台語半桶師雜記

留言回覆---「航」台語怎讀等

2012-01-05T08:05:00.002+08:00

philip yen箸2012年1月4日下午4:27留言：

同意你的說法,但你誤解了,我只希望說理跟事例並重.
不懂"tsong2 mooNh9免講一個仔「根據」*咧？"裡面的"tsong2 mooNh9",有人說這是個老台語,有人說現在還有人在用,不過幾種不同的解釋:
a,tsong2 mooNh9就是"總是".
b,tsong2 mooNh9就是"怎能".
c,tsong2 mooNh9就是"總之",漢字寫成"總麼".
d,tsong2 mooNh9就是"總要".
反正眾說紛紜,辭典上找不到,你就釋疑一下吧.
又,告訴我tsong2 mooNh9就是"總要"的人,想"考"你,台語一字多音,那"航"字只能讀hâng或有其他的念法?
想請教的還很多,不過你也忙.呵呵

philip：

1. 關於「tsong2 mooNh9」：

1-1. 本字是啥，我毋知。

1-2. 這句話猶有人咧講，比如素珠仔箸「豬哥會社」節目內底參主持人的對話，著pat4用 *過；不過，無講介普遍著是。

1-3.「tsong2 mooNh9」的意思真oh4解說，欲準「哪通(thang1)、哪會使、總嘛愛」攏會使 *咧，講「豈可、豈能」著比較精確，所以我選「b,tsong2 mooNh9就是"怎能"」。

2. 關於「航」*字台語的讀法，一般是讀hang5，阿較新版的字辭典嘛標安呢。我同意阮漢學(gun2 han3 oh8)先生講 *兮，讀hang5是因為台灣國語影響的訛讀，「航」的文音是hong5，話音是phang5：

2-1. 所有古早(1949進前)閩南語系的字書，無徦一本有注hang5兮，了後的辭典才有這音。無獨有偶，箸閩南人寫的辭書亦共款，可能亦是受「推普」的侵染。

2-2. 徐鉉講「航」的本字是「𣃚」，「今俗别作航，非是」。不過「航」*字箸我看著的版本《淮南鴻烈》、《方言》攏有出現 *過。我欲講的是「𣃚」从方亢聲，台語讀-ong、-ang是有合對應規律，發ph-敢會是因為「从方」的關係？我毋知。不過「欣，从欠斤聲」，咱哪會參「欠」sang5款發-m，未曉。

3-3. 毋管啥mehN9原因，古音亦好、誤讀亦好，總是，「航」咱以前確實有影讀做phang5，我報汝聽幾te3仔老歌：

文夏《思戀的夏威夷航路》(http://www.youtube.com/watch?v=oMqIY_9v9gI)，「想起這陣船欲開啦，真快樂的出航啦」、「啊，夏威夷，思念的航路，啊，夏威夷」、「熱情的青春人，欲出航來去」；《夏威夷航空信》(http://www.youtube.com/watch?v=dyysu4WtILI)，三句「夏威夷航空信」；所有的「航」計發phang5；kau3徦葉啟田著唱做hang5(http://www.youtube.com/watch?v=LGfjD3nhVRA&feature=related)。

文夏先生是台南偏漳腔，洪一峰先生日常的話語帶(tai3)偏廈腔，一般基本的語詞亦有保留偏漳腔；不而過伊早期灌的曲盤，計是時勢音，是偏廈腔。今仔汝聽伊《夜間飛行》(http://www.youtube.com/watch?v=vteYgFaWlHI)，「坐飛機伴著前後，青紅航空燈，已經是離開地面，何必再傷情」，這條「全廈腔」(案，古早台北偏廈腔「可」嘛的khoo2，「可愛的女性」唱khoo2 ai3 e5 lu2 siang3，算當時的偏廈門腔；毋koh8伊「可愛」聽khiai9足sing5唱做「khooN2 ai3」，「何必目屎滴」若像唱hoo5 bit4 bak8 sai2 tih4的款，這著濫著偏泉腔)的歌曲，「航」嘛是唱phang5。

2-4. 除了hang5、hong5、phang5以外，小川尚義亦另外讀做khang3，聲、調無合韻書音切的對應規律，拍算是借字的款。

3. 最近較無閒是有影，阿我這世人上驚考試，毋管是考 *人、抑是與人考。欲討論、pho3 tau7、拍鬧(la7)涼都OK，後回若用「考」*兮，我拒絕。(1)都無咧欠 *恁兮講(講，讀變調)，(2)欲考 *人？四兩箢仔有小除 *咧無？恁自信這方面有加別(ke1 pat4)人外濟？

4. 我毋知汝佮mysky使用啥款的「字型」，引號(“　”)箸我電腦版面會亂碼變「& q u o t ;」，看著oo7欲艱苦 *死；用新式的「」、『』，抑是換做細明體、Arial……著好 *啊嘛。都合若會拄好，勞煩汝小改 *一下，歹勢neNh9。

【轉載】施炳華《黃春明演講現場實錄》

2012-01-05T06:38:00.001+08:00

這篇施炳華教授的大作《黃春明演講現場實錄》，是柯柏榮先生PO箸Facebook頂頭，網頁是：

https://www.facebook.com/notes/%c3%a6%c5%b8%c2%af%c3%a6%c5%b8%c2%8f%c3%a6%c2%a6%c2%ae/%c3%a9%c2%bb%c6%92%c3%a6%cb%9c%c2%a5%c3%a6%cb%9c%c5%bd%c3%a6%c2%bc%e2%80%9d%c3%a8%c2%ac%e2%80%ba%c3%a7%c2%8f%c2%be%c3%a5%c2%a0%c2%b4%c3%a5%c2%af%c2%a6%c3%a9%c5%92%e2%80%9e-%c3%a6%e2%80%93%c2%bd%c3%a7%e2%80%9a%c2%b3%c3%a8%c2%8f%c2%af/10150208396477825

