老台語重注 --- taiN1

■ 詞條：

taiⁿ1

例，taiⁿ1 ＝ sian3 ＝ sai1 ＝ siau1 ＝ hong1 ＝ kuat4 ＝ phiat4 ＝ piak8
以上都是「以手掌打耳光」的動詞。
因為想起一個【taiⁿ1】的說法，就順便查了一下台日大辭典，沒想到竟然有這麼多個同義詞。
(2009,06,17 台湾語の広辞苑 - taiⁿ1 )

■ 重注：

● 頂頭的「phiat4」，我的記憶中若毋別 (pat4) 聽人講過；有簡單問過幾位年長的前輩，計攏無印象。
「piak8」有一個六十幾歲的台北人講伊細漢的時，猶有人咧講，但若毋是有人佫提起，伊嘛強強欲未記兮去啊 (bue11 ki11 e11 khi11 a11，哇！五字計講低平調)。

拍算攏是擬音字的衍伸，我了解的範圍，這兩句話詞差不多變做死語囉。

其他的「taiN1、sien3、sai1、siau1、hong1、kuat4」徦 (kah4) taN1 猶有人用，「taiN1、siau1、hong1」較罕咧人講，其他的全算日常用語。一般上 tsiap8 用的是「骲 (pa7)」，王先落鉤去無寫著 (tio3)。

箸台灣，「骲」，有人講「pa1」，講「pa1」的人無講「骲」；講「骲」的所在，無講「pa1」；這點毋知參廈門有仝 (kang5) 無。

● 這幾個語詞，大部分是「手擊」的意思，著是王先講的「以手掌打」—— 除了 taiN1 參 siau1；但無講的確是「以手掌打耳光」，換一句話講，用手拍別位，有的嘛會使用這來做動詞。

「taiN1」是「拍、揲 (tiap8，借字)、修理、tian7 ……」的意思，像「揢 (ka7) 汝 taiN1 落去、汝若毋聽話會 hong5 taiN1」，著未使講是「以手掌打耳光」。

siau1 是摕長長、幼幼無真大箍的物件拍，參「卹、勿 (sut4、but8) 」(案，這兩字根據林金鈔《閩南語探源》竹一，1980) 是同義詞。例，「giah8 siuh4 箠仔 siau1 尻川、摕掃梳笒 (sau3 sue1 giam2，笒，借字，據教育部《臺灣閩南語常用詞辭典》) siau1 骹後肚 (too2)」，嘛毋是「以手掌打耳光」。

在我所知，hong1 (揈) 以外的 sien3 (搧)、sai1 (揌，借字，據教育部《臺灣閩南語常用詞辭典》)、kuat4 (撅)、pa3 (骲)，共款毋是kan1 naN7會使解說做「『以手掌打耳光』的動詞」。比論講：

hiong5 hiong5 隈 (ui3) 手肚仁 ka1 搧落去。
佫講，頭殼 siau5 揌兩下仔與汝 (hoo7 li7) 咧。
這 thong7 牌仔 (尪仔標) 汝敢一擺著撅會開？
囡仔無乖，毋通 (thang1) 骲頭殼，拍了若毋拄好，減采會愈骲愈 tong3 gong7。

● 撅，居月切，見月入合三，中古漢語見紐台語讀 k-，像「規、矩、高、見」；月韻讀 -uat，像「越、發、曰、月」，見非濁母讀陰聲調。「撅」台語講 kuat4 有符合聲韻調的對應規律，無問題。

《集韻》：「撅 …… 一曰擊也」。
音、義計有合，kuat4 用「撅」字比用「抉」字較合適。

這字普通攏計用「抉」，「抉」字台語應該會使讀做 uih4 (有人讀 ueh4)，是「挖」的意思，像「抉空、抉目珠」，林金鈔先生有考證過。(林，1980)

參王順隆先生sio1 sang5，《臺灣閩南語常用詞辭典》講「抉」是「用手掌打人的臉」以外，辭典佫講「抉」是「塗抹、粉刷」；真濟人 (包括小川尚義、王育德)，計用這字。
其實，kuat4 塗、kuat4 灰、kuat4 粉 …… 的「kuat4」，拍算亦是寫做「撅」會較好。

《說文》：「从手有所把也」，《龍龕手鑑》等：「撥物也。」這寡意思應該比「抉目珠」的「抉」較倚意才著 (tsiah4 tioh8)。

● 台語共款講「kuat4」的動詞，除去用手的「撅」以外，猶有一字用骹 kuat4 的「蹶」字，亦是居月切；意思是用骹去蹳 (phuat4，足跋物)，「蹶倒」著是用骹去「kuai7、掃、lap4、蹋 ……」與人跋倒。

箸古冊上，「蹶」有類似的用例，像：《漢書‧揚雄傳第五十上》：「拕蒼豨，跋犀犛，蹶浮麋。」顏師古注：「蹶，蹴也。」蹴，蹋也。

● 順續對建輝先箸台湾語の広辞苑 - taiⁿ1的留言做一屑仔回應，伊講：「阮chia，佫有讲 pau5，pa1。」

1. 毋知「in1 hia5」算廈門、漳州的 to2位，抑是整個閩南地區？
2.「pa1」箸台灣的偏漳腔地區，比如講竹南、後龍 (au7 lang5) 等，亦有人安呢講；據教育部《臺灣閩南語常用詞辭典》著用 pa1，寫做「【包攴】」。
3.「pau5」毋別 (m7 pat4) 聽人講過，毋知調號「5」是陽平抑是陰去？《臺日大辭典》有一個 pau7 (陽去)，若像亦無人咧用啊的款。

林先若有看著，才麻煩汝鬥補充一下，loo2 lat8。

補充：
這篇發表了後，我照王先講的：「你可以針對此文寫一篇屬於自己的blog/想法,並給作者一個通告」，箸伊的 blog 做留言：

我有一點仔無共款的看法，寫囥箸我的 blog 頂仔，主要的是：
1.taiN1、siau1 毋是「以手掌打耳光」的動詞。參 sien3、hong1 等的意思亦無共款。
2.sien3、sai1、siau1、kuat4 亦無的確是 「以手掌打耳光」的動詞。
……

王先的回覆：
……
每一個動詞的「守備範圍」無一定攏相同，有的較窄，有的較闊，這是真四常的事誌。
就算是同義詞，也有可能各有小寡的nuance，在辭典裡為着簡潔，一般攏沒說明到真清楚。
根據我查台日大辭典的結果，我本意只是講以上所有的詞攏有「以手掌拍擊臉頰」的意思，其他另外的用法我即無說明。
……

王先的回覆，我共款有無仝的意見，因為無涉及伊本文的內容，我著箸這個家己的 blog 簡單補充一下，毋免佫 ka1「通告」。

先仿王先的發文，我亦寫一篇：
poo7 (哺) ＝thun1 (吞) ＝lim1 (啉) ＝tsip4 (【口集】) ＝kuan3 (灌) ＝ thui1 (推) ＝mauh4 (mauh4 喙的 mauh4) ＝suh4 (欶)
以上都是「從嘴巴放東西送到肚子」的動詞。

這毋是爭差的程度大抑細的問題，無仝 (kang5) 著是無仝，重點箸「＝」佮「≠」。。

狗似玃，玃似母猴，母猴似人，人之與狗則遠矣。

佫 kah4按怎講，王先生咧研究母語，嘛算是プロ級的，所講、所寫的，減采會去影響著別人。著毋是一般的網路聊天，這囉物件敢會使怙 (koo7) 準兮？
(2009.06.20補)