關於台語的「陽上調」

新鮮料理人 - 2011,03,10,10:55 留言：

我完全知也你無同意「聲調的表記未使用數字」兮原因，因為用數字做調號，並袂發生王華南先生所擔心兮的問題。你絕對是一位好老師，但是做你兮學生一定誠忝。我莫一睏問遐濟，你較袂煩。請教，仝彼个單元，王--先生講台語有陽上調，你有贊成--無？多謝。

料理人：

真「明確」的表示，無佫較好的解說進前，個人猶未當 (tang3) 同意王華南先生對「陽上調」的講法，「具體」的原因是：

1. 台灣毋是無陽上調，是「有的所在有，大部分的所在無」。阿這個「陽上調」可能參王華南先生講的無 kang5，王 -先陽上的調值訂做「3551 (的款)」，根據啥？我毋知。

鹿港猶有陽上調，本調調值是中平調，差不多是比王華南先生咧講的陽去較下一屑 -仔，連讀變調變參王 -先生的陰去共款，低平調。準「三連讀」的頭一字愛變陽上的本調，「開開開」鹿港毋著變講「khui22 khui33 khui33 (鹿港陰平連讀不變調)」？未啥會通。

2. 咱口語上有「青青青、嫷嫷嫷、黃黃黃、離離離 (li7)、直直直 ……」，準若有「上上上」，鹿港老偏泉腔是嘛講「siong11 siong11 siong22」，加強語氣若變「siong3551 siong11 siong22」，照安呢講 khiai3，鹿港的陽上毋煞有兩個本調佫兩個變調？未啥會通。

3. 王 -先講「陽上調」的調值毋是「陽平調」的 24，是 3551，我認為後者是加強語氣，這毋是「三連讀」的專利。比如「誠拍損、誠夭壽」，宜蘭腔會講做「tsin42 bo33 tshai42、tsin42 夭壽」，加強語氣的時陣，嘛會講做「tsin442 bo33 tshai42、tsin442 夭壽」，懸 (kuan5) 音的所在，時間會拖長。另外，宜蘭腔嘛會參別位的人共款，講做「偌 bo5 tshai2 咧、偌夭壽 -咧」，實際音值是「jua11 bo33 tshai42 le11、jua11 夭壽 -咧」，加強語氣的時陣，變講做「jau355 bo33 tshai42 le11、jua355 夭壽 -咧」，抑是頭字的懸音會佫降 -落來，講「jau3551 bo33 tshai42 le11、jua3551 夭壽 -咧」，咸「青青青、嫷嫷嫷、黃黃黃、離離離 (li7)、直直直 ……」的講法，完全一致；當然，因為語氣的無同，亦佫有其他的變化。汝敢會使講宜蘭的「442、355、3551」計是「陽上調」？

4.「加強語氣」語調的變法，有幾仔囉款，毋是一個「陽上調」會使總包兮。

4-1.「三連讀」的頭字，無限定會講做「高升調」，我箸「四臣有五味」有講 -過：

啥人講「紅紅紅」的頭一字一定是講「高升調」？少缺人講 ang351 ang11 ang24 ，「媠媠媠」sui55 sui55 sui42、sui24 sui24 sui42、sui351 sui44 sui42 計嘛有人講。

「紅紅紅」頭一字有人講「高升調」，尾音無佫降下 (ke7)，這無毋著；但是嘛會講做「高升降調」的「ang351 ang11 / 33 ang24」，甚至懸音佫拖長講「ang3551 ang11 / 33 ang24」。但是「嫷嫷嫷」等的「三連讀」，講「sui55 sui55 sui42 (偏漳廈)、sui24 sui24 sui42 (偏泉同)」嘛真四常，等加強語氣的時，才會出現「高升調」或者「高升降調」，這囉語例誠濟。

