回覆「別字、別人」等

新鮮料理君：

無影無跡汝毋甘嫌啦，總是，好兮 bai2 兮攏做汝講，未要緊。

汝毋是講「m̄-bat thiann-lâng tshiùnn ……」，「捌」是「幫」母，照理講未使讀「b-」，「捌」字敢有「知、會曉、識、懂、了解」的意思？我所了解的，「別」從漢朝進前的古册著有記載頂頭講的彼寡意思，傷過文言兮咱暫時 maiN3 講，白居易的詩：

移他到此須爲主，不別花人莫使看 (《戲題盧秘書新移薔薇》)

除却微之見應愛，人間少有別花人 (《見紫薇花憶微之》)

不寄他人先寄我，應緣我是別茶人 (《謝李六郎中寄新蜀茶》)

其他，「別人、別音、別盡、別書 …… (計讀 pah4)」這寡語詞，上少，我 thing3 好摕咧十個用例。

「別字、別人」…… 有影會敿「別個人、別款字」濫未清楚，但是嘛未使因為安呢，著去 ka1 改做「捌」，阿 kan2 毋用「八」？無嘛較好寫。

譬論咱講「水滴、後日、風吹、機關、菜頭、寫批、菜花、大人 ……」這計毋是一種辭義，敢有必要佫另外去揣字？

準若有人欲 hiah8 工夫，我嘛尊重。

a. sing2 too1 (省都) 嘛是偏泉音。

b. 未要緊啦，「習非成是」，「是」著是「是」，橫直攏是「是」。

無，今仔台灣國語「繫鞋帶 (縛鞋帶)」敢猶有人咧講「ㄐㄧˋ 鞋帶」，汝「滑稽」若講「ㄍㄨˇ ㄐㄧ」，凡勢會與人笑汝「很古雞」。呵呵

c. 有啦，我 naN2 咧整理、收集，粗胚拍算後禮拜著創 (tsong3) 會好，我會先囥咧 blog，逐個才做陣來鬥補充。

d. 感謝恁，看 khiai3 真費氣的款，我無才調用，暫時放棄。

汝上尾仔的問題：

「掠」台語會使讀 liah8，有「劫、奪」的意思，字義欠允。

「搦」嘛會使讀 liah8，古册有當做「捉、捕」的用例，參頂頭講的「別 (pat4)」共款，欲揣三幾個仔嘛無啥困難。

玄應《一切經音義‧卷二十二》：「搦觸，搦，執捉也。」是我在早的筆記，毋知隈 (ui3) 佗抄落來的，未記兮啊。

掃葉先若方便，才揢我鬥揣看有原文無 (bo9)。

多謝啦，歡迎繼續來罔 pho3 tau7。

阿這字箸漢朝著是「摩也」，顏師古講是「按也」。 massage 台語講「搦 ling5」，是有根據的。

另外，汝若欲攏用拼音字，我未有意見啦。不過，敢會使小參詳一咧；準若無啥特殊的原因，我希望拄著電腦介面顯示未出來的符號，汝才小改用一下仔標法，像「m̄-bat」用「m7-bat、毋 bat、ㄇㄇ├ bat ……」計攏好。無，汝看：

āu-ji̍t-á guá kái-tha̍k ……

Tio̍h-là, kóng-tiò "lia̍h", guá mā siūnn-tiò, Sian--e "lia̍h" iōng 搦 m̄ iōng 掠, lí-iû sī sánn?

一篇文章全空了了，看著 oo7 欲艱苦死。不過，我無堅持啦，在汝的意思。

以上是回覆汝2010,05,03,6:28pm的留言。