咱姑且不論施教授對黃春明先生的反駁，敿黃 *先共款觀念的人會當(tang3)接受 *未(bue9)；不而過，準in1若有看著，上少，in1未佫再死諍講「台語無文字、台語無法度用文字寫、上好是用華文寫」，施教授功德無量。

柯 *先的PO文下骹，有真濟網友做回應，寫了攏未䆀，建議若有閒去參考bai7 *咧。照這個情形看khiai9，關心母語、對推展母語有熱誠的人參in1台語文的程度咸素養，並毋是我過去想兮安呢若爾，有必要修正。

黃春明演講現場實錄/施炳華

我看各報的記者所記的，攏是衝突的表象，無深入報導引起衝突的原因。我佇現場，發覺黃春明先生所說的攏是歪tshua̍h的語言政策思想，所以誠認真聽、認真記；卜等交談的時來發問，無想著發生衝突煞無時間問。

黃春明先生靠勢伊文壇有名的身份來談〈台語文書寫與教育的商榷〉，我聽出伊對這個主題並無有深入的了解；無深入的了解閣敢站佇台頂用華語烏白濺(tsuàⁿ)，連台語諺語嘛無用台語講，煞翻做華語來講；對象是台下大部份是學中文抑是對中文文學有興趣的人(小部份是研究台語文學者)，影響是誠大的。伊所講的，值得討論的有幾點：

1. 語言愛佇生活中學，毋免佇學校教。

我的反駁：若是家庭裡父母對囝兒攏講母語、甚至教母語，台語就袂行到即碼淒慘落魄的地步──青少年台語講袂lìn/liàn tńg，無想卜講台語。就是因為家庭無法度講、教，咱才會爭取卜佇學校教。閣再講，卜共台語提昇到語言書寫的程度，猶是有需要佇學校教。

2. 教育部無準備好就佇學校實施：音標無統一，漢字烏白用。

我的反駁：咱準備好未？好矣，音標、建議用字攏陸續咧公佈。2006年教育部已經公佈台羅音標，到2010年已經有七百字的台語建議字、詞。佇漢字來講是安爾，若閣講記音的羅馬字，按台南教會公報(1885)開始，嘛有百外年的歷史。早就準備好矣，是咱無la̍k著權，無法度隨時教育台語佮台語書寫。

3. 伊並無反對佇學校實施母語教育，但是愛等準備好才來教。因為文字是愛經過足久、一百年才會當形成的。

我的反駁：伊對台語書寫、台語教學的實際情形根本無了解，伊的台語文書寫的觀念，嘛干礁限制佇漢字書寫。羅馬字，毋管是教育部的台羅、教會白話字已經有法度自由書寫。

照伊講的，愛等台語文字較完美咧，才佇學校實施母語教育；到迄陣，台語早就被消滅矣。無語言，卜那閣有文字呢!

4. (因為蔣為文的抗議，黃上台繼續講)全世界得著諾貝爾獎的作家有四、五位是用西班文寫作，毋是用伊的母語寫作。伊閣講：用西班文寫作的遐个國家，in的母語就消失矣。

我的反駁：全台灣逐家攏用華文寫作，無的確會出現一位得著諾貝爾獎的作家，到迄(ht)(赫案，應為hit)陣，台語早就完全被消滅矣。

5. 台語無統一，無法度用文字寫。伊舉例講：伊是宜蘭人，作家李昂(本名施淑端)是鹿港人，兩種話無啥仝，一鄉一腔，卜按怎寫？

我的反駁：我(施炳華)嘛是鹿港人，我寫的恁敢看無？

結論：

黃春明先生佇中文寫作有伊的地位佮成果；毋拘，佇台語文書寫佮教育的範圍內，伊是「毋捌閣假博」。伊對語言學一點仔常識都無，語言是文化的上重要的要素，語言若消失，文化就無去矣。原住民會當證明；所以即碼的原住民嘛卜用in的文字來記錄in的文化。

這是一个陽謀，黃春明先生演講的主題參「百年小說」無關係──「百年小說」無台語小說，in攏共伊看做無即種物件，家己共目睭ng起來，講「無看見，無看見!」。主辦者是卜借用伊寫作鄉土小說的名聲來教示濟濟的台灣青年──在座共伊贊聲的大部份是學中文的學生──台語無文字、台語無法度用文字寫、上好是用華文寫。

留言回覆Jan. 2012

2012-01-05T06:18:00.002+08:00

■

■ 韻書的音切是考求台語本字的依據

小明箸2012年1月2日下午11:16留言：

古漢語不是用韻書的切音來標示，韻書標的是讀書音，不是語音（白話音）。就是因為古漢語有一字多音的問題，才會有韻書制定標準音的出現。

台語用字很簡單，但若用韻書來切音，就會像推薦用字一樣，讓人摸不著頭緒。想知道台語字的規則，去找一本＜講臺語其實不難＞的書，第八頁開始是用字規則，根本不須要韻書，字的對映關係就在裏面。

很多臺語發音，目前都走調了，當然找不到字，但您看完明代話本三言二拍，就可印證＜講臺語其實不難＞的規則。

小明：

汝好，歡迎。

1. 台語無法度全怙白話音表達，阿白話音嘛會受標準音的影響，一直咧改變。當然，標準音嘛一直咧變，南北朝、唐宋、明，嘛未一致。

2. 韻書共款亦有一字多音，標準音是通語的意思，毋限定是一字一音。

3. 台語的用字本來著真簡單，但是欲討論抑考求本字，著無像桌頂拈(niN1)柑hiah4涼、hiah4聳(sang2)勢。

4. 韻書的音切，所有漢語方言的文白讀參域外漢字譯音，絕大多數攏會當(tang3)揣著對應關係，是一種佐證的依據。我了解的推薦用字，準若照音切的音，大部分計無問題。汝「摸不著頭緒」，敢pat4想 *過，是毋是家己的原因？

