回覆「坐、臥、凡」的讀音等

新鮮料理君：

歡迎。關於汝2010,02,06的留言：

1. 多謝汝的補充。

請教一下，「我也來到他鄉 (hiong) 的這個省都」的「省都」，汝敢猶會記得文夏是講「seN / sεN2 都」，抑是「sing2 都」？

2. 無秘結，咧拼經濟啦，呵呵。阿嘛毋是「才盡」，無「才」欲哪會「盡」？

3. 咱一般計講今仔台語的優勢音 (我較愛用「時勢音」) 攏是偏漳腔佔較大面，表面上看 khiai9，確實無毋著，較可惜的是無人提出統計抑分析的數據資料來佐證。若用汝所講「媽媽請汝亦保重」的唱音做例，講台語是偏漳腔優勢，這猶有研究的空間；因為，文夏先生的話音，百面是台南偏漳的腔口。

關於汝2010,03,22日的留言，我箸彼暗著有借 掃葉先的所在，回覆過啊。佫略仔刊校一下，po 蹛 (tua3) 下骹。

1.「播、過、破、坐、臥」欲讀 -oo、-o 計攏會使兮，一般來講，泉州腔是讀 -oo。

照《廣韻》音切的下字，「播、過、破、坐、臥」攏是陳澧系聯反切條例中同用 (如：坐、過)、遞用 (如：播、過)，是迭韻；所以汝「坐」讀 -o7、「臥」煞讀 -oo，這著是去濫著。

汝問講恁的讀法敢著，呵呵，欲講著嘛著，講毋著嘛是毋著。未要緊啦，聽有著好。無，汝看，臥、吾貨切，貨、呼臥切，「臥、貨」系聯反切條例是互用，這兩字的讀書音是愛讀 kang5 韻兮。但是「臥」讀 -o 的所在，比如同安、廈門，「貨」讀 -oo，嘛是變無迭韻。

2. 我引用的資料，若無提出無 sang5 的看法，著是認同 in1 的觀點。

林金鈔先生講，「凡」的聲母是「h-」，中古漢語的唇音少數的字在閩南語是讀「h-」的。伊是講「中古漢語」，箸上古漢語讀做「p-」，汝問我敢有證據？

證據喔？

中古「奉 (上古音是『並』)」母的字：
肥，hui ← pui
飯，huan ← png
縫，hong ← pang
佛，hut ← put
婦，hu ← pu
範，huan ← pan

真簡單著看會出來 (lai9)，讀書音是按中古「奉」的輕唇音轉化的，咱的音韻體系無輕唇音，所以國語的「飛機」有人會讀做「灰雞」。

但是話音猶保留上古「並」，讀重唇音 p-，有的所在會讀 ph-，像「並且」讀 ping7、「比並」讀 phing7，「並」母無 h-；「縫衫」讀 pang5、「空縫」讀 phang7，因為「縫」是「奉」母的讀書音是 h-，「裁縫」著讀 hong5。

阿嘛免講徦隈 (ui3) 上古音去，箸南北朝的時，「凡」都猶有讀唇音的。

《洛陽伽藍記‧卷五》：

時隴西李元謙樂雙聲語，經文遠宅前過 …… 元謙曰「凡婢雙聲」
(史語所，1992：38下)

「婢」台語讀 pi7，「凡、婢」是雙聲，所以古早「凡」有可能是發 p-。

凡勢「凡」參「範」共款，這兩字雙聲佫迭韻，攏是 huan ← pan，這敢無可能？

簡單寫，安呢敢有算？

另外，我回覆汝「宜蘭腔」的時，有講：

國語有介音「ㄧ」抑是無介音，像「縣 (ㄒㄧㄢˋ)、影 (ㄧㄥˇ)、鋼 (ㄍㄤ)、榜 (ㄅㄤˇ)」等，攏是「開口」音，宜蘭腔講 -ng。

這內底有一個 ting5 taN5，「縣 (ㄒㄧㄢˋ)」應該是屬其他所在台語無讀 -ng兮這類，所以宜蘭腔毋是講 -uiN (阿嘛毋是讀 -ng)，安呢才著。

失禮