《關於閩南話中效攝一等字的文白異讀》讀後筆記

《關於閩南話中效攝一等字的文白異讀》是樋口靖先生的大作，誠早以前著箸網路面頂讀過。文章論述的方法參結論 (小結)，個人無意見。只對我知影的範圍整理三幾條仔備忘骹注，著毋著無掛保證，阿若有異見，歡迎分享。

樋口先生是「根據音系內部的分析及近鄰方言的比較說明其事實」，不過有寡引用的資料，參今仔 (tsim1 a2 ) 部分人的看法有一屑仔爭差。當然，有可能欲忠於原著的關係，毋是失覺察。

一、大作引言「(膏) 也有讀為 _ckau 的讀法 (_ckau-_cliaŋ 膏粱，Campbell (1913) 將這個讀音對待為白話音)。」注釋1：「_ckau- _cliag- _csio 『膏粱燒』，Douglas (1899) 曰:“a strong sort of spirits . ”」

杜嘉德的《英廈大辭典》無漢字，甘為霖 1913 的冊毋知怎寫，照 2006 十九版八刷，確實kau1 liang5 sio1用「膏」。kau1 liang5 sio1是「高粱燒」，咱遮一般講kau1 liang5 tsiu2高粱酒，用「高粱」才合式。高粱較早阮一般是講 ko1 liong5，今仔變講 kau1 liang1，踮處內交談也維持原音腔。

「膏粱、高粱」有別，「膏粱子弟」阮讀ko1 liong5 tsir2 te3。

二、引言，「(高) ……一種是白話文的 _ckau (_ckau-hieŋ^ɔ 高興)」。

《廈門音新字典》(2006) 的「kau1 hing3 (高興)」「就心肝大意向的意思」；小川尚義亦用「高興」，林俊育先生講「愉快；真趣味；歡喜」，原著日語解說的「興味が多い、興が生ずる」省略掉。杜嘉德 (1873) 有收 kau1 hing3，漳州講kau1 hin3，攏有 to be very fond of or desire eagerly 的意思，辭典無漢字；羅啻( 1853) 唸kau1 hieng，寫做「交興」，意思參「合意hap8 i3、中意tieng3 i3、適趣siek4 tshu3」。攏共款，意思計是佮意(kah4 i3)、有合意(hah8 i2)、真想欲……。「kau1」是借音字，理由是若無佮意、無合意、無真想欲……，台語講「未交癮 (bue7 kau1 gien3)」，汝欲寫「袂高孍」嘛會使，均都共識無一致進前，據在人啦。

樋口先生認為「很明顯『膏粱』跟『高興』兩個單字都是從官話借來的。」

三、第三節，「竈 tsau^ɔ-_ck’a  (爐竈)」，竈 (灶) 孤一字才會當講是爐竈，tsau3 kha1是煮飵 (tsiah8) 料理的所在。大作的日文版翻做「台所」，所以我講有一屑仔個樣，可能欲忠於原著的關係。

四、注釋3：「『早』自白話音^ctsa、『稻』白話文tiu^ɔ都為例外，在此不談。『稻』很可能不是本字。」

豪韻唸-a，猶有「老虎 la7 hoo2、老鴞 la7 hioh8」，是阮長輩老沿兮的講法，後者王建設的《泉州方言與文化》有收。

又，尻，苦刀切，豪韻，《說文》：「尻，𦞠也。」「𦞠」著是「臀」，台語講「尻穿」案，一般計據 《山海經‧北山經》：「有獸焉，其狀如麋，其川在尾上。」郭璞注，川，竅也。事實上這個「川」是有爭議兮。我照阮漢文先的主張，用「穿」。

《教育典》講「尻」是借用字，無道理。豪韻字唸 -a 毋是台語敿 (kiau1) 閩南地區的專利。大田前路方言「臀 (屁股)」講 kʻa1 tsʻuŋ1 寫做「尻川」，「早」唸 tsa2。

「小學堂」仙游城關話「尻」唸 kɒ1，「早」唸 tsɒ2。據蔡國妹 2006《莆仙方言研究──兼論過渡性方言的特徵》，怹 (in1)「屁股、肛門」講尻川「尻川」」kɒ1 nuĩ1、「尻川空」kɒ1 nuĩ1 kʻaŋ1。效攝一等豪韻轄字「刀、老、早、靠、道……」韻尾攏是 -ɒ。