5. 講台語並無困難，全世界有幾那千萬同語系的人咧用。台語用字的規則著是「從眾、約定俗成」，嘛無外複雜。

6. 歹勢啦，我著讖 *過啊，汝彼本《講臺語其實不難》的內容不過如此如此，阿我嘛毋是空喙哺舌(像是汝「礤床兒」硬摕一個辭典無收的新詞彙「菜擦子」來鬥；「刨擦」哪是同義詞？「刨」是削，「擦」是磨)。

無，汝講我聽bai7 *咧，「誰毋知影『辛』為『辣』之義？為著解釋『辛』的字義，佔去遮大的篇幅，敢有這个必要？反觀，『辛』是按怎會使唸作hiam？卻連一句話攏沒交待」。(這是網友mysky箸《互阿明師的公開批》的意見之一，http://tw.myblog.yahoo.com/myway-letusgo/article?mid=561&prev=565&next=550)。

7. 不只台語，所有漢語方言包括北京話，都攏有有音無字的現象，原因誠濟，連讀合音、語音的轉變、訛傳是其中之一。不過，講誠濟台語發音，因為「走調」所以揣無字，這我的較有興趣，敢會使摕兩個仔例來分享 *咧，逐家罔研究。

8. 準若有欲佫回應，我建議汝用台文寫，漢字、拼音都可以，kun1 luh8「寫臺語其實不難」，敢毋是？(2012年1月4日下午12:19)

留言回覆Dec. 2011

2011-12-07T08:00:00.010+08:00

■

■ 風聲pong3影

新鮮料理人箸2011,12,12,09:10留言：

你講：「獅豹雨」或者「屎潑雨」著差了有較遠。
但是有人說本字是「獅豹雨」，伊講閩南、台灣話的“西北雨（sai-pak-hɔ⊦）”是“獅豹雨（sai-paʟ-hɔ⊦）”的音變。雷陣雨的特點是來得突然、雨勢兇猛、雨點大，通常伴有雷鳴及閃電，令人畏懼，於是閩南的先人就把這種雷陣雨叫做“獅豹雨（sai-paʟ-hɔ⊦）”，用野獸“獅子”及“豹”的兇猛來比擬雷陣雨的急驟與猛烈。而因“雨（hɔ⊦）”的聲母是舌根輕擦音[x]（本書用 h 表示），“豹（paʟ）”和“雨（hɔ⊦）”連續發音時，“paʟ（豹）”的音尾就容易產生同是舌根音的、不除阻的清塞音 k，paʟ 就變成“pak”（陰入聲）（paʟ-hɔ⊦ → pak-hɔ⊦），“獅豹雨（sai-paʟ-hɔ⊦）”就變成“sai-pak-hɔ⊦”，時間久了，大家忘記獅和豹，把 sai-pak-hɔ⊦ 用同音字“西北雨”三個字書寫，把理據模糊掉了。
淺見「獅」台語就是講sai1 a2，問題出佇「豹」的連音變化，這位先生講，“豹”字，《廣韻》北教切（去聲、效韻），效攝、二等、開口、幫母。依反切，台語應該讀 pauʟ，但現在只讀 paʟ，這是韻尾 -u 弱化、消失所致。下面幾個效韻的字也有相同現象：敎，古效切，文kauʟ／白kaʟ；孝，呼敎切，文 hauʟ／白 haʟ（帶孝，tuaʟ-haʟ）；罩，都敎切，文tauʟ／白taʟ（ke-taʟ，雞罩）；敲，苦敎切，k‘aʟ。
請教赫--先生，你認為「差了有較遠」是指音？抑是指義？

料理人：

我文章內底囥箸「因聲求字」這部分，是指「聲」差了有較遠。若(naN2)汝講 *兮，「獅」台語講sai1無問題，我認為「豹」講pak4，差了著較遠。我無意對「這位先生」有無禮貌的言語，嘛尊重伊的講法，下骹的闡述是我家己認為「差了有較遠」的理由。

1. 我無贊同這位先生的解說：

1-1. 豹(pa3)、雨(hoo7)連讀，pa3受h的影響，「豹」會變pak4？個人的看法嘛是無可能。音變是有條件 *兮(參閱：連音變讀嘛愛有規律)，我講幾個仔例：

ma7 ho2(嘛好)未變mak4/8 ho2

ta3 hun5(罩雲)未變tak4/8 hun5

ka1 hoo7病房(加護病房)未變kak4/8 hoo7 piN7/peN7 pang5

pa3 her1/he1/hue1(霸灰，鄧小平開放前閩南話猶未啥濫著台語所用兮，著是咱講的「紅毛塗」)未變pak4/8 her1/he1/hue1

tshim1 mng5 tah8 hoo7(侵門踏戶)未變tshim1 mng5 tak4/8 hoo7

pha1 hng1(拋荒)未變phak4/8 hng1

我有影想無台語有連讀前字元音a，受後字聲母h影響，會變入聲的語例。準若是用特例做解說，我會規氣講「豹」的古音著是讀pak4，不而過這嘛是用諧聲偏旁去推兮，揣無這字讀入聲的證據，講了嘛心虛未在膽，上要緊的是台語無這款讀法。

1-2. 台語聲母h是喉音，毋是舌根輕擦音(案，應為「清」擦音)x-，汝用台語讀「海、河、漢」看bai7，氣流敢有碰著(pong7 tioh8) 硬顎後壁的軟顎？汝若感覺未 *出來，佫用國語讀「海、河、漢」bai7 *咧，看佗位無kang5。這毋是我狡獪愛咸人盤喙錦，汝敢pat4看人揢台語、包括閩南語將這個聲母標做x-？

