台語的「kau2 kue3」，是指身軀頂的垃圾 (lah4 sap4，無清氣)、積垢，這是偏泉腔，偏漳腔講「kau2 ke3」；《台日大辭典》、教育部網路辭典計無收，阿事實上嘛是強欲變做死語，無啥人咧用矣。《台日大辭典》有一條類似的語詞「kau2 kueh4 sien1 / san1」，寫做「垢潔鏥」，《廈門音新字典》標做「káu-koeh-sian」，漢字亦是用「垢潔鏥」。
「鏥」著是「銹、鏽」，這三字同音、同義、異體，攏是指「鐵sien1 / san1」；若照字書的音切，「鏥、銹、鏽」所屬的「尤」韻是陰聲韻，而且佫是去聲，咱斷無唸做去聲佫是鼻音韻尾「sien1 / san1」的道理。這字一般寫做「鉎」，「鉎」是「鐵衣」，著是「鐵鏽」，字義有合，亦會使唸「san1」，讀「sien1」著較免強。因為這字字書「所庚、師庚、所京、桑經」的音切，分屬「庚、青」兩韻。個人的了解，「庚」韻的字台語無唸「-ien、-an」；「青」韻是有唸「-an」的字，像「零星 (lan5 san1)」，但是亦無讀「-ien」的他例。阿「庚」韻上古音屬「耕」部，「耕」部咱嘛無發「-ien、-an」的字例。可能是這個原因，所以台灣早時的字書著綴謝秀嵐用「鏥」。我欲講的是用這款代用字訓讀，若去揣字書可能ia2捎有總
(tsang2)；有人用怙「【身生】、【月山】」這種合體字，字書無記載，咱普通人著較歹理解。林金鈔先生的考求，認為「鉎」是本字，不過伊這字的音韻對應並無廈門話佮漳洲話，乾若用晉江、永春參潮州，著是無廈門，表示伊嘛有考慮這字未使唸「sien1」。事實上咱有「-an、-ien」兩讀的字，中古漢語著若爾 (合音，唸liaN11)「山」攝的「元、山、先」三個韻組的轄字；但亦毋是次方言語音的異讀，而是文、白的分別，比論「言 (gien5、gan5)、限
(hien7、han7)、牽
(tshien1、khan1)」；「庚、青」兩韻屬「梗」攝，「梗」攝咱無「-an、-ien」兩讀的字例。
「垢潔鏥」，小川氏怹頭字用「垢」，「垢」是「塵垢、濁也」，話音亦攏唸「kau2」(案，文讀是「kio2 / koo2」)，未有爭議。「潔」是清氣，「垢潔」減采是揢 (ka7)「垢」做動詞，「拍腌臢
(am1 tsam1)」的意思。「潔」中古漢語「古屑切」，「屑」韻字「節、血」偏泉、漳的話音分別唸「tsueh4、hueh4」，拄好有發「-ueh」；「kau2 kueh4 sien1 / san1」敿「kau2
kue3 sien3 / san1」的實際音值攏共款，計著是「kau44 kue(h)42
sien44 (偏漳廈)」、「kau24
kue(h)42 san44 (偏泉同)」。
當然，嘛會使做倒反 (to3 ping2 / paiN2) 的理解：「節」偏漳腔唸「tseh4」、「血」偏泉腔唸「huih4」，攏嘛無發「-ueh」。若安呢，看 *起來「kau2
kue3 / ke3」亦有可能著是「垢潔」，爭差讀了去與走音 *去。若無，著是「kau2 kue3 / ke3」這個語詞是個別特殊的講法，甚至是家己記了毋著抑是家己發明兮，台語根本無這句話。
其實不然，「kau2 kue3」這句話是從早 (tsng5 tsa2) 著有兮。阮認為「kau2 kue3、kau2
kueh4」意思雖然共款，但是寫法無sang5，阿「垢潔」的「潔」是借字。
「kau2 kue3 / ke3」不但箸往擺著是咱的日常用語，在閩南嘛有這個詞彙。黃典誠、周長楫兩位先生編寫的《普通話閩南方言詞典》(1982)、周長楫的《廈門方言詞典》計有收「kau2 kue3」，寫做「垢膾」，周教授的解說是「積在人體或其他物體上的髒東西；污垢」。只不過誠奇怪，《廈門方言詞典》出書著無十年
