學生尻穿先生喙

頂禮拜五(八月初三)歇晝的時去tshih8電視，中天新聞台拄咧講以前峨嵋有三個人去hong5銃殺的故事。去想著舊年清華先tshua7我去怹的竹筍園，著是箸hia5。三四甲當(tong1)，自本準備欲種荔枝，聽講愛幾十年才會當收成，著放棄囥咧據伊拋荒。我笑伊好額毋知，伊講he1是怹老爸少年的時，去bau7一寡學生囝仔的作文來改，按上頭仔一份一箍，一直做徦一份五箍，安呢勻仔儉(khiam7)khiai3綴會仔蓄(hak4) *兮。我講連作文著會使倩人改，做老師哪hiah4輕鬆；古早有一個老師用電風吹試卷決定分數的笑話，拍算毋是空穴來風。清華先講梁啟超pat4寫過講有一個考官，去某一個縣城主持考試，結果真失望，免強錄選三名，評語計三字，頭名是放狗屁，二名兮是狗放屁，第三兮是放屁狗。怹老爸彼陣的老師連三字都會使省khiai9，有夠嬾屍。伊講梁啟超這個狗放屁的笑話介有名，m7 koh8，真少人知影箸梁氏的進前，著有人寫 *過啊。這我著有影無研究，轉來台北伊著去hiau1一本《笑林廣記》，叫我摕轉來比較看bai7 *咧。

自底想講這嘛毋是啥要緊的代誌，徦這兩工仔想 *著，才摕來罔掀罔phien2。書薄薄仔，差不多兩百頁，但是看欲徦四分之三，才去揣 *著。參梁啟超寫的確實有一屑仔爭差，抄出來逐個心適 *一下：

一學究與人看文，遇文謬者，最喜批放狗屁三字，或勸之曰：「先生批文何必用此批，大覺不雅。」先生曰：「此乃一等批，還有二等、三等者。」或究其詳，先生說：「第一等是放狗屁，放狗屁者，人放狗屁也，尚有人言，不盡是狗屁。第二等是狗放屁，狗放屁時甚少，偶一放之，屁尚不多。第三等，放屁狗，狗以屁名，檢(簡)直的全是狗屁也。」問者釋然。(遊戲主人《笑林廣記‧學究批文》利大，民75：140)

有某學政按試某縣，縣中童生無一能成一八股文者，免強依學額取錄三名。其第一名批語，為「放狗屁」，第二名批語為「狗放屁」，第三名批語，為放屁狗。有問者曰：「同用此三字，而有一二三等之差，何也？」學政曰：「是在文法，顧諸君不解耳。試一讀馬氏文通，當知其用。夫第一名者，是人也，不過偶放一狗屁耳；第二名者，是狗也，其他種能力或尚多，不過偶放一屁耳；至第三名，則是狗也，捨放屁外，無他長技矣。」(梁啟超《梁啟超評論文集》台灣新生報社，民69：379)

《笑林廣記》同治年間著有印本，梁氏是光緒的時才出世 *兮。準若梁氏去改 *兮，個人感覺改去真好。按伊的短文，當時咧讀的人會當了解：(1.)童生考秀才，是縣試，有名額保障。(2.)因為詞序的無kang5，詞義著會改變。(3.)《馬氏文通》是咧講文法的冊。這箸怹彼的時代是有必要 *兮，寓教於樂，未拍損任何一個機會，大師出手著是無共款。阿後 *來的人，嘛會使按tsia5加減仔知影一滴仔以早的資料。我有一個脫線的想法，這兩個笑話若揢翻做羅馬拼音，效果毋知會按怎。

箸《笑林廣記‧學究批文》的後壁彼篇，號做「上下倒置」，嘛真趣味，不過，是「限制級」*兮。幾個仔「兒童不宜」的語詞，我小シアゲ *咧，罔娛樂：

閻王命鬼卒去搦一個趁飵查某佮一個教冊的先生到案，閻王看著妓女，著講：「汝水性楊花，廉恥不顧，流毒人間。」著判欲將伊賺飵的家私割khiai9。sua3 *落去對先生講：「汝好為人師，妄施教誨，誤盡蒼生，彼支臭喙愛揢汝割 *落來。」鬼卒著照閻羅王的判決動刑。這個時陣，閻王拄有急事喝(huah4)退堂，兩個人跪箸hia5看四邊無人，教冊的著講：「趁這個機會緊suan1。」參詳好勢，兩個人著將hong5割箸邊仔的物件緊捎khiai9鬥 *咧著lang2。結果傷兇狂，摕了毋著個(e5)，趁飵 *兮去安著先生的喙，先生去鬥著趁飵 *兮的家私，走轉去凡間。閻羅王代誌辦煞，知這兩個去與走 *去，著下令叫鬼卒去陽世搦人。鬼差來kau3先生的學堂，看著先生用妓女hong5割khiai3的物件咧講冊；走去kha1 sau1間仔一下看，趁飵查某竟然怙先生的喙箸hia5咧接客，照挑(thio1)不誤。

坊間傳說一寡去年羹堯怹tau1應聘的教席，看挂箸書房的頂聯「不敬先生天誅地滅」才咧暗爽，佫看下聯寫講「誤人子弟男盜女娼」，著驚一下緊請辭。年大將軍做這幅對聯的靈感，毋知參這篇「上下到置」有關係 *無。不而過一般的看法，這段笑話應該是咧詼(khue1)當時一寡毋負責任的教書先生，趁飵 *兮減采是去hong5帶(tai3) *著，掃著風颸(thai1)尾，衰徦無鼻落鼓。