當時

我了解的範圍，一般來講，台語的「當時」基本上有三種唸法，意思略仔無sang5。

A1. tong1 si5，［1］彼個時陣。例：

雖罔，當時屏東平洋的主人是平埔族，毋拘，Tamsuy這个名聽起來，假若是遵照少數民族（漢人）所講的福佬話──「淡水」這个詞的音直接翻譯過來的。(cit_lui_hoe「下淡水往事追憶（1）」)

「利隆」的數櫃先兮姓陳，聽講當時差不多是五十外歲人。(「無寫四」)

A2. tong1 si5，［2］應時、當令、當(tng1)著時。例：

嶺頂春風吹微微，滿山花開正當時。(吳晉淮「關仔嶺之戀」，吳晉淮先生「正當時」唱「tsing3 tong1 si5」，「tsing3」是文讀音，無發「tseng3」)

阮就是理髮小姐，青春正當時。(文夏「理髮小姐」，文夏先生「正當時」唱「tsiaN3 tong1 si5」，「tsiaN3」是話音)

B1. tang1 si5，［1］何時。例：

汝若問阮當時欲嫁，阮會講愛阮的人一直身邊陪。(江蕙「當時欲嫁」)

李登輝問黃昆輝講：「gio5兮，汝當時欲娶孫新婦？」(「老台語重注 --- gio5 兮」)

B2. tang1 si5，［2］，敿讀「tong1 si5」共款是「彼個時陣」的意思。例：

彼當時伊提議欲分離，因何我會無來佮阻止。(洪一峰「悲情的城市」)

想起當時，想起當時，想起彼當時。山崙櫻花趁春天，開徦滿滿是。(洪一峰「想起彼當時」)

C1. tng1 si5，［1］著是A1. 唸做話音，共款是「彼個時陣」的意思。

C2. tng1 si5，［2］著是A2. 唸做話音，共款是「應時、當令、當(tng1)著時」的意思。例：

山地姑娘嬌滴滴，青青青春正當時。(紀露霞「山地姑娘當青春」，紀露霞小姐「正當時」唱「tsiaN3 tng1 si5」)

隈(ui3)「當時」衍伸 *出來的語詞著不只仔濟，讀法嘛是敿頂頭講的共款，有一個連讀合音是例外。

D. 臨當時(liam5 tong1 si5)，突然間。例：

飛機佇半天頂飛啊飛，飛到一半，臨當時(liâm-tong-sî)拄著危險，機頂的廣播叫逐个講著跳傘。(林建輝「曹操坐飛機」)

聽林 *先音頻的當時，我有做簡單的筆記，只是過足久啊，阿臨當臨時無te3去hiau1。(「林氏閩南語」)

E. 箸當時(ti7 tang1 si5)，［1］箸彼個時陣，一般寫做「佇當時」。［2］何時，嘛會使講「箸時」;一般寫做「底當時、箸時」。這個語詞偏泉腔有人講「tir¹¹ tang³³ si²⁴、ti¹¹ si²⁴」。

F. 箸當時(tiang1 si5)，「箸當」唸合音變「tiang1」，咸E.［2］共款，著是「何時」的意思。例：

緊決定，看tiang1 si5啦！

G. 當當時(tng1 tang1 si5)，箸彼個時陣。例：

1933年下條九馬一對新加坡引進台灣，價數一粒日票一圓(當當時中層的公務人員月俸才三十圓)，欲飼的民眾就愛提出申請，申請通過才照分配的……(cit_lui_hoe「露螺Lōo-lê」)

像“sat-bûn / sap-bûn”、“蓮霧”、su-kah……計攏是當當時(tng-tang-sî)閩、台、番爿的共詞。(林建輝2009年5月2日下午8:02的留言)