董同龢先生是有無sang5的看法，伊講：

據作者的觀察，整個閩南話的喉擦音h恐怕不如在別的方言裏那麼簡單。大概是氣流從喉頭經過的時候，軟顎也偶而略略下降，於是氣流兼從口鼻而出。參照自己的記錄和Douglas的字典，作者發現有些h 聲母的字，尤其在上聲，陰去，陽去三調，元音有時鼻化有時不鼻化，如hi7和hiN7都指「耳朵」。(還有些例和相關的現象，參看下文韻母的比較一。)因為元音的鼻化和不鼻化在一般情形下都是分別很嚴的，所以這種不定的現象只好說是受h的特殊影響而來。

所謂次清聲母的送氣，從語音學上說，就是在全清聲母之後所加的(較微弱的)喉擦音。所以閩南話的次清聲母也有和h一樣的特徵。

我欲講的是著算安呢，董氏亦無認為閩南語這個聲母舌根音的x。

另外，個人的看法，伊講「整個閩南話的喉擦音h恐怕不如在別的方言裏那麼簡單。大概是氣流從喉頭經過的時候，軟顎也偶而略略下降，於是氣流兼從口鼻而出」，這著。因為這有一部分是受韻母的影響，像「火、好」讀hooN2。一方面是個人的習慣與「元音的鼻化和不鼻化」，箸閩南有，箸台灣亦有，並無限定喉音或者次清聲母，比如，有人「肉羹(keN1)」參「肉雞」講「肉ke1」，「舐」講tsi7、tsiN7攏會通，「蔭豉」講「蔭si7」抑「蔭siN7」嘛在人爽 *兮(案，我實在是無啥愛佫「批評」台灣教育部的網路字典，毋kuh8有當陣仔真正擋未著/tiau5，新竹偏泉腔明明著講蔭si7，阿蔭豉、豆豉、豆poo5根本是三項無共款的物件嘛)。

1-3. 依照音切，台語「豹」讀pau3，這是文讀音，今仔嘛有安呢讀阿，比如講「豹頭環眼 pau3 thio5 huan5 gian2；君子豹變 kun1 tsir2 pau3 pien3；羔裘豹飾 koo1 kiu5 pau3 sik4，學殊半豹，技媿全牛hak8 su5 puan3 pau3，ki7 khui3 tsuan5 ngiuN5」等，-u並無消失或者弱化。-au箸台語的話音亦毋是罕見，「鉤、狗、臭(tsau3)、猴、厚」計是日常用語；汝講的這位先生所舉的例，不但文讀的語詞猶讀-au，著是敿話音濫咧講的語詞亦共款，像講：敎，教育(kau3 iok8)；孝，孝敬(hau3 king3)；罩，桌罩(toh4 tau3)敲，敲鐘擂鼓(khau1 tsing1 lui5 koo2)。徦taN1效攝開二的字，咱嘛足濟文、白共音兮，照常讀-au，無變-a，例，包、巢、卯、拗、效……。汝敢會當揢我解說 *一下，啥款的情形抑是講條件之下，效攝開二字台語-u會弱化乃至消失，啥款的情形抑是講條件之下，效攝開二字台語-u會佫保留著(tiau5) *咧？音變毋是各取所需、在人呼兮。

2. 事實上「獅豹雨」箸字義上，這位先生的解說嘛無介周延，「令人畏懼」kan2毋用「蛇蠍雨、虎豹雨、豺狼雨、苛政雨、酷吏雨」，號做「獅豹雨」有啥證據？毋通講是「故老相傳」，這無當(tang3)去窮究；汝有汝的故老，伊有伊的故老，套一句王華南先生講 *兮，這著無咧先講先贏兮講(讀變調)。

3. 個人是安呢想兮(e7，隨前變調)，欲談論台語的本字或語源，毋是未使怙蒦 *兮，mah4 koh8著愛真清楚、明顯的表示這是一種猜測，與聽閱者理解。箸證據無充分的情況之下，哪會使落(loh8)「時間久了，大家忘記獅和豹」這呢確定的結論？

請注意「忘記」的前提是啥？「自本毋知」或者「自本無兮」的物件，著毋是「忘記」。

我換一個講法：這個話詞的本字是「使潑雨」，是因為去與一寡「沒有根據精確的材料、不講求方法、不顧歷史，先有了主觀的見解，隨便找些材料來附會」的人(參閱：「反向思考」)，一人講一款，「時間久了，大家忘記使和潑」。表面上看 *起來有影理直氣壯，因為是「逐個攏去與未記 *兮」，阿證據的要求煞完全「弱化」*去。

講一滴仔個人的經驗，互相參考。普通若看著一個影sing5啥，準若有興趣抑是好奇，我會佫再倚較近 *咧，做較詳細、較全面的(tik8)的觀察、了解事實；當然，十之八九計攏毋是當初期望的結局。毋koh8箸這個過程，定定有意外的「桑榆」。我較care是準若用「影」去證明或者直接講著是事實，安呢敢通(thong1)、敢通(thang1)？

4. 最後拜託諸位網友，摕其他先進的問題欲問我的意見，準若會拄好，請先講恁的看法，感覺我攏咧做歹人，死貧道免死道友啊？呵呵。(2011年12月14日下午7:00)

■ 年倚 *啊，較無閒

dongxie箸2011,12,08,11:55留言：

「不是劉熙的母語青徐話」這句話很重要嗎？
「推」嘛會使讀tshui1，如「推算(tshui1 sng3)、推排(tshui1 pai5)」，這是書面語吧？一般哪有人在用。

dongxie：

我另文回覆，後禮拜，OK？

(2011,12,07,08:00 )

■ 我認為台灣偏漳音失去較濟原味

Haiker箸2011,12,06,18:28留言：

你所謂的保留，其實就是不同意或反對人家的主張嘛，哈哈。
4-2. 日語「銀」講GIN是漢音.....這段寫的真好。從前你就獨樹一幟，不贊成台語優勢音是漳音占優勢這個「台灣共識」，問你原因，你總用沒數據來敷衍。偶也知道確實沒有詳細的數據，不過你一定有甚麼看法，就像台語“具體”可能還有說kī-thé，但“器具”，“區長”好像沒人說khì-kī，khi- tióN，幾乎都泉化為khì-kū，khu-tiúN了。要不要趁這個機會，說些來聽聽，不錯玩的樣子。
又，以前聚餐時你說過日語漢譯，m是用日語mu，n用日語nu，剛剛還打手機跟阿華確認過，偶們都還記得捏。