阮豪韻字本來是唸 -oo，像「水道頭 (tsui₂₄2 too₁₁7 thau²⁴5)、曹操 (tsoo₁₁5 tshoo¹¹3)、保庇 (poo₂₄2 pi¹¹3)」，有兮著綴時勢音著唸 -o，像「刀子師 (to₃₃1 tsi₂₄2 sai⁴⁴1)、考試 (kho₂₄2 tshi¹¹3)、套空 (tho₄₂3 khong⁴⁴1)」。亦有 -oo、-o攏用著，像「彼間店號做三元號 (hit₄4 king₃₃1 tiam¹¹3 hoo₁₁7 tsue₄₂3 san₃₃1 guan₁₁5 ho³³7)」。

五、大作第四節有講泉州 -ɔ、-o的語言層次，箸注釋 12，補充講也有一個可能，泉州的 - ɔ 是借用福州音，不而過樋口先生目前無按算採用這種見解。

在個人的理解，豪韻先秦為幽部，屈原《思美人》草、莽相押。莽，《廣韻》姥韻「莫補切，宿草」。《說文》段注古讀如模上聲。《詩 齊風‧還》「茂 ～盛、道 水～、牡 ～丹、好 ～奇」韻。又，魏晉進前，宋玉《笛賦》「寶 ～惜、道、老 敬～尊賢、好、受、保 ～庇、楚 西～霸王、茂」韻；《韓非 揚權》「道、茂」韻。兩漢枚乘《梁王菟園賦》「茂、苴、步 ～罡踏斗、菟 ～絲草」韻，班固《通幽賦》「補 候～、道、茂」韻。這寡韻字徦今 (kah4 taN1) 大多數阮依原唸 -oo，除了「好、老」有鼻化原音 -ooN，「受」讀 siu3，「苴」唸 tsir2。

台語「草」字的唸法(之一)

 

留言回覆--關於「吳國安先生是佗位口音」等

philip yen 箸 2016年7月22日13:27 留言：

(https://www.youtube.com/watch?v=bM9UvJK5yfE) 某大通識教育的主任問台語「我」第一人稱代名詞的guá，有何根據。高先生的回答妥當嗎？如果是否定的，您覺得應該怎樣答覆才完滿(以獲聘台語講師為目標)？又，高先生是哪裏的口音？(赫案，「高先生」應為「吳先生」之誤)

philip：

1. 吳 *先講𪜶是咧討論，徛在伊的立場佮理念，實話照講，我認為正確。不而過，準若是去應聘面試，會錄用 *未，暫且囥一邊；若有想欲爭取這個缺，改變應答的方式可能會較好。

台語漢文分 (bun1)「用字」佮「本字」兩種，吳 *先若像較主張「用字」的款，「用字」著照周長楫講 *兮，有訓讀字、同音字和方言字，個人認為「從眾」著好。來源誠濟，比喻講《彙音妙悟》、《彙集雅俗通十五音》、《台日大辭典》、《台灣語典》、古早戲曲的腳本、古文契、歌仔冊、電影電視本土劇字幕、台語流行歌的歌詞等等。

「本字」著是愛經過「書證」敿「證書」做音義根據，咱摕「我」這字來做例：

《易‧觀卦‧六三》「觀我生，進退」、《詩經‧小雅‧采薇》：「昔我往矣，楊柳依依；今我來思，雨雪霏霏」、《世說新語‧賞譽》「劉尹知我，勝我自知」等等，繁不勝舉。這寡用例攏是「書證」，應該無人會反對。

「證書」嘛幾𨙻 (lo7 / laN7) 張，我著揀幾個仔一般較有咧提起 *兮，來做說明。「我」這字，《說文》云「施身自謂也」，《玉篇》、《集韻》亦同。《廣韻》云「自稱」，《彙音妙悟》講「自曰也」，《彙集雅俗通十五音》是「稱自己也」，《廈英大辭典》翻做英語是「I, me.」《台日大辭典》翻做日語是「わたくし、わたし、ぼく、せっしゃ、おれ、おら」，《廈門音新字典》「我」著是「chheng-ho͘  ka-kī ê ì-sù」。

