2012年8月12日 星期日

「電視名嘴」會使天馬行空


前幾工仔聽人講黃品源有一齣電視劇箸新竹拍 *,我上網看兩集,劇中有一tsua7暗街仔(拍片的所在箸關帝廟hia5,是以前新竹的風化區之一,新竹真少講「暗街仔」,hia5號做「tiong1巷」),內底有一間林美照佮張本渝咧huaN7兮的kha1 sau1間仔,叫做「烏美人」,參台北的一間娛樂場所同名。頂日仔我趁khang1 ke3(phang7)走去圓環hia5罔趖(so5),看彼間「黑美人(台語講「oo1 bi2 lin5」,箸台北南京西路、延平北路口,頭先號做「萬里紅」,參「望花台──路尾改美人座、東雲閣、五月花、杏花閣、白玉樓」等計是豪華型的大酒家,毋是查某間。聽講古早怹的級數,比舞廳懸真濟,ROROサン怹阿舅講以前箸排頭名的新加坡舞廳,兩千四著跳規暗,會使tshua7出場宵夜;但是若三個人去酒家,乾若桌面咸チップ一暗開 *幾萬仔走未去,無包出場。「東雲閣、黑美人」等的小姐,有未少是新加坡佮夜巴黎等舞廳當紅的小姐轉行兮,he1查某囡仔逐個嘛仁仁仁)ia2有箸 *兮無(今仔外口撘棚仔,kham3bat8 tsiuh4 tsiuh4,毋知咧創啥)

佫行 *一久仔斡對市仔,咧買雞卷的時,拄著兩個以前的囡仔伴,招講欲去大橋頭兮㾪啉,sin7 sua3好好仔kiet4(有人講本字是「喫」,著是「thui1」,盡情的飵;近義詞有sah4piah4sut4hut4) *一下,我講先來去(來去,連音讀lai24)阿婆仔hia5買兩包包仔。按民樂街出 *來的時,看著一te3看板(カンバン),紅底白字,是汕頭人開兮的老店。

有人講以早汕頭幫箸這tsia5的藥材界嘛有過榮景,大賣、小賣上無嘛有十外kham2。彼當陣仔tsia5的汕頭人真濟是對香港來兮,比如信通、萬隆的頭家,倩的薪禾嘛差不多計是kang5故鄉兮,箸hia5出入的潮汕人足濟。

我著問其中一個怹兜以前嘛是做藥材兮的囡仔伴,看伊敢知影今仔箸電視當ヒット的「名嘴、專家」翁燦燿先生,翁 *先家己講伊是潮州人,pat4蹛大粙埕,佫是做漢藥 *兮。阮朋友講完全無印象,可能年歲差傷濟,阿大粙埕範圍hah4闊,別未透。不過,伊講翁 *先的口音無sing5大粙埕的人,這點我略仔同感。

*先的口音較倚水轉骹(水返腳)、坪林、三峽彼tah4的偏泉腔,比論伊「銀紙、附近」講「girn5紙、附kirn7」。但是伊-n尾有時仔會拂對-ng去,比論「咱」伊攏講「lang2」,這是潮汕話的特色之一。另外箸邊仔號做寶珠兮(往過阮定定愛走相搦,這箍細漢螺絲骹螺絲骹,有一遍佫跋倒,頭額摃一lui5,腫徦未輸金珠仔hiah4大圈,阮著揢號做這個外號。注,「圈」讀「khien1)講伊國中的同學有人講「girn5kirn7」,拍鐵仔街hia5的人;我想一下斟酌,佫乾若有印象的款。he1較早(khah4 tsa2,有人講「khat4 tsa2」,「以前、進前」的意思)箸細姬仔街(sue3 i5 a2 kue1)嘛一半擺仔pat4聽人講過這種口音;不過,這兩個所在攏無算大粙埕,雖然計離大粙埕誠近,著箸邊仔若爾。

