新竹人的工課

tsia5的「新竹人」指新竹老市區的在地人，日常口語大部分是偏同安腔。怹ia2有-ir韻，比如「四進士(戲齣的劇目)、士子、子思」講「sir3 tsin3 sir7、sir7 tsir2、tsir2 sir1」；怹(in1)上聲連讀頂字變高升調，像「滾水、水準、準擬」講「kun²⁴ tsui⁴²、tsui²⁴ tsun⁴²、tsun²⁴ gi⁴²」；陽平連讀頂字變低平調，一般「糜粒、麥粒」不分，除非有保留-er韻的地區或者家族。保留-er韻的人數較少，「火、果、過、袋、雪、說、郭、襪」講-e敿-eh的人較濟。這毋是偏廈腔，今仔同安舊屬的杏林、集美等所在嘛是發這個音，當然，廈門古早嘛是同安所轄。毋管唸-e、-eh抑-er、-erh，怹的傳統「豪(皓號)」韻唸-oo，「侯(厚候)」韻唸-io，嘛參廈門的-o、-oo無同。

有一個較特殊兮，「做穡頭(勞動工作，怹「做穡」一般單指農務)」，若「炊粿」讀「tsher1 ker2」的人講「khang1 ker2」，是毋是像教育部教育部網路辭典寫 *兮，有人講做「khang1 khir3」，我著毋知。但是我知影「炊粿」讀「tshe1 ke2」的人，怹是講「khang1 khi3」，講「khang1 ki3」的人箸新竹絕大占多數(包括「第、體、摕」ia2佫講「tue7、thue2、thueh8」的人，比如前中研院長李遠哲先生怹)。「khang1 kher3 / khi3」一般攏寫做「工課」，新竹人以早「課」*字讀「khoo3」，比如「音樂課、課長、兵役課」講做「音樂khoo3、khoo3長、兵役khoo3」，無讀「kher3、khir3、khi3」。阿「工課」偏漳腔講「khang1 khue3」，偏廈門腔講「khang1 ke3」；我了解的範圍，無論台語抑閩南話，「工」讀「khang1」、「課」讀「kher3、khir3、khi3、khue3、khe3」攏是孤例。是有想欲「從眾」，m7 kuh8「從」了膽膽(tam2 tam2)。

「頭路」箸怹hia5會使咸「工課」共款用做「職業、行業、代誌」，但是無「做穡頭」這個意思。「功課lang3 tsam7(「工課縫」的意思)」、「工課ia2未煞」、「bau7工課」、「功課場兮(讀「tiuN¹¹ e²⁴」)」、「工課(尾)收縮」怹無人講做「頭路lang3 tsam7」、「頭路ia2未煞」、「bau7頭路」、「頭路場兮」、「頭路(尾)收縮」。「引(有人寫做「允」)工課」佮「引頭路」是兩回事，教育部的網路辭典這個詞條應該有討論的空間。