Haiker兄：

1. 所謂的「保留」是存疑、無法度認同，參「反對」無sang5，欲「反對」必須愛點出對方錯誤的所在。

2. 若這個問題我著有影反對，在我的了解，台語漳泉濫，失去固有特殊音腔兮，是漳州音較嚴重。

3. 這因為日語「ン」是後來才產生兮，五十音無在內。

■ 無踢著鐵枋哪會進步？免驚，無啥通歹勢啦

他K箸2011,12,05,17:07留言：

這麼看來王華南這兩個說法是不被赫先生所認同的，但為何談論題其他的人就不客氣，遇到王先生就顯得和和氣氣的。我沒有不禮貌，只是覺得赫先生可以跟對巫義淵周長楫諸人一樣，認為不對的就直說。其實你們兩位都有實力，該批就批，莫非怕踢到鐵板？別生氣，我們確有這種想法。我們不懂王把蚓讀kin2，你明明寫過這是錯的，但就是不提，這代表你很忠厚嗎？不像你的作風呀。
兩個問題要請教，第一，王說日語金銀khin gin，gin跟我們一樣，他的我們是漳州音，那麼kim為何日語是khin呢。第二，赫先生覺得王氏是「不諳音聲」還是「囿於方音」(http://hik-u-tw.blogspot.com/2011/02/blog-post_14.html)？
「反向思考」拜讀了，有意思，值得鑽研跟熱心台灣語文的朋友思考，謝榭。

他K：

1. 無錯，關於料理人提起王 *先講「漳州音上接近東漢古音」、「『巾、斤』廈門音kun1，泉州音kirn1是腔口，毋是文讀音、白話音的差別」，我計持保留的態度。

2.「批評」無的確著是bai2 *兮、負面兮，但是若欲批評，著愛先知影人咧講啥貨；毋知頭毋知尾，著乾若會當講家己的看法。dongxie講「掃葉人的切音似乎較為獨特」，十月十六問我講敢會使「說出他的缺點，或者說問題出在哪裡」，阿我著有影毋知掃葉人按怎切音兮，欲哪有才調批評好抑bai2。因為我知影too5 un2/in2參too5 kun2/kin2寫法無kang5，隔轉工回覆的時，著講我家己的意見。回料理人的留言嘛共款，知之為知之，不知為不知；毋知兮欲講徦有一枝柄，我自認無這囉道行。

驚踢著鐵枋？唉，較等 *咧講我咧臭誕(tuaN7)，胚胚仔講 *一下著好。有喙唸徦無瀾，我一再表示，我寫的無一定著，歡迎人賜教、補正、辯難、質疑……；阿我這個blog嘛公開寫過參李壬癸、洪惟仁、張光宇等無kang5的意見，汝認為這幾位先生的程度敢較過輸王 *先？

踢著鐵枋，穩當會啦，毋kuh8驚與人落氣，哪會進步？

汝嘛會使講tsuai1大學者未看著我的意見，我才敢PO文，尻穿後kan3死皇帝。咱maiN3講萬不一，抑是有意見咸我無sang5的人；照這個推論，我嘛會使放心「批評」王 *先，伊嘛未看著我的意見。

3. 汝的意思毋著「無忠厚」才是我的作風？

料理人並無提起「蚓」讀kin2這個問題，我著無咧傷閒講(讀變調)；會曉用「螼」的人真濟，這字嘛毋是我發見、考求 *出來兮。

4. 關於日語「金、銀」的音讀：

4-1. 日語的漢語譯音並毋是怙記音兮，有一寡漢語有、日語無的發音，in1用in1當時的語音體系落去代用。但是有固定的規律，所以雖然未當(tang3)原音重現，但是參各種漢語方言，都會使揣著對應。阿日本的語語音體系參漢語並毋完全一致，像送氣抑無，箸漢語有辨義作用，日本著無一定。鼻音尾的-n、-m，箸台語有辨義作用，lim5(林)、lin5(鄰)無kang5，tsin3(進)毋是tsim3(浸)；日語著無這款分別，韻尾n、m計用「ン」表記。in1「ン」，一般是發n，一半擺仔嘛會發m，毋kuh8對in1來講，並無爭差。美空雲雀「愛燦燦」，「恨んだりして」恨ん唱URAM；「人生って」唱JIN SE TE；箸另外一te3，「恨んだりして」恨ん共款唱URAM；「人生って」人生變唱JIM SE TE。當然，連音變嘛會發m，像講「段ボール」嘛會講做DAMBORU。

4-2. 日語「銀」講GIN是漢音，真韻佮這陣的漳州音讀in有法度對應；王 *先講「痕」漳州音hin5，日語漢音是KON，這嘛會使對應，因為同韻組的「恩、恨」等，日語漢音亦讀做ON、KON，計是オ段的元音。「具」漳州音是ki7，虞韻組，日語漢音是GU(グ)，同韻組的「區、愚」漳州音讀khi1、gi5，日語漢音是KU(ク)、GU(グ)，計是ウ段的元音，所以嘛會使對應。這毋是佮啥人共款、佮啥人無共款的問題。

5. 我a11知，汝搦準我是詹惟中？我建議汝會使去看一下仔「蘇東坡規頭殼全屎」，想對好的去著無代誌 *啊嘛。(2011年12月6日上午7:03)