*先咧講文史民俗攏會引經據典,有古早箸漢藥店內底咧泡茶答喙鼓彼寡老先兮的遺風。一位長輩有這款經歷,便若有翁 *先的齣頭,傷暗、無閒著maiN3講,大部分會隈頭看徦煞。伊講翁 *先定定有「hoo2!……(後壁會使接「誠嫷、誠勥(khiang3)、誠無采」)」,這個嘆詞的「hoo2」與伊真數念。長輩講以前箸藥店咧開講、講笑談(kong2 tshiau3 tam5)的人,講 *準煞,免對怹的話負責;講煞尻穿拌拌 *咧,喝行著行,連茶甌、薰khok4仔嘛免鬥收鬥摒(piaN3)。怹無通告費,盤喙錦、相釘鼓(sio1 ting3 koo2)、拍鬧涼(phah4 la7 liang5)的齣頭定定有,冤家是未啦,諍徦頷䫀筋浮la3 sa3卻是真四常。這款情形箸邊阿咧聽話鬚兮的使仔(sai2 a2)上愛,因為kau3 *仔往往攏會出現仲裁者,阿這個下結論的人,若是怹平常時攏扂扂咧聽、無啥愛發表意見、有經驗佫有學問的頭家,這寡師仔佫較歡喜,行路著有風,感覺真煬氣(iang5 khi3,會使孤用一字「煬」,有人講「iang7」;箸tsia5是「臭屁、屎桶、屎潑、hia1 pai2、風神、真癀、臭偁、𡳞muaN7」的意思;「偁」讀tshing3,「𡳞muaN7」是多義詞)

長輩講今仔的人對「名嘴」的態度,普通計是敢問但是毋敢發表無sang5的意見,可能是尊重,可能是毋別、嘛可能是無自信。像翁 *先講咱tsia5清明抑三月節,去墓兮「kua3紙」,欲若箸古早,邊仔的人一定隨時(「馬上」的意思)揢唱(tshiang3)「逐個計嘛講kui3()紙、teh4()紙」。我應(in3)講這無啥要緊啦,觀眾聽聽 *咧著煞,未去記hah4濟、計較hah4濟;阿今仔計怙火葬,燒燒 *tiam3 *兮,挂紙的例早慢會改無 *去;何況人上(tsiuN7)兮嘛毋是母語教學的節目,哪著hah4呢講究啦。我這位長輩真開通,綴時代會著,伊承認有「代溝」這項事實,當然嘛同意我的講法。

有的「名嘴、專家」講了傷hiong5,有當時仔難免會較離經淡薄 *啊,嘛pat4有人當面著去與人糾正。應該是鄭弘儀佮于美人主持的節目,一位「名嘴美女」講洪一峰箸歌仔冊頂頭畫插圖,是受怹老爸的影響耳濡目染,曲盤達人李坤城當場著揢講洪一峰是遺腹子;若李 *先這個講法是著 *兮,雖然伊嘛pat4捸箠 *過。比論有一擺,咧講愛國獎券的時,伊用馬沙「招汝做舞伴」:「相招、招著汝、招汝佮我做舞伴」的曲(馬沙唱介濟歌,今仔人較知兮有一條號做流星。佫一首頭葩是「小姐請來電頭鬃,阮有幼秀的手工,看汝欲選佗一項,包汝達成恁願望」,歌名毋知。「禮拜日的遠足」,曲是用三橋美智也的「岩手の和尚さん」王瑞霞有翻唱,歌名小可仔無kang5「求愛的條件」,歌詞大概是「汝若有希望愛一個,會對汝純情的女性。頭一步態度愛正經……」,用和田弘的「お百度こいさん」填的詞。以上是ROROサン怹阿舅提供的資料,感謝)唱「著著,著著著,著著著著二十萬」,這著有問題(ROROサン怹阿舅聽過以前海野武沙敿大箍玲玲灌的曲盤,內底有這條,伊印象真深,旋律徦taN1haiN1會完整。伊是唱「著,著,著著、著著,著著二十萬。二十萬箍若著,變成好額人」,是另外一條歌。海野武沙著是李讚聲,敿林英美有合唱過YouTubete3)