H. 有當時(u7 tang1 si5)，佮「有時、有陣、有當陣、有時陣」共款，「有時候(華語)、sometimes」的意思。這幾個語詞後壁攏會使加「仔」，在人的習慣，比論講「有當時(仔) / 有時(仔) / 有陣(仔) / 有當陣(仔) / 有時陣(仔)好天，有當時(仔) / 有時(仔) / 有陣(仔) / 有當陣(仔) / 有時陣(仔)落雨」攏會通。例：

先踮高雄撈撈也，找「小學仝班的阿立仔」出來請我食好料的，正閣去籬仔內崗山仔共恆春兮借中古車，騎咧四界tho2，有當時仔嘛共新堀江的阿傑仔約出來散步。(cit_lui_hoe「高雄。面會。」)

日語漢語譯音是有系統的，有字母記載，規組猶好好攏無歹 -去。而且無像漢語方音會受著周邊語言的影響，有當時仔佫分做幾囉種語音層次。(「講 ka1 lo2 (7)」)

以上「當時」的相關解說，攏計敿時間有關係。另外ia2有一個特殊的用法，參時間無關。

I. 當時(tang1 si5)、箸當時(ti7 tang1 si5)，會使做「原來是……」使用，同(tang5)H. 共款，這兩個語詞後面欲加「仔」嘛可以。例：

欲死啊，當時著是汝 *喔，害恁爸驚一趒。

欲死啊，當時仔著是汝 *喔，害恁爸驚一趒。

欲死啊，箸當時著是汝 *喔，害恁爸驚一趒。

欲死啊，箸當時仔著是汝 *喔，害恁爸驚一趒。

tshim2看著「台灣音樂文化國際交流協會」這個名，我搦做是公家單位 *咧，當時仔著是五佰怹辦兮的民間團體。

昨暗去世貿hia5揣人，車that4 gah8，當時仔著是橋幸夫さん的演唱會。

上尾仔做「原來是……」解說這兮(tsit4 e1)，若(naN2)像真少人咧講啊，寫出來逐個罔議量。若有無褿勻、失覺察的所在，請賜教。

「電視名嘴」會使天馬行空

前幾工仔聽人講黃品源有一齣電視劇箸新竹拍 *兮，我上網看兩集，劇中有一tsua7暗街仔(拍片的所在箸關帝廟hia5，是以前新竹的風化區之一，新竹真少講「暗街仔」，hia5號做「tiong1巷」)，內底有一間林美照佮張本渝咧huaN7兮的kha1 sau1間仔，叫做「烏美人」，參台北的一間娛樂場所同名。頂日仔我趁khang1 ke3縫(phang7)走去圓環hia5罔趖(so5)，看彼間「黑美人(台語講「oo1 bi2 lin5」，箸台北南京西路、延平北路口，頭先號做「萬里紅」，參「望花台──路尾改美人座、東雲閣、五月花、杏花閣、白玉樓」等計是豪華型的大酒家，毋是查某間。聽講古早怹的級數，比舞廳懸真濟，ROROサン怹阿舅講以前箸排頭名的新加坡舞廳，兩千四著跳規暗，會使tshua7出場飵宵夜；但是若三個人去酒家，乾若桌面咸チップ一暗開 *三幾萬仔走未去，無包出場。「東雲閣、黑美人」等的小姐，有未少是新加坡佮夜巴黎等舞廳當紅的小姐轉行兮，he1查某囡仔逐個嘛仁仁仁)」ia2有箸 *兮無(今仔外口撘棚仔，kham3徦bat8 tsiuh4 tsiuh4，毋知咧創啥)。

佫行 *一久仔斡對市仔，咧買雞卷的時，拄著兩個以前的囡仔伴，招講欲去大橋頭兮㾪啉，sin7 sua3好好仔kiet4(有人講本字是「喫」，著是「thui1」，盡情的飵；近義詞有「sah4、piah4、sut4、hut4」) *一下，我講先來去(來去，連音讀lai²⁴)阿婆仔hia5買兩包包仔。按民樂街出 *來的時，看著一te3看板(カンバン)，紅底白字，是汕頭人開兮的老店。

