激氣、激蔘仔氣」，puah4 kiau2 的氣運講做「kiau2 氣」等。

● 我抄一寡語例，逐個不妨參頂頭的解說罔鬥看 maiN7 咧，看 to2 一款妥當，或者另外有較合適的。
咧鬥的進前，先用「誇口」解說一下，看敢會通。

(A) 一蕊花的作品：

A1. 台語稱呼「茨頭家」，習慣上攏是咧講查甫人，「茨頭家娘」彼字「娘」字，永遠黏佇尾溜，若無頭前彼三字，根本毋知是啥物身份。「收租婆」的氣口就無仝，是毋是有「收租公」？he佮恁祖媽無治代，阿婆我就是即間茨的茨主，就是欲來收茨租……
(艋舺收租婆)

A2. 阮屏東人有力擱熱情的氣口，向在場的媒體朋友宣告：「……
(1989衝！衝！衝！)

A3. 俊傑即個少年仔，有hah南哥的氣口。
(這阮堂的啦！)

A4. 因為，較 há 阮阿媽怹伊彼個年代咧罵人的氣口。
(怪老子阿伯)

A5. 華語會當用「綠油油」、「綠茸茸」來形容，台語，我干旦會曉講「青~青青」，一字做三字用，以加強的氣口，三字疊作伙，代表足青、介青、有夠青。
(清明kui7，穀雨穗)

A6. 是毋是有一工，我會當家己寫一條仔南管的曲、歌仔戲的調、或者是布袋戲氣口的歌，來給唱看mai7？……
(原味的一)

(B) limkianhui 的作品

B1. 這明顯是用較 khok8-khe1 的氣口來咧唸。
(2009,03,12 葫蘆問（葫蘆運）)

B2. 比論講，咱會當換 hit-lō 較倚“英語音”的氣口。
(2008,06,08 26个羅馬字母的閩南語讀音（二）)

B3.「汝這句話，我想著李炳輝」「呵呵。著是學伊的氣口啦」
(2008,02,20 在線學閩南語－閩南語的輕聲)

B4. 我按網頂下載一篇落來，儂自本是用 TLPA 標音，我照家己的氣口 kā 換做 POJ
(2007,05,24 昔時賢文（閩南語）)

B5. 裝潢是無底的，各儂氣口嘛無共款。
(2007,04,20 家己搭Wordpress blog)

B6. 實在真適合亲像站長即款 pīn-tōaⁿ 侬的氣口。
(2007,04,19 金門踅一lìn)

B7. 即齣戲 soah 愈搬愈合我的氣口，愈哺愈有味。
(2007,04,19 華視8點檔《舊情綿綿》，有儂講「漚戲拖棚」，敢安呢？)

B8. 即款撇步，当然有合 (hah8) 遐个無品味侬的氣口；
(2007,04,19,Ùi台灣民視(FORMOSA TV)來講起)

B9. 講實在的，he無合 （bo5 hah8） 咱閩南語的氣口 （khùi-kháu）。普通話即个「刷卡」，閩南語會當講做「luh 卡」。
(2007,04,19 《闽南之声》广播错误的读音实在有够侪)

B10. 我 ka7 翻做漳泉語，當中小可 (sió-kóa) 有保留一寡原封 ê 氣口，
(2007,04,18 《長征》)

B11. 文章可比天顶的仙文，有建安的氣口；
(2007,04,18 《宣州谢朓楼饯别校书叔云》)

B12. 了後看觀眾的氣口啥款 chiah 佫來調整下一个单元的剧情、佈景 hām 演員的安排等等。
(2007,02,02 中國頭一齣閩南語生活片，台廈合作)

B13. 當中有寡詞句寫了真正 bōe 嫌咧，比論講“將半暝仔的露水，當做傷心的知己，愈冷愈合意。”氣口真正讚的！
(2006,12,12 《酒佮淚》)

B14. He是一出政治氣口真重的印度寶萊塢（Bollywood）電影。
(2006,12,04 「尾代港督」不平凡的人生)

B15. 是講，有噹時仔咱 nā 感覺講氣口有合（hah8），著大膽 kā 開落去，呣免觀前顧後、頓teⁿ 躊躇。
(2006,11,17 刣毒軟體：Kaspersky（卡巴斯基）)

B16.「福州話」即款的講法，實在「【勿會】傷甜，也【勿會】也傷鹹」，氣口 (khùi-kháu) 拄拄好，值得吹銷。
(2006,11,17 福州話：是語言？是方言？（譯文）)

B17. 儂哺過了後，chiah thang 摕來哺一遍，不但氣口無對同（tùi-tâng），哺著嘛真無味。
(2006,11,17 閩南語，安怎死的。)

B18只有安呢，chiah有法度又佫包含「露骨」的意味，又佫包含著「淫穢」的氣口。我發現講，佮 即種「氣口」相對應的漢字寫法，佇《台/華》寫做「褻體」。
(2006,11,16 「Siat-thái」，啥物意思，汝敢瞭解？)

B19.“方旻五筆”是其中的一種，尤其適合中國儂的氣口。
(2006,11,15 吹銷幾个閩南語的輸入法)

(C) 呂興昌教授的作品：

1. 論真講，台語詩因為伊所使用的表達語言是本土的母語，ti7 聲嗽佮氣口方面，攏佮台灣的土地有真深的感情聯 ……
(2000,03,14 上網 扑開門窗，看著台灣 ── 台語詩中的台灣意象，下仝)