(案，我看
*著兮是1988第二版2002二刷)，伊佫再主編的《閩南方言大詞典》(2006) 著無這條矣，改做「kau2
kueh4」：
【垢圿】〈廈〉kau3-1
kueh7 〈泉〉kau3-2
kueh7 人體或物體上的髒東西；污垢║《集韻‧黠韻》訖黠切：「圿，垢也。」古漢語已用之。《山海經‧西山經》：「錢來之山，其上多松， 其下多洗石。」郭璞云：「澡洗可以磢體去垢圿。」郝懿行云：「《說文》云，磋垢瓦石。」(案，辭典「郝懿行云 ……」這段，是咧解釋「磢」*字，參閩南方言對「垢圿」的釋義無關。磢，《說文》做「㼽」)
我講「誠奇怪」是因為「kau2
kue3」這個語詞，箸廈門應該a2有人咧用，毋是死語。林寶卿先生的《普通話閩南方言常用詞典》(2007) 著ia2有收，伊標「gǎoguè」、寫做「垢圿」。「gǎoguè」換做TLPA著是「kau2
kue3」，顯然廈門這句話詞並未完全失落，只是寫做「垢膾、垢圿」、用字無同的爭差。
論真講 *起來，「膾、圿」攏算是借字，前者音有合，字義無對；後者字義是著，但是是入聲字，毋是唸做「kue3 / ke3」。我合理的推測，周氏編《閩南方言大詞典》，咧寫「台灣閩南方言概述」的時，摕董忠司先生的《台灣閩南語辭典》做參考資料，認為張光宇教授的序文內底，寫講「『垢膾』一詞，『膾』字疑誤，應作《廣韻》古黠切的『圿』字」有道理；嘛無定著有佫再參考《台日大辭典》抑《廈門音新字典》，內面計有「kau2 kueh4」、無「kau2 kue3」，著揢換掉。
另外，偏泉腔「屑」韻的「節、血、鍥」計發「-ueh」，「垢潔 (圿) 鏥」唸「kau3 kueh4 san1」較合傳統，小川氏怹是標「kau3 kueh4 sien1」，這是偏廈腔的特色。
張光宇先生箸《台灣閩南語詞典》寫序的時，嘛對用「膾」*字存疑，講愛用「圿」才著。不而過個人認為伊這段論述，包括用「圿」*字，嘛有討論的空間。伊講：
垢圿 閩南話說「身體上的污物」爲「垢圿」kau
kue〜ke。「垢圿」意同「髒鬼」。《普通話閩南方言詞典》「垢」字下列有「垢膾」一詞 (案，《普通話閩南方言詞典》並無「~ke」，這是張氏家己加兮)，「膾」字疑誤，應作《廣韻》古黠切的「圿」字。河南南陽方言有如下詞例。
泥垢圿
衣服上有層厚泥。
飯垢圿
衣服上有飯黏著。
垢圿臉
小孩子不洗臉，髒臉。
這種類同現象，不知是否出於偶合？從歷史淵源連繫，這種偶合並不感到意外。
第一、台語「垢圿」指「身軀頂、衫褲的污垢」，是垃圾、污穢的物件，毋是「髒鬼」。「髒鬼」是詈詞，是咧罵人無清氣、thai2
ko1。這著像「垃圾」毋是「垃圾鬼」、「腌臢 (a1 tsa1)」佮「腌臢鬼」是兩種物事。
第二、無論「《集韻‧黠韻》訖黠切」、或「《廣韻》古黠切」的「圿」，計是入聲。固然「膾」毋是適當的用字，毋佫寫做「圿」嘛無加外理想抑較高明。張 *先的「疑誤」是著兮，「應作」卻有淡薄仔重𧸖 (thing7 taN5)。
第三、哪會憑一個河南的南陽方言的語詞著會使做「歷史淵源」的佐證？到底這款「無意外的偶合」，有外濟說服力？毋知。
「垢圿」，並毋是台語抑閩南方言的特有語詞。根據書面資料佮網友訊息，箸漢語方言內底，毋laN7河南中原官話鄭曹片的南陽話，猶有真濟其他的漢語方言，共款有做「人身上的污垢」解說的「垢圿」這個語詞。欲談「歷史淵源」的連繫，若會使用安呢處理，我嘛來提供一滴仔材料。箸《方言‧1980第一期》熊正輝先生《南昌方言裏的難字》內底，除了講「垢圿」之外，也有一寡參咱有「偶合」的語詞，比論：
一滴子﹝it50 tiak50 tsɿ00﹞(案，我調值標「00」兮，代表輕聲)，一滴，滴子：相當於普通話的「一點兒」。