有人講以早汕頭幫箸這tsia5的藥材界嘛有過榮景，大賣、小賣上無嘛有十外kham2。彼當陣仔tsia5的汕頭人真濟是對香港來兮，比如信通、萬隆的頭家，倩的薪禾嘛差不多計是kang5故鄉兮，箸hia5出入的潮汕人足濟。

我著問其中一個怹兜以前嘛是做藥材兮的囡仔伴，看伊敢知影今仔箸電視當ヒット的「名嘴、專家」翁燦燿先生，翁 *先家己講伊是潮州人，pat4蹛大粙埕，佫是做漢藥 *兮。阮朋友講完全無印象，可能年歲差傷濟，阿大粙埕範圍hah4闊，別未透。不過，伊講翁 *先的口音無sing5大粙埕的人，這點我略仔同感。

翁 *先的口音較倚水轉骹(水返腳)、坪林、三峽彼tah4的偏泉腔，比論伊「銀紙、附近」講「girn5紙、附kirn7」。但是伊-n尾有時仔會拂對-ng去，比論「咱」伊攏講「lang2」，這是潮汕話的特色之一。另外箸邊仔號做寶珠兮(往過阮定定愛走相搦，這箍細漢螺絲骹螺絲骹，有一遍佫跋倒，頭額摃一lui5，腫徦未輸金珠仔hiah4大圈，阮著揢號做這個外號。注，「圈」讀「khien1」)講伊國中的同學有人講「girn5、kirn7」，拍鐵仔街hia5的人；我想一下斟酌，佫乾若有印象的款。he1較早(khah4 tsa2，有人講「khat4 tsa2」，「以前、進前」的意思)箸細姬仔街(sue3 i5 a2 kue1)嘛一半擺仔pat4聽人講過這種口音；不過，這兩個所在攏無算大粙埕，雖然計離大粙埕誠近，著箸邊仔若爾。

翁 *先咧講文史民俗攏會引經據典，有古早箸漢藥店內底咧泡茶答喙鼓彼寡老先兮的遺風。一位長輩有這款經歷，便若有翁 *先的齣頭，傷暗、無閒著maiN3講，大部分會隈頭看徦煞。伊講翁 *先定定有「hoo2！……(後壁會使接「誠嫷、誠勥(khiang3)、誠無采」)」，這個嘆詞的「hoo2」與伊真數念。長輩講以前箸藥店咧開講、講笑談(kong2 tshiau3 tam5)的人，講 *過準煞，免對怹的話負責；講煞尻穿拌拌 *咧，喝行著行，連茶甌、薰khok4仔嘛免鬥收鬥摒(piaN3)。怹無通告費，盤喙錦、相釘鼓(sio1 ting3 koo2)、拍鬧涼(phah4 la7 liang5)的齣頭定定有，冤家是未啦，諍徦頷䫀筋浮la3 sa3卻是真四常。這款情形箸邊阿咧聽話鬚兮的使仔(sai2 a2)上愛，因為kau3尾 *仔往往攏會出現仲裁者，阿這個下結論的人，若是怹平常時攏扂扂咧聽、無啥愛發表意見、有經驗佫有學問的頭家，這寡師仔佫較歡喜，行路著有風，感覺真煬氣(iang5 khi3，會使孤用一字「煬」，有人講「iang7」；箸tsia5是「臭屁、屎桶、屎潑、hia1 pai2、風神、真癀、臭偁、𡳞muaN7」的意思；「偁」讀tshing3，「𡳞muaN7」是多義詞)。

