赤高槌

往過大粙埕的漢藥界有時仔會對一寡較出名的先生做品並(「先生」指漢醫，著是台灣國語的中醫師。「並」讀phing7，品評比較的意思)，有人會揢(ka7)較𠢕(gau5)的先生分做「時醫」佮「名醫」兩款。

「時醫」是當咧行運的先生，「時醫」有兩種。一種是拄 *著的患者，攏是伊有把握的症頭。一種是天公保庇、祖公仔致蔭，無論啥疑難雜症、任何患者，若徦伊的手，凊采看著凊采好，藥方無對症嘛未要緊。「名醫」是醫術真正高明的先生，醫書、病症、方頭、藥性攏研究徦誠徹底，診斷、下藥計真準。伊若講無問題，著包穩藥到(kau3)病除。

幾那年前載長輩去揢伊一位世交䀛喪(bai7 song1，著是探視喪家。去看病人，號做「䀛病」，今仔普通計講「探病」)，這位往生的老先生日本時代著箸赤十字病院(箸大粙埕，台北市鄭州路。較早叫做市立中興醫院，今仔改做市立聯合醫院中興院區)做醫生。國民政府來無外久，伊著辭職，跳出來開私人診所。

老醫生的風評誠好，不而過伊攏自謙講伊是「時醫」，毋是「名醫」。

同時去揢燒香的人有五六個，有的比阮較慢kau3。香燒煞，逐個著倚來開講；在場有一個中年的外科醫生，當時箸仁愛醫院。伊講古早的醫技、器材無今仔hah4發達，醫生除了專業知識(ti3 sik4)、聽診器、磅針、量血壓 *兮這寡基本的器材，無其他的儀器，步步愛靠經驗。而且彼陣仔的科別無分徦hiah4幼，醫生加真辛苦，計愛十項全能。像這位老醫生，講是講內科兮，除了翕電光(日語講「レントゲン」，今仔的放射線科)愛揣別人，頭眩目暗、心臟無力、腹肚痛落屎、水腫顑㾈(ham3 pu7)、he1 ku1肺癆、畏寒發熱、肝病黃疸、半遂致骹手、墜腸吐大腸頭、大頷胿生un1 ai3(腮腺炎，「生hun1 ai3、豬頭皮」計有人講)……甚至囡仔著猴損、查某人血母痛，伊攏總包，佫醫會好才是勥(kiang3)。外科醫生佫講，今仔的醫生大部分攏專攻某一個科門，普通攏靠檢驗數據分析病症。若毋是怹彼科兮，著必須轉診。準若停電、儀器電腦故障，有兮著捎無總(tsang2)。不而過這嘛毋完全是歹 *處，有失有得，看現仔時的平均歲壽著知。

若(naN2)像總統府前秘書長葉菊蘭講兮的款，台灣各種母語有的是箸加護病房，有的咧急診。阿若我的母語，講是掛號等與先生看。對待這寡「患者」，咱tsia5咧研究古早的台語資料，研究的人較sing5以早的醫生。讀音、腔調、用字、釋義攏著兼顧，十八般武藝愛別透透。若拄著今仔無咧用的語詞(著是「死語」)，上簡單的方法的是揣文獻。文獻頂頭若有無sang5的記載，著用家己的專業素養去判斷。比論：

「竹塹」的「塹」，文獻有的讀「tsam3」，有的讀「tsham3」。今仔的人寫的大部分攏講是「tsam3」，有的佫注講又讀「tsham3」，或者會佫繵(tan7)講某一本書寫讀「tsham3」。安呢的做法是著 *兮，不過，準若會當說明選「tsam3」的理由，可能著佫較周延。

細漢的時，pat4聽人講 *過，印象上深兮，是一位オジサン(枋橋在地人，日本時代pat4箸總督府做小使仔，讀過漢學的公學士，偏漳腔)，「無彼囉命毋通飵竹塹餅，無彼囉骹毋通peh4三貂嶺」這句俗諺的「竹塹」，伊講「tik4 tsham3」。欲講這是又讀、地方腔甚至是訛讀，未使代表所謂的「正音」，這攏會當接受。我想無兮是，kan2無愛撥一下仔時間，去新竹問 *一下，看怹家己是按怎講 *兮。無的確會講a7無熟似徦半人，哪有te3問？其實這嘛毋是介困難。一般的講法，竹塹餅是新復珍(地址網路查會著，箸北門街，城隍廟邊仔若爾)上代先做 *兮，揣一位較有歲頭的店員問bai7 *咧，真簡單阿。何說講(ho4 seh4 kong2)新竹做糕皮餅(ko1 phe5 piaN2，今仔的人認為這著是竹塹餅，但新竹人攏是講糕皮餅。有人認為「竹塹餅」是一個概稱，實際上應該ia2包括柴梳餅等)的老店嘛不只一間，阿徛店 *兮，攏是老沿兮較濟。橫直一tsua7工，加行 *幾步仔，加問 *幾間仔，準若無滿意的答案，嘛表示講有咧照起工。若這款「投入」佫「深入」的做法，人對結論著較未存疑。當然，這是個人主觀的看法敿理想，可能無合(hah8)實際。

有一寡「死語」，文獻頂頭有影誠oh4揣，有研究者著用家己的學養佮經驗去推測，這款方法好抑䆀(bai2)著見仁見智嘍。個人是傾向「不知為不知」，不過這未要緊，人欲怙蒦(ioh4) *兮，我嘛無意見。若是用推測 *兮，較負責的做法著是加注一個類似「存疑」的字眼。比如：

赤高槌(tshiah-kuân-thûi)：疑是將人脫光衣服、懸吊半空中，再加以捶打。赤，赤身，沒穿衣服。「高」是借義字，應音kuân，今多作「懸」。槌，本字是捶，捶打。《黃編注》作「刺懸槌」：「用刺耙耙兮懸槌槌(thûi)拍，酷刑。」(「歌仔戲資料庫‧注音註釋凡例」)

事實上，「赤高槌」愛唸「tshiah4 ko1 thui5」，「槌」是「揭(giah8)槌揭杖(thng7)」的「槌」，名詞；毋是動詞「捶打、拍」，阿嘛毋是「酷刑」。

「tshiah4 ko1」怎寫我未曉，暫時用「赤篙」。有一個姻親長輩，新竹人，這兩年子才過身，九十外仔外，「赤篙槌」是怹彼沿兮的日常用語。照伊的講法，「赤篙槌」像鋤頭柄，柴兮(e5)，著是無鬥物件的柴棍仔，但是較長，ting7 khong1 khong1。欲若較薄板 *兮，與ham2(摕物件摃)著kau3 te3，一聲著毋好做囝(kiaN2)。

例一、赤篙槌gia5 *咧，按腹肚邊著揢(ka7)毆(io2) *落去。

例二、捎一支赤篙槌，隈(ui3)尻脊骿(kha1 tsiah4 phiaN1)一直hmh4(猛擊也)，未輸咧拍賊(tshat8)。

台灣hah4闊，全世界閩南語系的人口hah4濟，我想這句語詞應該有人別。

施教授這兩字「疑是」著用了真妥當。