透過這兩種根據，咱著會使認定字義無問題。

當然，音理嘛必須愛解說 *一下，音理包含箸「證書」內底。

《說文》徐鉉音、《玉篇》、《廣韻》、《集韻》計做「五可切」，疑紐哿韻上聲開口一等。中古漢語疑紐咱發計「g-」較濟，像「疑 (gi5)、悟 (goo7)、言 (gien5)、牛 (gu5)」，歌哿箇韻組開口一等的轄字咱話音唸「-ua」亦是常例，像「歌 (kua1：歌聲)、拖 (thua1：拖命)、可 (khua2：小可)、籮 (lua5：米籮)」。疑是次濁、「可」是上聲，這字台語話音唸做「gua2」，參中古漢語的對應規律有合。又，《彙音妙悟》這字列箸「花」母「語」音陰上的欄位，《彙集雅俗通十五音》囥箸「瓜」母「語」音上上聲的所在，《廈英大辭典》做「goá」、《廈門音新字典》唸「góa」；「我」泉漳廈三地的話音計攏講「gua2」，從古徦今 (tsng5 koo2 kah4 taN1)。《台日大辭典》標「ゴアˊ」，換做TLPA台語話音嘛「gua2」。到此為止，對台語「我」話音的聲韻調攏計有根據，咱已經會使認定字音亦無問題。

「我」是台語「gua2」音義計攏允當，是「本字」未重𧸖 (ting5 taN5)。

2. 我毋敢確定，但是吳 *先生可能細漢抑是伊的成長過程，有未短的時間蹛箸老偏泉腔的所在，甚至伊的母語著是海口腔。

寢 (tshim2) 聽 *起來，吳 *先是偏漳腔，有濫著淡薄仔偏漳廈腔。事實上可能毋是hah4簡單，我先用伊一句話做例。箸 (02：24) 的時，伊講：「咱來講漢字的問題，若是講，咧講台語伊的這個文字化hooNh4，攏差不多十擺九擺九著會起嚾家」。

「lan⁴⁴ lai¹¹ kong⁴⁴漢字的問 te²⁴」，「咱、講」變調做第1聲，偏漳廈腔，「題」講「te5、tai5」攏是偏漳腔。但是「來」的連讀變調做第3聲，這是偏泉腔。

「若是 kong⁴⁴，咧 kong²⁴ tai¹¹語伊的這個 bun¹¹ 字化hooNh4」頭一個「講」變調做第1聲，是偏漳廈腔，第二個「講」變調為第5聲參「台、文」變第3聲，這是標準的偏泉腔。

「攏差不多十擺 kau²⁴ bai²⁴ 九著會 khi²⁴ 嚾家」共款 *兮，第2聲的「九、擺、起」變調做第5聲，偏泉腔。(題外話，趣味趣味，台語講「差不多」的時，一般「差」攏變調做第3聲，安呢「差」的調類是啥？」

箸 (03：22)「從到今」若是偏漳廈音普遍是講「tsing³³ kau⁴² taN⁴⁴」，吳 *先是講「tsng¹¹ kau⁴² taN⁴⁴」，「從 (tsing5) 古早、tsing2 甲 (a fingernail & a toenail)」著若偏泉腔的人講「tsng5 古早、tsng2 甲」，「從」變調做第3聲亦然。「漢學」伊唸「漢o²⁴」，這嘛是偏泉腔的特徵。

箸 (04：13) 的時，「汝」伊唸「lir2」，無圓唇的後元音走 *出來矣。佫來，汝會使斟酌看唸舌根聲母後壁「i」的喙形，比論「去 (ki3)」，伊的「i」有當時仔音值著是 [ i ]，真懸、喙脣是扁 *兮。參咱一般的「i」無同，箸這個條件咱的「i」台語大部分會發做較鬆、較下 (ke7) *一屑仔的pin7 tuaN7音 [ ɪ ]，是毋是受偏泉腔 [ ɯ ] 所致，我毋知。

伊的實際調值咸鹿港、台西計無共款 (比論陰平本調毋是中平調，陰上本調毋是高平調)。

總講一句，用這三五分鐘視頻的資料，我能力有限，無才調嘛無興趣佫再做進一步的分析，歹勢。

3. 我講 *過，毋通捎一個網址著與按頭徦尾tau7 tau7 a2去摸，哪會無愛小注明一下仔時間咧，驚我傷閒？下不為例。