老台語重注 --- 斣

■ 詞條：

tau2 ＝ 換、替換、量詞
tau2 的漢字，寫做「斣」。


■ 重注：

● 林金鈔先生講，「tau2 支票」是台灣的特有詞，閩南話無用這句。台語參今仔閩南語是同一個語系，有一寡台灣 ia2 咧用的語詞，今仔閩南語無人咧講啊；但，這並毋是代表古早的閩南地區著無這句話，亦真有可能是久無人講，才去與失落去。 ( 過熨斗 )

林先講的台灣特有詞應該是「tau2 支票」，毋是「tau2」、「tau2 換」；伊箸《閩南語研究》頂頭寫講：
斣 (tau3)：廣韵「斣，相易物俱等也。都豆切」。閩南人稱以支票去兌換相等的現金，叫做「斣支票」；交換叫做「斣換」。都保存了古義。

林金鈔先生這段話，我有兩個補充：

(1.)「斣支票」亦講「斣現金」，支票的面額一定比換著的現金較濟，毋是「相等的」，因為支票的面額有含利息。

(2.)都豆切是陰去聲，台語是講做上聲 tau2，「斣支票」的實際音值，一般計講「tau24 支票」，有小部分偏漳、廈口音的，無受當時時勢音的影響，照 in1 的腔口講「tau44 支票」。

小川尚義《臺日大辭典》亦做上聲，寫做「倒」。
連雅堂《台灣語典‧卷一》：「斗，互換也。以物交物曰斗。」

《廣韻》解說做「相易物俱等」是承自《說文》，箸古冊內面，我猶無揣著用例，若照讀音看起來，《玉篇》是丁豆切，應該會使講上早箸六朝的時陣參台語的今音較倚。
雖然計去聲，但按《說文》的「蜀聲」kau3 六朝的丁豆切，毋管是音變抑是訛讀，這表示「斣」字的讀法，毋是從古至今攏一成不變。另外，林先標去聲，可能是照反切去推的。伊亦有講計閩南語的讀法，無一定會照中古漢語音切的聲調，比如：紀、警、己 ……。
我認為「斣」台語讀 tau2 無問題，

斣，現仔時，人印象較深的的，都若 (naN7)「斣支票、斣現金」若爾 (naN7 niaN7)。
不過，這幾工仔上王順隆先生的 blog，箸伊 禮服風波 這篇記事的音頻，我發見「斣換」這句話，是箸曲盤發行彼當時的台灣話常用語，並毋是書面資料。
詳細的情形，等若王先賜告了後，我才補充。

短短十五分鐘的爆笑劇，我聽著的，著有三句對話 (口白) 提 kau3「斣換」：

(1.)金太太：「用金蟬脫殼的這個步數，揢 (ka7) 我斣換過來」。伊「斣換」講做「tau42 uaN33」，讀去聲，應該是訛讀，或者無變調。因為伊佫有一句，著改講做「tau24 uaN33」。

(2.)金主任：「我是咧揢汝斣換啥麼貨？」「斣換」讀「tau24 uaN33」。

(3.)金太太：「汝若毋揢我斣換 ……。」這回「斣換」著講「tau24 uaN33」囉。

● 牌仔，毋管四色牌、ang1 仔標 (讀 phiau1，毋是 piau1)、トランプ (日語 trump 會使用做 a pack of cards，台語一般講做トランプ，亦有人號做「phe42 sih4 牌仔」、「けちばん」有人講是「けいじばん；啟示番、揭示番、掲示板」，這我猶未去查咧) 等，kiau2 官揢牌仔插好 (tshap4 ho2) 了後，tshai7 做 kui1 thong7，其他的人有權利佫揢斣過，號做「斣牌、斣牌仔」，一般是按 kui1 thong7 牌仔的中間，對頂頭摕半 thong7 囥踮下底，阿本來的下半 thong7 換起來做頂頭。
另外一種方式，著是對中央凊采抽一寡出來，欲囥 tua3 頂頭 thong7、抑是上下底，共款是與「斣」的人主意。
這有兩個目的，一個是斣牌的人相信斣過了後，換一個手氣 (tshiu2 khi3) 分 (pun1) 著的較好手；另外一個著是，預防 kiau2 官插牌的時陣「偷 tsham3 關」 (案，「tsham3」是濫著、thau3，例，tsham3 色、大人 tsham3 囡仔；「關」是機關；「偷 tsham3 關」著是to practice fraud、偷做牌) 。

「斣牌」敿「插牌」無共款，另閒才寫一篇較詳細咧。

● 台語用動詞做量詞的例真濟，比如：

一 haiNh4 tsiah4大 hiaNh4。
一 mi1 / me1 tsiah4 大 mi1 / me1。
一捧 (phong2) tsiah4 大捧。
kauh4 兩 kauh4 韌餅 (lun7 piaN2)。
加 ngueh4 幾 ngueh4 啊。

「斣」亦會使做量詞，一擺、一遍、一回的意思。例：
佫 sng2 兩斣仔。
最後一斣。
後斣換汝做官 (莊)

《臺日大辭典》做「倒」，音同義無合 (hah8)。

■ 附記：

若有時間，會使 tau5 tau5 仔聽，禮服風波 的演員歐雲龍 (新竹人，飾總經理)、金塗 (三重埔人，飾金主任)，in1 兩個計有保留偏泉、同口音，但亦計有濫著漳廈腔，像，歐：「意思」i3 sir3 → i3 su3；金：「契兄」khue3 hiaN1 → khe3 hiaN。上聲、陽平的變調參今仔的時勢音無共款；汝、女、去 ……，-ir、-u、-i 混用等等。

歐雲龍較愛用「書面語言」，比如「雞卵糕」講對「蛋糕」去，伊別塊 (pat4 te3) 曲盤亦有類似的現象。

王禎和問講：「目前有沒有演員能講像你所說的那樣典雅、富麗，屬於上層社會的閩南語？」
辛奇應伊：「歐雲龍勉強可以。可惜他已經死了。」
這點我無同意，雖然我承認亦阿老 (o1 lo2) 過歐雲龍是「鬼才」，不過，伊的口白計是一般人日常咧用的通俗語詞，「書面語言」是受台灣國語的影響，一半擺仔會加減仔捸箠 (thut4 tshe5)，毋是上層社會的閩南語啦。
我 hiah4 niN1 有把握，是因為我聽過伊的曲盤無數塊，亦拄 pat4 箸 in1 hiah5 做過長期的接續參紀錄，當然，毋是專業、亦毋是專程的。

個人的感覺，聽這寡老沿咧講台語，確實有影是咧享受。

補充：
我請教王先兩個問題：
1.曲盤敢有詳細的發行資料？比論講，曲盤名敢著是號做「禮服風波 」、日期(年份)、公司 ......

2.我若會記的款 (今仔日MP3 tshih8 無聲)，內面 kin24 too42 sang11 講 ka7 in1 boo2 小包的物件「tau24 uaN33 過」，連續講兩擺在汝所了解的，這句話徦 taN1 汝敢猶 pat4 聽人用？

關於曲盤的資料，王先的回覆是：
這張唱片是盛鎰唱片民國58年發行。

第二個問題，顯然王先亦參阮逐個共款，對「斣換」的了解，是對書頂的記載來的。
(2009.05.28補)