4-2. 加強語氣的「三連讀」，有符合王 -先所講 -兮，頭字變調做「陽上調」兮 (e7，隨前變調) 是這幾個調類：

陰平，「金金金」自然調是「kim3551 kim33 kim44」
陰上，「苦苦苦」自然調是「khoo3551 khoo24 / 44 khoo42」
陽平，「紅紅紅」自然調是「ang3551 ang11 / 33 ang24」
陽去，「爛爛爛」自然調是「nuaN3551 nauN11 nuaN33」
陽入，「鑿鑿鑿」自然調是「tshak3551 tshak11 tshak50」

但若陰去調、陰入調喉塞尾韻變降調的「三連讀」，頭字著未變所謂的「陽上調」：

陰去，「散散散」自然調是「suaN42 suaN42 suaN11」，無講做「suaN3551 suaN42 suaN11」

陰去，「信信信」自然調是「sin42 sin42 sin11」，無講做「sin3551 sin42 sin11」

陰入，「肉肉肉 (有錢人、身軀有肉)」自然調是「bah42 bah42 bah32」，無講做「bah3551 bah42 bah32」

陰入，「搭搭搭 (攏無偆)」自然調是「tah42 tah42 tah32」，無講做「tah3551 tah42 tah32」

另外，陰入 -p、-t、-k 尾韻的「三連讀」，頭字敢有變「陽上調」，這我毋知，我是毋 pat4 聽 -過，如：

「漉漉漉 (tam5 tsiuh4 tsiuh4)」自然調是「lok40 lok40 lok32」，毋知有講做「lok3551 lok40 lok32」-無？

「啄啄啄 (真尖)」自然調是「tok40 tok40 tok32」，毋知有講做「tok3551 tok40 tok32」-無？

4-3. 汝講了著，準汝若做一回 (tsit8 kai2) 問傷濟，有影，我會煩。彼個時陣，我會應：

「好啦」實際音值是「ho552 la11」，「好」的懸音 khiu2 懸佫牽長，這款情形新式的表記有人寫做「好 〜 啦」，嘛趣味趣味；或者應汝「拜託 -兮」，「拜」的實際音值會參「好」共款。

注意，「好」的後壁「啦」是輕聲，照講無讀變調，真明顯嘛，這是加強語氣。這囉無相同調值，當然未使計歸歸做一個「陽上調」，安呢台語欲分幾個調類？阿啥人敢掛保證，以後無「新調類」的出現，抑是「舊調類」的流失？

5. 我毋知汝有聽「字音合併、相同三連字變調」這個單元 -無？箸第一節「新調 (陽上調)」內底，王華南先生有舉誠濟例，來證明伊的主張。我初步的看法，這寡例證並毋是介充分；我講「初步」的意思，著是以我現仔時 (hien7 tsir2 si5) 的認知敿判斷，無佫做進一步的考求。

6. 事實上，台語的連音變，非常的複雜，原因是咱 tsia5 有各種的地方腔口，佫透濫徦誠功夫，毋是三兩句話著有法度釐清兮。我是希望汝若有興趣，家己先深入 -一下，有碰著 (pong7 tio3) 問題、抑是有心得、新發現，才摕來共同探討互相分享。


■ 新鮮料理人 - 2011,03,16,14:32 留言：

「字音合併、相同三連字變調」我有看，內面有一部分阮亦有講，有一部分就無仝，比如「加予我」阮講「kàu我」，共「咬我」仝音。你認為，這寡例證並毋是介充分，小講一兩項也來參考。因為我個人認為佇網路講「本字」兮，是你、王華南先生兩位，較合理較會用兮相信。所以兩位若有無一致的看法，我就誠有興趣，想欲了解。多謝。


