周長楫教授語錄簡評011---厘仔甲

■ 頂篇 (簡評010) 我寫講「厘」是平聲，今仔佫略仔補充一下：
厘，是「釐」之異體字；里之切，中古漢語來紐之韻，上古漢語來母之部。台語來母讀 l-，之韻 (部) 的字像「治、痣、之、時 ……」會使讀 -i，來是濁母，之是平聲，「厘」台語讀做 li5。

除去做度量衡參貨幣的單位，用著「厘 (釐)」這字的語詞，箸台語無講介濟。
一般較定咧用的：釐釐仔 (分分仔的意思)、釐絲 (一屑仔，例，布薄釐絲仔)、支釐 (差不多是「痀摸 ku1-moo1、追求完美、吹毛求疵」的意思)、釐戥 (細支秤仔，漢藥店攏用 tse1 咧秤藥仔)。

最近佫發見一個號做「厘仔甲」的新詞，拄參頂篇的討論有一點仔關係，sin7 sua3 摕出來做題，寫一寡個人的看法。

■ 周長楫講：

【厘仔甲】 〈廈〉li2 a3 kah7 (案，換做TLPA 是 li5 a2 kah4) 舊稱用人力拉的平板貨車。∥可能是外來語，待考。
(《閩南方言大詞典》福建人民出版社，2006：7)

■ 事實上：

●「li5 a2 kah4」是日語「リヤ (ア) カ－」閩南式的讀法，台語亦有這個外來語詞。
日本話リヤカ－本來是指拖箸骹踏車或者モ－タ－サイクル (a motorcycle) 等的後壁，一種用來咧搬運行李、送貨的車仔，車身兩朋各有一個樅奶 (tsing5 lin1，rubber) 輦仔；這款貨車無一定著用車去拖，有時仔嘛會使用人去代替。

台灣以前有一種專門咧載貨的三輦車 (一半擺仔亦會載人)，車後斗大約仔四尺闊六尺長、無蓋 (kua3)，嘛號做リヤカ－。
後來有人揢改裝做較大台的，佫鬥一粒モ－タ－ (motor)，一般是飵柴油兮，著叫做「三輦仔ポンプ」，無佫再用「リヤカ－」這個名稱。

聽講，台灣古早用人咧拖的平板貨車，是用柴釘的。
車身頭前的中央釘一板樅奶箍仔，欲與人 phaiN7 蹛箸胸 kham2 的，安呢拖車著會使免全靠雙手的力；另外，雙朋邊仔攏有鬥一支若鋤頭柄的棍仔做車手；因為有兩個比リヤカ－佫較大的樅奶輦仔，這款貨車號做「大 gong7 輦」，參リヤカ－無 kang5。

● 字書的記載：
詞目：li33 a55 khah3 (案，音標後壁的數字是實際調)
日語假名：リヤカ－
日語羅馬拼音：riyakaa
釋義：台車、自行車後面的兩輪拖車 (教育部《臺灣閩南語常用詞辭典》)

リヤカ－
〔和 rear＋car 後方の車の意〕自転車の後ろに連結して荷物を運ぶための、ゴムタイヤを付けた荷車。人力でもひけるようになっている。リアカ－。 (asahi辞書検索)

リアカ－
【和 rear car】自転車などの後ろにつける2輪の荷車
(千曲秀版社外來語研究會(東京)《精簡最新外來語辭典》遠大，1982：453)

■ 我的看法：

寫做「厘仔甲」箸廈門講會通，因為「厘」廈門變調了後，讀做中平調；台灣部分偏漳、廈腔的所在，嘛無問題。
不過，箸台灣偏泉、同 (安) 腔的人，「厘」的連讀會變做低平調，讀起來會參「利仔甲」同音，這著未對同囉，講「利仔甲」無人聽有。

我箸 讀《台語常用詞正音》-10 講：

「我希望外來語 …… 無漢字的、欲讀參母語無共款讀法的、抑是漢文寫未出來的，像「あっさり、きもち 日文『気持ち』、だいじょうぶ 日文『大丈夫』、あげ日文『揚げ』」，著用原文。」

寫原文的理由，免佫重複囉；無漢字的外來語無用原文，會出啥麼 (sia2 me3) 問題，亦免相諍 (sio1 tsiN3)，上少，毋免勞煩以後的人佫去考求。

廈門話這個語詞，當時仔有的，這有影真歹講。
外位的語詞，經過本地語音系統的轉換，讀法攏計會小可仔「失真」，年代一個久，尤其像「リヤカ－」這款日本式的「和製外來語」，毋是英語、馬來語、俄語、別種漢語方言 ……，欲去考求「語源」，這著未輸咧海底摸針囉。

寫 kau3 tsia5，煞去想著周教授講：

「……《台灣閩南語辭典》所收的台灣閩南語方言特有的詞語。應該指出的是，在這些特殊詞語中，有些是台灣閩南話產生的新詞，有些本來是來自福建閩南話，但今天在福建閩南話裏已經少用或不用，而在台灣閩南話裏還經常使用。」
(《閩南方言大詞典》福建人民出版社，2006，〈台灣閩南方言概述〉：29)

著台灣話有的，閩南話無的，毋即是號做「特有」語詞；周長楫教授這寡話講了真無理氣，嘛是咧 hong5 海底摸針。

伊揀這兩百六十左右條的「台灣特有閩南方言詞語」，到底有幾條是「有些本來是來自福建閩南話，但今天在福建閩南話裏已經少用或不用，而在台灣閩南話裏還經常使用」？
阿有啥證據？

箸「台灣特有閩南方言詞語」內面，伊都揢 (ka7)「來自日語、日語詞、外來語、來自日語詞、來自英語」、「源自英語，日語借用，再由日語借入閩南話」、「源自英語，日語吸收，由日語進入台灣閩南話」攏注明徦 tsiah4 詳細，是按怎無徦一條「來自福建」？

準若有，敢未堪兮寫兩字仔，與較清楚咧？

著毋是像我箸網路發帖回文，家己咧寫爽看暢的講 (非連讀，但亦愛讀變調)，安呢敢未傷潦草 (lo2 tsho2)？

拜託的，寄望各位先進，若有符合周教授講的 (來自福建的台語特有詞)，才加少提供淡薄仔。
我出一個工整理整理咧，揢囥蹛網路頂仔，毋通 (m7 thang1) 佫與人誤會周先生是無話咧講筊栳 (ka1 lo2)。