講 ka1 lo2 (2)

● 幾仔年前，台灣有一 tsam3 仔咧 siau2 苦苓講演的錄音帶。pat4 揢同窗兮借來聽，內容未啥記兮啊，印象上深兮有四項：

1. 苦苓真 gau5 講話，台語講了有夠 liu3 兮。

2. 講大學聯考國文題目有一條是咧問《陳情表》作者的阿嬤 (maN2) 幾歲過身兮？苦苓講讀大學參李密 in1 阿嬤幾歲死有啥麼 (meh4) 關係？(這條我無把握，嘛有可能是咧問講李密幾歲死阿嬤)。

3. 頭一擺聽人揢「事實上」的台語講做「su11 sit44 siong33」。

4. 苦苓自稱伊是滿州貴族的後裔，漢名是「王裕仁 (參日本昭和天皇是 gio5 兮)」，講伊本姓「金」，是台灣第二代新住民，伊家己消遣家己講伊號做「愛新覺羅裕仁」。

伊咧講台語完全無腔，著是這句「事實上」聽著礙謔礙謔 (gai7 gioh8)。

● 照正常的講法「事實上」事實上愛講「事 sit11 上」才著。

真簡單嘛，台語連讀三字的話詞，除了尾字是輕聲，頭仔兩字攏計愛變調，像：「原則上、溝通上、形式上、大體上、基本上、實際上、文化上、經濟上、世界上、都合上、臨床上、理論上、觀念上、表面上、禮貌上、面子上、心理上、政治上、立場上、歷史上 ……」等，第二字絕對無咧講本調。

台語的「隨前變調」無適用箸「事實上」這句話詞，因為無論怎讀，「上」字計無變調。sin7 sua3 請教諸位，敢有人知影：

「我叫伊」讀「gua42 kio11 i11、gua42 kio42 i44、gua42 kio42 i33」，這三種講法的意思，差別箸 toh32，我想誠久，徦 taN1 猶捎無，所以這類的話詞，我暫時無揢算是三字連讀，毋知著無 (tioh8 bo9)。

● 個人的觀察：

今仔講「事 sit44 上」的人嘛未少，真 tsiuN1 欲投票表決，無的確會去與過半數。

不過，有兩種話音的人，「事實上」的「實」絕對讀著，會變調。

1.「事實上」講「事實 siang7」的人。

2.「事實上」講「sir7 實上」的人。

是講空氣在人激兮啦，「台灣大學」講「tai11 (變調) uan11 (變調) tai11 (變調) hak44」，「台大醫院」煞講「tai11 (變調) tai33 (無變調) i33 (變調) iN33」；「中山北路」講「tiong33 san11 (變調) pak44 loo33」的人，「不三不四」煞講做「put44 sam44 (無變調) put44 su11」……。凊采啦，聽有著好。

阿我是咧想講「不四鬼」敢亦會是這囉關係，著因為「不死鬼」的「死」無讀變調，煞衍生出來的新語詞？

● 若 (naN2) 像是許極燉講兮的款，大意是因為使用拼音的關係，讀的人照本宣科，一寡話音的聲調 (自然調，毋是本調) 煞講了去與走精去。

這我亦略仔有感覺，像「比如講我欲舉例，事實上伊的老爸是校長」，正常的講法是「比如 kong44 / kong24 我欲舉例，事 sit11 上 i33 e11 老爸是校長」，未少人會講做「比如 kong42 我欲舉例，事 sit44 上 i44 e11 / 24 老爸是校長」，聽 khiai9 著是 tiau2 tiau2、瘸瘸；但是「講話」in1 又佫讀做「kong44 話」，毋是讀做「kong42 話」。新眼光電視台有真濟主持人抑是來賓，攏有這囉情形，尤其是阿啄仔、或者母語毋是台語的人，特別較濟。阿一部分神職人員咧佈道的時，嘛有這囉毛病。啊，講「毛病」略仔不敬的款，改做「情形」。

是講準若用漢字，敢著未發生這囉情形？

今仔台灣國語嘛有綴台語用「…… 的說」句型，譬喻：

「這件可以啦，穿起來滿好看的說」，台語講「這領好啦，tshing7 khiai9 足媠兮講」；毋知 in1「足媠兮講」是唸做「足媠兮 kong44 / kong24」，抑是「足媠兮 kong42」。

「就是他嘛，有夠出名的說」，台語講「著伊毋 meNh32，足有名兮講」；毋知 in1「足有名兮講」是唸做「足有名兮 kong44 / kong24」，抑是「足有名兮 kong42」。

● 閒閒無話講 ka1 lo2，心適代。絕對無存一點仔咧品並抑是剾削的用意，準若有一屑屑仔欲叫人「聞之者足以戒之」彼囉臭破布味仔，我嘛相信「言之者無罪」，這點愛聲明一下，maiN3 誤會。