■ 針對個人回覆，無法度鉅細靡遺

阿清箸2011,12,02,10:25留言：

攸關對王氏真軫震韻跟台語伸的讀音，你雖然用古籍、今例，證明王的謬誤，但整篇的說明卻很凌亂，沒底子的很難看懂。我用這篇做實驗，並提出問題，結果學生們絕大多數一知半解，似懂非懂，顯然無法透徹了解。
由於深入而不淺出，讀的人不能完全掌握，這是缺點，很遺憾。建議你重新整理過，這種撥亂反正的論說，引據愈多，寫得越詳細越好，輕輕一題應付了事，太可惜了。
至於說漳州音最接近東漢古音，那是無稽之談，說研究古音要用漳州音做基礎，感覺有如你所說楊鏡汀、羅時豐輩一般，「把自己做大了」，不值一駁。

清華先：

1. 這是與留言者個人的回覆，阿我小可仔了解諸網友個別的程度，一般著是交代問題的重點，留言者看有著好。汝煞摕這來做實驗，這就未免傷為難令高徒嘍。

2. 汝的指謫，我接受。老實講，我的PO文欠點誠濟，我家己嘛知，多謝啦。毋kuh8汝嘛有所誤會，我不過盡地主之誼，有「留言」我「回覆」，無咧「撥亂反正」。不過，我同意佫重整理 *一擺，另外發文；但是著等我回覆料理人箸12月初一的留言，因為欲引用的資料傷雜，會拖 *幾工仔。

3. 是毋是「無稽之談」，我毋知；箸王華南先生未提出伊論述的根據進前，我想汝這句話猶是小保留 *一下較好，無定著人有合理的說法。總是，我會針對料理人的問題，提出我的看法。(2011年12月3日上午9:39)

留言回覆---漳州古音等

2011-12-05T06:56:00.008+08:00

新鮮料理人箸2011,12,01,10:15留言：

一年外前我報王老師的網站予你，無想著對伊的論述，佇你遮有遐呢熱烈的討論，我始料未及。以前王老師講用漳州音讀唐詩較會押韻，這馬閣講漳州音上接近東漢古音，毋知先生的看法如何？
另外，王老師講「巾、斤」廈門音kun1，泉州音kirn1是腔口，毋是文讀音、白話音的差別，請問這敢是正確的講法？

料理人：

是啊，多謝汝拍報這個好所在。實在講兮，有這款程度的網站，台灣誠少；而且用影像來解說台灣語文，講伊第二兮，我想無人敢唱頭名。不而過講我tsia5有熱烈的討論，這著略仔較肨風；汝會使小查 *一下，較有咧提起 *兮，大概著是汝佮mysky，兩個仔噴噴 *啊。所以講，看代誌未使看表象，呵呵。

關於汝的問題，我盡量就我所了解的部分提供與汝參考。但是我先做聲明，我毋是咧批評(雖然我認為所有的論述計會使批評、亦計愛接受批評)，嘛毋是講王華南先生的研究是無意義、無采工、頭殼歹去(王 *先語)；我是盡版主的本分，回覆網友的留言，摕出個人的看法。當然，咸過去kang5款，欲補正、辯難，歡迎；我對家己寫的負責，阿減采嘛寫了有毋著、失覺察、無妥當的所在，冀望賜教。

一種新的理論或者新的發見，欲與人接受、肯定，應該毋乾若是「說理」，「證據」嘛誠要緊。講某種方音較倚某一朝代的古音，亦共款；用「互相尊重」一句話並未解決別人的疑慮。「證據」是必須愛精密考察大量的資料，未使湊拄坎(kham2)看著一兩項仔，著做論斷；嘛愛有歷史、地理觀點的素養，毋通揢漢、晉、六朝、隋唐甚至宋代的語音濫濫做夥，因為現仔時通行的語音，有伊無sang5的層次，阿古早詩文的作者敢計用當時的標準語？哪會使混為一談。

1. 箸頂回汝問「唐詩用漳州音來唸較會押韻」的時，我著講 *過，這無一定啦。

今仔汝問「漳州音上接近東漢古音」，我的回答嘛共款是「無一定啦」，所有的讀書音計是照字書的音切推 *出來兮，都mai3講漳、泉、廈，汝用客話、台灣國語甚至域外漢字譯音(比論日本的漢音)，嘛有可能會押韻。(「非關研究---唐詩韻」)

我不學無術，無啥高深的理論來反駁王 *先的講法，乾若會曉怙抄兮。簡單摕幾個仔例，用各種音腔來讀bai7 *咧，準做心適代，罔度時間：

1-1. 中古漢語「登、蒸」

a. 身衡陷而下沈兮，不可獲而復登(中古漢語登韻，漳ing、泉ing，下同)。不顧身之卑賤兮，惜皇輿之不興(蒸，in、ing)。(西漢‧劉向《楚辭‧九歎‧離世》)

b. 帝勤時登(登，ing、ing)，爰考休徵(蒸，in、ing)。(東漢‧班孟堅《靈台詩》)

c. 厥塗靡從。天瑞之徵(蒸，in，ing)。茲亦於舜，虞氏以興(蒸，in、ing)(西漢‧司馬相如《封禪文》)

減采有人講「興」漳腔嘛讀hin，箸「讀《台語常用詞正音》4 - 徵收」有講 *過嘍，這參古早的韻文未合，我佫抄一段東漢時的作品做補證：

d. 神明崛其特起，井幹疊而百增(登，ing、ing)。跱遊極於浮柱，結重欒以相承(蒸，in、ing)。累層構而遂隮，望北辰而高興(蒸，in、ing)。消雰埃於中宸，集重陽之清澂(蒸，in、ing)。瞰宛虹之長鬐，察雲師之所憑(蒸，in、ing)。上飛闥而仰眺，正睹瑤光與玉繩(蒸，in、ing)。將乍往而未半，怵悼慄而慫兢(蒸，ing、ing)。非都盧之輕趫，孰能超而究升(蒸，ing、ing)。(東漢‧張平子《西京賦》。案，「澂」有的版本做「徵」，這兩字音切的下字攏是「陵」；「憑」有的版本做「馮」，共音。)