長輩講今仔的人對「名嘴」的態度，普通計是敢問但是毋敢發表無sang5的意見，可能是尊重，可能是毋別、嘛可能是無自信。像翁 *先講咱tsia5清明抑三月節，去墓兮「kua3紙」，欲若箸古早，邊仔的人一定隨時(「馬上」的意思)揢唱(tshiang3)「逐個計嘛講kui3(墓)紙、teh4(墓)紙」。我應(in3)講這無啥要緊啦，觀眾聽聽 *咧著煞，未去記hah4濟、計較hah4濟；阿今仔計怙火葬，燒燒 *咧囥tiam3塔 *兮，挂紙的例早慢會改無 *去；何況人上(tsiuN7)兮嘛毋是母語教學的節目，哪著hah4呢講究啦。我這位長輩真開通，綴時代會著，伊承認有「代溝」這項事實，當然嘛同意我的講法。

有的「名嘴、專家」講了傷hiong5，有當時仔難免會較離經淡薄 *啊，嘛pat4有人當面著去與人糾正。應該是鄭弘儀佮于美人主持的節目，一位「名嘴美女」講洪一峰箸歌仔冊頂頭畫插圖，是受怹老爸的影響耳濡目染，曲盤達人李坤城當場著揢講洪一峰是遺腹子；若李 *先這個講法是著 *兮，雖然伊嘛pat4捸箠 *過。比論有一擺，咧講愛國獎券的時，伊用馬沙「招汝做舞伴」：「相招、招著汝、招汝佮我做舞伴」的曲(馬沙唱介濟歌，今仔人較知兮有一條號做「流星之夜」。佫一首頭葩是「小姐請來電頭鬃，阮有幼秀的手工，看汝欲選佗一項，包汝達成恁願望」，歌名毋知。「禮拜日的遠足」，曲是用三橋美智也的「岩手の和尚さん」，王瑞霞有翻唱，歌名小可仔無kang5。「求愛的條件」，歌詞大概是「汝若有希望愛一個，會對汝純情的女性。頭一步態度愛正經……」，用和田弘的「お百度こいさん」填的詞。以上是ROROサン怹阿舅提供的資料，感謝)唱「著著，著著著，著著著著二十萬」，這著有問題(ROROサン怹阿舅講聽過以前海野武沙敿大箍玲玲灌的曲盤，內底有這條，伊印象真深，旋律徦taN1猷haiN1會完整。伊是唱「著，著，著著、著著，著著二十萬。二十萬箍若著，變成好額人」，是另外一條歌。海野武沙著是李讚聲，敿林英美有合唱過「有汝著有我」，YouTube有te3揣)。

講khiai9嘛無啥eh4(讀連音「siaNh4」)，電視頂仔的「名嘴、專家」愛博古通今，隈觀落陰徦好奇號、隈伏羲八卦徦福島核災、隈縛骹徦波灣戰爭、隈去日本開查某徦證所稅、隈楊日松徦原油起價、隈星戰計畫徦西太后、隈臭頭洪武徦股票行情、隈預測總統大選結果徦金字塔、隈唐三彩徦林益世的一刀斃命、隈史艷文徦塑化劑、隈親子關係徦海豹部隊、偎油電雙漲的民怨徦薄谷開來的中國法制……怹攏愛知攏愛別，天文地理、民俗風情……任考不倒，腦神經的「負擔」嘛不只仔大。盛名累人，著若(naN2)「史上最牛的歷史老師」袁騰飛先生共款，「名嘴」亦毋是怹家己封兮，只要maiN3人身攻擊、影射毀謗；喙是人e5，嘛無強迫咱聽，講啥計都OK。著算講連「吹狗螺、牽狗螺」都毋別，講是「牽狗聲」(八月初三的中天新聞台，著是箸「學生尻穿先生喙」講的彼個節目，我毋知彼位專家準若hiong5 hiong5未記得這句語詞欲怎講，哪毋規氣用國語著好)，亦無損「名嘴、專家」的權威佮風采；著是風聲pong2影、加味添素，嘛未要緊，kun1 luh8亦毋是先生咧教冊(教冊的先生無這囉特權)，揢當做心適代、咧娛樂咱大家，若中意咱著揢拍噗(phok4)仔，若認為怹咧死tsuaN3，聽聽笑笑 *咧著好，無啥mah4大不了。