khu24
蹲：……【跍】《廣韻》平聲模韻苦胡切：「〜，〜 蹲貌。」(溪母讀如群母)
phak50
分開：〜 開腳 ……【擘】《廣韻》入聲麥韻博厄切：「〜，分 〜。」
這三個南昌話參閩南話的語詞計共款。
山東話嘛有用「跍」，有的文獻甚至當做「特殊詞彙」(案，艾紅娟《山東長山方言研究》「特殊詞彙」：「咕得ku214-3tei‧：蹲」；箸「詞彙表」用「跍【足㝵】」)，長山話平聲無分陰陽；濟南話、萊州話亦講「跍蹲」，「跍」攏是唸﹝ku1﹞、陰平調、無送氣，敿咱無同。
南昌話「跍」卻是「溪母讀如群母」唸「khu5」，準若這字著是本字，台語嘛是陰聲調變陽聲調、「讀如群母」，kan2會才拄好？設使有時間，佫再較斟酌看 *幾擺仔、ah8是摕熊
*先生的《南昌方言詞典》khiai42反
(ping2)，菜齣應該會加真 tshe1 tshau1、佫較豐沛 (phong1 phai3)。這囉現象，當然嘛會使講與閩南先民有兮亦路過南昌去坐數 (tse7 siau3) (案，南昌並無包含張光宇先生講的閩南「口語已融合三種方言成分，即中原東部、中原西部和太湖流域的方言成分」在內的任何一個成分)。
照張
*先生的標準，假使有人提出一兩個仔甘肅、雲南、廣州，抑是日本、朝鮮等，敿咱「偶合」的語料，阿西晉末閩南先民的南遷敢亦有經過彼寡所在？或者講著是直接隈 (ui3) hia5來兮？若安呢，人未感覺「意外」，才是意外。
親像台語的「籠床 (lang5 sng5。日語講「せいろう」寫做「蒸籠」)」，山西平遙講﹝luŋ13 suə13﹞，攏寫做「籠床」；平遙話箸tsia5的「床」是讀話音，「床單」是新事物，著用文讀﹝tshuɑŋ13﹞，佮台語的文白讀﹝sŋ24、tshɔŋ24
(案，如『東床快婿』；另外話音ia2有『tshng5』一讀，如『眠床、床母』)﹞，聲母對徦ba242 ba11 ba33。平遙話有影有一部分，參泉音誠倚，比如怹中古漢語「豪 (皓號)」韻的字發「-oo」，例，「刀﹝tɔ﹞、勞﹝lɔ﹞、桃﹝thɔ﹞、倒﹝tɔ﹞、草﹝tshɔ﹞(案，台北老市區、新竹、鹿港等較有歲的在地人，ia2真濟有保留「-oo」的讀法。晉江、安溪、永春、德化的城關亦相同；南安上晏箸20年前著有濫 *著，怹有的發「-oo」，像「勞﹝lɔ5﹞」，有的發「-o」，像「刀﹝to1﹞」)」，敢會使講著是閩南先民是對 (tui3) 山西來兮、抑是講怹咧逃難的時有路過山西的證據
(案，對山西來兮，這有可能，箸以後討論「古全濁」的時才來講，關於「古全濁」這部分，阮會攏攫做夥，囥蹛《「按「投」的字音講起」》。「攫」唸「khioh4」，从上挹也、從上擇取物也)？其實用「籠床」兮嘛不只平遙，太原亦是，講做「lung11 tshuɒN11」；忻州 (山西)、積溪
(安徽)、萍鄉 (江西)
……
等攏嘛用「籠床」。
箸河北，有的所在亦佮咱共款，第二人稱代名詞用「汝」、嘛有第三人稱代名詞用「伊」的方言，曷知是「偶合」*無。
「腯 …… 這字是台語『肥 thut4 thut4』的『thut4』」(參閱：「讀《台語常用詞正音》7 - 突破」)，廣州話形容人大箍，嘛講「肥腯腯」，「腯」唸做上陰入調﹝tɐt50﹞。小川尚義講這字咱嘛讀「tun2 (武腯)、thun2
(肥腯)」，廣州音講「肥腯」的時，著用異讀﹝thœn﹞；敢有人因為安呢，著講當時的閩南先民有踅按廣東，咸處邊挨拶 (あいさつ) *一下，順sua3學一寡廣東話？當然，咱這種敿廣州話「偶合」的語詞毋乾若這個 (tsit40