按tsia5咱看會 *出來，漳音文讀-in兮大概是蒸韻，比如「興、徵、承、憑、繩」，當然，「蒸」嘛讀tsin1；毋koh8平平是蒸韻的「兢、升、陵」(案，「升」話音tsin1) 等，煞亦讀-ing。無欲講啥地方的音較「正」、較「古」、較「接近東漢古音」，現不打這部分漳音參兩漢音根本著khioh4未倚，彼個時代人自本著「登、蒸」無別嘛。

1-2 中古漢語「陽(養)、唐」

a. 張日月，列星辰，序四時，調陰陽(陽，ang、ong)，布氣治性，次置五行，春生夏長(陽，ang、ong)，秋收冬藏(唐，ong、ong)。陽生雷電，陰生霜雪，養育群生，一茂一亡(陽，ong、ong)，潤之以風雨，曝之以日光(唐，ong、ong)，溫之以節氣，降之以殞霜(陽，ong、ong)，位之以眾星，制之以斗衡，苞之以六合，羅之以紀綱(唐，ong、ong)，改之以災變，告知以禎祥(陽，ang、ong)，動之以生殺，悟之以文章(陽，ang、ong)。(西漢‧陸賈《新語‧道基》。案，內底亦有他韻參「陽、唐」兩韻互叶，不在例證之列，省)

b. 既懲懼於登望(陽，ong、ong，案，實際上這字亦有讀-ang，參頂頭「綱」共款，讀-ang，如，「三綱五常」唸sam33 kang44 ngooN44 siang24)，降周流以徬徨(陽，ong、ong)。步甬道以縈紆，又杳窱而不見陽(陽，ang、ong)。排飛闥而上出，若遊目於天表，似無依而洋洋(陽，ang、ong)。前唐中而後太液，覽滄海之湯湯(唐，ong、ong)。揚波濤於碣石，激神嶽之嶈嶈(陽，ang、ong)。濫瀛洲與方壺，蓬萊起乎中央(陽，ang、ong)。(東漢‧班孟堅《西都賦》)

c. 伊玄蟲之微陋，亦攝生於天壤(養，ang、ong)。當三秋之盛暑，陵高木之流響(養，ang、ong)。融風被而來遊，商焱厲而化往(養，ong、ong)。(東漢‧班昭《蟬賦》)

d. 夫樂而不荒(唐，ong、ong)，憂而不困，先王所以平和府藏(唐，ong、ong)，頤養精神，致之無疆(陽，ang、ong)……曳長庚之飛髯，載日月之太常(陽，ang、ong)，棲招搖與玄弋，注枉矢於天狼(唐，ong、ong)。羽毛紛其髟鼬，揚金㚇而扡玉瓖(陽，ang、ong)。屯田車於平原，播同徒於高岡(唐，ong、ong)，旃旝摻其如林，錯五色以摛光(唐，ong、ong)。清氛埃，埽野場(陽，ang、ong)，誓六師，搜雋良(陽，ang、ong)……改乘回轅，泝恢方(唐，ong、ong)，撫馮夷，策句芒(唐，ong、ong)，超荒忽，出重陽(陽，ang、ong)，厲雲漢，橫天潢(唐，ong、ong)。導鬼區，徑神場(陽，ang、ong)，詔靈保，召方相(陽，ang、ong)，驅厲疫，走蜮祥(陽，ang、ong)。捎罔兩，拂游光(唐，ong、ong)，枷天狗，緤墳羊(陽，ang、ong)。(東漢‧馬融《廣成頌》)

中古漢語「陽、唐」同韻，從(tsing5)秦代進前著有：

維此惠君，民人所瞻。秉心宣猶，考慎其相。維彼不順，自獨俾臧。自有肺腸，俾民卒狂。(《詩經‧大雅》)

若東漢的語料，一部(pho7)《昭明文選》著會使抄咧幾那百個。一直kau3唐朝，都猶保留這款現象(參閱：「非關研究---唐詩韻」)，部分「陽」韻咸「江」合流，在我的了解是宋朝才有兮。「陽、唐」東漢古音是毋是讀-ong，我毋知；但真清楚 *兮，毋是像現仔時的偏漳音有兩款讀法。偏泉腔(古早偏廈腔歸入偏泉腔)拄有符合這個條件，論真欲講嘛不過是古早「陽、唐」同韻的輔證若爾；毋kuh8，隈(ui3)tsia5嘛看會出講(讀變調)漳州音的確著有影是「接近東漢古音」？無啦。因為，言天者必有徵於人，言古者必有驗於今(案，「人、今」互叶，「人」是「真」韻讀-in，「今」是-m尾，有未少類似的古例，絕對毋是王 *先主張兮，講「真、震」韻不同源，震韻才有-m。將來我另文回覆清華先2011年12月2日上午10:25 留言的時，會講與較詳細 *咧)，這個「今」的「驗」未使是片面、局部兮。比如講，「姑、高」不分、「兔、套」無別是老偏泉腔的特色(參閱：「留言回覆 Nov. 2011■老泉音的特色」)，箸張平子的《東京賦》嘛看會著：

其遇民也，若薙氏之芟草，既蘊崇之，又行火焉。

高祖膺籙受圖，順天行誅，杖朱旗而建大號。所推必亡，所存必固。掃項軍於垓下，紲子嬰於軹塗。因秦宮室，據其府庫。

這嘛乾若會使講中古漢語「豪皓號」有參「戈果過」、「模姥暮」箸東漢有互叶的記載、有對應關係，我毋敢確定張衡是讀-oo，因為這毋是全面性的資料，可能是特例。毋koh8汝若用漳音讀或者廈門音讀，著完全無押韻。

