一個教羅批評者的看法

dongxie箸2013年1月1日下午4:05留言：

大大，新年快樂。
以下是教羅支持者駁斥批評者(比如大大你)的說法，亦不無道理，不知你的看法如何？
台語羅馬字被認為介音之設計不妥當，例如「oa/oe」的「o」以及「eng」的「e」。
其實是台語介音的實際音值分別於[o]和[u]之間、還有[e]和[i]之間，所以從符號設計的角度來看，都算合理。之被認為不合理，主要可能是受到華語注音符號介音用[u]、[i]的關係。

還有，因為台語介音[w]容易受到後面的音節之影響：
如果[w]後面接的不是高元音，比方[a]或[e]，就會讓原本是高元音的[w]向低的方向移位。這樣一移位，便使[w]的音值接近[o]或者[ə]；因為[w]聽起來較像[o]或者[ə]，所以傳教士就把它寫成「goá」、「koe」。比方說「菜頭粿」，經過變調的實際發音是「chhái-thāu-koé」。

dongxie：

     關於汝留言的問題，個人略仔有意見，若欲詳細講是lo3 lo3長，我簡單寫一滴仔汝參考。  不過著做一個聲明，毋是愛餾這款的議題，我一方面是盡本分回覆網友的留言，一方面是欲講對我進前有關的「批評」，汝所引述的解說並無合適。

     1. 我的看法：拼音系統第一要緊的是愛與人好學、好記、方便掌握，音位的數量若傷濟、傷複雜，著失去拼音音標的意義，因此拼音音標著採用音位歸納(我家己嘛咧檢討，所以今年開始，我無欲用「m-、n-、ng-」)。  下骹兩個敘述，是我認為箸hia5用音變做理由，為歷史包袱做辯解，這款心意會當(tang3)理解，但這毋是務實的方法佮行為，未值得鼓勵的原因。

     2.「oa/oe」的「o」留咧參下面的問題﹝u﹞鬥陣講。  一般認為台語「eng」的「e」講是介於﹝e﹞佮﹝i﹞之間，我的看法無同。  個人認為台語這個介音是﹝i﹞，唸﹝iŋ﹞的時中央有人加減會有一個﹝e﹞的過渡音(glide)，比論台語「正經」，有人唸﹝tsiŋ3 kiŋ1﹞，有人緩讀(徐言)會唸做﹝tsieŋ3 kieŋ1﹞，著是無人讀﹝tseŋ3 keŋ1﹞；這著像有人唸「楓、飯、問、當、卵、糖、莊、床、算」等的時，箸聲、韻母中間走一個﹝ə﹞的過渡音，變唸做﹝pəŋ1、pəŋ7、bəŋ7、təŋ1、thəŋ5、ləŋ7、tsəŋ1、tshəŋ5、səŋ3﹞共款。  台語的﹝iŋ﹞怎讀，理論是一回事，實際較要緊，汝家己唸「冰冷、丁玲、警政、精英、行程、胸前……」看bai7 *咧，若無，亦會使去教育部的網路辭典聽怹的音頻。  佫較要緊的是有的所在唸﹝iŋ﹞，嘛有的所在唸﹝eŋ﹞，比如惠安、漳浦，敢毋是講愛國際化？哪會使濫做夥啦，呵呵。

     3. 「菜頭粿」，經過變調的實際發音，敢有影是「chhái-thāu-koé」？汝去教育部的網路辭典聽看 *咧，我khah4聽嘛「菜頭kue2」。

關於台語的﹝u﹞，汝留言頂頭所講的攏著，但摕這做標「oa / oe」無標「ua / ue」的理由，並無合理。

論真講，台語﹝u﹞音值有幾那款，若無，「有、油、肥」哪會標「u、iu、ui」，阿「花、話、乖」標「hoe、oe、oai」？前者的音有影倚﹝u﹞，後者著接近﹝ʊ﹞。(這是咧講音高；其實咱的「u」大部分計偏央，喙形較扁 *一屑仔，無﹝u、ʊ﹞hiah4圓)  但若是「-un、-ut」，比如「吞、術」的「u」著比「有」的「u」較下(ke7)、比「話」的「o」較懸，大概箸﹝u、ʊ﹞的中間倚﹝ʊ﹞；另外，嘛佮﹝iŋ﹞共款，「un、ut」韻的字，有的韻腹、韻尾的中間嘛有一個﹝ə﹞的過渡音。  「oa / oe、ui」欲分，其他兮著免管，這哪有合理？  佫再講，既然知影「oa、oe」的「o」是受後面音節影響的音變，表示承認參自本無受音變的音是同一個音位。

台語的拼音本來著是採用音位的概念，毋是使用實際音值，事實上嘛做未kau3。  我佫舉一個仔例，台語「ai、uai、in、it」的「i」一般比﹝i﹞較下音，差不多是﹝ɪ﹞；阿「i、iaN、im、ip」的「i」著敿﹝i﹞共款，比「ai、uai、in、it」的「i」較懸；但是「ts-、tsh-、s-」後壁的「i、iaN、im、ip」著佫會變發﹝ɪ﹞。

「相拍」的「拍」是﹝pʰa﹞，「拍球」的「拍」是﹝pʰA﹞(網友Y君今仔我毋知，較早伊一直認為台語的元音是﹝A﹞毋是﹝a﹞，阿﹝ts-、tsʰ -、s-﹞應該是舌葉音﹝tʃ-、tʃʰ-、ʃ-﹞，其實著是無考慮音變的現象)。

《彙集雅俗通十五音》「曾、出、時」這寡字頭的字，咱後壁接﹝i﹞的實際音值，絕大部分的人早著顎化做﹝tɕ-、tɕʰ-、ɕ-﹞。

咱唸中古漢語「見」系的字，聲母會隨後面元音的前後，發音部位綴咧改變，比如唸「基(ki)、家(ka)、龜(ku)」的時，「ki」的「k-」著展唇、偏前，有當時仔佫會顎化；「ka」的「k-」著較偏後、喙形較開；「ku」因為與「u」影響，發音部位箸佫較靠後，而且變圓唇的「k-」，所以「粿」的偏漳腔會唸做「kue2」。  阿咱「k-」後壁接「e(假)、o(高)、oo(故)」，伊的發音部位同款嘛計無共款oo5。

其他同聲母無同元音、同元音無童聲母的字，因為同化作用、音強、音高等等的關係，致使發音無sang5的現象ia2不只仔濟，欲按怎分徦hiah4幼？  阿這寡差別，有學者講小可仔注意 *一下，著感覺會出 *來，我有同感；但嘛有學者講這對無受過語言訓練的人著毋是真清楚，這我著毋知；不而過，怹攏同意這款音變是事實，阿嘛主張拼音系統毋通使用這寡無辨義作用的音標。