khiai9嘛無啥eh4(讀連音「siaNh4),電視頂仔的「名嘴、專家」愛博古通今,隈觀落陰徦好奇號、隈伏羲八卦徦福島核災、隈縛骹徦波灣戰爭、隈去日本開查某徦證所稅、隈楊日松徦原油起價、隈星戰計畫徦西太后、隈臭頭洪武徦股票行情、隈預測總統大選結果徦金字塔、隈唐三彩徦林益世的一刀斃命、隈史艷文徦塑化劑、隈親子關係徦海豹部隊、偎油電雙漲的民怨徦薄谷開來的中國法制……怹攏愛知攏愛別,天文地理、民俗風情……任考不倒,腦神經的「負擔」嘛不只仔大。盛名累人,著若(naN2)「史上最牛的歷史老師」袁騰飛先生共款,「名嘴」亦毋是怹家己封兮,只要maiN3人身攻擊、影射毀謗;喙是人e5,嘛無強迫咱聽,講啥計都OK。著算講連「吹狗螺、牽狗螺」都毋別,講是「牽狗聲」(八月初三的中天新聞台,著是箸學生尻穿先生喙講的彼個節目,我毋知彼位專家準若hiong5 hiong5未記得這句語詞欲怎講,哪毋規氣用國語著好),亦無損「名嘴、專家」的權威佮風采;著是風聲pong2影、加味添素,嘛未要緊,kun1 luh8亦毋是先生咧教冊(教冊的先生無這囉特權),揢當做心適代、咧娛樂咱大家,若中意咱著揢拍噗(phok4)仔,若認為怹咧死tsuaN3,聽聽笑笑 *咧著好,無啥mah4大不了。

6 則留言:

XingyiReporter 提到...

先--ê,毋知敢有tsit个榮幸kā tsit篇文章刊蹛《台文通訊BONG報》?(其實毋但tsit篇,設使先--ê若允--阮,koh來向望會當tiāⁿ-tiāⁿ kā你ê作品佇雜誌頂懸hām讀者分享)

XingyiReporter 提到...

等無你ê回覆,無,若有意願抑是問題,才麻煩寫電批予..我。勞力!
(voyu.lau@gmail.com)

台灣赫宇 提到...

SH:

是安呢啦,往過pat4有一寡來亂兮,所以箸2010年6月9日上午7:01我有做一個「以後無公開 Blogger『簡介』的新網友,恁的問題,我無欲回覆。」的聲明(http://hik-u-tw.blogspot.tw/2009/05/r.html?showComment=1276038064317#c2445239573863892155)。有影誠歹勢,失禮失禮。

我這是想kah9 hia9寫kah9 hia9,遣詞用字、組織結構攏無過(ke3)仕上げ,箸blog頂仔罔議量猶會使,正經欲箸雜誌發表,ia2無彼個水準。

阿我自本著散散(suaN3),發文的內容有錯誤的所在,嘛無愛去改,當然嘛有無發見 *兮。頭拄仔我佫略仔巡 *一下,著看著幾哪個。比論「師仔」應該是「使仔」、「hia1 pai2」應該是「hia1 pai1」、「無啥mah4大不了」應該是「無啥meNh4大不了」。另外,我用字嘛夭壽龜怪。所以,箸網路欲轉載,我攏毋pat4咧限制,但是無適合囥箸雜誌。

多謝汝的好意。

XingyiReporter 提到...

了解,猶原感謝。

阿清 提到...

台灣在家講潮汕話的人,多不多?他們說台語時-n都習慣性的變成-g否?

除你發現的之外,本文尚有,屎潑、有當時仔難免會較離經淡薄*啊…等,應可再重新檢視,一次性修改。

台灣赫宇 提到...

清華先:

1. 在我所知,台北市第一、二代的新住民猶有咧講,第三代著誠少啊。第一代兮大部分計八、九十歲,第二代兮一般嘛五、六十。

十偒年前,我箸世貿バイト,知影有一位咧做文具禮品的頭家,潮州人,大約仔咸歌星薛岳怹頂下歲。怹大姊嘛箸公司內底,應該是四十年次左右。怹私下攏講潮州話,講台語無腔,-n、-g分徦真清楚。兩個姊弟仔攏加翁 *先幾那歲。所以應該是在人兮,未當一概而論。

2. 是「屎撥、有當時仔難免會較離經 *淡薄啊」才著,呵呵,今仔日汝是來咧改作文hio3?