2.「我的一族有二千，雖然無刀也無槍 … 眼前何有警備兵」，表面是 leh o-lo2 霧社事件的主角泰雅族人對絕對強勢的敵人無 ka 看在眼內，但是順頭前的詩句讀 --落來，實在有真強烈的全台一同準備佮日本人做徹底輸贏的氣口。
這種氣口，伊 ti7 隔轉年所寫的另外一首台語詩〈故鄉的挽歌〉 ma7 有仝款的表現：詩分二段，伊用「同胞們呀」「兄弟們呀」做每一段的開頭，這種強烈的呼籲hou7 人感覺熱切的向望 ……

3.對殖民當局的 hiau-pai sang2-se3，表達了嚴厲的控訴。這種氣口雖然無一定有實質的結果，不過，參楊華彼種消極性的悲曲比 --起來，伊加真有「知其不可為而為之」的悲壯精神。

● 我講台語的「氣口」未使當做「誇口」，著毋是頂頭這寡語料才有法度證明。減采閒的時陣，去網路頂仔揣一下，看敢有做「誇口」的用例。

周長楫先生講「氣口」箸廈門著是「口氣」的意思 (周，2006)。準若是安呢，伊箸進前的著作 (周，1996) ，敢是著愛變做囥踮「詞義範圍大小的不同」，寫做：

語詞：氣口
台灣閩南語：①口氣、聲嗽。②口味、口韻。③氣味、韻味 …… ⑥胃口
廈門話：①同台灣。無 ② …… ⑥義

未使歸箸「叫法不相同的詞語舉例」，毋才較合理。

● 有一個較特殊的現象，建輝先19個用著「氣口」的例句當中，若親像無徦一個是當做「口氣」的。(案，例句是箸今仔日按伊的 blog 揣出來的，這19個例句應該是徦 2009,07,02 為止，所有用著「氣口」的文句。)

另外佫小注明一下，周長楫教授《閩南方言大詞典》的版權頁雖然寫講是2006年12月第一版、第一次印刷；不而過，實際發行是過幾仔月日後的代誌。

● 廈門話講「誇口」會使用「風謗」，讀做 hong1 pang3 (周，1996、2006)，《臺日大辭典》pong3的意思會使解說做「肨風」，亦安呢寫。

這字「謗」字應該是同音借字，因為「pong3」的意思並毋是 kan1 naN7 用箸咧「講話肨風」。

「pong3」是「放大、擴大」的意思，比如講：

灶骹 pong3 對巷路兮出去。

這雙鞋揢我 pong3 較闊咧。

田岸路 (tshan5 huan7 loo7 有人講 tshan5 nuan7 loo5，應該是連音的順行同化，毋是訛讀。「田」有人講本字是「塍」) 著 pong3 較闊咧，豬哥機仔才會得過。

● 有的時陣，「pong3」嘛會使講「hun3」，像講「路 pong3 與較大條咧」，參「路 hun3 與較大條咧」共款意思。

這個「hun3」，若 (naN2) 像是洪惟仁先生講的，本字是「鞋 hun3」的「hun3」，未記兮伊是講「楦」抑「楥」。不過，兩字攏著、計會用咧。

「楥」箸古早是用柴去車抑是削的，咧刺鞋仔用的模仔，台語講號做「楥頭、鞋楥」，老師兮 (lau7 sai1 e1) 計講「楥頭」較濟。

模仔是摕來咧揢鞋仔定型的用的，《說文通訓定聲》講：「楦頭，削木如履，置履中，使履成如式，平直不皺。」

刺皮鞋的時，做鞋面的皮仔裁好，會先繃與緊 (piN1 hoo7 an5) 釘箸楥頭兮，會記兮皮面 kan2 naNh8 (若親像) 愛一直抹水的款，這寡是「楥鞋」的穡頭。

鞋仔傷短，毋是 hiN3 sak4 著是分人 (pun1 lang3)，其他著無步啊。若傷 ueh8 的時，有的猶有救，會使摕去與人 pong3 與較闊咧。

「pong3 鞋」參「hun3 鞋」是無兩種無共款的代誌。「hun3 鞋」是咧刺新的鞋，「pong3 鞋」是咧修改鞋。

準後來「楥」有引申做「放大、擴大」義，安呢，洪教授講的著會通。若無，咱著 kan1 naN7 (只有) 會使當做伊是借字。

● 周長楫先生辭典 (周，2006) 內面的「台灣特有閩南詞語舉例」有收：

「【□】pong3，擴大 (空間)：客廳 ~ 對陽台出去。」

伊認為「pong3」只是用箸空間的放大。毋知影其實台語叫人 mai3 臭彈，嘛會使講做「雞 kui1 mai3 pong3 徦 hiah4 大粒。」

因此，伊所講的：

「【謗】pong3 ①〈廈泉〉肆意誇大；胡亂吹噓：伊 ~ 講伊有幾十萬銀 …… ② 誹謗：伊胛脊後共你亂 ~。∥《廣韻‧宕韻》補曠切，“謗，誹謗。”古漢語已用之。《論語‧子張》：“信而後諫，未信，則以為謗己也。”」(周，2006：469)

① 的「謗」，參台語意思共款。

② 的「謗」，參台語無 saN1 sang5，比如講：「我著無影 hiah4 gau5，毋通 (thang1) 揢我 pong3 徦安呢」、「這個先生的醫術普通普通，但是有人揢 pong3 徦未輸華佗再世咧」、「伊胛脊後共汝亂 pong5，講汝外才情、外顧家咧」。可能這寡話是「pong3」了有影較顑 (ham3)，但嘛毋講一定是咧「誹謗」。哈！減采彼個「伊」著是媒人婆仔亦無的確。

論真講起來，周先生「謗」字的①佮②兩義，嘛無講有真大的差別；毋是 in1 在地人，著區分無啥會出來。。

廈門話我毋別 (m7 pat4)，準若是台語，「謗」應該是借字才著。