就這寡現象來看，嘛未使講漳州音較「接近東漢古音」。

1-3. 中古漢語「真、文」等

「伸」是真韻，「春」是諄韻，箸tsia5無欲講這兩字會使讀kang5音 *未？目的是欲摕兩漢韻文的例，來檢驗「漳州音上接近東漢古音」這句話。

a. 法家嚴而少恩(痕，in、un)；然其正君臣(真，in、in)，上下之分(文，un，un)，不可改矣。(西漢‧司馬談《論六家要旨》)

b. 何窮達之易惑，信美惡之難分(文，un，un)。時悠悠而蕩蕩，將遂屈而不伸(真，in、in)。(西漢‧司馬遷《悲士不遇賦》)

c. 卒不能攄首尾奮翼鱗(真，in、in)，振撥汙作，跨騰風雲(文，in、un)，使見之者影駭，聞之者響震(真，in、in)。徒樂枕經籍書，紆體衡門(魂，un，un)，上無所蒂，下無所根(痕，in、un)……炎之如日，威之如神(真，in、in)，涵之如海，養之如春(諄，un，un)。(東漢‧班孟堅《答賓戲》)

d. 我所思兮在雁門(魂，un，un)，欲往從之雪紛紛(文，un，un)，側身北望涕沾巾(真，in、un)。(東漢‧張平子《四愁詩》)

頂頭的韻字，用現仔時的偏漳、偏泉(廈)腔來讀，哪有法度去分辨啥人較「接近東漢古音」？

2. 王老師講：

「巾、斤」廈門音kun1，泉州音kirn1(案，其實王 *先是標kern1)是腔口，毋是文讀音、白話音的差別。

我的看法，王 *先毋是咧講「文讀音、白話音」定義的問題，因為伊認為漳州音「正港的本調/本韻」才是「文讀音」，其他兮計攏是「地方的這個腔口」。

我簡單摕幾項仔代誌咸汝罔參考：

2-1. 一般講漳州音的《增註彙集雅俗通十五音》頂頭，印紅字兮是代表文音，印烏字的是話音；約萬五字的中間，話音佔20%(許極燉《台語文字化的方向》自立，1994：93)。這比王育德先生敿周長楫教授調查的パーセンテージ計攏下(ke7)誠濟，有一部分的原因是謝秀嵐「文、白」相混。比論，「算」，箸「貫韻時音」讀suan3；箸「卷韻時音」讀suiN3，兩字攏標紅字，事實上後者是話音。佫比論，頂文1-3.c.「振撥汙作，跨騰風雲」的雲 *字，《彙集雅俗通十五音》箸「巾韻英音」讀in5、「群韻喜音」讀hun5，兩音計標紅字；事實上，前者是文音，後者是話音。泉州音文音是un5，話音敿漳州的話音共款，亦是hun5。敢會使講泉州音的hun5是話音，阿un5是地方的腔口？

2-2. 王 *先講真韻是-in，所以「伸」無人讀做「孫」，拍算有影；毋koh8有人讀做「春」，汝(案，指料理人，下放此)會使講這是謝秀嵐、甘為霖、小川尚義、林金鈔、周長楫、林寶卿……是借字，抑是用了［貝廉］*去。

佫看「痕」，王 *先講讀hin5，謝秀嵐讀hun5，佮「魂」共音；hin5伊乾若收一字「眩」，汝嘛會使講《彙集雅俗通十五音》毋著。「手痕、傷痕、畫痕」敢pat4聽過人講「手hin5、傷hin5、畫hin5」？汝嘛會使講he1是逐個讀毋著。

「痕很恨」韻開一字「痕、根、恩、懇、墾、很、狠、恨」老泉音是-ɯn(-irn)，新泉音是-un。我知影王 *先「痕、根、恩、恨」讀-in，照講「懇、墾、很、狠」漳州音「正港的本調/本韻」應該亦愛共款呼做-in；但是我聽 *過兮、看會著有漳音的資料，比論《彙集雅俗通十五音》、《閩南方言大詞典》都無這種讀法。汝嘛會使講：(1)鄙人在下我孤陋寡聞，冊讀傷少；(2)謝秀嵐、周長楫先生in1的書，編寫了有問題；(3)今仔的音計攏毋著，抑抑是(iah44 a11 si11)-in是漳州音「正港的本調/本韻」，-un是漳州的「地方腔口」。

2-3. 拄掀許極燉先生的冊(許，1994：86)，內面有「人有二手，一手五指，兩手十指，指有節，能屈能伸」這段，sin7 sua3捎兩字仔來做話。

「兩」文音偏泉讀liong2(誓不兩立)，話音是lng7、liuN2(兩斤卅二兩)；偏漳文音讀liang2，話音本來是nooN7(案，目前受偏泉音的影響亦講lng7)、niooN2。

「十」偏泉、漳計共款，文音讀sip8，話音講tsap8。

「節」偏泉文音是tsiet4(節目)，話音是tsueh4(五月節)、tsat4(骨節)；偏漳文音是tsiet4，話音是tseh4(五日節)、tsat4。

咱敢會使講liang2是「正港的本調/本韻」，liong2是地方腔口，阿lng7、nooN7佮liuN2、niooN2 *咧？sip4是「正港的本調/本韻」，因為偏漳兮話音是tsap8，所以偏泉的tsap8才算話音，毋是地方腔口？共款的ロジカル，「節」偏泉文讀咸偏漳相sang5讀tsiet4，所以是「正港的本調/本韻」，因為偏漳兮話音嘛有講tsat4，所以著是話音，阿tsueh4佮tseh4著變地方腔口？

3. 王 *先這寡講法我保留，但亦無才調下結論，因為王 *先應該有伊合理的立論基礎參證據，期待看bai7 *咧，免急。

另外，關於頭一點「漳州音上接近東漢古音」，除了王 *先以外，可能猶有其他的先進做共款的主張(案，王 *先規句完整的講法是「所以是按怎有人講漳州音上接近東漢古音」)，這我嘛毋知，有影未輸古井水蛙。諸位網友準若有這方面的資料，拜託毋通藏私，小報我開一下仔眼界 *咧，感恩。