/ 44 le44) 若爾。準若有人怹兜服侍諍王 (hok8 sai7 tsiN3 ong5)，硬欲講古早山西、河北的人先走路去河洛，西晉末才輾轉入閩，所以有殘留這幾個所在的語、音；未要緊，只要有人提出無sang5的看法，阮會摕其他佫較具體的事證 *出來，逐個好好仔討論 (案，事實上怙張光宇先生引證的方式來推測，閩南先民嘛有按山西抑河北來兮；但張
*先攏講是「司豫、青徐」，減采有落鉤的款)。
張氏摕一個南陽話的「垢圿」，毋知是欲證明啥？在我所知，除去江西贛語昌都片的南昌，甘肅蘭銀官話河西片的涼州、寧夏蘭銀官話銀吳片的銀川、陝西中原官話關中片的西安、安徽江淮官話洪巢片的安慶 (案，安慶話無入聲喉塞韻尾，異於其他洪巢片的語音，比論怹「圿」讀若「基」，無的確這嘛是有人認為安慶是黃孝片的原因)，攏總有「垢圿」這個語詞。阿河南中原官話洛徐片的洛陽嘛講﹝kəu tɕiə﹞，一般寫做「垢甲」；甚至徦清末民初，張慎儀 (1846 - 1921) 的《蜀方言》嘛有：「塵垢曰垢圿」的記載。張
*先這個孤證根本著毋是方言的特有詞，咱未使講日本、北京、南昌、寧波、忻州等等的「先生」著是「老師」的意思，所以台語、閩南方言著一定共 (kang7) 這寡所在的語言有關係。
台語的「垢圿」是「kau2 kueh4」，若「垢 kue3 / ke3」，我想寫做「垢疥」比較合適：
「疥」《廣韻》古拜切，中古漢語「見」紐「怪」韻，「見、古」咱自本著發「k-」，「見」清紐、「怪」去聲，台語唸陰去調。「怪」會使唸「kue3」，「未怪 (bue7 kue3)」著是「莫怪 (bok8 kuai3)；同韻字「界」嘛會使唸「kue3 / ke3」，例「四界行」。阿漳音的《彙集雅俗通十五音》「疥」囥箸「計字韻」，同韻字的「計、繼、髻」至今仔偏漳腔攏也唸「ke3」。「垢 kue3 / ke3」的「kue3 / ke3」用「疥」，字音有合 (hah8)，無問題。
「疥」，無一定著是指「疥癬」，嘛會使解說做「污穢、創垃圾 *去」，唐代段成式《酉陽雜俎‧語資》：「大曆末，禪師玄覽往荊州陟屺寺，道高有風韻，人不可得而親，張璪嘗畫古松於齋壁、符載讚之、衛象詩之，亦一時三絕。覽悉加堊焉。人問其故，曰：『無事疥吾壁也。』」這角的「無事疥吾壁」著是「無代無誌 (或者飵飽傷閒)
將我的壁創垃圾
*去」，所以伊著攏用白色的粉塗揢抹掉。北宋陳季常《次韻蘇監倉》(案，另有《閑適二首之一》一說)：「長日奔馳傳置如，久妨著論與抄書。逢人爭席有時有，疥壁留詩無處無」，tsia5的「疥壁留詩」嘛是講「因為留詩煞與壁變無清氣」。「垢 kue3 / ke3」的「kue3
/ ke3」用「疥」，字義有對同，嘛無問題。
關於張教授這條論述：
1.
伊哪會揢 (ka7) 「圿」的台 / 閩南語唸做「kue3 / ke3」，無的確有伊的根據。萬不一是一時的失覺察，這著有一屑仔較彼囉 *淡薄仔，因為伊毋是普通的專業素養佮學術地位。這著未怪兮 (bue7 kue3 e1) 邱從容先生怹會將一寡像「尺 (che)、白 (bei)、舌 (ji)、鐵 (ti)」等入聲字的台語話音誤標、錯認做舒聲 (參閱：「簡評《唐朝的官話研究 (1) 》」)。
2.
阮的看法，「垢圿」不過是箸某一個時期的通語；各漢語方言有「這種類同現象」的例，濟徦難以盡舉。
3.
一個方言詞佮某一個方言的用詞相共 (kang7)，若欲講有「傳承」或者「受影響」的關係，必須愛有其他的旁證。我抄殷曉傑先生《明清山東方言詞彙研究》內面的一段話：
利津、沂水、諸城、膠南等地管「蜘蛛」叫「蛛蛛」。「蜘蛛」中古前已見 …… 「蛛蛛」這一俗稱最早見於元代 …… 今天的中原官話 (河南商丘)、江淮官話
(安徽南陵、青陽)、吳語 (寧波)、湘語 (湖南沅陵) 中都有「蛛蛛
(子)」的說法
……
敢會使講河南商丘「蛛蛛」這個方言詞是源自山東、抑山東話是受湘語的影響才講「蛛蛛」？
沒有留言:
張貼留言