料理人：

先就我初步理解的範圍，認為王華南先生箸這篇的語例，並無講介有說服力的部分，簡單講 -兩條仔：王 -先將「三連讀」加強語氣的「高升降調」參偏泉同腔上聲變調的「高升調」濫做夥，講計號做「陽上調」，汝會使按視頻的頂 -仔聽伊的發音，此其一。無論啥款的腔調，咱口語上除了「三連讀」加強語氣的時有「高升降調」，其他的變調或者陽平聲的本調，攏是發「高升調」，比如王 -先所舉例的「昨方、於昏」，計講「tsang24、ing24」，有時仔為著欲辨義，尾音調值會扭 (giu2) 懸，講做「tsang25、ing25」，毋是「tsang125、ing125」、「tsang3551、ing3551」……，此其二。一部分的變調亦可能毋是照王 -先所表記的用字，像「於昏」，「於」是「魚」韻的字，偏泉腔讀 -ir、-u、-ue ……，無讀 -e，偏漳是有啦，但是我 pat4 聽宜蘭腔的老先兮講做「ee(ε)1 huiN1」，未使講 in1 是走音或者特例，因為現仔時的漳州，普遍猶講「ee1 huiN1」，「於」箸宜蘭佮漳州無讀「ee」；所以偏漳的所在，應該無「【ĕŋ ,ㄝㄥˆ】（陽上調）」，此其三。

箸連音變的部分，我摕兩個例：

1. 今仔日 (kin1 a2 lit8)

kin44 a42 lit40 (本調) → kin33 a44 lit40 / jit40 (變調，偏廈漳) → kin33 naN44 lit40 / jit40 (連讀，「仔」有聲化，變 naN) → kiaN34 lit40 / jit40 (連讀，「今」的 -n 無聲化) → kiaN24 lit40 / jit40 (口語，事實上偏廈漳的人，真少安呢講，計用 kin33 a33 lit40 / jit40、kiaN33 a44 lit40 / jit40 較濟)

kin44 a42 lit40 (本調) → kin33 a24 lit40 (變調，偏泉同) → kin33 naN24 lit40 (連讀，「仔」有聲化，變 naN) → kiaN324 lit40 (連讀，「今」的 -n 無聲化) → kiaN24 lit40 (口語)

我欲講的是無論佗一種腔口，都無「kiaN3551 日」的講法。若「明仔再」嘛是講「bin11 (n)a44 tsai11」、「bin33 (n)a44 tsai11」、「miaN24 tsai11」或者「miaN24 a44 tsai11」等，共款無「maiN3551 tsai11」。阮家族較頂沿的老大人，猶有兮保留誠完整的老偏同音腔，海口腔的朋友亦未少。

2.「揢我講、揢我拍」一般講「ka11 gua44 / gua24 kong42、ka11 gua44 / gua24 phah32」，無人講「ka33 gua44 / gua24 kong42、ka33 gua44 / gua24 phah32」，所以「揢」毋是平聲。準若有的所在講「ka33 gua44 / gua24 kong42、ka33 gua44 / gua24 phah32」，安呢我以下的講法，著無的確會當成立；這著是我講的：「以我現仔時 (hien7 tsir2 si5) 的認知敿判斷，無佫做進一步的考求。」當然，我嘛毋是講攏無根據，比如我知影 tsia5 的「ka」，廈門話的變調是講低平調。

ka33 gua44 kong42 (本調) → ka11 gua44 kong42 (變調，偏廈漳) → ka11 a44 kong42 (連讀，「我」的 gu- 無聲化) → ka14 kong42 (連讀，「ka」或者「我」的 a 無聲化) → ka24 kong42 (口語)

無的確汝會講「揢講、揢拍」，咱嘛講「ka33 kong42、ka33 phah32」，「ka33」是陰平聲的變調。若我的看法，這個「ka33」是「揢伊」的連音變：

① ka33 i44 (本調) → ② ka33 i33 (變調，順行同化的一種，一般講「隨前變調」) → ③ kai33 (連讀) → ④ ka33 (連讀，i 無聲化)

證據：第 ③ 階段的連音變，今仔計猶有咧用，比如「揢拍」講 kai33 phah32，尤其是偏泉同腔的所在。箸網路頂頭，有人直接著用借音字「該」，「揢伊討錢、揢伊講失禮」會寫做「該討錢、該講失禮」。當然，「揢」亦是「用字」，這是古早一位讀廈門大學蹛 (tua3) 泉州的晉江網友建議兮。
(2011,03,18,08：30)